Lukasi 1

MALOBA MA LUKASI MA MAKOMELAKA YO Théophile.

1Moto wa lokumu Théophile, mpe bato baike, bailidzaka bokomi makambo mamatubaka o ntei ya biyo mpo ya Yezu. 2Bakomaka makambo bè dza wamaokaka ba ndenge'eyamalobaka bato bababa batemo oebandeli. Banà batemo baba batatoli ba nsango eeki makambo manana, nampino batoyedzi ena nsango. 3Nga menyi koto nawaaka na mayele mamèeme 'te naeba ndenge'eyatubaka makambo manana. Nde na kanisaka 'te yaaba walamu nga mpe naekomela we Théophile mpo 'te naeyebisa polele makambo mamatubaka. 4Nakadzi oeba 'te makambo ma maeyebisaka bato mpo ya Yesu malo masolo.

Andzelu aebisaka bobotami bwa Yoane Mobatisi

5Yabaka na nganga wa Nyaamolo moko nkombo yande Zakaliya owabaka o ntango ya Elode owabaka akayengela engumba ya Yudea. Aba wa'etuka ya banganga ba Nyaamolo na nkombo ya Abiya. Yo na mwadzi wande babaaka bakitani banganga wa Nyaamolo wa Isalaele wa yambo Alona. Nkombo yande yabaaka Elizabeti. 6Zakaliya na Elizabeti baba babèebe babale sembo o yambo ya Nyaamolo. Elimbodzi 'te, batosaka mibeko mimèeme mya Nyaamolo. 7Kasi, baakobaka na bana te mpo Elizabeti aakobaka na makoki ma boboi te mpo abaaka ekomba Mpe babèebe babale bakomaka bikolokolo. 8Mokolo moko Zakaliya aba akaala mosala mwaba mwa bonganga bwa Nyaamolo, mpo yabaaka ntango yaba ya lisanga nampino baponoko Zakaliya 'te akatumbela Nyaamolo mpaka ya malasi o ntei ya tempelo. 9Yabaka momeseno mwa banganga ba Nyaamolo 'te babeteke zeke mpo 'te badziya mokano mwa boponi nganga wa Nyaamolo owatumbela nkolo malasi ma ansa o tempelo. Yabaka mosala mwa banganga ba Nyaamolo, nde nkombo ya Zakaliya ya ponomoko. 10Dza momeseno, boike bwa bato baanganaka mpo ya bokumisi Nyaamolo baba bakasambela o ndzei ya tempelo o ntango eyaba Zakaliya akatumba malasi ma ansa o ntei ya tempelo. 11Ntango eyabaka Zakaliya o ntei ya tempelo, andzelu owatomamaka na Nyaamolo, amotokoledzi o eboko ya elomi ya etumbelo ya mpaka malasi. 12Zakaliya aèni Andzelu mpe abangi wakudzi. 13Kasi Andzelu alobi nande 'te: "Zakaliya we nakobanga te mpo Nyaamolo aoki losambo lao. We na Elizabeti mwadzi wao, bwadziya mwana wa lele mpe bwamobelenga na nkombo Yoane. 14Bwaoka esengo na bobotami bwa Mwana wa bino mpe bato baboko baike basepela mpo ya bobotami bwande. 15Aaba moto monene o miyo ma Nyaamolo, na motuya mpendza, akomwa vinyo to mpe iyoma iyoko ya bolangidza te, mpe atonda na Elimo santu dzina o libumu dza Nyango wande. 16Aolodza bato ba Isalaele baike baolodza o nkolo Nyaamolo waba. 17Aaba moto owalanda o yambo ya nkolo na ngwiya mpe na molimo mwa mosakoli Eliya. Yo aya o yambo ya nkolo, ayaloleya mitema mya bato mpo ya boyei bwande. Aolodza bookani o ntei ya batata na bana baba, mpe adzongidza milimo ma bato ba lofundo, baakokala bondimi bwanya bwa Nyaamolo te. 18Zakaliya atunaka Andzelu 'te: "naeba'éndenge baa? 'Te makambo ma malobi we maasalema ya solo? Nalo ekolokolo, mpe mwadzi wanga alo koto ekolokolo mpo tobota bana." 19Andzelu alobi nande 'te: Nkombo yanga Gabriele nakaba nakateleme o yambo ya Nyaamolo. Nyaamolo antomiki 'te naelobela nsango ndamu ebo mpo ya mwana wao wa lele. 20Kasi oka walamu, dza otèi we booki maloba manga, waikala mbubu kina wa botama mwana wao wa lele. Makambo mabo maalema o ntei ya makambo maeyebisiki nga. Mpe makambo mamèeme maeyebisi nga, maalema o ntango yama." 21Ntango'eyaba Zakaliya yo na Andzelu bakasolola o ntei ya tempelo, bato babaaka o ndzei bakadzila Zakaliya, watokoo yo o ndzei. Baba bakamituna ntina eyaikalaka yo ntango'elai o ntei ya tempelo. 22Nsima Zakaliya autaka o tempelo atokoi, akokokaka bosolodzi naba te. Nampino baebaka na bilembo mpe na bodzangi maloba 'te aèni eyenelo yoko omoo o tempelo. 23Ntango' eya kokaka poso yande ya mosala o ntei ya tempelo, alodzaka o ndako yande. 24Nde na mwa ntango ekèke, mwadzi wande Elizabeti akomaka na dzemi mpe atèeke boèneni na bato ntaka elai sanza itano. 25Alobaka 'te: ''eka likambo lilinsaledzi nkolo mikolo mibo, anteidza mawa mande na bonsumodzi iyôni yanga o ntei ya bato babèebe o mbula ibo 'te, ampinya likoki dza boboyi mwana o ntango ebo.

