Luk 1

Tâura bîla nani ulbanka

1-3Kulkanka tara brisma Teófilo: Upla ailal wilin takan diara nani wan tilara takan ba sturka aitani kat ulbaia. Baha nani ulban, tâ pali piua wina upla nani ai nakra ni kaiki banhwan ba bara sturi yamni wan smalkan ba dukiara. Bamna yang sin kulkanka tara pali ni, tâ pali wina naha diara nani na tânka pain pliki kaikri,#Ap St 1.1. bara aitani lukisna naha diara takan na man ra ulbaia, 4baku mika diara kasak mai smalkan ba tânka aiska pain kaikma.

Insal kum Jan Tatahbra aisubi takbia dukiara maisa pakan ba

5Herod Judia kingka aimaki kan ba ra, prîs kum bâra kan nina Sakaraya, witinka Abías kiamka kata.#1 Kr 24.10. Ai maya nina lika Elisabet, witin sin prîs Eran kiamka kan. 6Witin nani wâlsut Gâd mawanra upla kasakkira kan, Dawan lâka nani bara ai adarka nani sut ba bîla wali dauki kan; baha mita upla kumi sin witin nani ra diara aihka kumi sin sip sakras kan. 7Witin nani luhpa âpu kan, Elisabet lika biarapara kan bamna; bara baha purkara, witin wâlsut pat almuk pali takan kata.

8Yu kumi, Sakaraya daknika ba, Gâd mawanra prîs warkka daukaia piua balan kan, 9prîs nani natka kan ba baku. Baku kan ba ra, lat lulkan ba ra, Sakaraya ba sakan kan Dawan tempelka holikira pliska ra dimi, sîka kîa yamni ba angkaia. 10Sîka kîa yamni ba angki kan ba ra, upla sut latara ai pura suni kata. 11Dawan insalka kumi Sakaraya ra latan takan, bara baha altarka aihkika tani ra bûi kan. 12Sakaraya insal ba kaikan, bara dîa daukaia sapa tânka briras kan, bara sirang pali iwan kan. 13Sakuna insal ba bila:

—Si bripara, Sakaraya. Gâd mita puram sunra ba walan, bamna mayam Elisabet luhpa waitna kum baikbia, bara ai nina ba Jan mâkma. 14Aisubi takbia ba dukiara man liliam tara bara âmyapah kama, bara upla manis sin lilia pali kabia. 15Luhpiam waitna ba lika Dawan mawanra tara pali kabia. Witin wain dibia apia, laya saura sâtka kumi sin apia,#Kul K 6.3. bara witin kau aisubi takras piua ba wina, Spirit Holikira ni aibanhwan kabia. 16Witin mita Israel luhpia nani manis kli ai Dawan Gâdka ra laki bri balbia. 17Witin lika Dawan kainara wabia, bara witin ai spiritka ra, ai karnika ra sin Ilayas kata ba baku kabia. Aisa nani ai luhpia nani wal yaka kupia kumi takbia,#Mal 4.5-6; Ecl 48.4. bara kiama karnira nani ba yaka bîla wali dadaukra takbia. Baku mika, witin mita upla nani ridi daukbia Dawan briaia dukiara.

18Sakaraya mita insalka ra makabi walan:

—¿Nahki kaikamna naha na kasak baku kabia sa? Kan yang mayi wal lika pat almuk pali takri sa.

19Insal ba pana witin ra win:

—Yang lika Gabriel,#Dn 8.16; 9.21. Gâd dukia dadaukra ba; witin mita ai blikan naha sturka man ra maisam paki mai wiaia. 20Sakuna diara mai wîri ba kat man kasak lukras kapram bamna, naiwa wina bîlas kama, mai wîri na takbia ai piua aimakbia ba kat.

21Baku kan ba ra, upla nani latara Sakaraya bîla kaiki kan ba aihka naku lukan: “¿Nahki kan witin ban piua wihka tempel ra takaskisa?” 22Baku bamna, Sakaraya bal takan, sakuna upla nani ra sip diara aisaras, ai mihta baman wauhi sain baman dauki kan. Bara baha nani kaikan witin ba tempel holi pali pliska ra diara aihka kum kaikan.

