Luk 20

Bə dʉ̀ʉhə ghʉəʼ-Jiso-kə

(Matia 21:23-27; Mak 11:27-33)

1Kʉ̂ʉ bɛ ibɛʼ-yə mbyu kəchî ndə Jiso tʉʼ dàhə bʉə mu chunjaafɛ̀ʼndɛŋNyii bɔŋ-kə́-leʼ lɔ̀ʼ ntəŋjyujyu, bətiefɛ̀ʼndɛŋNyii, bʉə dàhə nuʼ-Mushi leʼnə bəntəŋbəshʉ gwè tə́ŋ kətʉ Jiso, 2kə́ bíʼtə tʉ ɔŋ mbɔ, “Shyíi baʼa, a tʉʼ fɔ̀ʼ nubə-ɔ̄ŋ nə ghʉəʼ-nda-kə? Byuunɔ, kɔ́ nda kɔ́ ghʉəʼkə tʉ a?”

3Jiso bə̀ŋhə tʉ bɔŋ mbɔ, “Mɔ bu bíʼtə mbyu kənu tʉ bii ghɔ, b̈ii shyíi mɔ. 4Jɔŋ kə́ báa bʉə muu nɔ, ghʉəʼkə-i kə́ lɔ̀ hə yuo mɛ, kə kəghɔ-bʉəməsʉʉ?”

5Bɔ̂ŋ jìʼtə mbʉ kənu-ghɔ̄ mu bɔŋ, kə́ ghɔ̀ŋ mbɔ, “Kaʼ bʉʼʉ ghɔ̀ŋ mbɔ, ‘I kə lɔ̀ hə yuo,’ ɔ bu ghɔ̀ŋ mbɔ, ‘Kə chìi ka təmə bii bɛ́ŋ ɔŋ fɛ?’ 6Bɔŋ kaʼ bʉʼʉ ghɔ̀ŋ mbɔ, ‘I nɔ nə lɔ̀ hə kəghɔ-bʉəməsʉʉ,’ lɔʼɔ ŋkwê bɔŋ túŋtə bʉʼʉ nə ŋgoʼhə bʉʼka bɔ̂ŋ nɔ bɛ́ŋ mbɔ Jɔŋ nɔ nə bɛ yʉkəŋgieNyii.” 7Ndʉʉmɛ, bɔ̂ŋ ghɔ̀ŋ mbɔ, “Baʼa kínə yəŋkə ndə i kə lɔ̀ hə chɔ fɛ.”

8Jiso bə̀ŋhə tʉ bɔŋ mbɔ, “Yɔŋ mbəŋ ghɔ kʉʉ shyíi bii nə yəŋkə ndə ghʉəʼkə-ɔŋ lɔ̀ hə chɔ ndə məfɔ̀ʼ nubə-ɔ̄ŋ fɛ.”

Chəŋkə te bʉə-bʉ̂ʼʉ ndə bɔ̂ŋ tʉʼ fɔ̀ʼ mutɔ

(Matia 21:33-46; Mak 12:1-12)

9Jiso bʉ̀nə bìʼ kíahə ŋwɔŋ-ɛŋ tʉ mbʉ bʉə mɔ̀ʼ chəŋkə-ɔ̄ŋ tʉ bɔŋ mbɔ, “Wobɛʼ nɔ nə bè tɔ̂-təlyʉʼ-kə-i ndə i kʉ́ʉnə ntɔŋmə, chɔ̀ʼhə kɔ́ tʉ bəbɛʼbʉə-mutɔhə mbɔ b̈ɔ̂ŋ kə́ shyíi, lɔ̀ gɛ̀ lɔʼɔ kətə̂ŋbɛʼ ndə məgɛ̀ chí chɔ dɔ̀ŋnə. 10Ndʉʉ kwɛ̀tə məntɔŋ kʉ̂ʉ kʉ̀ʼnə, ɔ tə́ŋ vaafɔ̀ʼ-ɛ kə mbɔ bɔŋ bu kɔ́ shyîi-mutɔ-kə-i. Ɔ gɛ̀ ndə məfì shyîikə hə kəghɔ mbʉ bʉə-mutɔhə, bɔ̂ŋ bʉ̀nə leʼ lʉ̀ ɔ, gwúu ɔ, jə̀ŋ ɔŋ, ɔ gɛ̀ ghɔghɔ. 11Ɔ bìʼ tə́ŋ ibɛʼ-yə vaafɔ̀ʼ, bɔ̂ŋ bìʼ gwúu ɔ, lə́ŋhə ɔŋ, mɔ̀ʼ tʉvyiikə mbʉə-bɔŋ, jə̀ŋ ɔŋ, ɔ gɛ̀ ghɔghɔ. 12Ɔ bìʼ bìitə nə ibɛʼ-yə wo, bɔ̂ŋ bìʼ lə́ŋhə ɔŋ ghɔ leʼ jə̀ŋ ɔŋ.

