Blasi Sturka 41
41
King fero yaprisauhkan kaikan Josep mita tânka win ba
1Mani wâl luan ba ningkara, king fero yaprisauhkan kum kaikan. Witin Nilo awala un ra bâra kan, 2bara awala ba wina bîp mairin batanira painkira nani 7 bal ulan, bara klisang nani tilara twi pi tauki kan. 3Baha nani ninara bîp mairin wala nani 7 mawan saura, biawan pali awala ba wina bal ulan, bara awala un ra wala nani bâra kan ba lamara takaski banhwan. 4Bara tisku kan, baha bîpka mairin nani mawan saura biawan pali nani kata mita bîp mairin wala nani batana pali painkira nani kata langki pin.
Baha kaiki king fero kupia tanh krawan, 5sakuna witin kli yapan bara kli yaprisauhkan wala kaikan: plawar kiama kumi pâwi kan bara baha dusa ra plawar mâ tilwan painkira 7 dusa bâra kan. 6Bara baha plawar ba ninara dusa wala 7 lalma payaska krawan ba mita angki lâkan ba bal takan. 7Naha nani ba mita plawar mâ dusa tilwan painkira kata langki pin.
King fero baha kaiki kli kupia tanh krawan, bara ai dara walan witin yaprisauhkan kaikan ba. 8Bara yu baiwan titan ra, witin baha kaikan ba dukiara luki kasak ai kupia wal aisi kan. Bara adar yaban Idsip ra bahmuna diara kakaira sinskira nani bâra ba sut paiwi bri balaia. Sinskira nani ba balan, bara king fero witin yaprisauhkan kaikan ba tânka sut baha nani ra win. Sakuna witin nani tila wina kumi sin sip yaprisauhkan kaikan tânka ba laki param saki sip wiras kan. 9Baha piua kat king watla ra glas wain ra lalaikra nani pura kakaira ba kupia tanh krawan bara witin king fero ra win:
—Yang saura daukri ba nanara kupi krawisa. 10King, man uplikam tara nani mapara kupiam baikram bara brit âiangkra nani pura kakaira kata ba, bara yang sin man nampakan nani, yang nani wâlsut silak ra wan mangkram suldiar kiaptinka watla sialaka ba ra. 11Tihmia kumi yang nani wâlsut yaprisauhkan kaikri, sakuna tânka ba lika kumi apia, witin kaikan ba tânka wala kan, yang kaikri ba sin diara tânka wala kan. 12Bara baha sialaka watla ra yang nani aikuki Hibru waitnika kum sin silak ra mangkan bâra sa, witin lika suldiar kiaptinka ba albika. Yang nani yaprisauhkan kaikri ba dukiara witin ra wîri, bara yang nani dîa kaikri tânka sut param saki ai win. 13Bara kaiks, witin dîa yang nani ra ai win ba baha bîla kat diara sut takan. Yang kli warkki ra balri, bara uplika wala ba lika langki ikan.
14Bara king fero bui Josep mata blikan wan silak watla wina saki bri balaia. Witin nani wan aihni pali bara Josep silak watla wina sakan, tâwa klakan, kwala klin yaban diman, bara king mawanra bri balan. 15Bara king fero Josep ra win:
—Yang yaprisauhkan kum kaikri, sakuna baha tânka ba upla kumi sin sip param saki ai wiras. Sakuna man dukiamra yang walri, yaprisauhkan sturka mai wisa bara man baha tânka ba param saki wisma.
16Josep pana king fero ra win:
—Baha tânka saki mai wiaia ba lika yang apia sika, sakuna Gâd mita baha tânka ba king ra param saki wibia, king ra yamnika kum kaia dukiara.
17Bara king fero witin dîa kaikan ba Josep ra win:
—Yaprisauhkan ra kaikri Nilo awala un ra yang bûi kapri, 18bara awala ba wina bîp mairin batanira painkira 7 bal uli klisang tilara twi pi kan. 19Bara baha nani ninara bîp mairin wala nani 7 awala ba wina bal ulan, mawan saura biawan pali aihwa. ¡Idsip aiska ra baha sât bîpka saura yang kau kaikras pali! 20Baha bîpka biawan saura nani ba mita bîp batanira painkira nani 7 kata ba sut langki pin. 21Sakuna baha sut pin ba ningkara, upla kumi sin tânka briaia apia kan baha pin ba, nahki biawan pali kata ba baku biawan ban kan bamna.
