လုကာ 11
11
အခန် (၁၁)
စွမ့်ဖီဆုတောင်တာခရာ
(မဿဲ ၆:၉-၁၃၊ ၇:၇-၁၁)
1အငြီးကု ကိုယ်တော်ယေရှုအွယ့် ထွိုင်ဆုတောင်ထွို့တာ ခမ်းလန်အတောင်ကုခါ့ တပည့်ဖုန်းကုအပလားအွယ့် “ဗွယ်၊ ဗွမ့်နောင် ငွုတ်သျှီ့မင်္ဂလာ ဆရာယောဟန်ဒီ့ စွမ့်ဖီအာတပည့်ဖုန်း တဆုတောင်နယ် စွမ့်ဖီကိုက့မွန်” လျှောက်နိန်းအွယ့်။
2အွယ့်ခါ့ ကိုယ်တော်အွယ့် “နားက့ မေဆုတောင်တာခါ့
‘ဖာ့ဖရာ ကအိုဒါ ဝိန်းခမ်းကု၊
ဖာ့ဖရာနျန်းနာမတော်ဒွို
ဖီကခံဘာမှန်မှန်ရိုစေ။ ဖာ့ဖရာကြွာ့လင်းထွို့ ဖီကအုပ်စိုမှန်မှန် ပလူးကျွမ်ပလားပလားလောင်။
3ဖီသညင်ဖီ က့အငြီးတာ ကအိုလူဒါ စာအာဟာရဖုန်းကျွမ်ငြီးငြီးမွန်။
4ဗွမ့်နောင် က့ခွင်လွှတ်ဖီ ပလူးမိုးလွမ်မာ အပျက်စရိုက်လီခိုဟ က့လောင်စာ ကားကအို
က့အပျက်စရိုက်လီခိုဟဖုန်းဒွိုလဲ့ ခွင်လွှတ်ဖီမွန်။
တာကအော်ဒါ
မိုးဖီက့ မိုးအပျက်စရိုက်လီခိုဟဖုန်း ကားကအိုဒွိုလဲ့
ရေးဖီကေ့မွန်’ ဆုတောင်ကာ နိန်းအွယ့်လုဲင်” မိန့်နိန်းအွယ့်။
ကျွူ့လုဲင်၊ ကွင်လုဲင်၊ ဒုန်ကန်တင်းလုဲင်
5ဒါ့အလိုင် ကိုယ်တော်အွယ့် “အေ့နေ့ချန်း နားက့ကု အပလားဒွို မွိုင်နားခိန်းကု အီချွော်ငှာတကိုးတာ လေးလေအာဖောဝ်အပလားဆောင့်ကု။ 6နားအွယ့် ‘ဖောဝ်၊ ငါးဖောဝ်သိငါအပလား အိုကလေ့ယားလေးတွိုထွို့ အီအန်လွူအာတာ တကျွိုငါလဲ့ လီအိုဟအွယ့်ကြားမဲ့ ဖီငှာငါး တကိုးအန်တွမ့်မာ့အာ့’ မေဒေါင့် ဖောဝ်အွယ့်ပလားနိန်းအွယ့်ခါ့ 7ဖောဝ်အွယ့်ပလားအွယ့် ‘ကျန်မိုးရှုပ်မာငါးမာ၊ ယွမ်ကန်တင်းဖုန်းလဲ့ ဖီထွိုင့်ထွို့လိထွို့၊ ငါးဖုဖုန်းလဲ့ အိုငြီ့ကိုလိုကာလိထွို့နောင်ငါး၊ ငါးထွိုင်ထွို့ လီဖီဒါဟာ နားတကျွိုကျွိုဟာ’ အိုယွမ်ကုထွို့ အီဒေါင့်ချာဒါ့နိန်းအွယ့်။ 8ငါးဘာသဒေါင့်နားက့ဒွို ပလူးအွယ့်ပလားဒီ့ ကွက်အိုပျန့်တိုဖောဝ်ထွို့ အင်းလေဖီဟတွို့နား တကျွိုကျွိုလဲ့ အာဒွို ဘသာကာကွယ် အာဂုဏ်သိက္ခာအွယ့်ကြားမဲ့ အီလေဖီတို နား ကအိုလူဒါတာဖုန်း။
