Matta 10

Wur Yeeso fathlǝngya kumkap sǝri

(Markus3:13-19; Luka6:12-16)

1Aagha Yeeso fatsahayighǝn kumkap sǝri a thlǝmadghǝn ɓa, fǝrang sǝsǝmnda nǝn kanda a kyang ngganda ǝnkaheeya sǝ tǝ ƙǝm ƙǝnang ngganda wanhaya ɗǝɗamǝn-ɗǝɗamǝn tǝ ɓeerha farha. 2Kulo thlǝm fathlǝngya Yeeso kumkap sǝri ya:

Siman nanda aarha Mbiturus,

Andrawus wanman Siman,

Yakubu wan Dzabadi,

Yahaya wanman Yakubu,

3Filibus,

Mbatalomi,

Toma,

Matta tǝ thlǝ tsamnda,

Yakubu wan Alfiyus,

Taddiyus, 4Siman tǝsǝrǝk chehweedghǝn,

Yahuda Iskaryoti fǝrgha Yeeso ɗǝ.

Thlǝn Yeeso kumkap sǝri ɗi

(Markus6:7-13; Luka9:1-6)

5Thlǝngga Yeeso kumkap sǝri ɗi ndanggǝn kanda, “A ɗuɗun thlǝmad fingya ɗǝ mbuwa Yahudaya, nduwa talya Samariyaya wa. 6Amma ɗaama thlǝmad nafiya Isǝreela ɗǝ, chauraya Faara sahadgha. 7Ɗaamaɗǝ ɗun ndangnda kanda nduwus Kutǝryid Faara ɓa. 8Ƙǝnaman haya, thleeman mǝrya sǝ, ƙǝnaman fingya natǝ wanhad termeerha fa, kyaman ǝnkaheeya sǝ. Fǝrang nggandan kun ka, kun ƙǝm fǝramadghǝn ka ƙǝla thlǝnun ndǝn! 9A ƙǝsɗun wuɗǝɓǝla ha hu panjakwan nun wa, ko tǝfaasa, nduwa wurirha, nduwa kala ˈya na ƙǝla wuɗǝɓǝla wa. 10A ƙǝsɗun yawarha ha tǝ lukrha tǝ pakhma, nduwa sǝsaala wa. Kala ˈya fǝrang nanda kun a karɗun ndǝn wa, ƙǝsǝr tǝtaara kamɗǝ a wal ǝnnarhami nǝn.”

11Kala wupǝri nduwa tala kyanun sahai, kaɗaama ka niifa tsawun ahur mindǝghǝn ta far ɗaɗǝ nun a mal talɗi. 12A kyaɗun hur minda hai, ndaamaˈya tǝ ƙǝm fǝrang parka nun kanda. 13Ana ka minda ni ngwa tsauka parkad nun sǝ. Amma a mbusǝ kee wa, ngwa wudgha parkad nun a fad nun ɓa. 14Kala tala nduwa wure kyanun sahai, a thluwa nda kun fa wa, nduwa kar nda kang thlǝmaarha kun fa, anaɗun a wiirha paman tinid mbǝɗa ɗǝ na a fad sarnun. 15Niya pǝrang ƙǝkafek kun, a far ngwa kumarha a nggushi nda Sodom tǝ Nggomara na nda a haɗang kanda fa ma talɗi.

Sǝsaarha na ɓayi

(Markus13:9-13; Luka12:11-12; 21:12-19)

16Niya thlǝn kun ƙǝla chauraya ahur mǝmereeya ɗǝ. Nanǝn kee tsawama thladwayirha ƙǝla huthlingya tǝ ƙǝm tsawama mǝsǝlǝmnda nafiya ƙǝla kataprakkya. 17Kwarama! Ƙǝsǝr na nda a ɗǝrha tǝ kun mbed fa ngwa kumaya ɗǝ tǝ ƙǝngya tsahad Yahudaya tsaɗa kun nda. 18Nanda a ɗǝrha tǝ kun a mbed ngwamnaya ɗǝ tǝ kutǝrya ƙǝsǝr ka nggi. Ənɗaniya na fǝrang kwamana kun pǝrang ƙǝkafek nun kanda atenna. 19Amma a ƙǝsang nda kun a ɓillaɗun tǝ ˈya nun a thlǝkrha tǝ ƙǝƙǝn nun a thlǝkƙǝn wa. Ƙǝsǝr a mǝmǝlla sayidɗi na Faara a pǝrang ˈya kun nun a thlǝkrha. 20Ƙǝsǝr mbǝ kunni na a kaala sǝ wa, Sǝsǝn Chinun ni na a kaala sǝ ahur nun.

21“Wanmana nǝn a fǝr wanman a ɓǝlang ngganda. Chingya na nda a fǝr wanggindan, na wundakhnaya a thleng fa nggǝt yindan fa a ɓǝlang ngganda kanda. 22Na fiya heu a kar kun ƙǝsǝr ka nggi. Amma kala niifa ƙǝrǝsgha, nǝn a hǝrǝkrha. 23A sǝsang nda kun ahu yanɗi tala ya, ɗaama hu tala ɗǝ pak. Niya pǝrang ƙǝkafek kun, Nggi, na Wan Niifa, ni a wutta ɓa kapa nun weng talya Isǝreela hai heu.”

