Luk 6
6
YISỌS ENEME ABAAŊA USEN IBED MME YUU
Luk 6:1-11; Matio 12:1-8; Maak 2:23-28
1K'usen ibed mme Yuu, Yisọs ma mme mbed nse ke asaana ebei k'inwaŋ upa. Mme mbed nse etọọŋọ ewai upa onyuŋ osiooŋo nyeriye inye mmọ ataa.
2Ede usuk mmọn Farisi okud se mme mbed ekenamde. Ndien mmọ ebib mmọ, «Nso ede mf'iwaide upa k'usen ibed? Ipinaaha ede ntoro nte ibed Muses atiŋde!»
3Yisọs ọbọrọọ ete, «Ede nte mf'ikoodke ŋwed Idem-Mbubod ikud se ọbọọŋ Defed ekenamde ma mmọnido ekedude ma idaha ọbiọŋ ekedọŋde mmọ?
4Ọbọọŋ Defed ekedukde ke atayad#6:4 Atayad: ufọk mme Yuu ekese oponode Idem-Mbubod Idem-Mbubod, eben ndom-uyoo iken ekewaade enọ Idem-Mbubod adia onyuŋ ọnọ mmọnido ekedude ma eme, epesukde nte ekedede mbed inọ owom ewen adia ke mmidehe mme oku.
5Ndien Yisọs oture ikọọ ise ete mmọ, «Ami Eyen-Owom mmeyene unen ke se mmọn owom enyenede inam ma se mmọ ikemeke inam k'usen ibed mme Yuu»
6K'usen ibed Muses ewen, Yisọs ọkọduk efe-upono Idem-Mbubod ọtọọŋọ epeebi mmọn owom mpọ. Ette keen eke odudo emi ubọk nnamisa ise eke apade.
7Ede usuk mme Farisi ma mme epeebi-mbed Muses eke onyuŋ odudo. Mmọ ekeọsuk atiŋ enyin ese, mme Yisọs aka-ikọk eme udọŋọ k'usen ibed Muses, sia mmọ ekesuk eyem usuŋ mbaak mmọ enyene se mmọ akamade obiom eme ipe.
8Ede Yisọs ama diọọŋọ ekikere mmọ, ndien enye ete owom odo ubọk apade, «Beene daa ke ọtọ mfifien owom emikude fin. Ndien owom okoro ebeene adaa.
9Ndien Yisọs ọwuŋọde ese mme Farisi ma mme epeebi-mbed Muses ete, «Nnyin idiọŋọke ede mbed k'usen ibed Muses inam etiti mpọ. Ede idehe inam owom ibak. Nnyin idiọŋ sọ ke ede nen-nen inyaaŋa uwem idehe iwod owom. Mfo inyiime ntoroo?
10Ede owom berikeen ibọrọke eme. Ndien enye atuaan enyin ese mmọ mfifien, ete owom odo, «Nyan ubọk fo.» Enye anyan, ndien ubọk ise eneŋede anante enyeken.
11Ede mmọ ekekud ntee, mme Farisi ma mme epeebi-mbed Muses ayadesid. Ndien mmọ ọtọọŋọ eneme k'otu idem mmọ se mmọ ipinamde ma Yisọs.
YISỌS EMEK NSAŊA UTOM NSE DUOPEBAA
Matio 10:1-4; Maak 3:13-19
12Ndien k'usen ifaŋ imaikibei, Yisọs ọwọrọ akaa ke akwaa opupo ibọŋ akam inọ Idem-Mbubod ofuri itudoyo.
13Ekede ke edem usen ikoro, Yisọs okood mfifien mmọn se ekekenede eme, enye osio owom duopebaa k'otu mmọ. Ndien emek mmọ nte nsaŋa-utom#6:13 Nsaŋa Utom: Ọwọrọ apọsud: owom duopebaa Yisọs eke mekde ise.
14Ndien enyin mmọ owoom, Saimọn emi Yisọs ekoodde Pite, apara eyen-eka ese Andruu, ma Yemsi ma Yọọn ma Fidip ma Batromium.
15Ma Matio, ma Tọmọsi, ma Yemsi eyen Afius, ma Saimọn, ekedede owom eken imaha utuk#6:15 Saimọn ekede enyeem awaanade ekọŋ ubọhọ k'ukara mmọn Rum .
16Ma Yudas eyen-eka Yemsi, ma Yudas ekeside obio Kadiọd ekedidade Yisọs ọnọ mpa.
YISỌS EPEEBI MPỌ ONYUŊ ỌKỌK UDỌŊỌ
Matio 4:24-25; Maak 3:7-12
17Ndien Yisọs ma mme nsaŋa-utom ise eke ọsuhọde k'onyuŋ akwaa opupo edi unaisọŋ. Ndien kendo mmọ edi osoobo ma akwaa otu mme mbed nse ma mmọn ewen ekeside idak ukara Yudia, ma obio Yedusedem, ma mme obio mben inyaŋ Taide ma Sidọn.