9အွယ့်ကြားမဲ့ ငါးဘသာဒေါင့်နားက့ဒွို ကျွူ့လိုကာလုဲင်၊ အီလ့ဘာတို။ ကွင်လိုကာလုဲင်၊ အီမို့ဘာတို။ ဒုန်လိုကာကန်တင်းလုဲင်၊ အီဘောင့်ဖီတို။ 10ပလူးကျွူ့စာ ကျွမ်ပလားပလား အီလ့ကာဘာတို။ ပလူးကွင်စာ ကျွမ်ပလားပလား အီမို့ကာဘာတို။ ပလူးဒုန်ကန်တင်းစာ ကျွမ်ပလားပလားလဲ့ အီဘောင့်ဖီတို။
11အေ့နေ့ချန်း နားက့ဖုဖုန်းဒွို မေကျွူ့တားအဘာအွယ့် နားက့ကု ဖာ့ကမာပလားဒွို အီဖီကူ။
12အေ့နေ့ချန်း နားက့ဖုဖုန်းဒွို မေကျွူ့စာ့ဇျီးအွယ့် နားက့ကု ဖာ့ကမာပလားဒွို အီဖီတဘင့်ခင်မိန်ကွိ။
13အွယ့်ကြားမဲ့ နားက့ဒွို အိုပျန့်တွို့ ပလူးလီခိုဟလဲ့ မေအိုသိတို အီဖီဘာတို နားက့ဖုဖုန်း တခိုဖုန်းအွယ့် ဝိန်းခမ်းကုကအိုဒါ ဖာ့ဗွယ်ဖရာဒွိုလဲ့ ပလူးကကျွူ့ဒါ အာဆောင့်စာ လမားမားခယောဝ်း ဉာဏ်ရောင်တော်ဒွိုမသဲ အီဖီတာ အိုစေးကန်းလိအထွို့” မိန့်နိန်းအွယ့်။
ကိုယ်တော်ယေရှုနောင် ဗေလဇေပုလ
(မဿဲ ၁၂:၂၂-၃၀။ မာကု ၃:၂၀-၂၇)
14အငြီးကု ကိုယ်တော်အွယ့် ဝါစွာ့ထန်ကေ့ မိစ္ဆာတလီခိုဟ အိုမိုးအ့ဒါ ပလူးအပလား။ ကိုယ်တော်အွယ့် ထွိုင်ဝါစွာ့ထွို့ မိစ္ဆာတလီခိုဟခါ့ ပလူးအိုအ့စာအွယ့် ပြန်ဒေါင့်ချာဒါ့ငို အွယ့်ကြားမဲ့ လူထုပရိသတ်ဖုန်းအွယ့် ဟွမ့်ဆန်လိုကာတာဟနေ။ 15ဒေါင့်မာလဲ့ ပလူးပိန်ပလားလားအွယ့် “ပလူးဒွိုးပလားဒွို အိုဝါစွာ့ထန်တို မိစ္ဆာတလီခိုဟ ဒွိုးဟိုဖုန်းနောင် မိစ္ဆာတလီခိုဟဖုန်းခွမ့်ခမ်း ဗေလဇေပုလတန်ခိုတို” ဒေါင့်ကာနိန်းအွယ့်#မ၊ ၉:၃၄-၁၀:၂၅။ 16ပလူးလငါ့စာဖုန်းလဲ့ ဘသာကျန်လိုကာ ကိုယ်တော် အွယ့်ကြားမဲ့ ဖီကနေ့ဖီ အကြောင် ကိုယ်တော်တန်ခိုတော်ဒွို အိုဗွယ်ဖရာဆောင့်လေးတိုခရာတာ ကျွူ့လိုကာ ဟွမ့်ဆန်အန်ဖရာခရာနိမိတ်လက္ခဏာဖုန်း။#မ၊ ၁၂:၃၈-၁၆:၁။ မာ၊ ၈:၁၁
