Impakan Sturka 14
14
Israel luhpia nani Kabu Pauni luan ba
1Dawan ba Moses ra aisi, naku win:
2“Israel luhpia nani ra wis witin nani kli ai bilara tawi wih Pi-hahirot mawan kat ai tintka watla nani ba mâkbia, Migdol kabuka un ba wal lilkapas ra, Baal-sefón mawanra. Baha tasbaya ba mapa tani kat ai tintka watla nani ba mâkaia sa, kabu un lamara. 3Baha mita king fero lukbia: ‘Israel luhpia nani ba aimawahkan, witin nani anira waia sin kaikras sa.’ 4Ban sakuna, yang mita king fero ba kupia karna daukamna, bara man nani ninam blîkbia; baha piua ra yang karniki ba witin ra marikamna. War aiklaklabra daknika nani ba sin karniki kaikbia, bara Idsip uplika nani ba sin baha piua ra kaikbia, yang sika Dawan sna ba tânka.”
Bara Moses win ba baku, Israel luhpia nani ba daukan. 5Nanara Israel luhpia nani, Idsip wina taki wan nani ba, king ra maisa pakan bara witin ai uplika tara nani ba sin kli ai kupia lakan bara upla nani ba dukiara luki naku win: “¿Kuna yawan nahki pali wisi baku daukan, Israel luhpia nani ba yawan wan warkka dauki kan ba, ban baku swika taki waia?”
6Bara baku luki king fero, witin war aiklabaia waginka ba ridi daukan, bara war aiklaklabra wala nani ba sin ridi dauki brin witin wal waia. 7War waginka kau pain nani ba 600 saki brin, bara war waginka tara kum mangkan tâ briaia, bara baha nani sut wal taki wan. 8Bara Dawan mita king fero ba kupia karna kaia daukan, Israel luhpia nani ba ban nina bliki waia, baha nani karnika tara wal taki wan sakuna.
9Idsip uplika nani war aiklaklabra nani ba sut, wagin nani araska âiulra nani ba sin sut, Israel luhpia nani nina bliki taki wan. Bara kabu un lama kat nina bliki balan, Pi-hahirot kat Baal-sefón lamara, bahara witin nani ai tintka watla nani mâki bapan kan. 10Israel luhpia nani ai dara walan, king fero bara Idsip uplika nani aikuki pat ai lamara aula kan ba. Witin nani sibrin pali daukan bara mahka Dawan ra ai pura sunan. 11Bara witin nani tawi Moses ra win:
—¿Idsip ra raiti âpu kan ki, man baha wina wan sakram bara naha upla iwras tasbaya ra yawan prui tiwaia wan daukram? ¿Dîa muni yang nani ra naku wan daukram? ¿Dîa muni Idsip wina wan sakram? 12Naha naku takaia kan ba dukiara sika yang nani Idsip ra mai aisi katna ba: ‘Ai swis, yang nani Idsip uplika nani dukia dauki kamna; kanra yamni kan yang nani ra Idsip ra witin nani ai albika taki kaia, sakuna naha twi saura tasbaya ra bal naku prui tiwaia lika apia.’
13Sakuna Moses pana tawi witin nani ra win:
—Man nani si bripara, kupiam karna dauks bara kaiki bas man nani swaki mai sakaia dukiara naiwa Dawan ai warkka daukaia ba; Idsip uplika nani naiwa man nani kaikisma na, witin nani ba man nani kli kaikma apia. 14Man nani sâp taki kaiki bas, Dawan mita man nani tâmwan aiklabaisa bamna.
