Blasi Sturka 19
19
Sodoma bara Gomora Gâd bui sauhkan ba
1Tutni pat yu dimaia lamara, insal nani wâl ba Sodoma ra wan. Lot ba tawan getka lamara iwi kan, upla nani asla taki pliska ra. Bara Lot insal nani ba kaiki ai iwaika ba wina buan witin nani lakula daukaia. Witin ai mawan ra tasba kat bawan, 2bara Lot witin nani ra win:
—Dawanki nani, yang bui man nani ra mamkabisni, naha tihmia man albikam watla ra bal takaskaia. Bâra minam sikbaia sip sma bara yapaia sin, bara yauhka titan yabalkam ra impakaia.
Sakuna witin nani pana win:
—Apia, tingki, yang nani ban latara lalawamna.
3Ban sakuna, Lot witin nani ra kli taibi aisi kan bamna, witin nani ban âu takan bara watla ra wan. Witin nani utla ra diman ba ra, Lot witin nani ai dukiara tutni pata auhni kum daukan, brit îs âpu daukan, bara impapakra nani ba pin.
4Sakuna witin nani kau ai krikrika ra aitnikras kan ba ra, Sodoma tawanka aiska ba wina, waitna almuk bara wahma nani ba sut aidrubi balan, Lot watla ba kir kutbi brin, 5bara witin nani mahka Lot ra winan:
—¿Waitna nani tihmia wamtla ra bal diman nani ba anira sa? ¡Lata ra sâks! ¡Witin nani wal yang nani yapan ai daukisa!
6Bara Lot latara takan witin nani wal aisaia, sakuna ai durka ba lika pain praki si takan, 7bara witin nani ra win:
—Upliki nani, man nani ra mamkabisna baha saurka pali lika man nani daukpara. 8Kaiks, yang luhpi mairin tiara pali wâl brisni, kau waitna wal taukras pali. Yang bui witin nani ba saki maikamna, bara witin nani wal man nani dîa daukaia brin mai dauki ba kat dauks. Sakuna naha waitnika nani ra lika diara munpara pali, kan witin nani ba yang mita paiwi waitla ra bri balri bamna.
9Sakuna witin nani bui pana witin ra win:
—¡Man tnaya ra taws! ¿Man ba ya, tringsar kum sma na, man mita yang nani ra lâ aikaia? ¡Yang nani bui witin nani ra saura munaia lukri ba purkara, man ra kau saura mai munamna!
Uplika nani ba bal diman, Lot ba alki raski sakaia bara dur ba sin kriki dimaia, 10sakuna waitna nani ba utla bîla wina ai mihta sakbi, Lot ba alki utla bilara dingkan bara dur prakan. 11Bara upla nani latara bâra kan ba sut nakra blain daukan, almuk bara wahma nani ba sin sut blain daukan. Witin nani dur ba kapi pliki kan, sakuna sip sakras, sut swapan kata. 12Bara waitna nani ba Lot ra makabi walan:
—¿Man tamya nani wala kau nâra brisma? Luhpiam waitna, luhpiam mairin nani, dampna nani, tamya nani sut naha tawanka ra brisma ba asla dauks, bara naha wina mahka taki was. 13Kan nanara naha tawanka na yang nani sauhki tikaisna. Naha uplika nani mapara dahra kwahkanka saura nani ba kasak sa, aitani Dawan mawanra uli wan sa, baha mita Dawan wan blikan tawanka na sauhki tikaia.
14Bara Lot wan, ai luhpia mairin nani briaia, makaban waitnika nani ba sut maisa pakan, bara witin nani ra win:
—¡Man nani bus, naha tawanka na wina taki was, kan Dawan balan tawanka na sauhki tikaia!
Sakuna ai dapna nani ba witin ra sip kasak lukras kan, baha sturka witin nani ra win ba. 15Pat lalma kahbi kan, bara insal nani ba Lot ra aihni muni win:
—Bus, mayam bris, luhpiam mairin nani wâl ba sin, bara mahka tawan na wina taki was, man nani naha uplika nani tilara aikuki tanis tiwaia want apia sma kaka, klala yabamna piua ra.
16Sakuna Lot ba kau ban tawa tauki kan, bara waitna nani ba mita mihta ra alkan, Dawan bui witin ra umpira kaikan bamna. Maya bara luhpia mairin wâl ba mihta ra sin alkan, swaki sakaia dukiara. Witin nani ba tawan ba wina latara bri si sakan.#2 Pi 2.7. 17Pat latara sakan kan ba ra, insalka kum bui witin nani ra win:
—¡Rayakam ba swaki sakaia dukiara plaps! Sakuna ninamra tawi kaikpara, il bîla nani ra dimi sin takaskpara. Il tara nani tila bâk plapi was, rayakam swaki sakaia mata.
