လူၤကၣ် 6
6
အဆၢဒွိၣ် (၆)
တၢ်သ့းကွၢ်ဘၣ်ဃး ဘၠီၣ်ယူဒၤဖွိ အမုၢ်အိၣ်ဘှံးနံၤ
(မး ၁၂:၁-၈; မၢ် ၂:၂၃-၂၈)
1ဘၣ်ဝဲလိ ဘၠီၣ်ယူဒၤဖွိအမုၢ်အိၣ်ဘှံးနံၤတနံၤနဲၢ်, ယ့ၣ်ရှူးလဲၤတၢ်ဘျီးခီဝီၤဝဲ စံၤပူၤတလိၣ်လိ. အဝဲအခ့အပှၤတလိၣ်ဒ့းဘုၣ်အလီၤစဲၤတလိၣ်, လံၤလူၤဝဲလိ အစဒ့ဘျီး အီၣ်ဝဲလိ. 2ဖဲနံၤအခါ ဘၠီၣ်ဖၤရံၤရှဲ#6:2 ဖၤရံၤရှဲ ဖၤရံၤရှဲ မဲၢ် ဂရံး အတၢ်ကတိၤလိ. အခီပညီမဲၢ် ဘၠီၣ်တဖူၣ်လိအအိၣ် လီၤဖးလါဘၠီၣ်ဂၤလိ. ဘၠီၣ်ဖၤရံၤရှဲ တလိၣ်အံၤ အိၣ်ထီၣ်လိ လံာ်စီဆှံအလီၢ်လံၤ ဧ့စရၤ အစိၤလိ. တုၤယ့ၣ်ရှူးအစိၤဘျီး အဝဲဖူၣ်အစိကမီၤ ဒိၣ်ထီၣ်ဘျီး ဟံစိဟံကမီၤအၤထီၣ်ဖးဒိၣ်လိ. အခီၣ်ထ့း အတၢ်ဟူးတၢ်ဂဲၤ မဲၢ်ဖျါမူၤနီၤလၢၤ လီၢ်ခံ ဖျါဒ်ဘၠီၣ်ပၤမၤအသးလိ အဲၣ်ယွၤလၢၤ မဲၢ်ပၤမၤအသးနဲၢ်လိ.တနီၤစံးဝဲ, “တၢ်တမံၤလိ ပတၢ်သိၣ်တၢ်သီစံးသုတဘၣ်မၤသုဝဲဖဲပှၤယူဒၤဖွိ အမုၢ်အိၣ်ဘှံးနံၤနဲၢ်, ဘၣ်မနီၢ်အဃိသုမၤဝဲလဲၣ်.”
3ယ့ၣ်ရှူးစံးဆၢအဝဲဝီၤ, “တၢ်လိစီၤဒၤဝံးလါ အခ့အပှၤတလိၣ်မၤဝဲဖဲတၢ်သၣ်ဝံၤအဝဲဝီၤအသးအခါနဲၢ်မဲၢ်သုတဖးဘၣ်ဧါ. 4အဝဲဒၣ်လဲၤနုလိ ကစၢ်ယွၤအဟံၣ်ပူၤ ဟံးနဲၢ်ကွိၣ်လိ အဘၣ်တၢ်လုၢ်ထီၣ်ပၤထီၣ်အီၤလိ ကစၢ်ယွၤ, အီၣ်ဝဲဘျီး ဟံနဲၢ်နဲၢ်ဝဲ အခ့အပှၤတလိၣ်လိ. နီၢ်နီၢ်တခိ နဲၢ်, မဲၢ်တမဲၢ်လိ ဘၠီၣ်လုၢ်တၢ်အခွိၣ်တလိၣ်ဘၣ်ဘျီး, ဘၠီၣ်တဂၤဂ့ၤတဂၤဂ့ၤ မဲၢ်အီၣ်ကွိၣ်အဝဲနံၤနဲၢ်, မဲၢ်တၢ်လိ အထီဒါပတၢ်သိၣ်တၢ်သီလိ.” 5ဘျီး ယ့ၣ်ရှူးမၤကတၢၢ်အတၢ်ကတိၤဘျီးစံးဝဲ, “ပှၤကညီဖွိခွါ#6:5 ပှၤကညီဖွိခွါ မဲၢ်ကစၢ်ခရံာ်စံးလီၤအသးလိ. ဖျါစ့ၢ်ဖဲ ဒၤ ၇.၁၃, စံး ၈း၄.အံၤ မဲၢ်ဝဲဘၠီၣ်ယူဒၤဖွိအမုၢ်အိၣ်ဘှံးနံၤအကစၢ်လိ.”
