Blasi Sturka 39
39
Josep bara Potifar maya sturka ba
1Josep ba Idsip ra brih wan ba ra, Idsip waitnika tara kulkan kum, nina ba Potifar, witin Josep ba Ismael luhpia nani wina atki brin. Potifar ba suldiar nani kiaptinka aimaki kan king fero watla ra. 2Sakuna Dawan Josep wal ban kan#Ap St 7.9. bamna, ai mapara diara sut yamni baman taki kan, witin ai dawanka Idsip waitnika ba watla ra iwi kan ba yua nani ra. 3Ai dawanka ba baha tânka brin, Dawan ba Josep wal ba mita witin diara sut dauki ba yamni baman taki kan. 4Baha daukanka ba mita munan, Potifar Josep ra kau yamni lukan. Bara witin ai lama kat, ai watla bilara ai hilpika mangkan, bara ai dukia nani ba ai warkka nani dauki kan ba sut Josep mihta ra mangkan. 5Potifar bui Josep mihta ra ai dukia nani sut mangki swin yua ba wina, Dawan bui Potifar ra yamni munan, ai watla bilara bara ai nasla nani ra sin. 6Josep ba witin ai dukia nani sut ba pain main kaiki kan. Nanara Potifar lal klahwanka âpu, ai pata piaia ba baman bîla kaiki kan.
Josep sin waitna mawan pain kan, bara ai daukanka sin. 7Bara yu kum ai dawanka maya mairin ba witin kat kang kaikan, bara witin ra naku win:
—Bal yawan wal krikri ra prawaia.
8Sakuna Josep baku daukaia brin daukras kan. Bamna pana witin ra win:
—Man kaiks, yang dawanki ai dukia nani sut ba yang mihti ra swin sa, nanara yang nâra sna, witin ai lal latwan âpu sa. 9Naha watla bilara upla wala yang wal kau tara wala âpu sa, man baman lika yang mihti ra mai mangkras kan, man sika witin ai maya mairin sma bamna. ¿Yang nahki baha saurka tara ba daukamna bara Gâdki mapara saura daukaia?
10Sakuna mairin ba lika baha walras. Witin yu bani ban Josep ra aisi kan wal krikri ra waia bara ai lamara prawbia, sakuna Josep mairin aisi ba walras baku kan. 11Yu kumi Josep ai warkka daukaia utla ra diman ba ra, upla wala sin witin ai lamara âpu kan, 12mairin ba witin ai prâka ra alki bara win:
—Bal krikri ra aitniks yang wal.
Sakuna witin ai prâka daiki ai mihta ra swi si plapi latara takan. 13Bara mairin ba kaikan witin ai prâka ai mihta ra swi si taki wan ba, 14witin ai albika nani utla bilara kan ba winan balan bara witin nani ra win:
—Man nani kaiks, mayi Hibru waitnika kum bri balan ba, nanara yawan wan lawaska kikisa. Rumki ra dimi ai kaikan bara krikriki ra uli ai alkan yang wal yapaia, sakuna yang bîli baikra karna winri; 15yang karniki aiska kisbri witin baha walan ba ra, ai prâka mihti ra swi si plapi latara takan.
16Baha aisi si bara Josep prâka ba witin bahara suni bri kan, ai dawanka utla ra balan ba kat. 17Bara witin dîa aisin ba baku, kli ai maya ra sin win:
—Hibru waitnika wan albika man wan utla ra bri balram ba, yang rumki ra diman bara swiri tara daukaia ai munan. 18Sakuna yang karniki aiska kisbri ba ra, witin ai prâka mihti ra swi si plapi latara takan. 19Man albikam ba yang ra baku ai munan.
Josep dawanka ba, ai maya baha sturka sut aisi kan ba wali, 20bara witin adar yaban Josep ba alki witin nani bri si silak ra mangkbia, king mita silak ra mangkan ba uplika nani ba tilara swibia. Sakuna ban silak watla ra sin, 21Dawan ba Josep lamara kan,#Ap St 7.9. ai kupia yamni lâka ba ban mariki kan, bara sin daukan silak watla wihtka ba ban Josep ra yamni lukaia. 22Bara silak watla kiaptinka ba mita Josep ba silak ra uplika nani ba sut pura kakaira kaia swin. Bara Josep mita adar nani ba yabi kan baha nani dîa warkka dauki kaia ba. 23Bara Josep dîa lâ daukan ba kiaptin ba mita kli laki kaikras kata, kan Dawan Josep wal kan bamna, witin diara nani sut dauki ba yamni baman taki kan.
Currently Selected:
Blasi Sturka 39: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