17ကိုယ်တော်အွယ့် အိုသိပလူးအွယ့်ဟိုတယူ အွယ့်ကြားမဲ့ “ကန်အကန်ကု ပလူးဖုန်း အချင်ချင် မေအိုတွိုက် လိုလေကာတိုအွယ့် ကန်အွယ့်ကန်ဒွို ငြီးဟ အီကေ့လေးဘာ။ ဗွမ့်နောင်အွယ့်အွယ့် ပလူးအိုမိသားစု အစုကုစာဖုန်း အချင်ချင် မေအိုဖျတ်လိုလေကာဘို့အွယ့် မိသားစုအွယ့်ဘာဒွို အီကေ့ဘာတာဟနေ။ 18အေ့နေ့ချန်း မာရ်နတ်အွယ့်လဲ့ နောင်အာမိစ္ဆာတလီခိုဟဖုန်း အချင်ချင် မေအိုတွိုက်လိုလေလိုကာတိုအွယ့် အာကန်ဒွို အီတည်ခွိုင်ဒါနိန်းမာ။ ဒွိုးခါ့လဲ့ နားက့ဒွို အိုဒေါင့်လိုကာ ငါးဒွို ဝါစွာ့ထန် မိစ္ဆာတလီခိုဟဖုန်းနောင် ဗေလဇေပုလတန်ခို။ 19အေ့နေ့ချန်း ငါးဒွို မေအိုဝါစွာ့ထန် မိစ္ဆာတလီခိုဟဖုန်း နောင်ဗေလဇေပုလတန်ခိုအွယ့် နားက့တပည့်ဖုန်းနုဲင့်ဟာ အိုဝါစွာ့လိုကာ မိစ္ဆာတလီခိုဟဖုန်းနောင် လမာအခွင်အာဏာ။ အွယ့်ကြားမဲ့ နားက့တပည့်ဖုန်းဒွို ပျန့်တိုနားက့ အိုမာတိုတာ ဆက်စေတိုဟနေ။ 20ဒေါင့်မာလဲ့ ငါးဒွို အိုဝါစွာ့ထန်တို မိစ္ဆာတလီခိုဟဖုန်း နောင်ဗွယ်ဖရာတန်ခိုတော် အွယ့်ကြားမဲ့ အိုနေ့ထန်တိုဆက်ဆေ ဗွယ်ဖရာသာသနာတော်ဒွို တွိုလိထွို့ နားက့ဆောင့်ဟနေ” မိန့်နိန်းအွယ့်။
21ထွို့မဲ့ ကိုယ်တော်အွယ့် အီနေ့ အကြောင်အာဒွို တန်ခိုပေါင်းဒူလွို့ထိုင် မာရ်နတ်တာ ဒေါင့်နေ့နောင် တတွိုက်တွုန်ဒီ့ “ပလူးအာဆန်စာအွယ့် နောင်လက်နက်အစုံအလင်ထွို့ မေအိုပွိုင်းဟွိုင့်တိုး အာယွမ့်ခါ့ အာတကလွိုင်ဥစ္စာဖုန်းဒွိုလဲ့ အီလုံခြုံတို ဟနေ။ 22ဒေါင့်မာလဲ့ ပလူးအာဒူထိုင်အာစာ လေတွိုက်အာထွို့ မေစပေးကေ့အွယ့် အီချွော်ဆျန်ကေ့ အာကအာကွိုဘာဒါ လက်နက်အစုံအလင်ဖုန်းထွို့ အာကဆျန်လ့ဒါ တကလွိုင်ကားကအိုဖုန်းဒွိုလဲ့ အီဝေပန်ဖီကေ့ ပလားလငါ့စာဖုန်း။
23ပလူးလီအိုထွိုင်ဟ ငါးဒိုင့်စာလမားခယောဝ်း ပျန့်တို ပလူးဆန့်ကင်ငါးစာတိုဟနေ။ အီစုဝေပလူးဖုန်း ဗွယ်ဖရာတာ ပလူးလီကူညီဟငါးစာဖုန်းဒွို ပျန့်တို ပလူးမိုးဖီ ပလူးဖုန်း အိုဗွယ်ဖရာဆောင့် စဖာ့ထန်ကေ့ ခမ်လန်ယားကုစာတိုဟနေ” မိန့်နိန်းအွယ်။
ပြန်ကျိန်းချာဒါ မိစ္ဆာတလီခိုဟ