ယ့ၣ်ရှူးမၤဟါမၢ်ဘၠီၣ်စဒ့သ့းတခိပၤတဂၤ
6ဖဲဘၠီၣ်ယူဒၤဖွိအမုၢ်အိၣ်ဘှံးနံၤအဂၤတနံၤနဲၢ်, ယ့ၣ်ရှူးလဲၤနုလိ ဘူၣ်ဘျီၣ်လိ အမဲၢ်တၢ်ဘါအလီၢ်ဘျီး သိၣ်လီၤသီလီၤတၢ်လိ. ဘၠီၣ်အိၣ်ဝဲဒၣ်ဖဲနံၤတဂၤလိ အစဒ့အထွဲတခိ သ့းဝဲလိ. 7ဘၠီၣ်သ့တၢ်ဘူၣ်တၢ်ဘါအတၢ်သိၣ်တၢ်သီတနီၤလါ ဘၠီၣ်ဖၤရံၤရှဲတနီၤ ချုးထ့ၣ်န့ၢ်တၢ်ဂ့ၢ်တမံၤမံၤလိ အကပၤတၢ်ကမၣ်လိ ယ့ၣ်ရှူးအလိၤအဂီၢ်လိ. လိတၢ်နံၤအဃိ, အဝဲဝီၤ ကွၢ်ဟုၣ်အီၤလိ မဲၢ်အကမၤဟါမၤတၢ်လိ ဘၠီၣ်ယူဒၤဖွိ အမုၢ်အိၣ်ဘှံးနံၤ, မဲၢ်တမၤဟါမၢ်ဝဲလဲၣ်နဲၢ်လိ. 8မီၢ်လၢၤဘျီး ယ့ၣ်ရှူးသံညါအဝဲဝီၤအတၢ်ဆိကမိၣ်, ဘျီး စံးဘၣ်ဘၠီၣ်လိ အစဒ့သ့းတခိပၤတဂၤနဲၢ်, “ဆ့ထၢၣ်ဘျီး ဟဲဖဲအံၤလိ တၢ်မံၤညါတကဲၢ်.” ဘၠီၣ်တဂၤနဲၢ် ဂ့ၤထ့ဘျီးဆ့ထၢၣ်ဝဲဖဲနံၤလိ.
9တဘျီးဃီ ယ့ၣ်ရှူးစံးဘၣ်အဝဲဝီၤ, “ယကသ့းကွၢ်သုပတၢ်သိၣ်တၢ်သီပျဲဘၠီၣ်လိပကမၤတၢ်မနီၢ်တမံၤဖဲဘၠီၣ်ယူဒၤဖွိအမုၢ်အိၣ်ဘှံးနံၤနဲၢ်လဲၣ်. လိပကမၤစၢၤတၢ်ဧါ. မဲၢ်တမဲၢ်လိပကမၤဆါတၢ်ဧါ. လိပကအုၣ်က့ၤခီၣ်က့ၤပှၤကညီတဂၤအသးသမူဧါ. မဲၢ်တမဲၢ်ပကမၤဟးဂီၤကွံၤနဲၢ်လဲၣ်.”
10အဝဲဒၣ်ကွၢ်ဝီၤတၢ်လိ အဝဲဝီၤခဲလုၤအအိၣ်ဝးတရံး, ဘျီး စံးဘၣ်ဘၠီၣ်တဂၤနဲၢ်, “ယူၤထီၣ်နစဒ့တကဲၢ်.” အဝဲဒၣ်မၤဝဲဒ့းန့ၤဘျီး အစဒ့ဂ့ၤထီၣ်က့ၤဝဲဒၣ်လိ. 11ဖဲနံၤအခါ အဝဲဝီၤအိၣ်ပှဲၤလါ တၢ်သူၣ်ဒွိၣ်သးဖျိဘျီး ကူၣ်ထီၣ်ဖးလီၤပကိးဘၣ်ဃးအဝဲဝီၤကမၤယ့ၣ်ရှူးဒ်လဲၣ်အဂ့ၢ်နဲၢ်လိ.
