လူၤကၣ် 4
4
အဆၢဒွိၣ် (၄)
ယ့ၣ်ရှူးဒွိးတၢ်လ့ပစီ
(မး ၄:၁-၁၁; မၢ် ၁:၁၂-၁၃)
1တဘျီဃီယ့ၣ်ရှူးလၢပှဲၤဝဲဘျီး သၣ်စီဆှံဖဲအဝဲဒၣ်ဟဲက့ၤလိထံလွိၤယၢ်ဒ့ၣ်, ဘျီးဘၣ်တၢ်ဆှၢအီၤလိ ယွၤအသးနဲၢ်လိ ပှၢ်လၤကျၣ် 2ဖဲကစၢ်ယ့ၣ်ရှူးဘၣ်တၢ်လ့ပစီအီၤလိ မုၢ်ကီၤလံၢ်လိ အသီလွံၢ်ဆ့ အတီၢ်ပူၤနဲၢ်လိ. ဖဲအဆၢကတီၢ်ဝဲနံၤ ထီကတီၢ်ညါနဲၢ်, အဝဲတအီၣ်တၢ်နီတမံၤဘၣ်,အဃိဘျီး လိခံကတၢၢ်နဲၢ်တၢ်သၣ်ဝံၤအသးလိ.
3မုၢ်ကီၤလံၢ်စံးဘၣ်ဝဲ, “နမဲၢ်မဲၢ် ကစၢ်ယွၤအဖွိခွါနဲၢ်, ဟ့လီၤနကလုၢ်ဒ်သိး လၢၢ်တဖျၢၣ်အံၤ ကကဲၣ်ထီၣ် ကွိၣ်တကဲၣ်.”
4မီၢ်လၢၤဘျီး ယ့ၣ်ရှူးစံးဆၢတၢ်ဘျီးစံးဝဲ, “တၢ်ကွ့းအသးစံးဝဲ, ပှၤကညီမူဝဲထဲလိ ကွိၣ်တမံၤဧိၤတသ့းဘၣ်.”
5တဘျီဃီ မုၢ်ကီၤလံၢ်ဆှၢထီၣ်အီၤလိ တၢ်လီၢ်ဖးထိ တတီၤဘျီးလိ တဖျးမံၤအတီၢ်ပူၤဒွိးနဲၣ်အီၤဟီၣ်ခွိၣ်အဘီအမုၢ် ခဲလုၤခဲဆ့လိ. 6မုၢ်ကီၤလံၢ်စံးဆၢဝဲ, “ယကဟ့နၤတၢ်စိတၢ်ကမီၤ အလၤကပီၤ အဝဲအံၤခဲလုၤ, ဘျီး တၢ်ထူတၢ်တီၤအဝဲအံၤခဲလုၤလိ. အဝဲအံၤ ဘၣ်တၢ်ဟ့လီၤပၤစၢၤအီၤလိ ယစုၣ်ပူၤခဲလုၤ, ဘျီးယဟ့လီၤအီၤလိ ဘၠီၣ်တဂၤဂ့ၤတဂၤဂ့ၤလိ ယဃုထၢဝဲနဲၢ်သ့းဝဲလိ. 7အဃိဘျီး နမဲၢ်ဘူၣ်ထီၣ်ဘါထီၣ်ယၤဘျီး, တၢ်အံၤခဲလုၤကမဲၢ်နတၢ်လိ.”
8မီၢ်လၢၤဘျီး ယ့ၣ်ရှူးစံးဆၢဝဲ, “တၢ်ကွ့းအသးစံးဒ့းအ့ၤ, ဘူၣ်ထီၣ်ဘါထီၣ်ထဲယွၤနကစၢ်ယွၤဘျီး မၤထဲအဝဲဒၣ်တဂၤဧိၤအတၢ်မၤတကဲၢ်.”