“Baha kaiki kupi krawan, 22sakuna kli yapri bara yaprisauhkan wala kaikri: plawar mâ 7 tilwan painkira pali plawar dusa kumi ra pâwi kan, 23bara mâ tilwan painkira ba ninara kli plawar mâ 7 wala pâwi takan. Sakuna mâ ba balan, mâ ba sin sirpi lupia kan, lalma payaska krawi ba mita sut lâkan kan. 24Bara baha plawar mâ lâwan sirpi lupia ba mita mâ 7 tilwan painkira kat ba langki pin. Naha sturka na yang diara tânka kakaira nani ra wîri, sakuna witin nani kumi sin tânka ba param saki ai wiras sa.
25Bara Josep pana king fero ra win:
—King, man yaprisauhkan wâl kaikram ba, wâlsut diara tânka kumi baman mairikisa. Gâd baha ba mamrikisa witin dîa daukuya ba tânka. 26Bîp mairin batanira painkira 7 kaikram ba, baha tânka lika 7 mani. Wala plawar mâ tilwan painkira dusa 7 kaikram ba, baha tânka sim wal baku sa 7 mani, mani painkira nani. Yaprisauhkanka wâlsut ba tânka kumi baman brisa. 27Bara bîp mairin wala nani 7 biawan, mawan saura nani, bîp batanira painkira nani ninara awala wina uli balan ba, baha nani sin 7 mani. Bara plawar mâ tilwan painkira nani dusa 7 lalma payaska karna krawan laptika mita angki lâkan kaikan ba sim tânka mamrikisa. Baha mani nani 7 ba plun âpu, plun tiwan pali kabia. 28Baha tânka yang pat mai wîri ba baku sa: Gâd ba witin mita king ra maisa pakan, dîa daukaia luki ba tânka. 29Man nani kaikma mani 7 Idsip tasbaya ra plun ailal pali ban pura lui taki kabia. 30Baha ningkara 7 mani wala ba plun tiwan tara pali balbia. Idsip tasbaya aiska ra, plun ailal nani takan ba dukiara upla sut âuya tiwan kabia plun wahwanka tara balbia ba tâka mita. Sanglang ba mita kuntrika aiska ba sauhkbia. 31Plun tiwan ba uba tara pali kabia, baha mita witin nani plun ailal pali sakata ba dukiara, ai kupia ra wiria sin mangki lukbia apia. 32King, man yaprisauhkan aima wâl kaikram ba baha diara nani aula ba dukiara sa. Gâd ba ai kupia wal pat lâ daukan sa, witin baku daukaia, bara baha win witin pat pali daukbia.
33“Bahamna king, yamni kabia man nanara mahka waitna âuya mâira, sinskira kum pliki sakaia, bara witin naha kuntrika wirhika na twilkaia mangkma. 34Man sin nanara mahka wark nani dauks; waitna nani saki wihta lâka ra mangks, witin nani Idsip tasbaya aiska ra taki waia. Bara plun mâ nani kriki ba matsip mânka bribia, 7 mani plun ailal taki piua kat witin nani baku daukbia. 35Mani pain nani ba piua ra, witin nani plun nani ba sut kuki bribia; watla kum ra auhbi swibia bara baha ba king mihta ra swin kabia. Tawan tara nani ra plun nani ba main kaiki bri kabia, upla nani ra dakakaia dukiara. 36Bara baku plun tiwan tara ba balbia ba ra, upla nani ba ban sanglang mita prubia apia. Mani 7 pata suni swin ba baha ni dakaki kabia, 7 mani plun âpu kabia ba piua ra.
Josep Idsip wihtka tara aimakan ba
37Wark daukaia tânka Josep aisin ba king fero yamni walan, wihta tara nani ba sin baku daukaia aitani lukan. 38Bara king fero ai uplika nani ra naku makabi walan:
—¿Yawan sip sa ki waitna wala nâra pliki sakaia naha waitnika na baku, Gâd Spiritka bri ba?
39Bara king ba Josep ra tawi win:
—Waitna kau âuya mâira sinskira, man wal baku ba wala nâra âpu sa, kan Gâd mita naha diara nani takaia ba tânka sut mamrikan. 40King watla wirhika na man puramra brima,#Ap St 7.10. yang tawanki uplika nani sut ba, man dîa daukaia wima ba bîlam walbia, yang baman kau puramra kamna, kan yang na king sna bamna. 41Wals, Idsip tasbaya aiska wihtka yang mai mangkisna.