ယ့ၣ်ရှူးဃုထၢထီၣ် ဘၠီၣ်တၢ်မၢဖွိတဖံခံဂၤ
(မး ၁၀:၁-၄; မၢ် ၃:၁၃-၁၉)
12တၢ်ဆၢကတီၢ်အဝဲနံၤ, ယ့ၣ်ရှူးလဲၤထီၣ်လိ တၢ်လုၢ်တလုၢ် အလိၤဒ်သိး အကဃ့ဘါထုကဖၣ်တၢ်အဂီၢ်ဘျီး ဘါထုကဖၣ်တၢ်လိယွၤထီနၤနဲၢ်လိ. 13လိမုၢ်ဆ့ၣ်ထီၣ်ဘျီး အဝဲဒၣ်ကိးဝီၤအခ့အပှၤတလိၣ်လိ အအိၣ်ဘျီးလိ အဝဲဝီၤ အကျၣ်ဃုထၢထီၣ်ဘၠီၣ်တဆ့ခံဂၤလိ အကိးဝဲအမံၤလိ ဘၠီၣ်တၢ်မၢဖွိတလိၣ်နဲၢ်လိ. 14ဘၠီၣ်တလိၣ်လိ အမဲၢ်စီၤရှံမိၣ် လၢအကိးနဲၢ်နဲၢ်လိ စီၤပ့းတရူး လါအထီပုၢ်ဝဲၢ်စီၤအၣ်ဒရ့း, စီၤယၤကိာ်လါစီၤယိၤဟၣ်, စီၤဖံလံပူးလါစီၤဘၢ်သလီးမဲ. 15စီၤမးသဲလါ စီၤသိၤမါ, စီၤအၤလဖဲအဖွိခွါ စီၤယၤကိာ်, ဘျီး စီၤရှံမိၣ် လိအဘၣ်တၢ်ကိးအီၤလိ ဘၠီၣ်စ့ၤလိၣ်ဖွိ, ဘၠီၣ်အဲၣ်အထံအကီၢ် 16စီၤယၤကိာ်အဖွိခွါ စီၤယူဒၤ, ဘျီး စီၤယူဒၤအံၣ်စကၤရံအိၣ်လိအကဲၣ် ထီၣ်ဘၠီၣ်ဆါလီၤကွံၤယ့ၣ်ရှူးတဂၤနဲၢ်လိ.
ယ့ၣ်ရှူးသိၣ်လီၤသီလီၤဘျီး မၤဟါမၢ်ဂ့ၤတၢ်
(မး ၄:၂၃-၂၅)
17တဘျီဃီ ယ့ၣ်ရှူးဟဲက့ၤလီၤလါတၢ်မၢဖွိတလိၣ်လိ တၢ်လုၢ်ခွိၣ်လိ. ဘျီးဆ့ထၢၣ်ပကိးလါ အခ့အပှၤထီဖူၣ်ထီခၠၢဖဲတၢ်လီၢ်လိ အပၢၤတတီၤလိ. ဘၠီၣ်အိၣ်နီၢ်အိၣ်သ့းလိ တၢ်လီၢ်ဖဲနံၤလိ ယူဒၤ, ယရူရှလ့ၣ်လါ ပီၣ်လဲၣ်ကၢၢ်နံၤတလိၣ်လိ အမဲၢ်ဝဲဝ့ၢ်ထါယၢၣ် လါ ဝ့ၢ်စဒွိၣ်နဲၢ်လိ. 18အဝဲဝီၤ ဟဲဝဲလိ ဒ်သိးအကနၢ်ဟူဘၣ်အတၢ်ကတိၤဘျီး ဒ်သိးအတၢ်ဆူးတၢ်ဆါတလိၣ်ကဘၣ်တၢ်မၤဟါမၢ်အီၤ အဂီၢ်နဲၢ်လိ. ဘၠီၣ်လိအဘၣ်တၢ်မၤတံၤတၤအီၤလိ တၢ်ဝ့းတၢ်နါတလိၣ်ဟဲနဲၢ်နဲၢ်ဝဲ ဘျီး ဘၣ်တၢ်မၤဟါမၢ်ဂ့ၤအီၤလိ. 19ဘၠီၣ်ကိးဂၤဒ့းဂုၢ်ကျဲးစၢၤထွိးဘၣ်အီၤ မဲၢ်လိ တၢ်စိကမီၤဟဲထီၣ်လိ ယ့ၣ်ရှူးအလိၤဘျီး မၤဟါမၢ်ဂ့ၤအဝဲဝီၤကိးဂၤဒ့းအဃိနဲၢ်လိ.