23Bamna Sakaraya tempel ra wark daukaia piua nani tnata alkan ba ra, mahka ai watla ra wan. 24Piu wiria ningkara, ai maya Elisabet ba kwihra tiwan, bara witin kati matsip lata takras yukuwi kan. Baha dukiara sin ai kupia ra naku luki kan: 25“Dawan mita nanara naha diara nani yang ra daukan sa, upla kli bahki ai kulkbia apia dukiara.”

Insal kum Jisas aisubi takbia dukiara maisa pakisa

26Kati 6 alkan ba ra, Gâd mita insal Gabriel ba saki blikan, Galili tawanka kumi nina Nasaret wi ba ra, 27mairin tiara kumi ra, nina Meri. Witin ba sin waitna kumi Debit kiamka wina nina Josep wal marit takaia lâ daukan kata.#Mt 1.18. 28Witin bâra kan ba pliska ra insal ba bal dimi, naku win:

—¡Lamkula maikisna, mairin yamnikira sma ba! Dawan ba man wal sa.

29Sakuna Meri insal ba kaikan ba ra, ai aisinka nani ba dukiara tâ iwan, bara ai kupia wal aisi kan, nahki baku pali witin ra ai lakula daukan ba. 30Bara insal ba bila:

—Si bripara, Meri, Gâd mita man ra yamni pali mai kaikan sa bamna. 31Man kwihra tiwma, bara luhpa waitna kumi brima, ai nina Jisas mâkma.#Mt 1.21. 32Witin lika tara pali kabia; Gâd Laih Purara iwi ba Luhpia mâkan kabia, bara Dawan Gâd ai damika Debit baku king mangkbia, 33Israel nisanka kingka ban kaia ra aimaki kabia, bara ai kingka lâka ba sin tnata âpu kabia.#2 Sa 7.12,13,16; Ais 9.7.

34Bara Meri insal ra makabi walan:

—¿Nahki naha diara na takbia, kan yang kau mayi âpu sna na?

35Pana insal ba bila:

—Spirit Holikira ba man puramra balbia, bara Gâd Laih Purara ba karnika kasbrika baku mamdiskbia. Baha mita, man wina tukta holikira aisubi takaia ba lika Gâd Luhpia mâkan kabia. 36Bara man tamya mairin Elisabet sin luhpa waitna kum baikbia, witin almuk pali sa kuna. Upla biarapara wi kata ba, kaiks nanara pat kwihra tiwan kati 6 brisa. 37Gâd mapara sip apia dukia âpu sa.#Bla St 18.14; Jir 32.16,27.

38Bara Meri bila:

—Yang na Gâd napakanka mairin sni; bamna man ai wiram ba kat Gâd bui yang ra daukbia.

Naha ningkara, insal ba mahka wan.

Meri Elisabet kaikaia wan ba

39Baha piua nani ra, Meri lika mahka aihni pali impakan Judia ilka nani ra, tawan kumi ra. 40Bara Sakaraya watla ra diman, bara Elisabet ra lakula win. 41Baku mika, Elisabet Meri ai lakula nan daukan ba ra, ai biara ra ai luhpia ba pulan, witin sin Spirit Holikira ni aibanhwan. 42Bamna ai bîla baikra karna aisi, naku win:

—¡Gâd yamni pali mai munan sa mairin wala nani sut tilara, man luhpiam biamra ra brisma ba ra sin! 43¿Yang na ya kapri kan, Dawanki yaptika ai kaikaia balan na? 44Kan lamkula nan walri wal baku, luhpi biaira ra lilia pâlan. 45¡Liliam bas, man kasak lukram ba, kan Dawan bui man ra dîa mai win ba kasak kat daukbia!

46Baku kan ba ra, Meri bila:

“Yang sulki bui Dawan ra mayunisa,#1 Sa 2.1-10; Law 113.5-9.

47yang kupi sin lilia sa Gâdki Sasakra ra.#Ais 61.10.

48Kan Gâd mita

ai albika mairin dukiara lukan bamna,

bara nanara wina piu sut ra

witin nani ai wibia: liliam bas.

49Kan Gâd, karnika sut bri ba mita

diara tara nani yang ra daukan;

¡ai nina sin holikira sa!

50Bara piu bani baha nani

witin ra sibrin luki nani ra

umpira kaiki kabia.

51Ai karnika sut wal daukan,

prautkira nani lukanka ba âpu daukan.

52King nani ra ai iwaika wina yaban mâyara iwan

bara bawikira nani ba lika purara bukan.

