Maruku 14

Paktechi Yahudawecha tahsandǝ mbanɗi ha natndǝ ɓǝlandǝ Yesu

1Tak chan mǝndǝ chap kǝ chǝ fee mbǝnfa tathla tǝ mbǝnfa njohumɗi nggawaktǝ yisti fiyan, paktǝ pangngǝncha tǝ fǝ chaˈandǝ kusiˈ i Musa kaɗi nakan ndǝ kaa mbanɗi nat ndǝ kǝsandǝ Yesu ǝ wuɓta kǝ ɓǝlanda. 2“Paɗaa ndaka nda wa, “Ngga fartǝ mbǝnfaɗan wa, kǝthlǝm naa nafchi thlaˈa mǝndǝ fa.”

Pǝtan fee Yesu fiɗet kǝ inda ǝ Betanya

3Kǝ nak Yesu ǝ Betani wiri nefa thla thlǝ ˈyafee wa Siman thla naa tarkwai fiyan, nakandǝ sǝm ɗǝsǝmnda, ɓak yowun nunefa tǝ fiɗeta thla nech tǝ kǝnau fǝ kaˈan, hur kwastǝ kuruɓta thla tahǝstǝ fee tǝ ɗakwan pǝlaarcha. Fiɗeɗan tahǝschǝ fee tǝ ˈyam ɗǝftǝɗi thlǝ ˈya fee wa nad. Fohankan ɓǝra kuruɓtaˈan kaɗi, thlǝrang kan fiɗeɗan kǝ inda. 4Fowun hur nafchǝɗi nech minni, sǝɓ kǝ hurchiyandǝ kaɗi, ndang kandǝ raˈan wa, “Mǝ chicha sǝɓandǝ fee fiɗeɗi kaɗ kǝɗaya? 5Mam wa tǝ hiyan fee kaɗi mǝ nan mbǝra ndǝ wanɗǝɓǝthli fǝ tarchǝ ha yi hurat arta, kǝ fǝran fee wanɗǝɓǝthlan fǝ ɓahcha.” Sǝɓ kǝ hwirˈyandǝ kaɗi, nakandǝ hurumɗǝf tǝ ndi. 6Ndak Yesu wa, “Malamandǝn nuˈini, kǝthlǝm mǝ natwun ɗahandǝ in? Kaakǝt chitǝn. 7Fǝ ɓahcha tandǝ tǝ wunchi kǝ porei, chǝkakwati nowun mbahǝn chan kaakǝt tanda. Nggǝt paɗ ngga kǝ porei nati nat tǝ wunchi wa. 8Tǝ chǝt ǝnɗi natǝn mbahǝn chǝta. Pǝtichan fiɗeɗiya kǝthlǝm tahǝstǝ fa kǝ fartǝɗi naa fee thlohita. 9Kittaˈan nati mbuˈowunda, nat mǝɗi naa fee ɓas kusheˈtǝ kwastǝ ndiktǝɗiya hur heshi nat, naa fee naa mbuˈ kusheˈtǝ ǝnɗi chǝt nuɗiya, kǝthlǝm kuɗuktǝ tǝ ndi.”

Nggǝm Yahuda Iskariyoti fa wa nan fǝr Yesu

10Nakandǝ minni, Yahuda Iskariyoti artǝ hur kǝmsichiɗi kum nggǝrsǝ chap yu, ɗǝkan kǝmɗi paktǝ pangngǝncha kǝthlǝm kǝ fǝr tǝ Yesu kǝmɗi yanda. 11Kǝ sǝk kanda kǝɗuyu, chǝkandǝ mbǝnfat kaan ɗǝfan kandǝ mee tǝ ndat wa nandǝ fǝran wanɗǝɓǝthla. Chat nggakǝ Yahuda Iskariyoti kaa mbanɗi natǝn fǝr ndi.