9တဘျီဃီအနံၤဝံၤ အလီၢ်ခံ, မုၣ်ကီၢ်လံၢ်ဆှၢအီၤလိ ယရူရှလ့ၣ်, ဘျီးပၤထီၣ်အီၤလိ တၢ်လုၢ်ဟံၣ်လီၢ်လိအတၢ်လီၢ်အထိကတၢၢ်တတီၤဘျီး စံးဘၣ်ဝဲ, “နမဲၢ်မဲၢ် ကစၢ်ယွၤအဖွိခွါနဲၢ်, တ့ၢ်လီၢ်နသးလိ တၢ်လီၢ်တတီၤအံၤတကဲၢ်.” 10တၢ်ဂ့ၢ်ဒ့းအ့ၤ, အတၢ်ကွ့းအသးစံးဝဲ, “ကစၢ်ယွၤကမၢလီၤ အကလုၢ်လိ အကလူးတလိၣ်အအိၣ် ဒ်သိး အကအံးထွဲကွၢ်ထွဲနၤ ဂ့ၤဂ့ၤလိ.” 11စံးနဲၢ်နဲၢ်ဝဲဒ့းအ့ၤ, “အဝဲဝီၤ ကစိၤထီၣ်နၤလိ အစဒ့ဒ်သိး နခီၣ်ဒ့တလိၣ်နီၣ်ခၠါ အသုတဘၣ်ဒိလိလၢၢ်တဂ့ၤအဂီၢ်လိ.”
12ဖဲနံၤအခါယ့ၣ်ရှူးစံးဆၢဝဲ, “တၢ်ကွ့းအသးစံးဝဲ, တဘၣ်လ့ပစီယွၤနကစၢ်ယွၤနဲၢ်တဂ့ၤ.”
13တဘျီဃီ ဖဲမုၢ်ကီၤလံၢ်လ့ပစီယ့ၣ်ရှူးလိ ကမၤတၢ်ဒဲးဘးကျဲၣ်ကိးဘိၣ်ဒ့းဝံၤဝဲနဲၢ်, အဝဲဒၣ်ဟးလီၤဖးကွံၤအီၤတစိၢ်တလီၢ်လိ.
ယ့ၣ်ရှူးစးထီၣ်အတၢ်မၤဖဲကီၢ်ကၤလံၤလါ
(မး ၄:၁၂-၁၇; မၢ် ၁:၁၄-၁၅)
14တၢ်နံၤဝံၤအလီၢ်ခံ, ယ့ၣ်ရှူးဟဲက့ၤခွိၣ်ခံဂ့ၤလိ ကီၢ်ကၤလံၤလါ, ဘျီး သၣ်စီဆှံအစိကမီၤအိၣ်ပကိးအီၤလိ. တုၤတၢ်ကစီၣ်ဘၣ်ဃးအဝဲဒၣ်အဂ့ၢ်အကျိၤ ဟူထီၣ်သါလီၤဝဲလိတၢ်လီၢ်အကဝီၤဖဲနံၤကိးတီၤဒ့းလိ. 15ကစၢ်ယ့ၣ်ရှူးသိၣ်လိၤသီလီၤတၢ်လိ အဝဲဝီၤအဘူၣ်ဘျီၣ်#4:15 သိၣ်လိၤသီလီၤတၢ်လိ အဝဲဝီၤအဘူၣ်ဘျီၣ် ဘၠီၣ်ယူဒၤဖွိကိးဂၤဒ့းလဲၤလိ ဘူၣ်ဘျီၣ်လါ ဖးလ့ၤစီဆှံ, ထုကဖၣ်လါ ဟီတရါလိ. ဘၠီၣ်လိ ကဟီတရါအံၤ မဲၢ်ဖးလံာ်စီဆှံနဲၢ် ဆ့ထၢၢ်ဝဲဘျီး မဲၢ်ဟီတရါနဲၢ် ဆ့နီၤဟီတရါလိ.လိ အမဲၢ်တၢ်ဘါယွၤလီၢ်အပူၤ, ဘျီး ဘၣ်တၢ်စံးထီၣ်ပတြၢၤအီၤလိ ဘၠီၣ်ကိးဒံးကိးဂၤဒ့းလိ.