53Plun dauki uplika nani ra

diara pain nani ni banhkan,

bara yuyakira nani ba

lika mihta bîla baman blikan wan.

54Ai napakanka Israel ba hilp munan;

ai kupia swapni lâka sin ai âuya tikras kan,

55ai pramiska wan damika nani wal daukan ba kat,

Ebraham ra bara ai taya nani ra sin ban kaia ra.”#Bla St 17.7.

56Baku bamna, Meri ba Elisabet wal takaskan kati yumhpa prais. Baha ningkara, witin kli ai watla ra wan.

Jan Tatahbra aisuban ba

57Baha ningkara, Elisabet luhpa baikaia piua ba aimakan, bara witin luhpa waitna kum briaia kan. 58Ai watla lamara iwi nani bara ai taya nani sut lilia lakula daukaia wan, bara baha nani kaikan nahki Gâd mita Elisabet ra yamni munan ba. 59Yu 8 alkan piua, witin nani aidrubi balan tukta luhpia wîna ra Aisa sainka daukan,#Lib 12.3. bara nina ba sin Sakaraya mâkaia luki kan. 60Sakuna yaptika bila:

—Apia. Kau pain kabia ai nina Jan mâkaia.

61Baku mika, witin nani bila:

—¿Dîa muni baha nina yaia? Kan man tamya nani tilara baha nina bri uplika ba âpu sa.

62Baku bamna, witin nani aisika ra sain dauki makabi walan, nina ba dîa mâkaia lukisa sapa. 63Sakaraya ba wauhtaya pîs kum makaban, bara baha ra naku ulban: “Ai nina ba Jan.” Baku mika upla sut ba tâ iwan. 64Bamna baha sim piua ra, Sakaraya lika sturi aisan bara Gâd ra sin mahka mayunan. 65Baha mita, ai watla lamara iwi uplika nani tâ iwan pali takan, bara naha sturka na ban sin Judia ilka kuntrika aiska ra brih wan. 66Bamna naha sturka walan nani sut ba, bahara luki pana pana aisi makabi wali kan: “¿Naha tuktika na dîa kabia ki?” Kan Dawan karnika witin wal param kata.

Sakaraya lawana ba

67Ai aisika Sakaraya ba Spirit Holikira ni aibanhwan, bara Gâd diara aisaia yan ba, naku aisin:

68“¡Dawan ba yamni pali kabia, witinka

Israel Gâdka ba,

ai uplika nani ra swaki sakaia dukiara balan bamna!

69Witin Sasakra karnakira kum wankan,

ai napakanka Debit kiamka ba tila wina.

70Patitara piua wina witin baku pramis daukan,

ai prapitka holikira nani bâk:

71witin wan waihla nani ba wina swaki wan sâkbia,

bara misbara wan kaiki nani ba wina sin;

72wan damika nani ra sin umpira kaikbia,

bara ai pramiska holikira witin nani wal daukan ba

sin ai âuya tikbia apia.

73Naha pramiska sika Gâd wan damika Ebraham wal

swer taki daukan ba:

74witin wan waihla nani wina swaki wan sâkbia,

bara sibrin âpu kira yawan ai dukia daukbia,

75wan rayaka piua nani sut ra,

bara witin mawanra holikira, kasakkira tauki kabia.

76Bamna man, luhpi lupia,

Gâd Laih Purara iwi ba prapitka mai mâkan kabia,

kan Gâd kainara yabalka nani ba man mita ridi dauki wama,#Mal 3.1.

77bara yaka ai uplika nani swaki sakan lâka ba kaikbia,

ai saurka nani swih tikaia lâka ba sin.

78Wan Gâdka, ai kupia swapni lâka ra

umpira wan kaikan bamna,

witin yu raya baiwan baku

pura wina lapta ba wan blîkbia,

79baha nani tihmia bara prura mununhtara iwi nani ra

ingni yaia,#Ais 9.2.

bara wan mina nani ba

kupia kumi yabalka ra yaka wapaia.”

80Baku kan ba ra, tukta ba pâwi karna sin taki kan, ai wîna tara mapa ra, ai spiritka mapa ra sin. Witin lika upla iwras tasbaya ra takaski kan, Israel luhpia nani ra param takan piua ba kat.

Currently Selected:

Luk 1: MSKTU

Highlight

Copy