24ကိုယ်တော်မိန့်ထိုင်ဒါ့နောင် တတိုက်တွုန်ဒါ့အဘာဒီ့ “မိစ္ဆာတလီခိုဟအွယ့် အိုပလူးအာကအိုပူစို့စာကု စထန်ထွို့ စအိုလေတာ နွိုင့်ကန္တာရကုထွို့ စကွင်ခမ်းလန်အိုစို့တာ။ ဒေါင့်မာလဲ့ ခမ်လန် အတောင်ငါလဲ့ လီကွင်မို့ဟ အွယ့်ကြားမဲ့ ‘ကျိန်းချာဒါ့ဘို့ ငါးကအိုဖိုဒါ ပလူးဒီ့ပလားဆောင့်’ ဒေါင့်နိန်းအွယ့်ထွို့ ပြန်ကျိန်းချာဒါ့။ 25ထွိုင်ကျိန်းတွို့ချာခါ့ သျှီလေဘာ အကီခါ့ အာကအိုပူစို့ဒါ ပလူးအွယ့်ပလား နန်ခန္ဓာအွယ့် အိုဗွမ့်တိုနောင် အိုဝေပလင့်ပလီတျပ်တဲစေးကန်းဒါ ယွမ်အိုဒိုင့်အမာ့။ 26အွယ့်ခါ့ မိစ္ဆာတလီခိုဟအွယ့် ဟောင့်လေး မိစ္ဆာတလီခိုဟ သေ့လွို့ထိုင်အာ အန်နျွို့ဘာ လေအိုစို့ကေ့ အွယ့်ကြားမဲ့ ပလူးကခံဘာဒါ အိုပူစာအွယ့် အခြေအနေ ယိမ်းဟုဲင်းထန်လွို့ ထိုင်အကီခါ့ ဟနေ” မိန့်လေနိန်းအွယ်။
ပလူးပျော်စွင်စာဖုန်း
27ကိုယ်တော်အွယ့် အိုဟိုစွမ့်တာတွင် လူထုပရိသတ်ဖုန်းကု ပမွော်အပလားအွယ့် “ပမွော်ကအန်လွူပွာလင်းဖီထွို့ ကဖီအို့ဒါကိုယ်တော်ညွှော်စာဒီ့ ပျန့်တို ပလူးပျော်စွင်ဘာတာတို” လျှောက်ဒင်နိန်းအွယ်။
28အွယ့်ခါ့ ကိုယ်တော်အွယ့် “အိုမှန်တို။ ဒေါင့်မာလဲ့ ပလူးကနာဟွမ့်လိုကာဘာဒါ ဗွယ်ဖရာတရာငိုတော်ဖုန်းထွို့ ကလွိုက်နာဒါစာဖုန်းဒွို ပျန့်တို ပလူးယိမ်းပျော်စွင်လွို့ဘာတာစာတိုဟနေ” ပြန်မိန့်ဟွမ့်ချာဒါ့နိန်းအွယ့်။
ကျွူ့နိမိတ်လက္ခဏာအဘာ
(မဿဲ ၁၂:၃၈-၄၂)
29လူထုပရိသတ်ဖုန်းအွယ့် အိုခွူ့စုရွန့်လိုကာကိုယ်တော်တွင် ကိုယ်တော်အွယ့် “ပလူးခေတ်ဒွိုးခါ့စာဖုန်းဒွို ကေ့ယွမ်လိုကာတွို့တာ။ ကွက်တဟနာမေဒေါင့်ဘာအွယ့် နားက့ဒွို အိုကျွူ့လိုကာ ဖီကပြနေ့ဖီ ဟွမ့်ဆန်အန်ဖရာခရာနိမိတ်လက္ခဏာ အေ့ပျန့်နောင်ဆက်ဆေ ကဒေါင့်ဒါ ဗွယ်ဖရာဒွို အန်ကြွ့လင်းငါးလဲ့ လွို့အရိယာဆူတော်ကောင်ယောန#11:29 ယောနဒွို ပျန့်တို အရိယာဆူတော်ကောင် ကအိုစေးဒါ အကီကီခါ့ကာ အပါးတိုဟနေ။ တားဒူတန်အဘာဒွို