ဘၠီၣ်ဝ့ၢ်နစၤရ့ဖိ တနၤယ့ၣ်ရှူးဘၣ်
(မး ၁၃:၅၃-၅၈; မၢ် ၆:၁-၆)
16တဘျီဃီအနံၤဝံၤ အလီၢ်ခံ. ယ့ၣ်ရှူးလဲၤလိ နစၤရံး, တၢ်လီၢ်ဖဲ အဝဲဒၣ်ဘၣ်တၢ်ကွၢ်ဒွိးဒိၣ်ထီၣ်အီၤ, ဘျီးဖဲမုၢ်အိၣ်ဘှံးနံၤနဲၢ် အဝဲဒၣ်လဲၤဝဲဒ်အညီနုၢ်အသိးလိ ဘူၣ်ဘျီၣ်လိ အမဲၢ်တၢ်ဘါလီၢ်နဲၢ်လိ. 17တဘျီဃီ အဝဲဒၣ်ဂ့ၤထ့ဒ်သိး အကဖးတၢ်ကွ့းအသးစီဆှံတလိၣ်, ဘျီးတၢ်ဟ့လီၤအီၤလိ လ့ၤဝံယရှါယၤနဲၢ်လိ. အဝဲဒၣ်သလၣ်ထီၣ်လ့ၤထူၣ်တထူၣ်နဲၢ်, ဘျီးထ့ၣ်န့ၢ်တၢ်ကွ့းအသးတတီၤလိ အစံးဝဲဒၣ်, 18“ကစၢ်အသးအိၣ်ဝဲလိ ယလိၤလိ. တၢ်ဂ့ၢ်ဒ့းအ့ၤ, အဝဲဒၣ်ဃုထၢလ့ယၤဒ်သိး ယကဟီသရါလီၤတၢ်သးခုကစီၣ်လိ ဘၠီၣ်ဖှီၣ်ဖွိယၣ်ဖွိနဲၢ်လိ. အဝဲဒၣ်ဆှၢလီၤယၤဒ်သိး ယကဒုးဟူထီၣ်သးလီၤ တၢ်ထူၣ်ဖျ့းလိ ဘၠီၣ်ဘၣ်တၢ်ဖီၣ်န့ၢ်အီၤတလိၣ်အဂီၢ် ဘျီးတၢ်ဒွိးထ့ၣ်ထီၣ်က့ၤတၢ်လိ ဘၠီၣ်မံၤတထ့ၣ်တၢ်တလိၣ်အဂီၢ် ဒ်သိးယကဒွိးပူၤဖျဲးထီၣ်ကွံၤဘၠီၣ်လိ အဘၣ်တၢ်မၤနၢၤမၤဃၤအီၤတလိၣ်. 19လိတၢ်ဆၢကတီၢ်အခါနဲၢ်ယက ဘိးဘၣ်သံညါ ဘၣ်ဃးနံၣ်တနံၣ် ဖဲကစၢ်ကအုၣ်က့ၤခီၣ်က့ၤအပှၤဂီၢ်မုၢ်နဲၢ်လိ.”
20ယ့ၣ်ရှူးထူထီၣ်ဂ့ၤလ့ၤထူၣ်တထူၣ်နဲၢ်, ဟ့ဂ့ၤဝဲလိ ဘၠီၣ်တဂၤလိအကွၢ်ထွဲဘူၣ်ဘျီၣ်လိ အမဲၢ်တၢ်ဘါလီၢ်အစုၣ်ပူၤဘျီး ဆ့နီၤဝဲလိ. ဘၠီၣ်အိၣ်လိ ဘူၣ်ဘျီၣ်လိ အမဲၢ်တၢ်ဘါယွၤလီၢ်ပူၤတလိၣ်ကွၢ်တံၢ်အီၤကိးဂၤဒ့းလိ. 21တဘျီဃီအဝဲဒၣ်စးထီၣ်ကတိၤတၢ်လါ အဝဲဝီၤဘျီးစံးဝဲ, “တၢ်ကွ့းအသးစီဆှံတတီၤအံၤလၢထီၣ်ပှဲၤထီၣ်လ့ဝဲတနံၤအံၤ, ဖဲသုနၢ်ဟူတၢ်ဖးဖျါထီၣ်အီၤအဆၢကတီၢ်နဲၢ်လိ.”