13 “Mbʉ tiefɔ̀ʼ-mutɔ bíʼtə tʉ ŋwɔŋ-ɛŋ mbɔ, ‘Mɔ bu bɛ təka loo? Mɔ bu tə́ŋ mbyu vaa-ɔŋ-yɔ̄ŋ ndə mɔ kʉ̀ʉ ɔ daa nɔ, ndʉʉbɛʼ bɔ̂ŋ bu nyíɛ ɔŋ nɔ, fàa ɔ.’

14 “Bɔŋ ndʉʉ ndə bɔ̂ŋ nyíɛ ɔŋ, bɔ̂ŋ jìʼtə mu bɔŋ, ghɔ̀ŋ mbɔ, ‘Nɔ bɛ mbʉ nju-i nɔ, b̈ii gwè b̈ʉʼʉ yí ɔ, mbʉ bəfɔ chʉʼ bɛ yʉʼʉ-yə.’ 15Ndʉʉmɛ, bɔ̂ŋ fyúhə ɔŋ mbʉ mutɔ mɛ̀ʼ ɔ mbi, yí ɔ.”

Jiso bíʼtə mbɔ, “Mbʉ ŋwɔ̌ŋ-mutɔ bu bɛ təka? 16Ɔ bu gwè yítə mbʉ bʉə-fɔʼɔ mutɔ, fí mbʉ mutɔ kɔ́ tʉ bʉə-kədɔŋ.”

Ndʉʉmɛ, ndə mbʉ bʉə yʉ́ yɔ̄ŋ-yə, bɔ̂ŋ ghɔ̀ŋ mbɔ, “N̈yii fə́ŋhə maa-yɔ̄ŋ.”

17Ɔ chɔ̀ʼhə shʉ-i lɛ́nə bɔŋ ghɔ̀ŋ mbɔ, “Yɔ̄ŋ-yə ndə bə kə nyɔ̀ʼ ndʉʉghɔfii mu ŋwɔʼnə-Nyii bɛ mbuka nduɔ?

‘Mbʉ ŋgoʼ ndə bʉə bɔŋ njaa kə bìe mɛ̀ʼ,

nɔ bɛ ŋgoʼ-fûu-njaa.’ # 20:17 Ŋwɔʼnə-təLyuu 118:22.

18 Wotəmiyɔŋ ndə ɔ bu wɔ̀tə ndəŋ ŋgoʼ-ghɔ̄ gwù, bu ŋìʼtə bəviabəvia. Bɔŋ kaʼ mbʉ ŋgoʼ leʼ gwù ndəŋ wo, i jìehə ɔŋ tə ɔ báʼtə.”

Mbiʼtə te məmɔ̀ʼ-tashi

(Matia 22:15-22; Mak 12:13-17)

19Haʼ ndʉʉghɔfii, bʉə dàhə nuʼ-Mushi ghɔŋbə bətiefɛ̀ʼndɛŋNyii kə́ kʉ́ʉ fia ndə məyá ɔ. Bɔŋ bɔ̂ŋ nɔ kə́ fàa shʉ-bʉə, bʉʼka bɔ̂ŋ nɔ kə́ nyíɛ mbɔ ɔ nɔ kə mɔ̀ʼ chəŋkə-ɔ̄ŋ te bɔŋ.