တၢ်သူၣ်ခုသးခုဘျီး တၢ်သူၣ်အုးသးအုး
20တဘျီဃီယ့ၣ်ရှူးကွၢ်ဝီၤအခ့အပှၤတလိၣ်ဘျီး စံးဝဲ, “သုဝဲဘၠီၣ်ဖှီၣ်ဖွိယၤဖွိတလိၣ်အံၤ သုဘၣ်ဆိၣ်ဂ့ၤနီၢ်နီၢ်လိ. တၢ်ဂ့ၢ်မဲၢ်ဒ့းအ့ၤ ကစၢ်ယွၤ အဘီအမုၢ်မဲၢ်သုတၢ်လိ. 21ကစၢ်ယ့ၣ်ရှူးစံး, သုဝဲလိတၢ်သၣ်ဝံၤအသးခဲနဲအံၤတလိၣ်နဲၢ် သုဘၣ်ဆိၣ်ဂ့ၤနီၢ်နီၢ်လိ. တၢ်ဂ့ၢ်မဲၢ်ဒ့းအ့ၤ သုကဘျဲးအီၣ်ဘျဲးအိ သုဝဲလိ. သုဝဲလိ အဟီၣ်အယၢၤခဲကနံၣ်အံၤတဖၣ်လိၣ်နဲၢ် သုဘၣ်ဆိၣ်ဂ့ၤနီၢ်နီၢ်လိ. တၢ်ဂ့ၢ်ဒ့းအ့ၤ, သုကနံၤထီၣ်သုဝဲလိ. 22ဖဲဘၠီၣ်သးဟ့သု ဘျီးတတူၢ်လိာ်သု, ဘျီးကတိၤတရီတပါသု, ဘျီးစံးအၢၣ်စံးသီသုလိ ပှၤကညီဖွိခွါအံၤအဃိနဲၢ်, သုဘၣ်ဆိၣ်ဂ့ၤသုဝဲနီၢ်နီၢ်လိ. 23တုၤတၢ်တမံၤနဲၢ် မၤအသးဘျီး သူၣ်ခုသးခုလါ ဂဲၤကလံာ်လိ တၢ်သးဖှံအပူၤတကဲၢ်. တၢ်ဂ့ၢ်မဲၢ်ဒ့းအ့ၤ ခိၣ်ဖးဖးဒွိၣ်ဘၣ်တၢ်ပၤဃၤအီၤလိ သုဂီၢ်လိမွိခွိၣ်နဲၢ်လိ. တၢ်ဂ့ၢ်မဲၢ်ဒ့းအ့ၤ အဝဲဝီၤအပၢ်တလိၣ်မၤပၤစၢၤဝံတလိၣ်ဒ့းန့ၤအသိးလိ. 24မဲၢ်မဲၢ် သုဝဲလိ အတၢ်အိၣ်တၢ်ယၢၤခဲနဲအံၤတလိၣ် သုဘၣ်အဖှီၣ်ထဲလဲၣ်ခိ. တၢ်ဂ့ၢ်မဲၢ်ဒ့းအ့ၤ သုအိၣ်မူဘၣ်ပၤစၢၤလ့သုတၢ်အိၣ်မူအဘီၣ်အညီလ့. 25သုဝဲလိ အအီၣ်ကူးအိပှဲၤခဲနဲအံၤတလိၣ် သုဘၣ်အဖှီၣ်ထဲလဲၣ်ခိ. တၢ်ဂ့ၢ်မဲၢ်ဒ့းအ့ၤ သုကသၣ်ဝံၤလီၤဒိၣ်လိ. သုဝဲလိ အနံၤခဲနဲအ့ၤတလိၣ် သုဘၣ်အဖှီၣ်ဆံးဒိၣ်လဲၣ်. တၢ်ဂ့ၢ်မဲၢ်ဒ့းအ့ၤသုကသူၣ်အုးသးအုးလါ သုကဟီၣ်ကယၢၤလိ. 26တုၤဘၠီၣ်ကိးဂၤဒ့းကတိၤဂ့ၤသုနဲၢ် သုဘၣ်အဖှီၣ်ထဲလဲၣ်ခိ. တၢ်ဂ့ၢ်မဲၢ်ဒ့းအ့ၤ အဝဲဝီၤအပၢ်တလိၣ်စံးဘၣ်ပၤစၢၤဝံအဘျၣ်တလိၣ်လိ တၢ်တမံၤဃီနဲၢ်လိ.”
တၢ်အဲၣ်ပဒုၣ်ပဒါတလိၣ်
(မး ၅:၃၈-၄၈; ၇:၁၂)
27“မဲၢ်မဲၢ် ယစံးဘၣ်သုဝဲလိ အနၢ်ဟူဘၣ်ယတၢ်ကတိၤတလိၣ်. အဲၣ်သုဒုၣ်သုဒါတလိၣ်တကဲၢ်. မၤဂ့ၤဘၠီၣ်အသးဟ့သုတလိၣ်တကဲၢ်. 28ဆိၣ်ဂ့ၤဘၠီၣ်တလိၣ်လိ အဆွိၣ်အၢၣ်သု, ဘျီး ဃ့ဘါထုကဖၣ်တၢ်လိ ဘၠီၣ်မၤအၢၣ်မၤသီသုတလိၣ်အဂီၢ်တကဲၢ်. 29ဘၠီၣ်တဂၤဂၤမဲၢ်ဒဲၣ်နဘိကပၤတခိနဲၢ်, ဒွိးဒဲၣ်နဘိကပၤ လိ အဂၤတခိနဲၢ်နဲၢ်တကဲၢ်. ဘၠီၣ်တဂၤဂၤ ကဟံးနဲၢ်နဆ့ကၤအဖီခွိၣ်နဲၢ်, မၢအဟံးန့ၢ်နဆ့ကၤနဲၢ်နဲၢ်တကဲၢ်. 30ဘၠီၣ်ကိးဂၤဒ့းလိ အဃ့နတၢ်တမံၤမံၤလိသုအိၣ်နဲၢ်, ဟ့အီၤတကဲၢ်. ဘျီးဖဲဘၠီၣ်တဂၤဂၤဟံးန့ၢ်တၢ်တမံၤမံၤလိ အမဲၢ်နတၢ်နဲၢ်, တဘၣ်ဃ့ဂ့ၤအီၤတဂ့ၤ. 31တၢ်တမံၤဃီလိ သုဆၢလိ ဘၠီၣ်ဂၤကမၤဝဲလိ သုဂီၢ်နဲၢ်, မၤအီၤလိ အဂီၢ်တကဲၢ်.