22အဝဲဝီၤကိးဒံကိးဂၤဒ့းဘၣ်သူၣ်ဘၣ်သးလိ ယ့ၣ်ရှူး, ဘျီးကမၢကမၣ်ဝဲလိတၢ်ကတိၤအသ့းအဘၣ်လိ ကစၢ်ယ့ၣ်ရှူးစံးကတိၤပၤစၢၤဝဲလိ အထးခွိၣ်တလိၣ်အဃိနဲၢ်လိ. အဝဲဝီၤစံးဝဲ, “အဝဲဒၣ်တမဲၢ်စီၤယိၤသးအဖွိခွါဘၣ်ဧါ.”
23ကစၢ်ယ့ၣ်ရှူးစံးဘၣ်အဝဲဝီၤ, “ယနၤသပှၢ်ကတၢၢ်လိ သုကစံးယၤလိ တၢ်ကတိၤဒိတထ့ၣ်အံၤလိ.” ကသံၣ်သရၣ်ဧၢ, မၤဟါမၣ်လီၤဂ့ၤနသးဒၣ်နဲတကဲၢ်. သုကစံးဘၣ်နဲၢ်နဲၢ်ယၤ, တၢ်တမံၤဃီလိ ပဘၣ်တၢ်စံးဘၣ်ဘၠီၣ်လိ အမၤအသးဖဲ ကပ့းရနီၣ်တလိၣ်နဲၢ်, မၤအီၤဖဲအံၤလိ နလီၢ်အိၣ်လီၢ်ဆိးနဝ့ၢ်ဒၣ်နဲအပူၤတကဲၢ်နဲၢ်လိ. 24မီၢ်လၢၤဘျီး ယ့ၣ်ရှူးစံးဝဲသီတဘျီ, “ယစံးဘၣ်သုဒ့းအ့ၤလိ. ဝံတဂၤနဲၢ် တဘၣ်တၢ်တူၤလိၤအီၤဖဲ အလီၢ်အိၣ်လီၢ်ဆိး အဝ့ၢ်ဒၣ်ဝဲအပူၤ နီတဘျီဘၣ်. 25ဒိကနၣ်ယတၢ်ကတိၤတကဲၢ်. လိဝံအ့ၤလံယၤအစိၤအဆၢကတီၢ်ဖဲမွိခွိၣ်ကးဃၣ်အသး လါ တၢ်တစူၤလိသၢနံၣ်ဃုလါ အတီၢ်ပူၤ, ဘျီးတၢ်သၣ်ဝံၤလီၤဒွိၣ်အိၣ်ထီၣ်နီဝဲဒၣ်သကုၤကီၢ်အံၣ်စရ့လးအပူၤနဲၢ်, မုၣ်ကမဲအိၣ်ဘျၢအသးလိ ထံကီၢ်ပူၤလိ. 26မီၢ်လၢၤဘျီးကစၢ်ယွၤအဝံအ့ၤလံယၤတဘၣ်တၢ်ဆှၢအီၤလိဘၠီၣ်လိ အံၣ်စရ့လးအပူၤနီတဂၤအအိၣ်ဘၣ်. မဲၢ်မဲၢ် အဝဲဘၣ်တၢ်ဆှၢလီၤဒၣ်အီၤလိ မုၣ်ကမဲအိၣ်ဖဲဝ့ၢ်စၤရဖၤသးဘၣ်ဃးလါ ကီၢ်စံဒိၣ်တဂၤအအိၣ်လိ. 27ဘျီးဖဲဝံအလံၤရှါ အဆၢကတီၢ်နဲၢ်ဘၠီၣ်လိ အခီၣ်ဘၣ်တၢ်ဆါလိၤတဂ့ၤအိၣ်ဘျၢအသးလိ ကီၢ်အံၣ်စရ့လးအပူၤ, မီၢ်လၢၤဘျီးအဝဲဝီၤတဘၣ်တၢ်မၤဟါမၣ်ဂ့ၤအီၤနီတဂၤဘၣ်. တၢ်မၤဟါမၣ်ဂ့ၤဒၣ်ထဲဘၠီၣ်စူၤရံဖွိ စီၤနဧၤမၣ်တဂၤဧိၤလိ.”