အန်ပွာအာထွို့ ထွိုင်လ့အန်တွမ့်ငြီးခါ့ ဗွယ်ဖရာဒွို အန်ချန့်တားဒူ ပလို့ထန်ချာဒါ့ ယောန ခေါင့်လောင်ကု နိမိတ်လက္ခဏာထွို့ နိမိတ်လက္ခဏာ လငါ့ကမားဘာလဲ့ အီနေ့လီမေဟာ။ 30ဗွမ့်နောင် ယောနဒွို ပျန့်နိမိတ်လက္ခဏာ နိနေဝေဝိန်းစာဖုန်းတာထွို့ ပလူးဖုခုငါးဒွိုးလဲ့ ပလူးခေတ်ဒွိုးခါ့စာဖုန်းတာ အီပျန့်တို နိမိတ်လက္ခဏာအဘာဟနေ။ 31ရှေဘကန်ခွမ့်ခမ်းမွော်#11:31ကျမ်အထိ့ကုဒီ့ ရှေဘကန်ခွမ့်ခမ်းမွော်ဒွို ကန်လဝီဒိုင့် ခွမ့်ခမ်းမွော် နိန်းအွယ့်လဲ့ အိုနေ့နေ့ထန်စေးကန်း။ အာကအုပ်ချုပ်ဒါကန်ဒီ့ အို အစ္စရေးကန်ကု လဝီခို့ကုဟနေ။အွယ့် ဖီကနာဟွမ့်ဘာ ဉာဏ်ပညာကဒူမြတ်ဒါ ခွမ့်ခမ်းရှောလမုန် တဆုံမဖုန်းထွို့ အိုကယားယိုးဒါ ရှေဘကန်ကုထွို့ လေးလေဘာတာ။ ဒေါင့်မာလဲ့ ဒွိုးခါ့ ပလူးဒူမြတ်လွို့ထိုင် ခွမ့်ခမ်းဒူရှောလမုန်စာ အိုတွိုလေးတိုတာဟနေ။ အွယ့်ကြားမဲ့ မေတွိုကျေရင်ဆုံဖြတ်တရာငြီးကု ရှေဘကန်ခွမ့်မွော်ဒွို အီထွိုင်ထွို့ စွယ်တရာ ပလူးခေတ်ဒွိုးခါ့စာ။ 32ကွက်အရိယာဆူတော်ကောင်ယောန တဟိုစွမ့်ဖုန်းထွို့ ကလ့လိုကာဒါနောင်တစာ နိနေဝေဝိန်းစာဖုန်းဒွိုလဲ့ မေတွိုကျေရင်ဆုံဖြတ်တရာငြီးကု အီစွယ်တရာ နားက့။ ကွက်တဟနာ မေဒေါင့်ဘာဒွို ဒွိုးခါ့ ပလူးဒူမြတ်လွို့ထိုင် အရိယာဆူတော်ကောင်ယောနစာ အိုလေလေးတိုတာဟနေ” မိန့်နိန်းအွယ့်။
နန်ခန္ဓာ မီအိမ်
(မဿဲ ၅:၁၅၊ ၆:၂၂-၂၃)
33ထွို့မဲ့ ကိုယ်တော်အွယ့် “မီအိမ်ကလိစေကန်းဒါနောင်မီးဒွို လမားလဲ့ အီအန်ဒင်အွိုစေးဟ၊ ဖီပါအွိုစေးကန်းဟ ခရောင်ခမ်းလားကု။ ခရားအွယ့် ပလူးကနွူးကျိန်းဒါ ယွမ်းကုစာဖုန်း ဖီကလ့လိုကာ တခါ့ရောင်တာ မီအိမ်ဒွို ကုဲင်ဖီဗွိုင်ဒါဘို့ မီအိမ်ထွမ်လောင်ကုဟို့။ 34နားက့မေးဖုန်းနုဲင့် ပျန့်ဗွမ့်တိုနောင် နားက့နန်ခန္ဓာ မီအိမ်။ နားက့မေး မေခိုတိုအွယ့် နားက့နန်အဘာလူး အီလ့လူးတွို့တခါ့ထွို့ နားက့မေး မေလီခိုဟအွယ့် နားက့နန်အဘာလူး အီသျှီ့တိန်လူးတွို့ဟနေ။ 35အွယ့်ကြားမဲ့ နားက့ကု ကအိုဒါတခါ့ဒွို ဖီကျန်ပျန့်ကေ့မာ တသျှီ့မာ အန်ဒင်ရေလိုကာလုဲင်။