Andzelu aebisaka bobotami bwa Yesu.

26Ntango'eyakomaka dzemi dza Elizabeti sandza motoba, Nyaamolo atomaka Andzelu Gabriele, o etuka eya belengaka ba nkombo 'te: Nazarete o engumba ya galileya. 27Andzelu akèeke o moeka moko na kombo 'te Maliya. Abaka mobandami wa mwana moko walélé na nkombo Yozefu, owabaaka moto wa eboto ya mokondzi Davidi. 28Andzelu ayei o ndako yande mpe alobi 'te:" mbote Maliya, sepela mpo Nyaamolo alo nao. Mpe aepambodzi botubi balibato babèebe. 29Nde ntango'eyaokaka Maliya makambo ma malobaka Andzelu, amitungisaka wakudzi mpe abaaka akamituna o motema mwande waike 'te aeba ntina ya mbote enena. 30Kasi Andzelu alobaka nande 'te, "Maliya nakobanga te! Mpo 'te Nyaamolo akanaka 'te ateidza bolamu. 31Oka likambo libo. Waadziya dzemi mpe wa bota mwana walélé. Wa moteya nkombo 'te Yezu. 32Yo aba moto monene mpe bato bamobelenga mwana wa lele wa Nyamolo olo o likolo. Nkolo Nyaamolo amokomidza mokondzi likolo dza bato bande, ndenge dza owabaaka nkoko wande Davidi. 33Aaba mokondzi o likolo dza bakitani ba Yakobo libela na libela. Mpe bokondzi bwande bwakoba na nsuka te. 34Nde Maliya atuni andzelu 'te:" ndenge bani'ekoki nga bodzii mwana?" Mpo nalo niino mongondo nakomoebe niino balomi te!" 35Andzelu alobi nande 'te: elimo santu yàya o likolo dzao. Mpe ngwiya ya Nyaamolo oleki likolo yaedzinga we mpe yaala 'te odziya dzemi mpo mwana mosantu abotama utama nao, bamobelenga mwana wa Nyaamolo. 36Oka likambo libo! Eka mwanyongo Elizabeti mpe abota mwana walélé, ata akomi mokolu waike, bato baba bakaloba 'te akobota te, kasi akomi na dzemi dza sanza motoba. 37Mpo likambo dzoko litubi Nyaamolo na bokudzi likoomoi te. 38Nampino Maliya amoololedza 'te: "nalo moombo wa nkolo Nyaamolo" leme mpo iyèye iyalema dza olobi we. Nampino Andzelu amoiki o maana mpe yo akèi.

Maliya akèi likaeka Elizabeti

39Nsima ya mwa mikolo, Maliya amilèngèlèkè mpe akèi mbango o mboka yoko ya Yudea eyabaka o ntei ya bangomba. 40Ngonga'eya ekoma yo, aingedzi o ndako ya Zakaliya mpe ainyi Elizabeti losako. 41Ntango'eyainya Maliya Elizabeti losako, aoki bè mbala yawi mwana anyingani na' esengo o ntei ya libumu dza Elizabeti. Nde Elizabeti atondaka na ngwiya ya elimo santu. 42Abekaka na mongongo mokudzi na nsai mpe alobi: Malia, Nyaamolo apambodzi waike botubi balibato babèebe. Mpe Nyaamolo abenisi mwana owabota we. 43Naoki Bolamu boleki! Na ntina 'te nyango wa nkolo wanga ayei liyanseka o ndako. 44Mpamba te, ntango'eyoki nga mbote yao, mwana anyingani na esengo o ntei ya libumu dzanga. 45Nkolo Nyaamolo aempambodzi mpo 'te wandimaka 'te nkolo akokisa elaka yande o ndzoto yao. 46Nampino Maliya alobi:" Na bomoto bwanga bubwèebwe na kumisi Nkolo Nyaamolo." 47Mpe natondi na esengo mpo ya Nyaamolo, mpo alo mobikisi wanga. 48Mpamba te, Nyaamolo a'eki bomikitisi bwa moombo wande; banda lelo bato ba mbelenga mwalimoto o pambolami. 49Mpo 'te Nyaamolo wa bokasi bwèebwe alo mosantu mpo aadzi makambo ma bokamoi mpo yanga. 50Mpe mawa mande maba ntango iyèye o ntei ya bato bakamobanga. 51Aadzi makambo ma manèene na ngwiya yande, a'olidza bato ba lofundo mpe bakakanisa 'te balo bato banene. 52A'olidza bakondzi obiika byaba bya lokumu mpe atombondzi bato baka mi'olidza. 53Adzeidzaka bato bababa na nsala ya toma tolamu mpe apandzi badzii maboko matooto. 54Atosungi biyo ba Isalaele, bato bande na bototeidza bolamu bwa Abalayama mpe batike bande mpo ya libela. Enena akokisi elaka eyainyaka yo bankoko ba biyo" 55Na'Abalayama mpe bana bande seko na seko ndenge'eya lobaka yo, na bankoko ba biyo. 56Maliya adzalaka na Elizabeti upe na sanza iyato mpe a'olodzaka o ndako yande o Nazarete.