28ဖဲဘၠီၣ်အိၣ်လိ ဘူၣ်ဘျီၣ်လိ အမဲၢ်တၢ်ဘါလီၢ်အပူၤတလိၣ် နၢ်ဟူဘၣ်ကစၢ်ယ့ၣ်ရှူးအတၢ်ကတိၤအဝဲအံၤနဲၢ်, အဝဲဝီၤလၢပှဲၤဘျီး တၢ်သူၣ်ဒွိၣ်သးဖျိးလိ. 29အဝဲဝီၤဂ့ၤထ့, တွံၢ်ထီၣ်ကွံၤယ့ၣ်ရှူး လိ ဝ့ၢ်အချၢဘျီး ဆှၢအီၤလိ တၢ်လုၢ်ဖဲအဝဲဝီၤအဝ့ၢ်အိၣ်သူၣ်ထီၣ်အသးလိ အလိၤနဲၢ်အဒီၣ်ခွိၣ်လိ. အဝဲဝီၤပၤလီၤအသးလိ အကတ့ၢ်လီၤဆှိခွိၣ်အီၤလိလ့အလိၤ. 30မီၢ်လၢၤဘျီး အဝဲဒၣ် ဟးထီၣ်ကွံးလိ ဘၠီၣ်ထီဖူၣ်ထီခၠၢအကဆူးဘျီးလဲၤလိ အကျဲၣ်ဒၣ်ဝဲလိ.
ယ့ၣ်ရှူးနီဟးထီၣ်ကွံၤဘၠီၣ်လိ တၢ်နါဒိးအီၤတဂၤ
(မၢ် ၁:၂၁-၂၈)
31တၢ်နံၤဝံၤအလီၢ်ခံ, ယ့ၣ်ရှူးလဲၤဝဲလိ ကပ့းရနီၣ်, ဝ့ၢ်တဖျၢၣ်လိ အအိၣ်ဝဲဖဲကီၢ်ကၤလံၤလါ, ဘျီးဖဲနံၤအဝဲဒၣ်သိၣ်လီၤသီလီၤ ဘၠီၣ်ထီဖူၣ်ထီခၠၢ တလိၣ်ဖဲ မုၢ်အိၣ်ဘှံးနံၤလိ. 32အဝဲဝီၤ ကမၢကမၣ်ဝဲကိးဂၤဒ့းလိ အတၢ်သိၣ်လီၤသီလီၤအဃိ, တၢ်ဂ့ၢ်ဒ့းအ့ၤ ကစၢ်ယ့ၣ်ရှူးစံးကတိၤတၢ်အိၣ်လါ တၢ်စိတၢ်ကမီၤလိ.
