Apastil Nani Sturka 9

Saulo ai kupia lakan ba

(Ap St 22.6-16; 26.12-18)

1Baha pali piua ra, Saulo lika Dawan ra luki uplika nani ra rausauhki, ikaia sin pliki kan. Bamna witin prîs tara ra wan. 2Bara lâ daukaia karnika wauhkataya nani makaban, witin baha ba wal Damaskus Ju nani priaska watla nani ra wih plikaia, baha nani sturi yamni nina bliki ba sut alki Jerusalem ra bri sal silak ra atia mangkaia, waitna nani sapa, mairin nani sapa. 3Sakuna witin yabal ra auya kan, pat sin Damaskus lamara balan ba ra, kasbrika purara ba wina ingni kum bal witin ra kir ingwan. 4Bamna Saulo tasba kat kauhan, bara bîla baikra kumi walan witin ra naku aisi kan: “Saulo, Saulo, ¿dîa kan man rau ai sauhkisma ki?”

5Bara Saulo pana makabi walan: “¿Man ba ya sma ki, Dawan?” Bara bîla baikra ba naku win: “Yang sika Jisas, man bui yang ra sika rau ai sauhkisma ba. 6Man mahka bûi tawan ra dims, bahara mai wibia man dîa daukaia sma ba.”

7Waitna nani Saulo wal impaki kan ba sut tâ iwan pali takan, kan witin nani bîla baikra walan, sakuna upla kumi sin kaikras kan. 8Ningkara Saulo tasba wina buan, sakuna ai nakra kwâkan ba ra, sip diara kaikras pali kan. Baku bamna, witin nani mita ai mihta ra alki Damaskus ra brih wan. 9Bahara yu yumhpa kan diara sip kaikras, plun piras, diara sin diras.

10Damaskus ra lalukra kum iwi kata ai nina ba Ananías; witin ra Dawan mita diara aihka mariki, naku win: “¡Ananías!” Bara witin pana win: “Nâra sni, Dawan.”

11Bara Dawan mita naku win: “Man bus bara yabal kum nina Wapni wi ba kat was, bara Judas watla ra wama ba ra, Tarso wina waitnika kum nina Saulo wi ba dukiara makabi wals. Witin ai pura sunisa, 12bara diara aihka kaikan, nahki waitna kumi nina Ananías wi ba bal dimi ai mihta nani witin ra kahbuya, kli ai nakra diara kaikbia dukiara.”

13Naha walan ba ra, Ananías bila: “Dawan, baha waitnika dukiara upla ailal ai win, nahki diara saura manis daukan, man uplikam nani Jerusalem ra iwi nani ba mapara. 14Bara nanara witin Damaskus ra aula kan, prîs tara nani wina karnika brih, baha nani man ninam ra ai pura suni nani ba alki priski silak ra brih waia.”

15Sakuna Dawan bila: “Man was, kan yang baha waitnika ba pliki sakri sa, yang dukira witnis aisaia, nisan wala nani ra bara ai kingka nani ra, bara Israel luhpia nani ra sin. 16Yang mita witin ra marikamna nahki pât nani uya yang dukira wahwaia ba.”

17Bamna Ananías wan Saulo bâra kan ba watla kat. Witin diman, bara ai mihta nani witin ra kahbi, win:

—Muihni Saulo, man aulma kapram bara yabal ra Dawan Jisas wal prawram ba mita ai blikan man namkra kli yamni briaia, bara Spirit Holikira ni sin aibanhma dukiara.

18Baha pali piua ra ai nakra nani wina inska taya nani baku kauhan, bara kli sip kan diara kaikaia. Bamna Saulo mahka buan, bara tahbi sin daukan kan. 19Baha ningkara plun pin, ai karnika sin brin, bara lalukra nani Damaskus ra kata nani ba wal yu kulki takaskan.

Saulo Damaskus ra smalkisa

20Ningkara Saulo lika mahka prias watla nani ra smalkan. Witin aisin Jisas ba kasak Gâd Luhpia sa. 21Baha nani wali kan ba sut aihka luki, naku win:

—¿Naha sim waitnika apia, Jerusalem ra Jisas nina mâki ai pura suni nani ra rausauhki kata ba? ¿Bara nahara sin balan apia baha nani alki priski bri si prîs tara nani mihta ra mangkaia?

22Sakuna Saulo lika kau karnakira smalki mariki kan, Jisas ba Misaya sa. Ju nani Damaskus ra iwi nani kan ba sut pana sip diara aisaras kan.