36အွယ့်ကြားမဲ့ နားက့နန်ခန္ဓာအဘာလူးဒွို ကမားကွူ့လဲ့ယောဝ်း တသျှီ့တိန်တကျွိုကျွို အိုဟထွို့ မေအိုလ့တို တခါ့ရောင်အွယ့် ဗွမ့်နောင်မီအိမ်ဒွို အိုတင်ခါ့တိုတာ နားက့လောင်ကု နားက့နန်ခန္ဓာအဘာလူးဒွို အီအိုတင်ခါ့လက်တိုတာဟနေ” မိန့်နိန်းအွယ့်။
ကိုယ်တော်ယေရှု ဝေဖန် ဆူတော်ကောင်ယောင်ဆောင်စာဖုန်း
(မဿဲ ၂၃:၁-၃၆။ မာကု ၁၂:၃၈-၄၀)
37ထွိုင်မိန့်နိန်းအွယ့်ထွို့ ဖာရိရှဲအပလားအွယ့် အီခံသျှန် ကိုယ်တော်နောင် တအန်မွိုင်တ့ဖုန်းတာ ပင်းကျိန်း အာယွမ်ကုအွယ့်ကြားမဲ့ ကိုယ်တော်အွယ့် ကြွာ့လေး အာယွမ်ကုထွို့ အိုနင်းတာခုံကု။ 38ကိုယ်တော်အွယ့် လီမိုးဟ ကပျန့်ဒါ ဂျူးပလူးမျိုဖုန်း အလီ့ထုံစံ ခရားအီအန်တအန် ကူပလင့်ဘာကျွော့် နိန်းအွယ့်ခါ့ ဖာရိရှဲအွယ့် ထွိုင်သျှီထွို့ ဟွမ်ဆန်တာ။
39အွယ့်ခါ့ ကိုယ်တော်အွယ့် “နားက့ ဖာရိရှဲဖုန်းဒွို တီပလင့်ကာဘို့ တင်ချွူ၊ ယျန့်ပွိုင်းဖုန်း ခူနောင့်ဒိုင့်ကုဟို့ထွို့ တွိုနားက့သ့ ကုန်ကုဖုန်းနုဲင့် အိုကီကာတိုနောင် လောဖတရာဖုန်း တာလီတရာဟဖုန်း။ 40ပလူးမွိုက်ဖုန်း၊ ဗွယ်ဖရာဒွို ကုန်ကုဒိုင့်ယောဝ်း ခူနောင့်ဒိုင့်ယောဝ်း ဖန်ဆင်ဖီစေးကန်းတို မေဟနောဝ်။ 41အွယ့်ကြားမဲ့ အန်ဒင်ဟဒွမ် လောဖတရာဖုန်း တာလီတရာဟဖုန်းထွို့ မေဖီဘို့ ဆင်ရယ်စာဖုန်း တာကအိုဒါ နားက့ကုဖုန်း နောင်သ့တွို့မှန် ငါမထွို့ နားက့ဒွို အီပျန့်လိုကာတို ပလူးပလင့်ဖုန်း ဗွယ်ဖရာမေငါ့ကု။
42ဖာရိရှဲဖုန်း နားကဒွို အီကြုံလိုကာဘာနောင် တခုဲင်ဖုန်း။ ကွက်တဟနာမေဒေါင့်ဘာအွယ့် နားက့ဒွို ဟွမ်လွန်၊ လျူကျွို့နောင် ဥယျာဉ်ခြန့်ကုကထန်ဒါ တမွိုင် ကဝင်ဒါဘစီဖုန်း အစီ့ပွမ်အပွမ်ဒွို အိုလှူလိုကာတို ဗွယ်ဖရာဆောင့်လဲ့ နားက့နုဲင့် ဗွမ့်နောင်လီဆက်ဆံဟ ပလားလငါ့နောင် တတရာမျှတထွို့ ဗွယ်ဖရာလဲ့ လီရက်ယွမ်လိုကာဟ။ နားက့ဒွို အီလှူဘာ အစီ့ပွမ်အပွမ်ကာဟ ပလားလငါ့ဖုန်းဒွိုလဲ့ အီဆက်ဆံလိုကာဘာနောင် တတရာမျှတဖုန်း။ ဗွယ်ဖရာလဲ့ အီရက်ယွမ်ယွမ်လိုကာဘာ။