33လိဘူၣ်ဘျီၣ်လိ အမဲၢ်တၢ်ဘါလီၢ်အပူၤနဲၢ်, တၢ်နါအအၢၣ်အသီတဒုၣ်လိ အတကဆှီဘၣ် အိၣ်ဝဲဒၣ်လါ ဘၠီၣ်တဂၤအပူၤနဲၢ် အိၣ်တဂၤလိ. အဝဲဒၣ်ကိးပသူထီၣ်လိ အကလုၣ်ဖးဒွိၣ်ဘျီးစံး, 34“အၣ်လါ, နအဲၣ်ဒိးမၤဘၠီၣ်ဒ်လဲၣ် ဘၠီၣ်နစၤရ့းဖိ ယ့ၣ်ရှူးဧၢ. နဟဲဖဲအံၤဒ်သိး နကမၤဟးဂီၤကွံၤဘၠီၣ်ဧါ. နမဲၢ်မတဂၤလဲၣ်နဲၢ်ယသံညါဝဲလိ. နမဲၢ်ယွၤအဘၠီၣ်စိၤ စီဆှံ အကစီၣ်တဂၤလိ.”
35ဖဲနံၤအခါ ယ့ၣ်ရှူးမၢလီၤအကလုၢ်လိတၢ်နါအအၢၣ်အသီဘျီးစံး “အိၣ်ကစုၣ်ဒၣ်ဘျီးဟးထီၣ်ကွံၤလိ ဘၠီၣ်တဂၤနဲၢ်အပူၤတကဲၢ်.” တၢ်နါကွံၤလီၤဘၠီၣ်တဂၤနဲၢ်လိ အဝဲဝီၤတလိၣ် အမံၤညါဘျီးဟးထီၣ်ကွံၤလိ အဝဲဒၣ်အပူၤ, တအိၣ်လါ တၢ်မၤဘၣ်ဒွိဘၣ်ထံးအီၤနီတမံၤဘၣ်.
36ဘူၣ်ဘျီၣ်လိ အမဲၢ်တၢ်ဘါယွၤလီၢ်ပူၤနဲၢ်ဘၠီၣ်ထီဖူၣ်ထီခၠၢတလိၣ်ကမၢကမၣ်ဝဲကိးဒံးကိးဂၤဒ့းဘျီးစံးလွိၤအသးတဂၤလါတဂၤ, “တၢ်စံးတၢ်ကတိၤတလိၣ်အံၤ မဲၢ်တၢ်ကတိၤဒ်လဲၣ်တကလုၢ်လဲၣ်. ဘၠီၣ်တဂၤအံၤ မၢလီၤအကလုၢ်အိၣ်လါအသူးအသ့ၣ်ဘျီး အစိကမီၤလိ တၢ်နါအအၢၣ်အသီတလိၣ်အဖီခွိၣ်, ဘျီးအဝဲဝီၤ ဟးထီၣ်ကွံၤဝဲနဲၢ်လဲၣ်.” 37ဘျီးယ့ၣ်ရှူးအဂ့ၢ်အကျိၤတမံၤအံၤဟူထီၣ်သးလီၤနိၤဝဲ သကုၤကီၢ်အတၢ်ပၢတၢ်ပြၣ်တတီၤနဲၢ်အပူၤလိ.
ယ့ၣ်ရှူးမၤဟါမၢ်ဘၠီၣ်အိၣ်ဘျၢသးလိကပ့ၤရနီၣ်
(မး ၈:၁၄-၁၇; မၢ် ၁:၂၉-၃၉)
38ယ့ၣ်ရှူးဟးထီၣ်ကွံၤဖဲ ဘူၣ်ဘျီၣ်လိ အမဲၢ်တၢ်ဘါယွၤလီၢ် ဘျီးလဲၤဝဲဒၣ်လိ စီၤရှံမိၣ်အဟံၣ်လိ. စီၤရှံမိၣ် အမံၤပှၢ်မ့ၣ်ပှၢ်သးတမးဝဲဘျီး အလိၤကွိၢ်နီ, ဘျီးအဝဲဝီၤ ကတိၤတၢ်ဘျီးယ့ၣ်ရှူးလိအဝဲဒၣ်အဂ့ၢ်လိ. 39အဃိဘျီးအဝဲဒၣ်လဲၤဝဲဘျီး ဆ့ထၢၣ်ဝဲဖဲဘၠီၣ်မ့ၣ်ပှၢ်နဲၢ်အလီၢ်မံကပၤဘျီး မၢလီၤ အကလုၢ်ဒ်သိး တၢ်ကွိၢ်နဲၢ်လီၤဝဲ တဘျီဃီလိ. ဘျီးအဝဲဒၣ်ဂ့ၤထ့တဘျီဃီဘျီး ဒုးအီၣ်ဒုးအိအဝဲဝီၤလိ.