Saulo Ju nani wina swak takan

23Yu ailal luan ningkara, Ju nani ai mânka asla taki lâ daukan Saulo ba ikaia. 24Sakuna witin mita baha walan. Kakna bara tihmia sin witin nani tawan wina takaia getka ra aihwaki banhwi kan witin ra ikaia. 25Sakuna lalukra nani mita baskit tara kum bilara mangki, tawan walpaya kutbanka bâk alahbi ikan latara, bara baku witin ba swak takan.#2 Ko 11.32-33.

Saulo Jerusalem ra ba

26Saulo Jerusalem ra wan ba ra, trai kaikan lalukra nani wal asla takaia, sakuna sut mita witin ra sibri kan. Witin nani mita pain lukras kan, Saulo ba kasak Dawan ra tawan sapa. 27Ban sakuna, Bernabé bui witin ba apastil nani ra bri si mariki win, nahki yabal ra Dawan wal prawan ba, bara nahki sin Dawan Saulo ra aisin ba, bara Damaskus ra sin witin sibrin âpu kira Jisas nina bri mâki smalkan ba. 28Bamna Saulo Jerusalem ra takaskan, lalukra nani aikuki sin asla tauki kan. 29Witin ai kupia aiska ni Dawan nina bri mâki aisi kan, bara Ju uplika Grik bîla aisi nani ba wal aisi blahwi kan, bamna baha nani mita trai muni kan witin ba ikaia. 30Wan muihni nani mita naha na kaikan ba ra, Saulo ba Sesaria ra brih wan, baha wina Tarso ra blikan wan.

31Bamna serts ba, Judia ra, Galili ra, Sameria ra, baha tasbaya aiska ba kupia kumi spirit bri pâwi kan. Witin nani Dawan sibrinka ra iwi banhwi kan, Spirit Holikira hilpka ra, bara kau ailal taki kan.

Eneas ba rakan

32Pita aimaki wan muihni nani ba kaikaia. Witin Lida ra sin wan, lalukra nani bahara iwi kan ba kaikaia. 33Bahara witin waitna kum wal prawan nina Eneas, witin 8 mani krikri ra prawi kan, wakia lâwan sikniska bri kan bamna. 34Bara Pita bila:

—Eneas, Jisas Kraist mai rakuya. Bûi muni, krikrikam ba pain dauks.

Baha pali piua ra Eneas mahka buan. 35Bamna Lida ra bara Sarón ra iwi nani ba bui witin ba kaikan, bara sut ai lukanka almuk nani ba mahka swi si, Dawan nina blikan.

Dorcas ba pruan wina bukan

36Baha piua ra, Jope tawanka ra lalukra mairin kum kan ai nina ba Tabitá, Grik bîla ra lika Dorcas mâki kan.#9.36 Aram uplika nani wisa Tabitá, bara Grik nani sim bîla ba wisa Dorcas. Miskitu nani wisa Sula. Naha mairka ai rayaka yua nani aiska ra diara yamni man dauki kan, upla umpira nani ra sin uya hilp muni kan. 37Baha yua nani ra Dorcas ba siknis alkan bara pruan, bamna ai wîna tara ba tahbi saki muni, bri si pura rumka kum ra dingki tnikan. 38Jope lika Lida tawanka wal baila kan, bara lalukra nani Jope ra iwi kan ba walan, Pita lika Lida ra sa. Bamna waitna wâl saki blikan, naku maisa pakaia: “Pliskam takaskras, Jope ra bal.”

39Bara Pita witin nani aikuki wan. Witin balan ba ra, brih wan wîna tara tnikan ba rumka kat. Piarka nani sut witin ra bal ai tnaya ra kir bûi, ini mariki kan prâk nani, kwala wala nani sin Dorcas mita kau raya kan piua ra sipan nani ba. 40Ningkara, Pita win baha nani sut ba latara takbia, bara witin ai lula kriki ai pura sunan. Mairka pruan ba kat kaiki, naku win:

—¡Tabitá, man mahka bus!

Bamna mairka ba ai nakra ilingki Pita ra tawi kaikan, bara mahka bûi iwan. 41Pita bui mairka ba mihta ra alki bukan; ningkara lalukra nani bara piarka nani ba sut paiwan balan, witin nani ra marikan Tabitá ba kli rawan sa. 42Naha sturka na Jope tawanka aiska ra wali banhwan, upla ailal sin Dawan ra kasak lukan. 43Bara Pita lika yu ailal baha tawanka ra takaskan, daiwan taya lâkaia saika dadingkra kum nina Saiman wi ba watla ra.

Currently Selected:

Apastil Nani Sturka 9: MSKTU

Highlight

Copy