32သုမဲၢ်အဲၣ်ထဲဘၠီၣ်လိ အအဲၣ်သုတလိၣ်နဲၢ်, သုမုၢ်လၢ်လိ သုကဒိးန့ၢ်တၢ်ဆိၣ်ဂ့ၤကသ့းဝဲလိ ကျဲၣ်ဒ်လဲၣ်ခိ. ဘၠီၣ်တၢ်ဒဲးဘးဖွိတလိၣ်နီၣ်ခၠါအဲၣ်ဝဲဘၠီၣ်လိ အအဲၣ်အီၤတလိၣ်လိ. 33ဘျီး သုမဲၢ်မၤဂ့ၤထဲ ဘၠီၣ်တလိၣ်လိ အမၤဂ့ၤသုနဲၢ်, သုမုၢ်လၢ်လိ သုကဒိးန့ၢ်ဘၣ်တၢ်ဆိၣ်ဂ့ၤကသ့းဝဲလိကျဲၣ်ဒ်လဲၣ်ခိ. ဘၠီၣ်တၢ်ဒဲးဘးဖိတလိၣ်နီၣ်ခၠါမၤဝဲဒ့းန့ၤလိ. 34ဘျီးသုမဲၢ်ဟ့လိၢ်လီၤတၢ်ထဲ ဘၠီၣ်လိ သုမုၢ်လၢ် သုက ဒိးန့ၢ်ဘၣ်က့ၤတၢ်လိ အအိၣ်နဲၢ်, သုမုၢ်လၢ်လိ သုကဒိးန့ၢ်ဘၣ်တၢ်ဆိၣ်ဂ့ၤကသ့ဝဲလိ ကျဲၣ်ဒ်လဲၣ်ခိ. ဘၠီၣ်တၢ်ဒဲးဘးဖိတလိၣ်နီၣ်ခၠါ ဟ့လိၣ်လီၤတၢ်လိ ဘၠီၣ်တၢ်ဒဲးဘးဖိ တလိၣ် အအိၣ်ဒ်သိး အကဒိးန့ၢ်ဘၣ်ဂ့ၤဝဲ ပှဲၤသိးသိးအလီၢ်လိ. 35တဘၣ်မဲၢ် ဒ့းန့ၤဘၣ်. နၤတလိၣ်နဲၢ်အဲၣ်သုဒုၣ်သုဒါတလိၣ်ဘျီး မၤဂ့ၤ အဝဲဝီၤတကဲၢ်. ဟ့လိၢ်တၢ်ဘျီး မုၢ်လၢ်ဂ့ၤတၢ် နီတမံၤတဂ့ၤ. သုကဒိးန့ၢ်ဘၣ်ခိၣ်ဖးလိ အဒွိၣ်ဘျီး သုကမဲၢ်တၢ်ထီကတၢၢ်ကစၢ်ယွၤတဂၤ အဖွိခွါတလိၣ်လိ. တၢ်ဂ့ၢ်မဲၢ်ဒ့းအံၤ, အဝဲဒၣ်ဂ့ၤလိ ဘၠီၣ်တသံညါတၢ်ဘျုးတၢ်ဖှိၣ်ဘျီး ဘၠီၣ်အၢၣ်ဘၠီၣ်သီတလိၣ် အဖီခွိၣ်လိ. 36နၤတလိၣ်အိၣ်လါတၢ်သးဘၣ်ဃဲၤလါ သုပၢ်သးဘၣ်ဃဲၤ အသိးတကဲၢ်.”
တၢ်စံၣ်ညီၣ်ဘၠီၣ်ဂၤ
(မး ၇:၁-၅)
37တကါဒ်ဘၣ် “စံၣ်ညီၣ်ဘၠီၣ်အဂၤတဂ့ၤ, ဘျီးကစၢ်ယွၤ တစံၣ်ညီၣ်သုဘၣ်. စံၣ်ညီၣ်ဃၤ ဘၠီၣ်အဂၤတဂ့ၤ, ဘျီးကစၢ်ယွၤ တစံၣ်ညီၣ်ဃၣ်သုဘၣ်. ပျၢ်ကွံာ်ဘၠီၣ်အဂၤအတၢ်ကမၣ်တကဲၢ်. ဘျီးကစၢ်ယွၤ ကပျၢ်ကွံၤသုတၢ်ကမၣ်လိ. 38ဟ့တၢ်လိဘၠီၣ်အဂၤတကဲၢ်. ဘျီးကစၢ်ယွၤ ကဟ့တၢ်လိ သုလိ. သပှၢ်ကတၢၢ် သုကဒိးန့ၢ်ဘၣ်တၢ်လိ အဘၣ်တၢ် ကဃီၣ်အီၤ ပှဲၤထီၣ် ပှဲၤထီလါ တၢ်ကဟ့လီၤ သုတၢ်အိၣ်ဘျၢအသး ဘျီး ကလူလီၤအီၤလိ သုပူၤထဲသိး သုဟံးဃၤအီၤ သ့းဝဲနဲၢ်လိ. တၢ်ဂ့ၢ်မဲၢ်ဒ့းအံၤ ကစၢ်ယွၤ ကဃီၣ်ဟ့တၢ်လိ သုဒံးသိးသိး သုကဃီၣ်ဟ့တၢ်လိ ဘၠီၣ်ဂၤနဲၢ်လိ.”