18Uwak mmọn owom emadi paŋ utọŋ ekop upeep mpọ Yisọs. Mmọnido ekedọŋọde eyem enye ọkọk mmọ. Enye ama onyuŋ ọkọk mmọnido sibidid idem-epo eke ọtuhọde. 19Mfifien otu owom eyeemi usuŋ nte mmọ epetukde eme sia Yisọs ekesuk ọkọk mmọ owom udọŋọ odu-odu.
EDIDIỌŊ
Matio 5:1-12
20Ndien Yisọs edibede enyin ese mme mbed nse ete,
«Idem-Mbubod akaidiọŋ mfo mme ubueene,
Sia obio-ubọọŋ idem Mbudod enyenede mfo.
21Idem-Mbubod akaidiọŋ mfo mmọnido ọbiọŋ ọdọŋde idaha iken.
Sia nsa akaiyọk mfo.
Idem-Mbubod akaidiọŋ mfo mmọnimi ituade eyed idaha iken.
Sia mf'ika imua imuam.
22Idem-Mbubod akaidiọŋ mfo k'idaha mmọn owom atuaade mfo.
Ediaaŋade idem mmọ ọpọŋ mfo,
Enyuŋ ọsọŋọ mfo enyin onyuŋ etiŋ ndedehe ikọọ ma mfo,
Ke ntak mfo inyiime ikene min, Eyen-Owom.
23K'utọ ini ikoro, inemesid, inyuŋ itọọrọ k'idara, sia Idem-Mbubod aka enehede ipono mfo ke edem-onyuŋ. Sia mme ntaa ntaa mfo akanam sọ ukeme ikoro ọnọ mme asiak-uduak oyooko.
YISỌS ETIŊ ABAAŊA MFUHỌ INI ISO
24Ede, mbombom mfo mmọn inyene!
Sia mf'ibọọ ọyọhọ ndọŋesid mfo.
25Mbọm-mbọm mfo mmọnido nsa ọyọkde idaha iken,
Sia ufiop-ufiop ọbiọŋ akaidọŋ mfo.
Mbom-mbom mfo mmọnido imuaade idaha iken,
Sia mf'ika itua iseeme.
26Mbọm-mbọm mfo k'idaha mmọn owom etiiŋide ntiti ikọọ adian mfo,
Sia mme Ntaa mfo ekenamsọ ntee ma mme asiak-uduak ebiaaŋa.
IMA MMỌN ATUAA MFO
Matio 5:38-48
27Yisọs akaaiso epeebi mpọ ete, «Edese ami ntiŋde nnọ mfo mmọnimi ikopde ikọọ iken, anante mfo ima mmọn atuaa mfo, inyuŋ inam etiti mpọ inọ mmọ. 28Ibeeŋeidem-Mbubod yak ọdiọŋ owom ọdọọŋide akam ọnọ mfo, inyuŋ ibọŋ akam inọ mmọnido etueeŋide mfo iduọ. 29Owom iyubi mfo ufia k'ibaŋ edem keen ituene fin, kanade edem nken nnọ eme yak ọyubi. Owom epe ọbọ fin ewuri fo, yak mfọrọ-idem mfo dian nnọ eme. 30Owom epe ebeeŋe fin mpọ, yak nnọ eme. Ede owom epe ọbọọ fin mpọ ekeyenede fin k'usanya, k'uyeem sọ ubọ eme. 31Nam sọ nnọ owom ewen mfifien se ofo eyemde owom anam ọnọ fin.
32Epere ofo ama mmọnido amade fin ọpọọŋ, ofo unyeneke se anamde berikeen eke ododde itoro. Sia idem mmọnido iponoke Idem-Mbubod ama sọ mmọnido amade mmọ. 33Ede idehe ofo anam etiti mpọ ọnọ mmọnido anamde etiti mpọ ọnọ fin, ofo unyeneke se anamde berikeen eke ododde itoro. Sia idem mmọnido iponoke Idem-Mbubod anam sọ mpọ ọnọ mmọnido anamde etiti mpọ ọnọ mmọ. 34Edieke ofo ọbuọde owom eken ofo ekerede ke akaikan ipe fin ebuọd oyoomo ese, ofo umuŋunyene utip. Sia mmọnido iponoke Idem-Mbubod ọbuọd mmọnido mmọ ekerede ke ekaipe mmọ ebuọd oyoomo mmọ. 35Ede anante ofo ama mmọn atua fo onyuŋ ọfọn ido ma mmọ. Buọd oyoomo ede k'uyeem sọ owom eken ofo ọbuọd epe fin. Sia Idem-Mbubod akainọ fin akwaa utip. Ndien emi aka iwuri ke ofo ọfọn ido nte Nkoŋnkan Idem-Mbubod. Sia enye ọfọnde mfọn ma mmọnido ananade esid ekọm ma mmọn ibak. 36Anaa ofo enyene mbọm ukem nte Ntaa nnyin ke edem-onyuŋ enyenede mbọm ọnọ mfifien owom.
