Matayo 3

Yohana bàbùtízìmʉ̀ fèle vɨɨ nɨ léti ɨdejʉ Opɨ yɨ́ vɨɨ

1Iwú ꞌdànaa yɨ̀, Yohana bàbùtízìmù fèle vɨɨ rɨ ací eꞌyo òlʉ àngʉ̀ àꞌwi Yudea nɨ vɨɨ alɨa yɨ̀ 2kɨ́nɨ̀, “Àmɨ kʉ́ ɨ̀zatà ra àrɨ̀yɨ̀kʉ Kárí ꞌBùnɨ vɨɨ àsì ògògò.” 3Yohana nɨ agú dráánɨ Isaya eꞌyo ondrɨ́lé vɨɨ nɨ eꞌyo ìcele drìa kɨ́nɨ̀:

“Àále rɨ pʉ ngajʉ àngʉ̀ àꞌwɨ alɨa kɨ́nɨ̀,

‘Àmɨ ɨdé léti Yehova yɨ́,

àmɨ ɨdé ɨ̀rɨ ovʉ kpii.’”

4Yohana awo àfa sùzà vɨɨ ɨnɨ ꞌba ɨdé àkànyà ɨwɨ́ yɨ̀ díká rɨ nɨ opílé ànzu ngawú ɨdele ɨꞌdɨ yɨ̀ vɨɨ yɨ̀, díká ɨ̀rɨ awo tà drʉ ombɨ ɨnɨ ànyú osà asɨ́á vɨɨ be. 5Òꞌbi rɨ́ cá ɨ̀rɨ bʉ ɨngajʉ àkú ìmgbélé Yerusalemu nɨ vɨɨ alɨa, Yudea ɨ̀ga mgbimgbi vɨɨ alɨa díká ngajʉ àngʉ̀ yí àra Yorudani drʉ vɨɨ ɨ̀gaa mgbimgbi vɨɨ ɨnɨ alɨa drɨ́á. 6ꞌBa ndee ɨ̀ꞌdá ꞌyowa ɨ̀zatà ɨnɨ ra díká Yohana fè ɨnɨyɨ́ bàbùtízìmù yí àra Yorudani drʉ vɨɨ alɨa ra.

7Te Yohana nɨ ndrèrìa ꞌba òꞌbɨ́ Farasayi drʉ vɨɨ ɨnɨ ꞌba Sadukayo drʉ vɨɨ ɨbe carɨa nɨ bʉ bàbùtízìmù isújʉ́, ꞌyo ꞌba ndee ɨnɨ yɨ́ kɨ́nɨ̀, “Àmɨ ꞌba así be onzɨ nɨ kɨ̀le lí lé, Àrɨ ꞌyo àmɨ yí àmɨ ɨco mu àmɨ pa panga Orɨ nɨ ꞌole fèle vɨɨ alɨa ra vɨɨ nɨ̀? 8Àmɨ ó eꞌyo àlá ɨ̀ꞌdale àmɨ kʉ ɨ̀zatà ꞌba vɨɨ ɨnɨ ɨ. 9Àmi ɨgá kɨ́nɨ̀ àmɨ ɨco panga isú kʉ àmɨ nɨ ovʉle Iburahimu yɨla nɨ yɨ̀ kʉ. Ma lè ꞌyo àmɨ yɨ́ Orɨ ɨco ɨrà ꞌdɨ̀vɨɨ ɨnɨ oja yɨla Iburahimu awo drʉ ra. 10ꞌBà ꞌbá tàlúà ngónde patí sotia ba, díká patí drɨ́á ɨkɨ́ ònyɨ̀be kale kʉ vɨɨ ɨnɨ ba nga ɨnɨ ògaa nyawúá pàbaa ɨnɨ oꞌbe àcɨ́á.

11“Ma àmɨ yɨ́ bàbùtízìmù fèe yɨ́ yɨ̀ ɨ̀cejʉ àmɨ kʉ ɨ̀zatà ba. Te ma butia, ́ꞌbarʉʉ àloo òkpo be tʉ̀ manɨ tàsìle ka sʉjʉ ɨ̀rɨ awo wàrà alɨa kʉ vɨ́ɨvɨɨ nɨ ngaa ca ra. Ɨ̀rɨ ngaa mu àmɨ yɨ́ bàbùtízìmu fèle Orɨndɨ Àlátárá yɨ̀ díká àcɨ yì. 12Ɨ̀rɨ gíá nɨ awo jerí òrɨ iꞌbíjʉ́ vɨɨ cɨ, díká ɨ̀rɨ ngaa òrɨ sódrí iꞌbíi nya, ɨ̀rɨ ngaa nɨ awo ngánʉ̀ mule ònyɨ̀be vɨɨ tàa mba dùlàa, te ɨ̀rɨ ngaa sódría ɨve acɨ nɨ dele kʉ vɨɨ yɨ̀.”

Yesu yɨ́ bàbùtízìmù fèjʉ vɨɨ

13Acete Yesu ca ɨngajʉ Galilia vɨɨ yɨ̀ Yohana bʉ yí Yorudania mu bàbùtízìmù bɨ. 14Te Yohana lè àꞌbaa ga Yesu yɨ́ sì, ànɨ ꞌyo ìrɨ́ yɨ́ kɨ́nɨ̀ “Àꞌbaa sìtà té mɨ fè bàbùtízìmù má yɨ́ ká, te baa mɨ ca ace ma bʉ.” 15Te Yesu òmvɨ ɨ̀rɨ́ yɨ́ kɨ́nɨ̀, “Ace oꞌdɨ́dò vɨɨ yɨ̀ ɨrɨ ꞌonɨ vɨ́nɨ àrɨ̀yɨ̀kʉ ɨ̀rɨ ꞌyée àmanɨ eꞌyo drɨ́á Orɨ nɨ lèle vɨɨ ꞌojʉ ɨ” Ànɨ ace Yohana àtɨ̀ eꞌyo ndee ra.

16Cotícotí Yesu nɨ bàbùtízìmù bɨ̀jʉ ba, pʉ̀ yí alɨa vɨɨ yɨ̀ àja. Sawà naa yɨ̀ ꞌbù ti nzìnɨ gboo díká ndrè Orɨndɨ Àlátárá Orɨ awo vɨɨ rɨ sɨ àꞌbòo lé díká ɨ̀rɨ drìa dìzà be. 17Oꞌdúkó ɨnga ꞌbùa kɨ́nɨ̀, “ꞌDɨ̀vɨɨ mvamàa ɨ, ma lè ɨ̀rɨ tʉ̀ díká ma ɨ̀rɨ yɨ̀ àyɨ̀kò yɨ̀.”

Currently Selected:

Matayo 3: MADI-URL

Highlight

Copy