39တဘျီဃီယ့ၣ်ရှူးစံးဘၣ်အဝဲဝီၤလိ တၢ်ကတိၤဒိတထ့ၣ်အံၤ ဘျီးစံးဝဲ, “ဘၠီၣ်မံၤဘျိၣ်တဂၤ ဆှၢဘၠီၣ်မံၤဘျိၣ်အဂၤတဂၤတသ့ဘၣ်. မဲၢ်မၤဝဲဘျီး အဝဲဝီၤ ခံဂၤလုၤ ကလီၤတ့ၤနုလိ တၢ်ပူၤလိ. 40အခ့အပှၤတဒိၣ်နဲၢ်အသရၣ်နီတဂၤဘၣ်လိ. မီၢ်လၢၤဘျီး အခ့အပှၤတဂၤဂၤဒၣ် ဖဲအဝဲဒၣ်မၤလွိတၢ်ဝံၤဝဲခၠိကလၤ နဲၢ် ကလီၤဂၢ်လါးအသရၣ်လိ.”
41“ဘၣ်မနီၢ်အဃိ နကွၢ်တၢ်ကမူအိၣ်လိ နထီပုၢ်ဝဲၢ်အမံၤချံပူၤ လၢၤ နတပၤသူၣ်ပၤသးလိ သ့ၣ်ဖူကျီၣ်အိၣ်လိ နမံၤချံအပူၤနဲၢ်ဘၣ်. 42နစံးဘၣ်နထီပုၢ်ဝဲၢ်, ‘ထီပုၢ်ဝဲၢ်ဧိ ဝံသးစူၤ ပျဲယခွ့းထီၣ်ကွံၤတၢ်ကမူလိ နမံၤချံပူၤ, လၢၤနတထ့ၣ်သ့ၣ်ဖူကျီၣ်နီၣ်ခၠါအိၣ်လိ နမံၤချံဒၣ်ဝဲ အပူၤနဲၢ် ကသ့းဝဲဒ်လဲၣ်ခိ.’ ဘၠီၣ်အမၤဂ့ၤမၤဝၣ်လီၤအသး တဂၤဧိ ထူထီၣ်ကွံၤဆိ သ့ၣ်ဖူကျီၣ်အိၣ်လိနမံၤချံဒၣ်ဝဲ အပူၤတကဲၢ်. တုၤနုၤတဘျီ နကထံၣ်တၢ်ဆှိကလၤဘျီး နခွ့းထီၣ်ကွံၤတၢ်ကမူလိ နထီပုၢ်ဝဲၢ်အမံၤချံပူၤ ကသ့ဝဲလိ.”
သ့ၣ်တခွိၣ်လါ အတၢ်သၣ်
43“သ့ၣ်လိ အဂ့ၤတခွိၣ်နဲၢ် တသၣ်ထီၣ်တၢ်သၣ်လိ အတဂ့ၤဘၣ်. ဘျီး သ့ၣ်လိ အတဂ့ၤတခိၣ်နဲၢ် တသၣ်ထီၣ်တၢ်သၣ်လိ အဂ့ၤနဲၢ်နဲၢ်ဘၣ်.” 44သ့ၣ်ကိးခွိၣ်ဒ့း ဘၣ်တၢ်သံညါအီၤခီဖျိတၢ်သၣ်လိ အသၣ်ထီၣ်ဝဲနဲၢ်လိ. ဘၠီၣ်တဒ့ ချၢၣ်ဒၢၣ်သၣ်လိ တၢ်ဆှုၣ်တၢ်မဲအမုၢ်တလိၣ်အလိၤဘျီး ဘၠီၣ်တဒ့စပံးသၣ်လိ တၢ်ဆှုၣ်တပှီၤအလိၤဘၣ်.