Witin baha aisin ba ra, 42king fero ai mihta wina king mihtadingka king sîlka prakan bri ba daiki saki, witin mita Josep mihta ra dingkan. Bara ai uplika nani ra win, linin kwalka kau painkira ni sipan prâka ba ni Josep ra yaka dimbia, bara ai nana ra sin gul lilurka kum mangkbia win. 43Baha sut daukan ba ningkara, king ulaika wagin wala kum bâra kan ba win baha saki bri balan, bara baha purara Josep yaban iwan bara king bila win, upla nani ai tâura wapi ai pura wini aisabia: “¡Man nani yabal ba param dauks!” Baku dauki Josep ba Idsip tasbaya aiska mawanra wihta tara mangkan.
44Bara king fero kau ban aisi Josep ra win:
—Âu, yang na king sna kuna mai wisni, upla kumi sin Idsip tasbaya aiska ra, man adarkam âpu kira ai mihta tâ kum sin bukbia apia.
45Bara king fero mita Josep nina ba Idsip uplika nani bîla ra Safenat-panéah mâkan, bara Asenat Potifera luhpia mairin ba wal maya baikan, witin lika tawanka ra prîs kum bâra kan ba luhpia mairin. Bara baku Josep ba Idsip tasbaya aiska mawanra wihta tara mangki swin. 46Josep ba 30 mani bri kan king fero mawanra brih wan ba ra.
Witin wihta tara aimakan ba ra, king ra lakula dauki si Idsip tasbaya aiska ba laki kaikaia mahka taki wan. 47Baha 7 mani nani ba bilka ra, Idsip ra plun ailal pali taki kan. 48Bara baha 7 mani ba Josep plun nani ba sut apahki brin Idsip tasbaya aiska ra. Tawan tara nani bani ra plun ba kuki suni kan. Tawan tara kumi bani ra insla nani wina, plun nani dâki brih watla ra auhbi suni swi kan. 49Josep plawar mâ nani wahbi kukan ba lika, kabu un ra auhya nani ailalka ba baku prais kan. Ailal pali kan ba mita, sip kulki sakras bara kulki banhwi kan ba mahka takaskan, numbika witin nani sip kulki alkras kan bamna.
50Plun tiwan manka nani ba kainara, Josep ai maya Asenat wal luhpia waitna wâl baikan. 51Bara ai luhpia tawahkia ba nina Manasés#41.51 Hibru ra ulban ba Manasés, baha tânka ba âuya tikaia, Hibru aisi ba binka talia sa. mâkan, baha tânka win ba sika: “Yang pât nani uya wauhri ba, bara taiya nani ba sin sut lukaia katna ba, nanara Gâd mita baha sut âiya tikan.” 52Ai luhpia waitna ningka ba nina Efraín#41.52 Hibru ra ulban ba Efraín. Baha tânka ba luhpa nani briaia apia kaka mâ sakaia, Hibru aisi ba binka talia sa. mâkan, baha tânka win ba sika: “Yang pât nani uya wauhri ba tasbaya ra, Gâd bui yang ra luhpi nani aikan bamna.”
53Bara 7 mani plun ailal pali taki kan manka ba bal aimaki lui wan. 54Bara 7 mani plun tiwan tara manka ba bal aimakan.#Ap St 7.11. Josep dîa aisisata ba baku bal takan. Kuntri wala nani sut ra plun wahwi kan, sakuna Idsip ra baman lika plun piaia bri kan. 55Idsip tasbaya aiska ra upla nani pata âpu takan mahka plun wahwi kan ba ra, witin nani king fero ra plun makabaia balan. Bara king fero Idsip uplika nani sut ra win: “Man nani Josep ra wih aisas, bara witin dîa man nani ra mai wibia ba man nani baha dauks.”#Jn 2.5.
56Idsip kuntrika aiska ra plun tiwan ba alkan ba ra, plun watla durka nani ba sut param sakan. Bara Josep win plun ba Idsip uplika nani ra atkaia, sakuna plun tiwan ba yu bani kau tara taki kan. 57Bara kuntri wala nani wina sut sin Idsip ra Josep wina plun atkaia balan, kuntri wala nani sut ra plun âpu kan bamna.
Currently Selected:
Blasi Sturka 41: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