Bobotami bwa Yoane Mobatisi

57Ntango eleko ya Elizabeti ya boboi wa'ekokaka, abotaka mwana wande wa walélé. 58Nampino bamwanyango ba upe na Elizabeti na mpe liya dzande ba baokaka ndenge'eya mookelaka Nkolo mawa maike 'te amoinya mwana wa lele, badzalaka nande eika yawi mpe basepelaka na bobotami bwa mwana wande. 59Wakokaka mikolo mwambe, o bobotami bwande, baboti bande bakei nande mpo ya bomoteni gaza bokokani na mibeko ma moize. Bakanisaka 'te bamoteidza nkombo ya tata wande Zakaliya. 60Nampino mama wa mwana alobi naba 'te botooto, bamobelengaka Yoane. 61Balobi nande 'te Tokanisiki 'te wainya mwana nkombo yoko ya moto moko wa bino wa libota. 62Nampino batunaka tata wa mwana Zakaliya na bikela, mpo baeba nkombo bani eya mobelenga ba; 63Zakaliya aongi mwa iteni ya libaya na bikela mpe akomi 'te: "nkombo yande elo Yoane." Mpe bato babèebe bakamoi. 64Mbala yawi, mongongo mwande modziboi mpe alobi 'te: "Nyaamolo adzia lokumu". 65Bato babèebe babadzalaka upe naba, bakamoi wakudzi mpe babangi. Mpe moto mumwèemwe okodzalaka oba mboka ya ngomba ya Yudea, babaaka bakaloba makambo mèeme ma maalemaka. 66Bato babèebe ba baokaka ena nsango baba bakabomba sekele o ntei ya mitema myaba mpe bakamituna 'te: Ona mwana aba'endzaa? Mpamba te, eboko ya Nkolo elo'o likolo dzande.

Lisakoli la Zakaliya

67Ango wande Zakaliya atondaka na ngwiya ya'Elimo santu, mpe asakolaka nsango'eyakalaka Nyaamolo 'te aloba. 68Leme 'te nkolo Nyaamolo akumisama, Nyaamolo wa Isalaele, mpamba te, ayei liya'ikola bato bande. 69Atoyeedzi lobiko mpe mobikisi wa ngwiya o libota dza mokondzi Davidi mosali mwande. 70Akokisi elaka yande eyainyaka yo kala o monoko mwa mosakoli wande mosantu wa ntango ya kala. 71Atobikisa o maboko ma banguna mpe bato babèebe bakatoinaka mpo todziya lobiko. 72Nyaamolo aalaka dzabona Mpo ya boteidza mawa mande o bankoko ba biyo, mpe mpo ya bokanisi bookani bwande naba bosantu. 73Ekelimbola 'te akokisaka Ndai eyakataka yo na bookani bobwaokanaka yo na nkoko wa biyo Abalayama 'te: 74Mpo 'te Atobikisa o maboko ma banguna ba biyo; na ntina 'te tokoka bosaledzi Nyaamolo na bodzangi bobangi. 75Bolandi o ntei ya bosantu mpe bosembo, o miyo mande, Mikolo mimèeme o bomoi bwa biyo. 76Nampino we mwana wa Nyaamolo, Baebelenga mosakoli wa Nyaamolo o tubi likolo; Mpamba te, wakè o yambo yande, mpo ya bololei bato. 77Mpo ya boteidza o bato bande 'te, Nyaamolo abainyi lobiko uta na bolimbisi bwa masumu maba. 78Mpo ya mawa ma nyaamolo wa biyo; Na Ntina'enena moi mwa ntongo mwatoyela uta o likolo. 79Mpo ya bongengidza bato ba bakangama o ntei ya dzombi mpe, mpo ya bolandidza makolo ma biyo o mokanga mwa kimia. 80Mwana akolaka, adziaka ngwiya ya elimo santu, mpe adzalaka o esobe kino mokolo mu mwamiyenidzaka yo o Isalaele.

Currently Selected:

Lukasi 1: LIZ

Highlight

Copy