Blasi Sturka 31
31
Jekob ba Labán wina plapaia lukan
1Sakuna Jekob wali kan, Labán luhpia nani dîa aisi tauki kan ba: “Jekob lika wan aisika daiwra nani sut brin, baha nani brih yuyakira takan.” 2Jekob sin Labán mawan ba kaiki ba ra, blasi witin ra pain luki kan, sakuna nanara witin ra pain kaikras ba. 3Bara Dawan bui Jekob ra win: “Man aisikam nani tasbaya ra kli tawi was, tamya nani bâra ba tilara, bara yang lika man wal wamna.”
4Bamna Jekob ai maya Raquel bara Lea wal ra ai bîla blikan, witin nani ra win ai lamara twi ra taki wabia, sîp nani main kaiki ba lamara. 5Bara witin nani ra win:
—Yang daira walisna man nani aisikam mawan ba blasi yang wal pain kata ba nanara baku apia sa, sakuna yang aisiki Gâdka ba piua bani yang wal tauki kan. 6Man nani pain nu sma, damra walisma sin, yang karniki aiska dîa sip kapri ba kat aisikam dukia daukri ba. 7Bara nanara man nani aisikam kunin ai munan, bara nanara kat sin kau ban kunin ai munisa maina aikaia apia dukiara. Sakuna Gâd bui witin ra karnika yabras yang ra saura ai munaia; 8saura ai munaia watlika ra, witin naku ni ai wisata: ‘Mamna ba daiwan taya bulni nani ba ni mai aibapaisna.’ Bara daiwan nani ba sut, ai luhpia nani taya bulni baman baikan. Bara witin kli wisata: ‘Daiwan taya marsina nani ba wal mamna aibapaisna’, bara daiwan nani ba sut ai luhpia marsina baman baikan. 9Bara baku Gâd mita aisikam daiwra nani kan ba mihta dakban baha yang ra aikaia dukiara.
10“Bara yu kumi daiwan nani ba wainhka alki kan, bara yang yaprisauhkan ra kaikri, bara kaiks guts wainhka nani ba mairin nani ba uli taiban bara luhpia nani bulni atia baikan. 11Bara Gâd insalka ba yaprisauhkan ra yang ra nini kat mâki ai winan, bara yang pana wini wîri: ‘Yang nâra sna.’ 12Bara witin bui yang ra ai win: ‘Aman pali kaiki bas bara man kaikma, daiwan wainhka nani sut mairin ra uli taibi ba, luhpia nani ba sut marsina, bulni, puputni atia baikisa, kan Labán man ra dîa mai munan ba sut yang kaikri bamna. 13Betel ra Gâd bui man ra param takan Dawanka ba, baha ba yang sika, bahara man baha walpaya purara batana laiki puram suni yang ra pramis takram ba.#Bla St 28.18-22. Bamna nanara naha tasbaya wina bus. ¡Kaisa! Man aisubi takram ba tasbaya ra kli tawi was.’
14Bamna Raquel Lea wal pana witin ra naku win:
—Nanara yawan wan aisika watla ra wan dukia kumi sin âpu. 15Nanara papiki, yang nani na, tasba wala wina uplika kum baku ai kulkisa. Yang nani na man ra wan atkan, bara man bui yang nani wal marit takaia lalahka aibapram mana brin ba sin pat sut pin. 16Kasak aisaia kaka, Gâd bui yang nani aisiki wina daiwra nani mihta dakban ba, baha sut ba yawan wan dukia bara wan luhpia nani dukia kan. Bahamna dîa sut Dawan bui man ra daukaia mai win ba baha kat dauks.
Jekob Padán-aram wina taki wan
17-18Bara Jekob mahka ridi takan kli Kenan ra tawi waia, ai aisika Aisak iwi kan ba tasbaya ra. Ai luhpia bara ai maya nani ba sut kiamil ra sunan, baku sin ai dukia nani bri kan ba sut asla kuki brin, Padán-aram ra wark taki ai warkka mana daiwan nani brin ba, daiwra nani ba sin sut kangbi mahka yabal ra impakan. 19Sakuna Labán sîp taya irbaia wisi ai sîpka daknika wala nani tilara taki wan kan, bara Raquel ai watla ra dimi, aidul nani bri kan ba impliki brih wan. 20Jekob witin mahka auya ba, Labán Aram waitnika witin ra kunin munan bara maisa pakras taki wan. 21Bamna witin ai dukia dîa bri kan ba sut brih mahka plapan. Éufrates awala ba pat lui wan, baha wina kau kainara Galaad ilka nani tila kat wan.