Sǝm Yesu ɗǝsǝmǝn mbǝnfa Tathla tǝ kǝmsichiyan

12Ə fartǝ tǝrkwathl homba njohǝma ngga tǝ yisti fa wa, ndaˈan nech kǝ fartǝɗi thlǝ thlendǝ ndǝ chohra homba Tathla, chǝhankǝ kǝmsichi Yesu mee wa, “Ə ai yahtu kǝ ɗǝˈǝn tahsu mǝtsi yi sǝm ɗǝsǝmǝn Tathla?”

13Ndaˈan thlǝndǝn chap hur kǝmsichiyan, ndang kan tanda wa, “Ɗam kǝ hur wira. Minni naa yowun nef ɓat kǝmndǝ tǝ wunchi thla nech rǝf ɓutǝ ema. Parakowun ndi. 14Nat wurɗi yim ndǝn, kǝ ndawun thlǝ wuran wa, ‘Ndech thlǝ chaˈanan kaɗ wa, ai kǝtǝn ɗi tahsandu ha kǝthlǝm nggǝta, kǝ sǝmi ɗǝsǝmǝn homba Tathla tǝ kǝmsichinchi?’ 15Mǝthlan paɗ nan pǝnowun kapa kǝnda thla nech ɗar sheɗan fǝrta thla tahsandǝ fee chǝka mǝ ha ǝ huran. Minni natwun tahsamǝn ɗǝsǝm ndǝsi.”

16Thlaˈkǝ kǝmsichaˈan pǝɗakandǝ kǝ hur mǝrɓan, ɗǝkandǝ mbǝsanda kǝɗ ǝnɗi mbuˈanda Yesu tanda. Tahsan kandǝ ɗǝsǝmǝn homba Tathlan ha ǝ kǝtǝnan.

17Kǝ saˈkǝ farwita, Yesu tǝ kǝmsichiɗan kum nggǝrsǝ chapyu ɓakandǝ kǝ wuran. 18Kǝ nakandǝ sǝm ɗǝsǝmnda, minni ndak Yesu wa, Kittaˈan nati mbuˈowunda, artǝ hurwun nan fǝr nenchi, mǝthlan tǝɗi nech sǝm ǝn tǝ nenchi nakanya.”

19Sǝɓkǝ hwiri kǝmshichaˈan kaɗi, chǝkawun nakan chǝhan mee artǝ artǝ tǝ ndat wa, “Nggǝta wa?”

20Nggǝmangkǝ Yesu tanda wa, “Artǝ hur wun kum nggǝrsǝ chap yu, thla nat ǝn sǝm ǝn hur tiɓ artǝ tǝ ndi. 21Na Waˈi Nef mǝrta, kǝɗ ǝnɗi yarandǝ fee ha hur Laulawati Farta, kǝ ɗar indiyan. Ai i nafɗi nech fǝr Waˈi Nefa, kwechchan mǝ nggǝt waktǝ fee nef ini.”

22Nak Yesu tǝ kǝmsichiyan sǝm ǝna, tǝrkǝ Yesu njohǝman, chan kan usoko Farta. Chichen kan ha, fǝran kan kǝmsichiyan, ndakana, “Thlama. Thlǝya fatinchi.”

23Kǝrsǝ ndaˈan, tǝrkan kongnga tǝɓɗi naa ˈyam inabi huran, chankan Farta usoko fǝrankan tanda. Nat nda saka ndǝ paɗ huran.

24Kǝnan ndandǝ tanda wa, “Thlǝya ferinchi, thla nech pǝnda wa yuwa ɗǝfmiɗi chandǝ Farta nafcha nan ndiitǝ ha. Ferinchi thla thlǝrandǝ fee kaɗ kǝthlǝm nafchǝ terchan. 25Kittaˈan nati mbuˈowunda, peˈwi nggǝr sa ˈyam inabi paɗ wa, maangga fartǝɗi nati sa yuwa ˈyam inabi fartǝ kutǝrakti Farta wa.