24“Wan tǝmakarantarha mbǝ kal tǝmalǝmndǝghǝn wa, tǝ ƙǝm mafarha mbǝ kal turighǝn wa. 25Wangya makarantaya kamɗǝ a na nda ƙǝla tǝmalǝmndǝn ndan, mafaya ƙǝm a na nda ƙǝla turi ndan. Nanǝn Nggi, na tuwuri ɗi, anda nggi kogna ǝnkaheeya, wangya wuriɗi ƙǝm na nda aah kanda tǝ thlǝma kalgha yina mu!”

Yanɗi kamngga a tǝrǝmnggǝnǝm

(Luka12:2-7)

26“Nanǝn kee, a tǝrǝm ɗun fingya na a sǝsang kun wa. Ƙǝsǝr na farghǝn ɓayi kala ˈya na nggǝnggǝla na nda a inang ɗǝ; kala ˈya na ɓǝɓee ƙǝm nǝn a kyarha pǝpal ɓa sǝkƙǝna fiya heu. 27ˈYa pǝrang ni kun hu wula, tǝraman urad nun sǝ pǝrghǝn nun a yanfaara a ɗalth mbǝrha hai. ˈYa shishiwang ni kun hu thlǝmaarha hai, tǝrama ten ƙǝnna sǝ tǝranggun urad nun sǝ pǝrghǝn nun sǝkƙǝna kowunni! 28A tǝrǝm ɗun fingya na a ɓǝl farha wa; ƙǝsǝr mba nda mbang ɓǝlang shingnda wa. Amma tǝrmama Faara katenggǝn, ndǝghǝn na mbang ɓǝlang farha tǝ shingnda kyab ahu hwanga. 29Mbǝ na nda heng wuɗikkya ɗǝ sǝri kobo tal wa? Amma a muk tal a hweeɗe hai na Chinun sǝnda sǝ. 30Ko was tengginun heu nǝghǝn thlǝthlǝɗa. 31Nanǝn kee, a tǝrǝm ɗun wa; kal ɗun wuɗikkya hangga a mbed Faara.”

Kyad sǝnda Yeeso a mbed fiya

(Luka12:8-9)

32“Niya ndang nda kun, kala niifa ndagha sǝnɗǝ nggi a mbed fiya hu ƙǝshidɗiya, nggi ƙǝm niya ndaarha sǝnɗi ndǝn a mbed Pǝpa na a talara. 33Amma niifa ƙǝm ndagha sǝngwa nggi wa a mbed fiya hu ƙǝshidɗiya, nggi ƙǝm niya ndaarha sǝngwi ndǝn wa a mbed Pǝpa na a talara.”

Tsaharha ha aten tsawud ɗǝɗemnggirha tǝ sǝsaarha

(Luka12:51-53; 14:26-27)

34A numaɗun ndon ɓang ni tsawud ɗǝɗemnggirha ƙǝshiirha ɓa wa. Awo, ɓawi ɓa tǝ tsawud ɗǝɗemnggirha wa, amma thlaukh ƙǝlara. 35“Ɓani ɓa ka a ɓi wumang yanda a pathlang:

‘Nda wee hǝshin tǝ chin,

nda wutararha tǝ man,

nda nu wee tǝ

thlaɓǝrghǝn tǝ nuwunda. 36Fa saryi nun,

na nda naarha ahur mindǝnun.’”

37A nggǝmna tsu nduwa muwa ma nggi, tsǝkka a tsawana yina wa. Tǝ ƙǝm a nggǝmna wundǝlad wa nduwa wutarad wa ma nggi, tsǝkka a tsawana yina wa. 38Kala niifa kargha tǝr kaɗidghǝn fa mbu samadna nǝn, tsǝkkwa a tsauka yina wa. 39Kala niifa nggǝmngga yiɓǝdghǝn, nǝn a ƙǝɗeng nda, tǝ ƙǝm kala niifa ƙǝɗengga yiɓǝdghǝn ka nggi nǝn a walghǝn.

Tsaharha ha aten ƙǝna

(Markus9:41)

40“Kala niifa thlǝgha kun fa thlǝnǝn nggi, tǝ ƙǝm kala niifa thlǝgha nggi fa thlǝnǝn Chinɗi thlǝngga nggi ɓa. 41Kala niifa thlǝgha annabi fa ƙǝsǝr ka nanǝn annabi, nǝn a wal ƙǝnaghǝn yi annabi. Kala niifa thlǝgha ka niifa fa, ƙǝsǝr ka nanǝn ka niifa nǝn a wal ƙǝnaghǝn yi ka niifa. 42Kala niifa fǝrangga aam saarha na shishiu ahu wuhuleurha a tal ahur fingyayini na nggun-ngguchit ahu fatakkwayina, ƙǝkafek nǝn a wal ƙǝnaghǝn.”

Currently Selected:

Matta 10: HWO

Highlight

Copy