Labán bui Jekob nina blikan
22Yu yumhpa luan ba kat. Jekob plapan sturka ba Labán walan. 23Labán ai taya nani aikuki, Jekob bliki alkaia wisi nina bliki ninara wan. Wik kum ningkara, Galaad ilka nani tilara kan bliki alkan. 24Sakuna baha tihmia, Labán Aram wina ba yapan ba ra, Gâd bui witin ra yaprisauhkan ra param takan bara witin ra naku win: “Wals, man Jekob ra diara watawi aisapara.”
25Labán bui Jekob bliki alkan ba ra, witin ai tintka watla pat bâra mâkan kan. Bara Labán witin sin ai taya nani aikuki baha ilka nani tilara takaski ai tintka watla nani mâkan. 26Bara Labán ai tintka watla ra dimi, baha wina Jekob ra blahwi kan:
—¿Man dîa daukram? ¿Dîa muni man kunin ai munram bara luhpi nani ba war aiklabi kan wina priski alkram kan baku, brih plapram ba? 27¿Dîa muni man kunin ai muni bara yukuwi maisi pakras plapram ki? Man mahka auma ba tânka yang bri katna kaka, lilia tara daukaia kapri, drum pruki, arp kangbi lilia binka dauki lamkula daukaia katna. 28Luhpi mairin nani, muli nani lakula dauki kiawalaia sanska sin aikras kapram. Man upla taniskira kum baku diara daukram. 29Yang karnika brisna man nani sut ra saura mai munaia; sakuna man aisikam Gâdka ba naha tihmia yang ra ai win: “Man naha wals: Jekob ra watawi aisapara.” 30Sakuna yang kaikisna man aisikam watla ra kli tawi wan pali mai daukisa, baha mita man mahka taki balram, ¿sakuna dîa muni man bui yang gâdki nani ba implikram?
31Bara Jekob pana Labán ra win:
—Yang sibrin ai dauki kan, lukri ban kra man kupiam baiki luhpiam nani ba kli mihti wina dakbi brima wisi. 32Sakuna yang nani tili na wina ya man gâdkam nani ba brisa kaka, baha uplika ba lika pruaia kabia. Yang taiya nani nâra na witnis sa: bamna man ai wis, dîa man dukiam yang nâra brisma kaka, brih was.
Sakuna Jekob nu âpu kan Raquel baha aidulka nani ba implikan kan ba.
33Bara Labán Jekob tintka watla ra pas dimi ai gâdka nani ba plikan. Ningkara Lea tintka watla ra dimi plikan. Baha wina albika mairin nani tintka watla ra sin dimi plikan, sakuna sakras kan. Bara Lea tintka watla ra dimi pliki si baha wina taki, Raquel tintka watla ra dimi plikaia wan; 34sakuna Raquel lika aidulka nani ba brih kiamil satilka bilara yukuki, bara witin baha purara uli iwan. Bara Labán bal utla aiska ba pliki taukan, sakuna ai gâdka nani ba sakras kan. 35Bara Raquel ai aisika ra naku win:
—Aisiki, yang nanara iwi man mamwanra sip buras sna wisi kupiam baikpara, kati siknis brisna ba mita yang sip man mamwanra buras.
Bara Labán aidul nani ba pliki ban watauki kan, sakuna sip sakras kan. 36Bara Jekob ai kupia baiki naha bîla nani aisi Labán wal unsabi, witin Labán ra win:
—¿Dîa watawika kum yang bui man mampara daukri? ¿Dîa saurka kum yang bui man mampara daukri ba ra, man sringkam pali yang nini bliki nâra balram? 37Kaiks man duki nani sut tilara turbi aidulkam nani ba plikram, ¿bara dîa man wamtla wina dukiam kum duki nani tilara kan sakram? Dîa pliki sakram ba, yang taiya nani, man tamya nani mawanra bri bal, bara witin nani mita wan wibia dukia ba ya dukia sa kaka. 38Yang 20 mani ailal man warkkam takri ba, piua nani sut tilara sîpkam nani wina, gutskam nani tila wina sin, biara wina luhpia prui takras kan. Yang sin sîpkam lupia kumi sin iki piras katna. 39Daiwan wail nani mita daiwram nani iki kan ba, baha sin aima kum pan bri sal maikras kapri. Sakuna baha pura mana ba yang wina man ra aibapi kapri. Kakna ra kra, tihmia ra kra sin, âimplikra nani daiwram implikan kaka, baha mana sin yang ra ai kulkram, yang bui man ra aibapi kapri. 40Kakna laptika ba yang aimaki kapri; tihmia ra sin kauhla ba yang aimaki kapri. Yapanki sut tiwi kan, sip yapan ai daukras wîni rausauhki kapri. 41Yang 20 mani man wamtla ra bâra kapri ba, baku pât taki kapri. Luhpiam mairin nani briaia dukiara 14 mani warkkam takri. Bara 6 mani daiwram nani ba main kaikri; sakuna 6 mani yang maina ba aikaia wisi aikras kunin ai muni kapram. 42Yang aisiki nani Ebraham Aisak wal Gâdka ba, yang wal apia kan kata kaka, kasak pali man kupiam wina lika yang na mihti bîla baman diara luha, naha wina ai swirka waia kapri. Sakuna Dawan lika yang kupi sarka lâka ba kaiki kan bamna, yang mihti warkka nani daukri ba sin, bahamna tihmia luan ra man ra lawi mai daukan.