26In kandǝ emsa, chekan ndǝ kesh kǝ hur ngwal Zaitun.

Mbuˈ Yesu wa naa Biturus asˈin sǝn ndi

(Mat 26:31-35; Luk 22:31-34; Yoh 13:36-38)

27Ndang kǝ Yesu tanda wa, “Nat wun nowun rakata, kǝ mal wun nen chǝ ha, kǝthlǝm yaranchǝ fee ha hur Laulawati Farta ndat wa, ‘Ni ɓǝlandǝ thlǝ paraɗan, chohrechaˈan paɗ nandǝ wethlǝ ha.’ 28Paɗaa kǝrsǝ thlaˈitinchi ǝ mǝrta, nii lat kǝ Galili mǝ kun.”

29Ndangkǝ Biturus, Yesu wa, “Chǝka tǝ rak takichanˈan nat, nggǝtta nii raka wa.”

30Ndangkǝ Yesu wa, “Kittaˈan nati mbaˈuta, ɓukwiya ǝ witǝɗiya, no asˈin nenchi harkeˈya mahkan, kǝn chakkarta kwartǝ chap.”

31Paɗaa nggǝrangkǝ Biturus si tǝ alkǝt fǝ kaan ndat wa, “Chǝka tǝn fee ɓǝlitǝ tǝ wechi, nii tam asˈin sǝn wech wa.” Nat takichaˈan mbuˈkandǝ kǝɗu.

Shenuˈ Yesu tǝ Farta ǝ Getsemani

32Pǝɗakandǝ kǝ mǝɗi thlǝ ˈyafewa Getsemani (ndaˈan nech kǝ mǝɗi thlǝ yim ndǝ fee wan inabi), ndang kan kǝmsichiyan wa, “Chokam ha mǝɗiya chi shenuˈtǝ tǝ Farta kwaɗǝn.” 33Tǝrkan Biturus, tǝ Yakubu, tǝ Yohanna. Nakandǝ pǝɗata, nggak kǝ fatˈyan mǝrtǝ kaɗi tǝ sǝɓ tǝ wanɗikaɗata. 34Ndangkan tanda wa, “Nggǝt hur sǝɓtǝ hwir kaan kǝɗ tǝ nii mǝrta. Thlaram ha mǝɗiya kǝ chokwun tǝ tahǝs fa.”

35Ɗǝkan kǝ pang ngguɗyeh, sǝkan kuruminchi ha kǝ haha, shenuˈkan tǝ Farta, ndat wa, maa nan chǝta kǝ tǝreen ɓahti wanshengngǝnɗiya kaɗi. 36Ɗǝkan kǝ pang tǝ shita, ndat wa, “Papa, no mbahǝn chǝt chǝka mii. Tǝran kongnga nggwarkana tǝɗinchiya kaɗi. Ngga nwaat ǝnɗi yahtisi kǝ chi fee wa, paɗ ǝnɗi yahtusi kǝ ndiiɗ ha.”

37Nggǝrangkan in kǝmɗi kǝmsichiyan, ɗǝkan mbǝsandǝ tanda saˈena. Ndang kan Biturus wa, “Siman, tǝ nen saˈena wa? Awi no mbahan chok tǝ tahǝs fa chǝk wanshengnan arta wa? 38Shiyama kǝ nowun choktǝ tǝ tahǝs fa kǝthlǝm kǝ yimwun kǝ hur kaɗata wa. Shemeɗan yehsi kǝ chok tǝ tahǝs fa, paɗaa faɗan nen mbahan wa.”

39Nggǝr kan pǝɗata, ɗǝkan nggǝr shenuˈtǝ tǝ Farta kǝɗ thla tǝrkwathl kanan yu. 40Kǝ ɓakan kaɗi mbǝsankan tanda saˈen paɗ. Kǝthlǝm en fiyandǝ kaan, paɗ sǝnwandǝ ǝnɗi nat ndǝ mbuˈa nda wa.

