Blasi Sturka 28
28
1Bara Aisak bui Jekob winan balan, bara baha lâka nani yabi bara yamni munan, naku wisi: “Kenan tasbaya mairka nani kumi wal sin man mayam bripara, 2sakuna bus, Padán-aram ra was damikam Betuel watla ra, bamna bahara tahtikam Labán luhpia mairin nani wina kum wal mayam brih iws. 3Bara Gâd karnakira ba yamni mai munbia, kiamkam nani uya sakaia maikbia, bara kiamkam wina nisan nani ailal bal takbia. 4Bara Ebraham ra yamnika yabaia win yamnika ba, man ra bara kiamkam nani sut ra maikbia.#Bla St 17.4-8. Naha tasbaya nanara man nâra iwisma na, nanara lika tringsar baku iwisma na, man nani tasbaya na dawanka nani kama. Kan witin Ebraham ra baku yabaia pramis win bamna.”
5Bara baku Aisak Jekob ra blikan wan, Padán-aram ra. Jekob Labán watla ra wan, bara Labán aisika ba nina Betuel, Aram uplika win kan, Labán Rebeca wal ai lakra, Jekob bara Isau ba Rebeca luhpia waitna nani.
Isau ai maya wala brin ba
6Bara Isau kaikan nahki Aisak Jekob ra yamni munan, Padán-aram ra blikan wan baha tasbaya wina ai maya saki briaia dukiara, bara yamni munan bîla nani sin aisin ba sut wali kan: “Kenan tasbaya luhpia mairin nani tila wina sin mairin bripara” win ba. 7Bamna Jekob ai aisika bara ai yaptika wal aisin ba baku bîla wali Padán-aram ra waia kan. 8Bara Isau ba tânka brin nahki ai aisika Kenan mairka nani ra yamni kaikras kan ba. 9Bara Isau ba Ismael wal aisaia wan, Ismael lika Ebraham luhpia waitna ba; bara luhpia mairin Mahalat ba makabi ai maya brin, Nebaiot muihnika ba, Kenan mairka nani wal pat bri kan ba tnaya ra.
Dawan Jekob ra latan takan ba
10Bara Jekob, Beerseba wina taki Harán ra waia yabalka ra mahka wapan. 11Plis kum kat wan, bara tihmia bahara takaski yapan, yu pat diman kan bamna. Tasbaya ba ra walpa nani bâra kan bara walpa kum brih bahara ai lal kahban, bara aitniki mahka yapan. 12Bahara witin yaprisauhkan kum kaikan, bara bahara kaikan ladar tara kum buki bapan kan, tasba wina kasbrika pura kat tâ ba alki kan, bara Gâd insalka nani ba bâk uli bal iwi kan.#Jn 1.51. 13Bara Jekob kaikan Dawan ai lamara bûi kan bara witin ra aisi kan: “Yang sika Dawan, damikam Ebraham Gâdka ba, Aisak Gâdka sin. Naha tasbaya man nâra yapisma na tasbaya man ra maikamni,#Bla St 13.14-15. man kiamkam nani ra sin. 14Man kiamkam nani ba auhya ailal ba baku ailal kabia. Bara yahbra ra, waupasa ra, lalma ra, muna ra sin kiamkam nani ba bâra kabia. Bara tasba aiska ba man kiamkam ra praki yamnika ailal yabamni.#Bla St 12.3; 22.18. 15Bara yang lika man wal kamni; man ani anira wama ba yang main mai kaiki mai bri kamna, naha tasbaya ra sin kli mai bri balamna. Yang mai lulki mai swimna apia, man ra dîa aisari ba daukamna ba kat.”
16Jekob ai yapanka wina rawi buan ba ra, witin naku win: “Dawan ba naha tasbaya ra nâra sa, yang tânka briras kapri.” 17Witin sibrin daukan bara lukan: “Naha tasbaya na holi pali sa Gâd watla ba nâra sa; ¡naha na lika kasbrika pura durka!”
18Bara Jekob baha yua titan pali pat buan, bara baha walpaya ra ai lal kahbi bri yapata ba brin, bara buki bapi purara batana laiki baku tasbaya ba ra sain kum dauki swin. 19Blasi baha tawanka nina ba Luz#28.19 Hibru ra Luz, baha tânka amans dusa. mâki kan, sakuna nanara witin mita Betel#28.19 Hibru ra ulban ba Betel, baha tânka Gâd watla. mâkan.
20Bara Jekob naku pramis dauki aisin: “Âu, nanara Gâd ba yang wal impakanki ra wabia kaka, witin yabalki ra main ai kaiki ai bri wabia kaka, bara plun piaia, kwala dimaia sin aikbia kaka, 21bara siknis âpu pain kli aisiki watla ra tawi balamna kaka, bâra mika Dawan ba yang Gâdki kabia. 22Naha walpaya playa bapanka kum bapi swisna na, naha na Gâd watla kabia; bara diara nani sut aikisma ba wina, mânka matawalsip bani ba wina, mânka kumi ba man ra maiki kamna piua sut ra.”
Currently Selected:
Blasi Sturka 28: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