45ဘၠီၣ်ဂ့ၤဘၠီၣ်ဝၣ်တဂၤနဲၢ်, ထူထီၣ်တၢ်အဂ့ၤအဝၣ်လိ တၢ်ဂ့ၤတၢ်ဝၣ်တလိၣ်အိၣ်ပၤဖှိၣ်အသးအလီၢ်လိအသးပူၤလိ. ဘၠီၣ်အၢၣ်ဘၠီၣ်သီတဂၤနဲၢ်, ထူထီၣ်တၢ်အၢၣ်တၢ်သီလိ အဝဲအတၢ်ပၤဖှိၣ်ဃၤတၢ်အၢၣ်တၢ်သီတလိၣ်အဂီၢ်အပူၤလိ. တၢ်ဂ့ၢ်မဲၢ်ဒ့းအ့ၤပှၤကညီတဂၤ အထးခိၣ် ကတိၤတၢ်ဒ် တၢ်လိ အအိၣ်ပှဲၤဝဲလိအသးပူၤ အသိးနဲၢ်လိ.
ဘၠီၣ်ဘှီၣ်ထီၣ်ဟံၣ်ခံဂၤ
(မး ၇:၂၄-၂၇)
46“သုဝဲလိၣ်ဘၣ်မနီၢ်အဃိ သုကိးယၤ, ကစၢ်ဧၢ ဘျီး သုတမၤတၢ်လိ ယစံးဘၣ်သုနဲၢ်လဲၣ်. 47ဘၠီၣ်တဂၤဂၤလိ အဟဲလိ ယအိၣ်လါ ဒိကနၣ်ယတၢ်ကတိၤတလိၣ်ဘျီး စူၤအီၤနဲၢ် ယကဒုးနဲၢ်သုလိ အဝဲဒၣ်လီၤဂၤလါ တၢ်မနီၢ်လဲၣ်နဲၢ်လိ. 48ဘၠီၣ်အဝဲနံၤနဲၢ်အဝဲဒၣ်လီၤဂၤလါ ဘၠီၣ်တဂၤ အသူၣ်ထီၣ်ဟံၣ် ခူၣ်တၢ်ပူၤ ထိထိ ဘျီးပၤလီၤဝဲ အခီၣ်ထံးလိ လၢၢ်ခိၣ်နဲၢ်လိ. ထံလဲာ်ဘံကွံၤ ထံကျိၣ်အကၢၢ်ခွိၣ် ဘျီးဘၣ်ဒွိဟံၣ်တဖျၢၢ်နဲၢ်, မီၢ်လၢၤဘျီး မၤဟူမၤဝးအီၤ တန့ၢ်ဘၣ်. တၢ်ဂ့ၢ်မဲၢ်လိ တၢ်သူၣ်အီၤမးတ့ကျ့ အဃိလိ. 49မီၢ်လၢၤဘျီး မဲၢ်မဲၢ်ဘၠီၣ်တဂၤလိ အနၢ်ဟူယကလုၢ်ဘျီး တစူၤဝဲနဲၢ်, လီၤဂၤလါဘၠီၣ်တဂၤလိ အသူၣ်ထီၣ် အဟံၣ်လိ ဟီၣ်ခွိၣ်လိၤ တအိၣ်လါ တၢ်ပၤလီၤဃၤအခီၣ်ထံးတၢ်နီတမံၤဘၣ်နဲၢ်လိ. ဖဲထံလဲၣ်ဘံတၢ်ဘျီး ဘၣ်ဒိဟံၣ်အဝဲနဲၢ် လီၤပှီၢ်ကွံၤဝဲ တဘျီးဃီ ဘျီး အတၢ်လီၤပှီၢ်နဲၢ် မဲၢ်တၢ် နးနီၢ်နးသ့နဲၢ်လိ.”
Currently Selected:
လူၤကၣ် 6: JKP
Highlight
Share
Copy
Want to have your highlights saved across all your devices? Sign up or sign in
Karen - Paku Bible by Beyond Translation is licensed under Creative Commons Attribution-ShareAlike 4.0 License.
