Blasi Sturka 3
3
Upla Dawan bîla wali daukras
1Bara piuta#Par M 12.9; 20.2; Si L 2.24. ba kau âuya mâira kan, Dawan Gâd tasba ra daiwan nani sut paskan ba tilara. Bara baha mita mairin ra makabi walan:
—¿Baku bamna, Gâd bui man nani ra mai win, dus nani giadin ra bâra ba wina mâ nani kumi sin pima apia?
2Bara mairin ba pana piuta ra win:
—Giadin ra dus nani ba mâ wina yang nani piaia sip sna; 3sakuna giadin lilara dusa mâ ba dukiara, Gâd ai win yang nani baha wina pimna apia, bara sin kangbamna apia win, kan baha daukamna kaka, pruamna ai win.
4Bara piuta ba bui mairin ra win:
—Baha lika rait apia. Man nani pruma apia. 5Ban sakuna, Gâd kaikisa man nani baha dusa wina pima yua ba, Gâd baku namkra ilingkan kabia, bara yamni ba wihki saura ba wal tânka kaiki banhma.
6Bara mairin baha walan ba ra, dusa ba kaikan, dusa mâ ba piaia painkira kan. Witin ai nakra nani ra sin pain kan, bara dusa ba sin mahka pin dauki kan, sinskira takaia dukiara. Bara mâ ba wina brin, bara pin. Baha ningkara ai maya ra sin yan, bara witin sin wal baku brih pin.#Ro 5.12. 7Baha minitka ra ai nakra nani ba ilingwan, bara kaikan witin nani ba susu pali kan; bara witin nani kwah damni dusa wahia nani praki sipi, ai maisa wilkaika nani daukan.
8Bara witin nani walan, Dawan Gâd giadin ra tutni ra payaska krawi ba tilara tauki kan; bara upla ba ai maya wal, Dawan Gâd mawan wina giadin dusa nani tilara yukuwan. 9Bara Dawan Gâd upla ra winan, bara win:
—¿Man anira sma?
10Bara witin pana win:
—Giadin ra tauki kapram ba yang walri, bara sibrin ai daukan, kan yang susu katna bamna; bara yang yukuwri.
11Bara Gâd bui witin ra win:
—¿Ya mamrikan man ba susu sma ba? ¿Yang bui man ra adar maikri baha dusa wina pima apia, dîa baha wina piram ki?
12Bara upla ba pana win:
—Mairin yang wal kaia aikram ba, witin dus ba wina mâ aikan, bara yang piri.
13Bara Dawan Gâd mairin ra win:
—¿Baha dîa man daukram?
Bara mairin ba win:
—Piuta ba kunin ai munan,#2 Ko 11.3; 1 Ti 2.14. ba mita yang dusa mâ ba piri.
14Bara Dawan Gâd piuta ra win:
—Man naha daukram ba mita, man ba aihka saura pali mai kulkan sa daiwan nani sut tilara. Biamra purara baman kwasi tauki kama, bara tasba yuya dabi watauki kama rayakam yua nani sut ra. 15Bara man mairin wal waihlam kaia daukamni.#Par M 12.17. Man kiamkam ba mairin kiamka ba wal sin ai waihla kabia; witin bui man lamla ra insauhkbia, bara man pana witin ai mina plakura ra sami kama.
16Mairin ra witin win:
—Sarkam lâka ba uya pali daukamna, man kwihra tiwisma ba piua ra; wînam latwanka tilara luhpiam nani baiki kama; bara man kupiam brinka ba mayam kat kabia, bara witin ba man wihtkam aimaki kabia.
17Bara waitna ra sin win:
—Man mayam bîla baikra wali bîla walram bamna, man ra mai wisatna baha dusa ba wina mâ pipara, sakuna man ban dusa ba wina mâ piram; bamna man tamka, tasba na lahtuban kabia. Rayakam yua nani sut sarkam lâka ra tasba wina patam saki pi kama. 18Kiaya wihki rahra wal saki maiki kabia,#Ro 8.20; Hib 6.8. bara man insla namya ba pima. 19Mamwan laptika saki patam pima, tasba ra kli tawma ba kat, kan baha wina mai paskan bamna, man ba tasba yuya sma, bamna tasba yuya ra kli tawma ba kat.
20Bara upla ba ai maya mairin nina ba Iv#3.20 Hibru aisinka ba Iv, tânka ba rayaka dukiara aisisa talia sa. mâkan, kan witin ba rayakira nani sut yaptika bamna. 21Bara Dawan Gâd daiwan taya wina, waitna bara mairin ba dukiara prâk daukan bara witin nani ra dingkan. 22Bara Gâd win: “Nâra kaiks, nanara upla ba yawan nani kumika baku takan sa, yamni bara saura ba wal tânka kaikisa. Nanara kaiks, witin ai mihta sâkbia raya kaia dusa ba#Par M 22.14. wina sin brih pibia, bara witin pruras ban kabia ba sîa.”
23Dawan Gâd bui upla ba Eden giadin wina sakan, bara tasba ra insla dauki kaia swin, kan witin ba tasba wina brih sakan bamna. 24Witin mita upla ba kangbi sakan, bara giadin lalma tani ra kirubin nani tnawa bri ba ra swin. Pauta klauhi isparka kum, tnaya bani ra namhpa namhpa tawi ba sin bâra swin, raya kaia dusa ra waia yabalka ba aihwaki kaiki kaia, upla kli bâra wih dimbia apia dukiara.
Currently Selected:
Blasi Sturka 3: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
