Blasi Sturka 37
37
1Jekob lika witin ban Kenan tasbaya ra ai aisika iwi kan ba tasbaya ba ra iwi kan. 2Naha uplika nani sika, Jekob kiamka nani ba, bara ai sturka nani ba sin.
Josep ai muihni nani ba wal
Josep wahma luhpia mani 17 bri kan ba ra, ai muihni nani aikuki, ai aisika maya wala nani Bilhá bara Zilpá luhpia nani aikuki sin, ai aisika sîpka nani ba twi ra main kaiki kan. Bilhá bara Zilpá ba Jekob lilika nani kan. Bamna Josep ai muihni nani tânka bara daukanka saura nani ba dukiara ai aisika ra dahra saki kan.
3Israel ba ai luhpia wala nani ba wal Josep ra kau latwan kan, witin pat almuk pali si Josep ba baikan bamna. Bahamna witin ai prâka kau painkira kum sipi yaban. 4Sakuna ai muihni nani ba ai dara wali kaikan ai aisika ba Josep ra kau latwan kaiki ba, witin nani ra lika baku apia. Bara witin nani Josep ra misbara kaikan, bara lakula sin daukras kan.
5Yu kum Josep yaprisauhkan kum kaikan, bara yaprisauhkan kaikan ba tânka witin ai muihni nani ra win. Sakuna baha win ba tâka wina, ai muihni nani witin ra kau misbara kaikan. 6Witin nani ra naku win bamna:
—Man nani wals, yaprisauhkan kum kaikri ba tânka mai wiaisna. 7Yawan nani sut insla ra kan kaikri, bara yawan plawar mâ dakbi kiaubi wilki kan, bara yang kaiki kapri, yang plawarki mâ kiaubi wilkri ba, ai mina ra tit bûi tatwa ban bâra kan, bara man nani klubankam ba sin tatwa buan, sakuna yang plawarki mâ klubanka ba mawanra bawi kulkanka yabi kan.
8Bara ai muihni nani pana witin ra win:
—¿Man baha wal wan wiaia want sma, man ba yang nani kingki aimakaisma, bara man mita yang nani ra lâ aiki kaia lukisma?
Bara baha yaprisauhkanka kaikan ba tâwan, bara tânka sin laki win ba sut tâwan, witin nani bui Josep ra kau misbara kaikan.
9Baha ningkara Josep kli yaprisauhkan wala kum kaikan. Baha sin witin kli ai muihni nani ra bal baha tânka ba win:
—¿Man nani nu sma ki, yang kli yaprisauhkan wala kaikri ba? Yang kaikri lapta, kati bara slilma nani 11 yang maiwanra bawi kulkanka aiki kan.
10Josep baha yaprisauhkan tânka ba ai aisika ra bara ai muihni nani ra sin win, bara ai aisika witin ra lawi dauki, pana win:
—¿Man baha yaprisauhkanka kaikram ba tânka ba wal praki, yang ra dîa ai wiaia want sma? ¿Dîa man yaptikam, man muihkam nani bara yang nani sut ba man ra bawi kulkanka maiki kamna lukisma?
11Bara ai muihni nani lika witin ra tumi kan,#Ap St 7.9. sakuna ai aisika lika, baha tânka kaiki aisin ba dukiara uya luki kaiki kan.
Josep ba muihnika nani mita upla ra atkan
12Yu kumi Josep muihnika nani ba, twi pliki Siquem ra wan, ai aisa sîpka nani ba pata dakakaia. 13Bara Israel bui ai luhpia Josep ra win:
—Josep, kaiks, man muihkam nani ba Siquem ra sîp nani ba main kaikisa. Yang brin ai daukisa man muihkam nani kaikaia wama.
Josep pana win:
—Papiki, yang liliakira wamna.
14Ai aisika Israel pana witin ra win:
—Aitani, luhpi, bamna nanara man was, muihkam nani bara daiwan nani ba sin sut laki kaiks, witin nani ba nahki sa sapa, bara man kli bal sturka ba ai wis.
Israel bui Josep ba Hebrón ilka bîla wina blikan witin Siquem kat wan. 15Sakuna baha kat Josep aimawahki tauki kan twi biara ra bara waitna kum witin wal prawan, bara witin ra makabi walan:
—¿Man dîa pliki taukisma?
16Josep pana witin ra win:
—Yang muihki nani ba pliki taukisna. ¿Man sip sma ki ai wiaia, witin nani ba anira sîp nani ba main kaikisa?
17Waitna ba pana witin ra win:
—Witin nani naha wina pat taki wan. Sakuna yang walri witin nani Dotán ra waia aisi kan.