18Sakuna Lot witin nani ra win:
—¡Apia pali, dawanki nani! Yang bui man nani ra bik mai takisna, 19man nani lika yang nani hilpki ra pat diara uya pali daukram sa. Yamnika nani ailal sin daukram, rayaki swaki sakaia. Ban sakuna, yang daira walisna plapi il nani ba kat waia sip apia sna, kau yabal ra plapi kaprika sauhki tikaia ba ai alkbia, bara yang baha kat pruamna. 20Naha wina, wan lamara tawan sirpi kum bâra sa, yang bahara plapaia sip sna. ¡Man nani aik yang bahara plapi waia rayaki swaki sakaia mata, tawanka ba sirpi luhpia sa kuna!
21Bara witin nani kumika ba witin ra win:
—Man baha tawanka dukiara aisaram ba, yang walri bara dîa makabram ba daukamna. Tawanka ba yang sauhkamna apia, 22sakuna aihni impaks naha wina nanara pali taki was, yang diara daukamna apia man bahara wih dimma ba kat.
Baha mita baha tawanka ba nina Sóar#19.22 Hibru ra Sóar, baha tânka ba sirpi, Hibru aisi ba binka talia sa. mâkan.
23Lot Sóar diman ba ra, pat yu baiwan kan. 24Bara Dawan mita Sodoma bara Gomora wal purara kasbrika pura wina sulpa pauta klauhan wal yakaban; 25bara tawan nani, baha bilara iwi kan nani ba, diara nani pâwi kan ba sut âpu daukan.#Mt 10.15; 11.23-24; Lk 10.12; 17.29; 2 Pi 2.6; Jud 7. 26Bara Lot maya,#Lk 17.32. ai maya waitna nina bliki auya kan ba wina, witin ai ninara tawi kaikan, bara baha kat witin sâl walpaya takan.
27Baha yaprika wala titanka ba, Ebraham witin Dawan wal aisin ba tasbaya ra wan. 28Baha wina witin Sodoma bara Gomora tani ra tawi kaikan, baha twi langnika tasbaya aiska ba sin. Bamna kaikan Sodoma bara Gomora wal tawanka ba wina kiasma baman taki kan, pauta klauhan watla kum baku kan. 29Baku, Dawan baha twi langnika tasbaya tawanka tara nani, Lot bahara iwi kan ba sut sauhki tikan. Sakuna witin Ebraham dukiara ai kupia ra luki kan bamna, Lot ba sauhki tikan tawanka ba wina sakan.
Moab uplika nani bara Amón uplika nani bal takan ba
30Baha takan ba ningkara, Lot sibrin dauki kan Sóar ra iwi kaia; bara ai luhpia mairin nani wâl ba aikuki, il nani tasbaya ra uli wan bahara iwaia. Bara witin nani yumhpa sut walpa unta kumi ra wan bahara iwaia. 31Bara yu kum, luhpia mairin almukka ba mita ai muihni ai ningka ba ra win:
—Wan aisa na pat almuk takan sa, bara waitna wala kumi sin âpu sa naha tasbaya aiska ra, yawan wan briaia wan natka ba baku. 32Bamna kaisa yawan wan aisa yaka bla takaia, bara yawan lika witin wal yapaia, bara baku yawan bui witin ai luhpia baikaia.
33Bara baku, baha tihmika witin nani ai aisa ra wain diaia yaban, bara muihnika almukka ba pas witin wal yapan. Sakuna almuk ba bla kan ba mita ai tânka briras kan ai luhpia witin wal yapan ba, bara ahkia kli buan ba sin ai dara walras kan. 34Yapra wala titan muihnika almuk ba ai muihni ai ningka ba ra win:
—Wals, tihmia luan ra wan papika wal yapri, bamna kaisa naha tihmia yawan yaka witin kli bla takaia, bara man sin witin wal yaps, bamna baku man bara yawan wâlsut wan aisika luhpia baikbia.
35Bara witin nani baha tihmia sin kli ai aisika ra wain dakakan, bara muihnika ningka ba witin wal yapan; sakuna Lot ai tânka briras kan, ahkia ai luhpia mairin witin wal yapan ba bara ahkia sin kli buan ba. 36Bara baku Lot luhpia mairin nani wâlsut ai aisika luhpia kwihra tiwan. 37Bara ai luhpia mairin almukka ba ai luhpia waitna kum baikan, ai nina ba Moab#19.37 Hibru ra Moab. Baha wiaia witin baha uplika nani aisika kulkanka ba tâka, Hibru aisinka binka talia sa. mâkan, witin sika naiwa kat baha Moab uplika nani aisika mâkan sa. 38Muihnika sirpika ba sin ai luhpia waitna kum baikan, bara ai nina ba Ben-Ami#19.38 Hibru ra Ben-Ami, baha tânka ba upliki nani luhpia waitna. mâkan, baku witin ba ban naiwa kat Amón uplika nani aisika mâkan sa.
Currently Selected:
Blasi Sturka 19: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