43ဖာရိရှဲဖုန်း၊ နားက့ဒွို အီကြုံဘာနောင် တခုဲင်ဖုန်း။ ကွက်တဟနာမေဒေါင့်ဘာအွယ့် နားက့နုဲင့် ဓမ္မာရုံကုဖုန်းလဲ့ ဘာသအိုနင်းလိုကာ မေငါ့စွက်ကု။ ကန်စီ့ဖုန်းကုလဲ့ ဘသာလ့လိုကာ ပလူးဖုန်း အန်ဒင်ရေကျွိုစွမ်။
44ဖာရိရှဲဖုန်း၊ နားက့နုဲင့် အီကြုံလိုကာဘာနောင် တခုဲင်။ ကွက်တဟနာမေဒေါင့်ဘာအွယ့် နားကဒွို ဗွမ့်တိုနောင့် စင်ခိုင်အောင့် လိအိုဟနောင် အမှတ်ဖုန်း။ ပလူးဖုန်းဒွို အကြောင်ပျန့်တို စင်ခိုင်အောင့် အီမိုးပလင့်ဟဒါအာကာဒွို လီသိကာဟထွို့ ကုဲင်းစစွာ့ကျိန်းလေးစို့ကာဒါ ဟန်အွယ်ဘာလောင်” မိန့်နိန်းအွယ့်။
45အွယ့်ခါ့ ကျမ်ဒါဆရာအပလားအွယ့် “ဆရာ၊ အိုဒေါင့်မိန့်တာနိန်းဒွိုးဒွို အိုဒင်အပျက်တို က့တို” လျှောက်ဒင်နိန်းအွယ့်။ 46အွယ့်ခါ့ ကိုယ်တော်အွယ့်လဲ့ “ကျမ်ဒါဆရာဖုန်း နားက့ဒွိုလဲ့ အီကြုံလိုကာဘာနောင် တခုဲင်။ ကွက်တဟနာမေဒေါင့်ဘာအွယ့် နားက့ဒွို အန်ချန့်ကာ ပလူးဖုန်း ယိုးလိုကာဝန်ထွိုဖုန်းထွို့ တွိုနားက့နုဲင့် နောင်နားက့ကျွေ့ာ်နာ့ငါးလဲ့ လီခွိုင်းလိုကာဟ တာအွယ့်ဟို။
47နားက့ဒွို အီကြုံလိုကာဘာနောင် တခုဲင်။ ကွက်တဟနာ မေဒေါင့်ဘာဒွို အတိတ်ကာလကုဒီ့ နားက့ဖာ့ပလာဖုန်း ကမိုးစီ့ဒါ အရိယာဆူတော်ကောင်ဖုန်းတာ နားက့ဒွို တေဖီလိုကာ စင်ခိုင်အောင့်ဖုန်း ဖီကပျန့်တသိနန်ကျီ့တာ။ 48ကမိုးဒါနိန်းဒွိုးဒွို ပျန့်တို အိုထောက်ခံတို နားက့ဖာ့ပလာဖုန်း မိုးစေးတာဒီ့ အိုမှန်တိုနိန်းအွယ့် ဟနေ။ နားက့မေလီထောက်ခံဟအွယ့် နားက့ဖာ့ပလာဖုန်း ကမိုးစီ့စေးဒါ အရိယာဆူတော်ကောင်ဖုန်းတာ အီတေဖီလိုကာ စင်ခိုင့်အောင့်နိန်းဒွိုး လီမေဟာ။ 49အွယ့်ကြားမဲ့ ဗွယ်ဖရာ ကအိုသိလူးဒါတာ ကားကအိုဒွို ‘အီအန်ကြွ့လေး အရိယာဆူတော်ကောင်ဖုန်းနောင် သာဝကဖုန်း နားက့ဆောင့်။ ဒေါင့်မာလဲ့ အရိယာဆူတော်ကောင်ဖုန်း၊ သာဝကဖုန်း အဟန်ဟန်အွယ့် နားက့အီမိုးစီ့ကေ့ထွို့ အဟန်ဟန်အွယ့် နားက့အီမိုးခုဲင် နှိပ်စက်လိုကာ’ မိန့်စေးကန်း နိန်းအွယ့်ဟနေ။ 50ထျက်ကမ်ဖာတေတ့ခါ့ကာ ကွက်နားက့ဖာ့ပလာ ကမိုးစီ့ဒါ အရိယာဆူတော်ကောင်ဖုန်း ကားကအို တစီ့တာမဲ့ ပလူးခေတ်ဒွိုးခါ့ဖုန်းဒွို အီခံလိုကာ ဗွယ်ဖရာ ကျေရင်ဆုံဖြတ်အပျက်ဒဏ်ဖုန်း။ 51တွိုအရိယာဆူတော်ကောင်ဖုန်းဒွို တေအာဗေလထွို့ တွိုတွို့ အရိယာဆူတော်ကောင် ဇာခရိ ကခံဘာပလားမိုးစီ့ ဗိမာန်တော်ကု ကအိုဒါ ခမ်လန်ပလင့်ပလီကုနောင် ပူဇော်ပလ္လင်ခါကု ဟနေ။ အွယ့်ကြားမဲ့ တာဒွိုးဟိုဖုန်း ကားကအိုတာ ပလူးခေတ်ဒွိုးခါ့စာဖုန်း အီခံလိုကာဘာ ကျေရင်ဆုံဖြတ်အပျက်ဒဏ်ဒွို ငါးအီဒေါင့် စေချာတိုဟနေ။
52အွို ကျမ်ဒါဆရာဖုန်း၊ နားက့နုဲင့် အီကြုံလိုကာဘာနောင် တခုဲင်။ ကွက်တဟနာမေဒေါင့်ဘာအွယ့် နားက့ဒွို အိုဆျန်စေးကန်းကာ တသိပညာဆိုင်နောင်ဗွယ်ဖရာ ဘဏ်တိုက် ကန်တင်းစိုးထွို့ နန်တိုးလဲ့ လီနွူးဟ၊ ပလားလငါ့ဖုန်းဒွိုလဲ့ ချန်းအိုရေးလိုကာ” မိန့်နိန်းအွယ့်။
53ကိုယ်တော်မိန့်နိန်းအွယ့်ထွို့ ကျမ်ဒါဆရာနောင် ဖာရိရှဲဖုန်းအွယ့် ဝေဖန်ဒင်အပျက်ယွမ်လိုကာတွို့ ကိုယ်တော်လောင်ထွို့ တစီ့လိုကာ ကိုယ်တော်တတစီ့ဟေတန် ဆိုင်နောင် အကြောင်ခရာဟေတန်ဖုန်း။ 54ပလူးအွယ့်ဟိုအွယ့် ကိုယ်တော်ကမိန့်ဒါ ငိုဖုန်းကု အမာအကျွိုကျွိုမေပါအွယ့် အီဒင်အပျက်ကိုယ်တော်တာ အိုပွိုင်းဟွိုင့်ဘို့လိုကာဟနေ။
Currently Selected:
လုကာ 11: KVT
Highlight
Share
Copy
Want to have your highlights saved across all your devices? Sign up or sign in
Lahta Bible by Beyond Translation is licensed under Creative Commons Attribution-ShareAlike 4.0 License.
