Ittẹwọr 9
9
Echekhi ch'Ibinọkpaabyi osi ọnang Noa
1Mẹ wọ osi, Ibinọkpaabyi odo Noa ttara va pẹ, oben bẹ bi, “Bọng mon va, tte va pabọng ahaabh-ọhaabh, abira anyaami, aruk k'ibe kpenamkpen m'ọyagbin. 2Nden s'ẹtzam biphyir, ọmaana ọnọhn f'okhuri k'ẹrọng, ttara ekpo py'ereng k'irerek biphyir, ọmaana nden s'asi biphyir, pyẹ biphyir éruk ẹkhaama ojora fabọng. Kaam nhokhi pyẹ biphyir k'irekh-irek kwọ bi, akkeri. 3Ọttọhk kpenamkpen f'orukhi akpen obiro oreng-orenga óde ọchattọhk ọnang bọng. Mach'iwa nnangi bọng araraari, nna mbiri nnang bọng ọttọhk kpenamkpen mach'ọchattọhk.
4“Yina, ọkhaam ọttọhk f'án-achi. Kọ etzen ch'etzim ẹkhaam izi kachi, okhuri bi, izi rọ ide akpen. 5Idikha ọnọng ofhu oyok ọnọngẹya, kaam ńnor akpen p'oyok mbọbh-ẹ. Etzen ch'efhu ọnọngẹya, ńnang chẹ ettuma. Ọnọng kw'ofhu oyok, ńnang-ẹ ettuma ch'ẹbaan-ẹ.
6Ọnọng kpenamkpen kw'ofhu oyok ọnọngẹya,
mando wọ kw'ọnọng óbiro ófhu kẹ,
okhuri bi, kẹ Ibinọkpaabyi osi ọnọngẹya ka ngera sẹ.
7“Bọng mon va, tte va pabọng ahaabh-ọhaabh, anyaami aruk k'ibe kpenamkpen m'ọyagbin.”
8Mẹ wọ osi, Ibinọkpaabyi oben Noa ọmaana va pẹ bi, 9“Kker e, kaam nsi echekhi nnang bọng, ttara va pa va pabọng. 10Echekhi nda ewobh ẹnang ọttọhk kpenamkpen f'orukhi akpen, ọmaana ọnọhn, ọmaana nden s'otzer, ttara nden s'ẹtzam, nnuma biphyir sa nyini k'ọkpaar ttara bọng, sa nnukhi akpen m'ọyagbin. 11Kaam nsi echekhi nnang bọng bi, ogbe dọk kóde kw'asi an-abira achi ekpo py'erukhi akpen biphyir, ogbe dọk kóde kw'asi abira akhibhi ọyagbin.”
12Ibinọkpaabyi obiro oben bi, “Ma wọ ode ẹkhọhkha ch'Echekhi chaam, cha mmingaama ttara bọng ọmaana ekpo py'erukhi akpen biphyir, echekhi nda éwobha ẹnang igbọ s'ikwu k'ogbe ororo. 13Kaam nkk'esididibha chaam nhokha k'eboni, ch'éde ẹkhọhkha ch'Echekhi cha kaam ngaam ttara bọng, ọmaana ọyagbin biphyir. 14Ogbe kwa ndọhmi eboni k'ọyagbin, esididibha eyini, 15kaam ńjima echekhi chaam, ttara bọng ọmaana odem kpenamkpen kw'ekpo biphyir py'erukhi akpen. Ogbe dọk kode kw'asi ánwa adimi ekpo biphyir py'erukhi akpen. 16Mẹ wọ osi, ogbe kpenamkpen kw'esididibha eyini k'eboni, ńne chẹ, mbiri ńjima echekhi nduma ch'Ibinọkpaabyi ọkhaam ọmaana ekpo biphyir py'erukhi akpen m'ọyagbin, k'adem-k'adem, py'ewobha m'ọyagbin maa ipemanitzor.”
17Mẹ wọ osi, Ibinọkpaabyi oben Noa bi, “Esididibha dọ ede ẹkhọhkha ch'Echekhi cha kaam nsi nnang ẹkpo kpenamkpen py'erukhi akpen k'ọyagbin.”
Odem kwa va pa Noa
18Iwa va p'ijinọng pa Noa p'ayini k'ọkpaar nwa ade; Shẹm, ọmaana Ham, ttara Japhẹt. Ham wọ iwa ode otte kwa Kenaan. 19Iwa ofon ma va mba attaan pa Noa, ọmaana va pabẹ, anọngẹya anyaami afhu ọyagbin bi pyẹrrr.
20Wa Noa ode ọnọng kw'ọyaabh owoni. Kẹ wọ iwa ode ocheden-nọng kw'ọttẹwọr ogbon nchi si mminwọm aduk p'agrep. Nchi nna s'agrep mminwọm aduk pa bẹ am-atzima asi atzuk. 21K'ogbe wani, wa Noa ogwo atzuk p'achiduk mbuma matzẹmaa obumma, oyima irinikhum k'ikhira sẹ. 22Mẹ wọ, Ham otte kwa Kenaan, ore irinikhum s'otte, ọtza ọgbaak abagbaanọkka k'iyaan. 23Mẹ wọ osi, Shẹm ọmaana Japhẹt atzọkha ibara s'ideden anana ka mbabaang sabẹ, bẹ arenga nnama-nnam, akpa nnam abọra otte, abubh-ẹ irinikhum, ifha bẹ aningi irinikhum s'otte are.
24Mada Noa ọn-ọphyọbh, da atzuk akk'ẹ attoni, oronga odik kwa Ham, kw'ode nnwa kwẹ kw'ikhakhari ọkk'ọsa, ọnang-ẹ ẹmma oben bi,
25“Ẹmma ẹbọkha Kenaan!
Kẹ óde obira kw'owobha k'irekh-irek kw'abira pa vọkka pẹ biphyir.”
26Wa obiro oben bi,
“Tte ẹtzọhnga ewobha ẹnang Ọvaar Ibinọkpaabyi kwa Shẹm okpobh,
tte Kenaan obiro ode obira kwa Shẹm.
27Tte Ibinọkpaabyi ọmmẹma nnem sa Japhẹt,
tte Japhẹt oruk k'okhira fa Shẹm,
tte Kenaan ode obira kwa Japhẹt.”
28Mada asi p'achi ọyagbin akk'akka biphyir, Noa obiro oruk cho arọbh-chi-obhiri-afa obhiri jobh. 29Mẹ wọ oyini bi, biphyir-phyir, wa Noa orukhi cho nnọhna mfa obhiri arọbh azenamfa obhiri jobh.
Currently Selected:
Ittẹwọr 9: mfo-latn
Highlight
Share
Copy
Want to have your highlights saved across all your devices? Sign up or sign in
©️2025 Luke Initiative for Scripture Translation