Jekob Labán wal lâ kum daukan ba
43Bara Labán pana Jekob ra aisin:
—Mairin nani na yang luhpi nani sa, luhpia nani ba sin yang muli nani atia sa; sîp nani ba sin yang sîpki nani sa, nahara diara nani sut man kaikisma na sut, yang duki atia sa. Ban sakuna, ¿nanara luhpi mairin nani ai luhpia nani baikan na yang bui witin nani ra dîa daukamna? 44Bamna nanara man nani bal yawan wal pramis kum daukaia, baha lâka ba yawan wâl lâ daukuya na witniska kaia.
45Bara Jekob walpa tara kum brih bara walpa playka kum bapan, 46bara Jekob ai taya nani ra win:
—Nanara man nani walpa nani wahbi bri bal, naha purara bataks.
Bara witin nani sut walpa nani wahbi, walpa paskanka kum daukan; bara witin nani walpaya paskanka lamara iwi bara bahara plun pi banhwan. 47Bara baha walpaya paskanka nina ba Labán witin ai bîla kat “Jegar Sahadutá” mâkan, bara Jekob sin witin ai bîla kat “Galaad” mâkan.#31.47 Nahara nina wal na, wâlsut ba witniska tânka ailal sa. Aram uplika bara Hibru bîla ra sin tânka ailal sa. Ban sip sa naku wiaia “Walpa nani paskan”.
48Bara Labán witin ra naku win:
—Naiwa wina naha walpaya paskanka na, yawan wal lâ daukan na witniska kabia.
Baha mita pliska nina ba Galaad mâkan; 49bara nina wala sin mâkan Mispá,#31.49 Hibru ra ulban ba Mispá, baha tânka ba aihwaki kaikaia pliska, Hibru ra aisin binka baku sa. Labán witin ra win bamna:
—Dawan yawan wal, wan lilapas ra aihwaki wan kaiki kabia, yawan wal dakwi taki laihura kabia ba piua ra. 50Luhpi mairin nani na ra saura munma kaka, witin nani ai tnaya ra mairin wala nani wal sin kaka, baha witniska aimakaia wan tilara upla wala lika âpu kabia, sakuna Gâd yawan wan witniska aimaki kabia.
51Sakuna Labán kau ban Jekob ra sturi aisi kan:
—Kaiks, naha walpaya nani wahbi paskanka ba nâra sa, walpa playa ba yawan wâl wan lilapaska sa. 52Yawan wal pana witnis aimaki kabia. Yang sin naha piarka lainka na lui wih man ra saura mai munaia apia, pana man sin naha piarka lainka lui balram na ai sauhkaia apia. 53Damikam Ebraham Gâdka ba bara damiki Nahor Gâd ba sin witin luki kaikbia, yawan wâl wan lâka ba nahki daukaia sapa.
Bara Jekob ai aisika Aisak ra ai pura suni kan Gâdka ba dukiara swer taki aisin. 54Baha ningkara Jekob baha ilka purara sakripais nani daukan, bara ai taya nani ba sin paiwan wan sakripais pata ba piaia. Witin nani sut plun ba pin, bara tihmia aiska sin ban baha ilka purara lalawan.
55 #Naha borska nani 31.55—32.32 na bors. wala 32.1-33 ra kli baku ulban sa, baku Hibru nani ulbanka baku sa. Baha yua wala titan ra, Labán buan ai mula nani alki kiawalan, ai luhpia mairin nani sin. Bara witin nani pura suni yamni munan, baha ningkara kli mahka ai tasbaya ra tawi wan.
Currently Selected:
Blasi Sturka 31: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
