Apastil Nani Sturka 21

Pal Jerusalem ra auya

1Wan muihni nani wina mahka swi si, duri tara ra aimaki ban Cos ra bal banhri, yu wala Rodas ra, baha wina Pátara kat sin. 2Pátara ra duri tara kumi Fenicia ra waia kan ba wal prawi banhri. Yang nani baha duri tara ra aimakri, bara mahka kabu ra taki impaki banhri. 3Yang nani lui auna kan piua ra, Chipre kî dakura ba kaikri. Baha ba wan mihta smihka tani ra swi si, ban Siria kat impakan. Duri tara ba Tiro tawanka ra diara nani kwahki brih auya ba sunaia kan, bamna bahara yang nani dimi wari. 4Bahara yang nani kristian nani aikuki prawi, wik kum takaski banhri. Spirit Holikira mita naha kristianka nani ra win kan, Pal ra wibia Jerusalem ra wabia apia. 5Sakuna wik kum ba luan ningkara, yang nani mahka taki impakri. Lalukra nani sut ai maya mairin nani, ai luhpia nani aikuki yang nani yuli kahbi tawan ba wina takan, bara auhya ra luli kriki, puri suni banhri. 6Bara yang nani pana pana laikula dauki si duri tara ra aimakri; bara witin nani lika mahka ai watla ra wan.

7Yang nani impakanka ba ban bri katna Tiro wina Tolemaida kat. Bahara wan muihni nani ra yang nani lakula daukri, aikuki sin yu kumi takaskri. 8Yu wala, Pal bara ya nani wala sin yang nani wal kan ba aikuki Sesaria ra wih banhri. Bahara yang nani Pilip#Ap St 6.5; 8.5. watla ra aidrubi wari; witinka sturi yamni ba twatwilkra kan, serts tâ upla 7 kan ba wina kumi kata. Witin wal takaski banhri. 9Pilip lika luhpa mairin walhwal bri kan, kau maya briras; baha nani Gâd sturka yamni smasmalkra kan. 10Yang nani bahara pat yu ailal takaskri kan, bara Judia wina prapit kum balan, nina ba Agabo kata.#Ap St 11.28. 11Witin ba yang nani ai kaikaia balan. Bara Pal maisa wila ba brih, ai mina nani bara ai mihta nani sin priski, naku aisin:

—Spirit Holikira bila, Jerusalem ra Ju nani naha maisa wila dawanka ra naku priski, Ju apia nani mihta ra mangkan kabia.

12Naha diara na walan ningkara, yang nani bara Sesaria uplika nani kira Pal ra makabri witin Jerusalem ra wabia apia. 13Sakuna Pal win:

—¿Dîa kan man nani ini, kupi ra sari ai dingkisma ki? Kan yang ridi sni ai priskan kaia baman apia, sakuna Jerusalem ra sin pruaia Dawan Jisas tâwan.

14Witin sip wan bîla walras kan bamna, yang nani ban swi si, naku wisatna:

—Dawan ai kupia lâka ba kat man wal daukbia.

15Naha diara na ningkara, yang nani ridi taki si Jerusalem ra wari. 16Sesaria wina kristian nani tila wina yang nani wal wan. Witin nani tilara Chipre wina waitna kum kata, nina Mnasón, witin ba pat piua wihka kristian kan; bara witin watla ra takaski banhri.

Pal bui Jems wih kaikan

17Yang nani Jerusalem ra wari ba ra, wan muihni nani mita liliakira wan brin. 18Yu wala ra, Pal yang nani aikuki wari Jems kaikaia; bahara serts tâ upla nani sin bâra kan. 19Pal baha nani ra lakula daukan, ningkara diara bani Gâd bui witin bâk Ju apia nani ra daukan ba sut maisa pakan. 20Baha nani ba naha diara nani na walan ba ra, Gâd ra mayunan. Ningkara, witin nani Pal ra win:

—Muihki, man sin kaikisma nahki Ju nani tausin ailal kasak lukan sa, witin nani sut wisa, Moses lâka ba kulkaia sa. 21Witin nani ra win sa, man mita smalkisma baha Ju nani Ju apia tasbaya ra iwi nani ra, Moses lâka ba kulkaia apia, ai luhpia nani ra sin Aisa sainka daukaia apia, wan lâka nani ba sin nina blikaia apia. 22¿Bamna naha wina dîa kabia? Man balram na upla nani walbia sika. 23Bamna pain kabia man naku daukma: Wan tilara waitna walhwal nâra sa, witin nani pramis kum daukaia brisa. 24Man bui witin nani ba brih was, aikuki sin wih wînam klin dauks, dîa tikaia nani mana ba sin aibaps, bara ai tâwa irbaia sip kabia.#Kul K 6.13-21. Upla sut baha kaikbia bara ai dara walbia, man dukiamra diara walan ba lika kasak apia sa, sakuna lukbia man sin Moses lâka ba kulkisma. 25Sakuna Ju apia nani kasak lukan lâka alkan ba dukiara lika yang na lâ daukri ba pat ulbri sa: gâd bahki nani ra sakripais daukan wîna ba piaia apia, tala sin apia, daiwan katwi pruan wîna ba sin piaia apia, bara upla kum marit takras kaka ai maya ba briaia apia sa.#Ap St 15.29.

Pal tempel ra kan alki priskan ba

26Bamna Pal ba yu wala, waitna walhwal ba brih wan, bara witin nani aikuki ai wîna klin daukaia lâka ba daukan. Ningkara, tempel ra dimi maisa pakan ahkia pali baha warkka ba dauki tnata alkbia ba, witin nani kumi bani ai prisantka ba ahkia sal daukaia sapa.

27Pat wik kum tnata ba alkuya kan ba ra, Asia tasbaya wina Ju tila nani bâra kan ba kaikan Pal tempel ra kan, bara baha nani upla nani ra maisa kapi turbi, Pal ba prak alkan. 28Bara witin nani ai bîla baikra karna winan: “¡Israel waitnika nani, hilp wan muns! Bika, naha waitnika sika plis sut ra smalki taukisa, wan nisanka mapara, bara Moses lâka bara tempel na mapara sin. Baha purkara, kaiks, tempel ra sin Ju apia nani sal dingkan, bara naha pliska holi na tâski daukisa.”

29Baku aisi banhwi kata, kan baha piua kainara witin nani Pal bara Trófimo,#Ap St 20.4. Epesus wina ba wal tawan bilara kan kaikan bamna, bara witin nani luki kan Pal bui baha waitnika tempel ra brih wan kan.

30Tawan aiska ba kupia turban pali takan, bara upla nani sut plapi aidrubi balan. Bara Pal ba alki raski, tempel ba wina sakan. Baha pali piua ra upla dur nani sut ba prakan. 31Witin nani Pal ba mahka ikaia luki kan. Bara Rom kamandanti ba sturi walan, Jerusalem tawanka aiska ba turban pali sa. 32Kamandanti ba ai suldiar nani ba bara suldiar nani bara kiaptin nani ba sin asla kuki brih, upla nani bâra kan ba kat plapi wan. Witin nani kamandanti bara suldiar daknika ba kaikan ba ra, Pal ra pruki kan ba, mahka swin. 33Bara kamandanti ba, Pal lamara wih alki, adar yan sîn wâl ni priskbia; bara makabi walan witin ba ya, bara dîa sin daukan sapa. 34Sakuna upla nani ba wini, sât sât man aisi kan, bara kamandanti ba sip pain diara walras kan, bin ba mita. Bamna witin adar yan Pal ba kwartil ra brih waia. 35Kwartil tipska ra wan ba ra, suldiar nani mita Pal ba alki purara buki brih waia kan, upla uya aihka pali lawi kan ba mita. 36Upla nani Pal nina ra aidrubi aula kan ba mita wini aisi kan: “¡Witin ba pruaia sa!”

Pal yaban ai tâwan aisin ba

37Pal ba kwartil ra dingkaia brih auya kan ba ra, witin kamandanti aiklaklabra daknika ba ra win:

—¿Diara man wal aisaia sip sna ki?

Kamandanti ba bila:

—¿Man Grik bîla aisisma ki? 38Bamna, ¿man baha Idsip waitnika kata ba apia ki, pat piua nani luan ra witin, mapara buaia warkka kum daukan, bara war aiklaklabra 4,000 brih upla iwras tasbaya ra wan ba?

39Bara Pal bila:

—Yang lika Ju, Tarso wina, Cilicia kuntrika tawanka kumi kau tara kulkan ba wina. Sakuna, pliskam sans wiria aik upla nani ra aisaia.

40Bara kamandanti ba mita sans yan aisaia, bara Pal mahka tips ra bûi, upla nani ra ai mihta ni sain yan sâp takaia. Upla sut sâp takan ba ra, witin Hibru bîla ra naku aisin:

Currently Selected:

Apastil Nani Sturka 21: MSKTU

Highlight

Copy