Bara Josep ai muihni nani ba pliki wan, Dotán ra bara witin nani aikuki prawan. 18Ban sakuna, witin nani ba laih wina pat kaikan witin aula kan ba, bara kau lamara balras kan taim ai mânka lâ dauki banhwan ikaia wisi. 19Witin nani ai tilara naku aisi banhwan:
—Man nani kaiks, yaprisauhkan kakaira ba bukra aula ki. 20Man nani bal, kaisa yawan bui witin ba ikaia, bara liwanhta pakni kum ra lulkaia. Bara ai sturka yawan naku wibia, daiwan wail kum mita witin ba alki pin. Bara baha ningkara yawan kaikbia, kapu witin yaprisauhkan nani kaikan ba wal dîa takbia sa sapa.
21Baha lâka witin nani daukan ba, Ruben walan. Bara witin Josep ba, muihnika nani ba mihta wina dakbi sakaia luki, witin naku win:
—Yawan bui witin ba ikbiara. 22Man nani tala laikpara. Sakuna upla iwras tasbaya ra liwanhta kum bâra ba, bahara dingki swis. Sakuna man nani mihtam lika witin purara mangkpara.
Ruben baku aisin, kan witin ai kupia ra luki kan, Josep ba swaki saki bara kli ai aisika ra bri si yabaia dukiara. 23Bara Josep ai muihni nani lama kat wan ba ra, ai muihni nani ba mita prak alki, ai prâka painkira dimi kan ba taya wina daikan. 24Bara liwanhta pakni kum bîla man lî âpu kan ba ra dingkan. 25Baha dauki si witin nani plun piaia iwan.
Bara tisku kan ai nakra buki kaikan, kaiks Ismael kiamka nani daknika tara kum, Galaad wina aula kan ai kiamilka nani ba prahki, isint kîa pain nani, sîka sâtka nani, dus mâka wina saki daukan saika nani wal. Baha nani dukia nani ba wauhi atkaia Idsip ra waia impaki kan. 26Bara Juda mita ai muihni nani ra win:
—¿Yawan wan muihni na iki si, bara ai pruanka sturka ba yukuki tikaia daukbia ba, baha mana yawan dîa bribia ki? 27Kaisa yawan bui witin ba Ismael kiamka nani ra atkaia. Sakuna ikaia lika apia, yawan sin luki kaikaia sa, witin ba wan muihni, wan wîna pali sa.
Bara ai muihni nani sut witin aisin ba baku daukaia âu win. 28Bara Madián wina uplika diara wauhi âiatkra nani ba bahak bal lui auya kan ba ra, witin nani Josep liwanhta ba wina saki, baha uplika nani ra silbar mâ 20 mana atkan.#Ap St 7.9. Bara baku witin nani Josep ba Idsip ra brih wan.
29Ruben ba bâra âpu kan. Baha ningkara witin balan, bara Josep kaikaia liwanhta ba ra wan, sakuna witin liwanhta ra âpu kan. Bara Ruben sari pali taki, iwi ai prâka kalkan. 30Bara witin ai muihni nani ra wan, bara witin nani ra win:
—Josep liwanhta ra âpu sa. ¿Bara nanara yang dîa daukamna?
31Bara witin nani Josep prâka maplira painkira kata ba brin, guts kum iki prâka ba baha tâlia ra buskan. 32Bara prâka ba ai aisa ra blikan; witin nani ai bîla sin naku wauhan wan: “Yang nani naha prâka na saki banhri, bamna man pain laki kaiks luhpiam prâka sa sapa, apia kaka upla wala prâka sa sapa.”
33Jekob prâka ba kang kaikan ba ra, win: “¡Âu, naha na yang luhpi prâka sika! Daiwan wail kum kra luhpi na alki kalki pin.” 34Bara Jekob ai prâka kalkan, kwala siksa diman, bara piua wihka ai luhpia pruan ba sarka brih iwi kan. 35Ai luhpia waitna, ai luhpia mairin nani sut ai aisika maisa nihkaia trai kaikan, sakuna ai luhpia nani ba witin ai maisa nihki ba brin daukras kan. Witin ai luhpia dukiara kau ini bara naku aisi kan: “Luhpi sarka brih ini ban kamna, yang pruan nani tilara wih, witin wal prawamna ba kat.”
36Bara Madián uplika nani ba, Josep ba Idsip ra bri si, bara waitna kum king fero watla bilara wihtka, king watla ra suldiar nani ba sin kiaptinka aimaki kan ba ai nina Potifar, baha waitnika ra atkan.
Currently Selected:
Blasi Sturka 37: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