15Bara Dawan bui Moses ra win:
—¿Man nani dîa dukiara yang ra tawi ai kaiki inisma? Israel luhpia nani ra wis, witin nani mahka ai kainara wabia. 16Mihtam ra dus brisma ba kabu purara buki alki bris, kabu ba lilak baiki laks bara yabal takbia, baha tasba lâwan takbia bâk Israel luhpia nani ba wapi lui wabia. 17Yang bui Idsip uplika nani ba kupia karna daukamna, bara witin nani sin Israel luhpia nani nina bliki kabu lilapas bâk lui waia wisi wabia. Bara bahara yang bui king fero ra, war aiklaklabra nani ra bara aras âiulra nani ba sut ra sin, karniki ba marikamni. 18Yang karniki ba king fero war waginka nani bara aras âiulra nani ba purara sin mariki kamna. Bara Idsip uplika nani ba kaikbia, yang sika Dawan sna tânka ba.
19Baha pali piua kat, Gâd insalka bara kasbrika playka Israel luhpia nani tâura impaki kata ba, ai watlika ba wina kitwi taki, witin nani nina tani ra tawi aimakan. 20Kasbrika playka ba Israel luhpia nani bara Idsip war aiklaklabra nani ba wal lilapas kat aimakan. Idsip uplika nani ra tihmia tara baman yabi kan, sakuna Israel luhpia nani ra lika ingni baman yaban. Baha mita Idsip uplika nani ba, tihmia aiska Israel luhpia nani nina bliki kan, sakuna witin nani sip bliki alkras kan.
21Bamna Moses ai klahkla ba kabu purara sakban; bara Dawan mita lalma wina pâsa karna pali yaban krawan, tihmia aiska.#Law 77.16-20. Baku kabu ba lilak baiki tnaya wâl awala bîla baku sakan, bara lilapas bâk tasba lâwan takan. 22Bara tasba lâwan takan bâk, Israel luhpia nani ba kabu ba lui wan.#2 Ko 10.1-2; Hib 11.29. Lî nani baikanka ba, ai aihkika ra bara ai smihka ra bri kan.
23Bara king fero araska âiulra nani ba sut, ai waginka nani ba aikuki, witin nani nina bliki ban kabu lila kat wan. 24Mahka lalma kahbaia kan ba ra, Dawan Idsip war aiklaklabra nani ba kat kaikan kasbrika pauta klauhan playka ba wina. Bara witin nani ra sibrin tara dingkan, ai tilara turban lâka tara takan. 25Waginka wilwaika nani ba sin drapapa ra kakahwi kan, baha mita witin nani sip ai kanra waras kan. Bara Idsip uplika nani ba win:
—Kaisa yawan Israel luhpia nani mawan wina plapaia, Dawan ba witin nani tâwan yawan wan mapara aiklabisa bamna.
26Bara Dawan bui Moses ra win:
—Nanara klamhkla ba kli kabu purara sakbi bris, bara lî ba kli wal prawbia, Idsip uplika nani purara, war waginka nani aras bara âiulra nani ba sut purara sin.
27Moses ai klahkla kabu purara sakban, bara plapi swakwaia munan, sakuna Dawan mita witin nani sut ba kabu lilapas kat rungki tikan. 28Kabu bîla kwawan ba kli bal wal prawan bara king fero waginka nani, aras âiulra nani ba, war aiklaklabra nani sut, Israel luhpia nani nina bliki kabu ra dimi wan nani ba, kumi sin swak takras ailal takaskan. 29Ban sakuna, Israel luhpia nani lika tasba lâwan bâk lui wan. Kabu laya ba kutbanka tara wâl kan, kumi ai aihkika ra bara wala ba ai smihka ra.
30Baha yua Dawan bui Israel luhpia nani ba, Idsip uplika nani mihta wina swaki sakan. Israel luhpia nani ba, Idsip uplika nani wîna tara prui kabu un ra awi ulan nani ba kaiki kan. 31Dawan wark karnakira nani Idsip uplika nani mapara daukan ba, Israel luhpia nani ba kaikan ba ra, witin nani Dawan sibrinka brin bara kasak lukan. Ai napakanka Moses ra sin kulkanka yabi banhwan.
Currently Selected:
Impakan Sturka 14: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