41Kǝ nggǝr kan ɓat yi mahkanan, ndangkan tanda wa, “Peˈchowun saˈena tǝ yipta wa? Cheˈ kǝɗu, saˈ wanshengnan. Ɗǝpama, fǝr fee Waˈi Nefa kǝ hari fǝ ɓǝɓifecha. 42Thlaˈama. Tamǝ kaɗi, thla nech hiyitǝ kaɗi mbǝhi nduk.”

Kǝsan fee Yesu

43Kǝ nak Yesu ɗar shenuˈta, chat Yahuda, artǝ hur kǝmsichiɗan kum nggǝrsǝ chap yu, ɓakan. Fen tǝ nafchi terchan tǝ fangngǝncha tǝ pangsalmicha, paktǝ pangngǝncha, tǝ fǝ chaˈandǝ kusiˈ kaɗi tǝ paktechaˈan thlǝnchi tanda.

44Yahuda thla nech fǝr Yesu tapi tahsandǝ wanɗǝsǝnan ha, thla nech pǝnda wa mǝthlan nech kǝ Yesu. Ndangkan tanda wa. “Thla nati nggǝthl anchi kafa mǝthlan nech kǝ nafan. Kǝ kǝsawun kǝ pǝɗowun taˈanchi. Kǝ kǝswun anchǝ har ndiˈchan 45Kǝ saˈ kǝ Yahuda, chat ɗǝkan kǝ thlǝma Yesu, ndangkan wa, “Thlǝ chaˈanan kaɗi.” Nakan nggǝthl anchi kafa. 46Chat nafchaˈan kǝsankandǝ Yesu. 47Artǝ hur kǝmsichi Yesu thla nech kit nduk taˈanchi kǝt kan wan fuwha, chathlan kan thlǝmati mafati kapa pangndǝ kaɗi.

48Ndangkǝ Yesu tanda wa, “Ɓechowun kesh tǝ fangngǝncha tǝ wan fuwhicha, kǝthlǝm kǝ kǝsichǝ wun, tǝni kǝ thlǝ fasa fata wa? 49Chǝk yen parta nggǝt tǝ wunchi hur Wiri Farta, nggǝt chaˈandǝ kaɗi, kǝsiwowun wa. Ənsu wa. Chich fee kǝɗaya kǝthlǝm kǝ ndiiɗan fee ǝnɗi mbuˈtǝ fee, hur Laulawata.” 50Ə minni nat kǝmsichiyan malkandǝ anchi ha, rakakanda.

51Kimsha si thla nech para Yesu, kapat sǝ fiyan wa, ǝna chiptǝ ndak. Yahkǝ nafchaˈan wa nandǝ kǝsanda, 52chat malkan ǝna chip taˈan ˈyan ha mǝɗiyanda, rakakkan tandǝr kwai.

Yesu ǝ pangngǝn fǝ chak miicha

53Ɗǝkandǝ tǝ Yesu kǝ wiri kapa pangnda, mǝɗi nggomndǝ paktǝ panggǝncha, tǝ paktecha, tǝ fǝ chaˈandǝ kusiˈ i Musa kaɗi. 54Parak Biturus Yesu kǝrsǝ, langnga, parechan ndǝ kǝ file wiri kapa pangnda. Minni chokkan ha tǝ fee nech pǝk wuran har, nakandǝ hwarta.

55Paktǝ pangngǝn chaˈan, nat tǝ fǝ chak mii chaˈan nakandǝ ka mbanɗi nat ndǝ kǝsandǝ Yesu tǝ ǝnfa kǝthlǝm kǝ ɓǝlanda, paɗ mbǝsawandǝ tǝ ǝnfa wa. 56Nafchi terchan lekandǝ kafa, paɗaa ɓawu meˈyandǝ arta wa.