40ဖဲမုၢ်လီၤနုဝံၤအလီၢ်ခံနဲၢ်, ကယဲၢ်ဘၠီၣ်အိၣ်လါအမံဖီၣ်လိ အအိၣ်လါတၢ်ဆူးတၢ်ဆါ အကလုာ်တလိၣ်ဟဲဆှၢဘၠီၣ်ဆါတလိၣ်နဲၢ်လိ ယ့ၣ်ရှူးအအိၣ်, ဘျီးအဝဲဒၣ်ပၤထီၣ်အစဒ့ခံခိလိ အဝဲဝီၤ တဂၤဘၣ်တဂၤအလိၤ, ဘျီးမၤဟါမၣ်အဝဲဝီၤကိးဂၤဒ့းလိ. 41တၢ်နါအအၢၣ်အသီဟးထီၣ်ကွံၤနဲၢ်နဲၢ်လိဘၠီၣ်အိၣ်ဘျၢအသးအလိၤ, အိၣ်လါတၢ်ကိးကလူထီၣ်, “နမဲၢ်ကစၢ်ယွၤအဖွိခွါလိ.” အသံညါဝဲလိ အဝဲမဲၢ် ခရံာ်လိ. ဘျီးအဝဲ တဟ့ၣ် တၢ်ပျဲလိ အကကတိၤတၢ်ဘၣ်လိ.
42ဖဲမုၢ်ဆ့ၣ်ဝၣ်နဲၢ်, ယ့ၣ်ရှူးဟးထီၣ်လိ ဝ့ၢ်ပူၤဘျီး လဲၤဝဲလိ တၢ်လီၢ်လိ ဘၠီၣ်တအိၣ်ဝဲနီတဂၤဘၣ်လိ. ဘၠီၣ်ထီဖူၣ်ထီခၠၢတလိၣ်လူၤချုးအီၤ, ဘျီးဖဲအဝဲဝီၤထ့ၣ်အီၤနဲၢ်ဂုာ်ကျဲးစၢၤတြီအီၤဒ်သိး အသုတဟးသဒၣ်အဝဲဝီၤတဂ့ၤအဂီၢ်လိ. 43မီၢ်လၢၤဘျီး အဝဲဒၣ်စံးဘၣ်အဝဲဝီၤ, “ယကဘၣ်ဟီတရါတၢ်သးခုကစီၣ်ဘၣ်ဃးကစၢ်ယွၤအဘီအမုၢ်လိ ဝ့ၢ်အဂၤတလိၣ်အပူၤနဲၢ်နဲၢ်လိ. တၢ်ဂ့ၢ်ဒ့းအ့ၤ, ကစၢ်ယွၤဆှၢလီၤယၤလိ တၢ်တမံၤနဲၢ်အဂီၢ်လိ.” 44လိတၢ်နံၤအဃိ, အဝဲဒၣ်ဟီတရါတၢ်လိ ဘူၣ်ဘျီၣ်လိ အမဲၢ်တၢ်ဘါယွၤလီၢ်တလိၣ်အပူၤတုၤထီပၤညိ ကီၢ်ယူဒၤထီကီၢ်နဲၢ်လိ.
Currently Selected:
လူၤကၣ် 4: JKP
Highlight
Share
Copy
Want to have your highlights saved across all your devices? Sign up or sign in
Karen - Paku Bible by Beyond Translation is licensed under Creative Commons Attribution-ShareAlike 4.0 License.