K'UBIOM OWOM IPE
Matio 7:1-5
37Yisọs akaaiso epeebi mpọ ete, «Ku udori sọ owom uyo kiinam idiọk-mpọ. K'ubiom sọ owom ipe, mbaak mmọ ibiom fin ipe. Feen nnọ mmọnido eduede fin ndien ekainyuŋ efeen inọ fin. 38Nnọ mfifien owom se mmọ ebeeŋde fin, ndien Idem-Mbubod akainọ fin ọyọhọ ndomo, efiik ọdọŋ, otuhede amana ọdọŋ ọyọhọ ọduọhọ. Udomo mpọ nken ofo akamade odoomo ọnọ owom ewen, nsọ ukem ikoro ke Idem-Mbubod emi ikama idomo inọ fin.
39Yisọs ọnọ mmọ uwud-mpọ, «Owom nnan ikemeke ida owom nnan ewen usuŋ. Ke apanikọọ, mmọ mbumbaa aka iduọŋọ iduk odu. 40Eyen ufọk ŋwed ikemeke ipon ikan atitia eken epeebide eme. Ede eyen-ufọk ŋwed eken epeebide mpọ ọdiọŋọ emi inaa nte atitia ese.
41Ndusuk ofo eyeem idọhọ adaa fo ibaaŋa apara ndudue enye anamde, emi atakde nte mbuubud ntọŋ. Ede kwa bemiso nam mpọ baaŋa niniŋ akwaa ndudue ofo anamde emi ọfukde enyin fo nte mbaai ọpupọk. 42Ede idiọk odunam ofo idọhọ adaa fo, yak nwam nehede fin ke mpara ndudue nken anaamide, k'ini ofo ukaunamke mpọ ubaaŋa niniŋ akwaa ndudue eken anamde. Epe anam ntoro, ofo ede anam utom enyin owom! Ede bemiso nehede mme ndudue fo. Ndien ofo akaikan inwam adaa fo inehede ndudue nse.
EDA MFURI ETO EDIỌỌŊỌ ETO
Matio 7:15-20
43Yisọs akaiso epeebi mpọ ete, «Etiti eto isioŋoke idiọk mfuri. K'ukem usuŋ ikoro, idiọk eto inyuŋ ikeme isioŋo etiti mfuri.#6:43 Ikọọ Yisọs eke ọwọrọ: etiti owom namke idiọk-mpọ, idiọk ido. Idiọk owom inamke etiti ido. 44Nsọ ukem ikoro k'ediọọŋọ mme ọduuk eto esi ke mfuri mmọ. Sia owom inyuŋ itedke wọfa ke eto nkukum, inyuŋ itedke asokoro ke upaap.#6:44 Ikọọ inua ma odunam fo ọwuri sutọ owom ofo edede 45Ke ntoro, etiti owom atiŋ ntiti ikọọ sia ekikere esid edede etiti. Idiọk owom anam idọk mpọ sia esid ese ekere ibak. Ndien ikọọ ọwọrọde owom ik'inua ọwuri utọ ekikere esid ese.
IBỌM UFỌK KE ỌSỌŊIDEM ITIAD IDAKISỌŊ
Matio 7:21-27
46Nenso anam mf'ikoodde min ‹Ọbọọŋ, Ọbọọŋ› ede mf'inamke se emi ndọhọde mfo inam?
47Yak nam anwaŋa mfo, owom eken edide ekeene min, apaŋ utọŋ ọnọ upeebi mpọ mi, amaana nam mmọ.
48Enye ebid owom ọbọbde ufọk. Etibi isọŋ enye otuŋe esin itiad idakisọŋ, ndien enye ọbọb ufọk ke onyuŋ itiad ikoro. K'idaha ukwọ edim edide, ewe idibede k'ufọk ikoro, ikanke iyed eme osio sia mmọ ọbọb eme ododi k'itiad idakisọŋ. 49Ede, owom keen ekedede okopde upeebi mpọ mi inyuŋ anamke, enye anante owom eken ọbọbde ufọk ede isinke itiad idakisọŋ. Ede enye ọbọb ufọk ikoro ododi ke onyuŋ mbubuem. Muuŋ ewe idisibi ufọk ikoro, eyed eme osio ndien enye onyuŋ owure.
Currently Selected:
Luk 6: NKZ
Highlight
Share
Copy
Want to have your highlights saved across all your devices? Sign up or sign in
Nkari Bible by Beyond Translation is licensed under Creative Commons Attribution-ShareAlike 4.0 License.