57Kǝrsaˈan thlaˈkǝ fowuna, mbuˈ kandǝ lekta kǝ ɗar Yesu, ndat wa, 58“Sǝk ǝn ndi ndat wa, ‘Nii tutokandǝ Wiri Farta kaɗi thla tǝndǝ nafcha, hur mǝndǝ mahkan kǝ nggǝri tǝn yowun, ngga tǝndi nefa wa.’” 59Chǝka kǝɗu, ǝnɗi mbuˈtǝnda, ɓawa keˈke wa.

60Thlaˈkǝ kapa pangnda hur ɗǝfi tǝ nanda, chǝhangkan mee Yesu ndakan wa, “Ə nggǝmndiyo su wa? Ənɗi naa nafchǝɗiya mbuˈtǝ kǝ indiyo ya kǝni? 61Paɗaa nggas kǝ Yesu ɓaˈ nggǝma wa tanda wa.

Nggǝr kǝ kapa pangnan chǝhan mee ndat wa, “Chǝ nech kǝ Kǝristi, Waˈi Chinda, Farta thlǝ maanda wa?”

62Nggǝrangkǝ Yesu su wa, “Nggǝta. Nowun naa Waˈi Nefa ɗas har sǝm i thlǝ alkǝt nat, mǝthlan ɓata hur husamba ǝ hulafǝrta.”

63Kapa pangnan thlahan kan kapat ˈyan kaɗi, ndakana, “Weˈtǝ yen sǝnan paɗ natmǝn kata? 64Sǝk wun ǝ njiran tǝ Farta kaɗi. Mǝ ɗǝpandǝ wun?”

Nat nda thlen kandǝ ha tǝ ndat wa, chǝt ǝnɗi kǝmwak chǝsi, kǝ ɓǝlan fee. 65Fowun nggak kandǝ chǝhan yahtǝ kafa. Kǝnan kandǝ chimandiyan, mbǝmbalan kandǝ fa, ndang kanda wa, “Mbuˈu wun mbalech wechi.” Fǝ pǝk wuran har paɗ tǝr kandǝ anchi thlǝthlafan kandǝf tǝ harcha.

As Biturus in sǝn Yesu

66Nak Biturus ɗas haha file wuran, ɓak yowun wannuwa hur mafechi kapa pangnan kǝ minni. 67Kǝ nakan Biturus tǝk wat fa, chat dǝpankan ha ndiˈchan, ndakana,

“Chǝ paɗ chǝ tǝ Yesu, thlǝ Nazarat tǝɗiya.”

68Askǝ Biturus inda, ndakana, “Sǝnwi ǝnɗi natu mbuˈta wa paɗ wathliwa wa.” Kǝ mbuˈkan kǝɗu chekan kesh kǝ kǝtǝn mii mbeya chat kwarkǝ chemsa.

69Kǝ nggǝrkǝ wan nuwanan naa anchi minni, mbuˈankan fee nech kit kit mǝɗan, “Nafɗa mǝthlan artǝ hur nanda.” 70Nggǝr kǝ Biturus asˈin inda.

Chǝkan tolla, fee nech kikit nduk tǝ Biturus, ndang kanda wa “Asˈin indǝs wa, kittaˈan chǝ hur nanda, kǝthlǝm thlǝ Galiliyawata nako.”

71Nggak kǝ Biturus mbuˈ sǝɓtǝ ichǝ kǝ ɗar indiyan tǝ ransata, ndat wa, “Sǝnwi nafɗi natwun ndiktǝ kǝ ɗaran ya wa.”

72Chat kǝɗuyu kwarkǝ chakkarta yi chapataˈan. Kuɗuk kǝ Biturus tǝ ndiktǝɗi mbuˈandǝ Yesu. “Kǝn chakkarta kwartǝ harkeya chap, no asˈin sǝn nenchi harkeya mahkan.” Kǝ kuɗuk kan tǝ ndikti ini, chat nakan tǝta.

Currently Selected:

Maruku 14: GQA

Highlight

Copy