20Bʉə-bɔ̄ŋ, bʉʼka mbɔ bɔ̂ŋ kə́ yə̀ŋ tiɛŋ-ɛŋ, bɔ̂ŋ tə́ŋ bəfyuu lə́ŋ fʉ́əʼ kɔ́ bɔ̌ŋ ɔŋ. Bɔ̂ŋ gɛ̀ kə́ yie ŋgie-bʉə-kə ndə i bu fyú hə chu-ɔ, bɔ̂ŋ chʉʼ gɛ̀ fʉ̀ʼtə tʉ gɔməna Luŋ, bə yá ɔ. 21Bɔ̂ŋ ghɔ̀ŋ mbɔ, “Chicha, baʼa nɔ kínə mbɔ kwəʼ-a ghɔŋbə nubə ndə a tʉʼ dàhə nɔ bɛ kʉ̀ʼnə, a kyinə túhə shʉ fɛ. A nɔ tʉʼ kɛŋ dàhə fia-Nyii shʉəŋ. 22Nduɔ, shyíi baʼa, bɛ nu-bʉə-kə ndə məlɔ̀ʼ tashi tʉ Fɔŋ-Luŋ mɛ kə mbee?”

23Ɔ yíɛʼhə nyíɛ mənaa ndə i bɛ muŋgɔ, ghɔ̀ŋ tʉ bɔŋ mbɔ, 24“Bii dʉ̀ʼ mbyu kyʉə-kətəŋ tʉ mɔ. Bɛ ŋkwutə-kətʉ-nda-kə leʼnə yie nda ndəŋ ghɔ?”

Bɔ̂ŋ bə̀ŋhə mbɔ, “Yi-Fɔŋ-Luŋ-yə.”

25Ɔ ghɔ̀ŋ tʉ bɔŋ mbɔ, “Nɔ, b̈ii kɔ́ fɔ-Fɔŋ-Luŋ-bə tʉ Fɔŋ-Luŋ, kɔ́ yi-Nyii-yə tʉ Nyii.” 26Ntɛ ndə ɔ bə̀ŋhə, i chíe chu-yʉə. Bɔ̂ŋ mùutə ɔŋ kəŋkaa ndə məyá tiɛŋ-ɛŋ hə ndəŋ kwəʼ-ɛ ndʉʉ-ghɔ̄ mu bʉə.

Məbʉ̀nə kóʼ ghɔŋbə lɔŋ

(Matia 22:23-33; Mak 12:18-27)

27Bʉə-Sadusi-bɛʼbə ndə bɔ̂ŋ tɛ́ŋ mbɔ məbʉ̀nə kóʼ bɛ ghɔ fɛ, gwè tʉ Jiso nə mbyu mbiʼtə, 28kə́ ghɔ̀ŋ mbɔ, “Chicha, Mushi nɔ nə nyɔ̀ʼ tʉ baʼa mbɔ, ‘Kaʼ liŋ-wo kwú mɛ̀ʼtə vi-i təmə bí vaa chɔ fɛ, mbʉ liŋ-iŋ yaʼ lʉ̀ mbʉ woke bí vaa chɔ ndə mətʉ́ʼ yie-mbʉ-ŋkwu-liŋ-iŋ.’ 29Nduɔ, vâabələŋbɛʼbə nɔ nə bɛ chu-ŋkwê-bɔŋ təkwiitia. Fəŋ lʉ̀ woke kwú təmə kie vâa fɛ. 30Biitəkə lʉ̀ mbʉ woke, kwú təmə bí fɛ. 31Ntyunə-kəntyunə-bɔ̌ŋ-kə-i bìʼ lʉ̀ ɔ, i kə́ bɛ haʼ nɔ, tə bɔ̂ŋ mì, tʉbə-ʉə təkwiitia, təmə ɔ bí fɛ. 32Kəliʼ mbʉ woke kwú ghɔ. 33Bu yi bɛ chîkə ndə bʉə ndə bɔ̂ŋ nɔʼ kwútə bu bʉ̀nə kóʼ nɔ, mbʉ woke bu bɛ vi nda mu bɔŋ? Bʉʼka bɔ̂ŋ təkwiitia bənchəŋ nɔ nə lʉ̀ ɔ ndə vi-yʉə.”

34Jiso bə̀ŋhə tʉ bɔŋ mbɔ, “Bʉə-kəwʉʉnəmbi-bɔ̄ŋ nɔ tʉʼ lɔŋ, bɔŋ kə́ kɔ́ vâa-bʉə lɔŋ. 35Bɔŋ bʉə ndə bɔ̂ŋ bu nə kʉ̀ʼnə ndə məŋíi mu wʉʉnəmbi-ghɔ̄-kə ghɔŋbə məbʉ̀nə kóʼ hə ndəŋ kwú, kʉʉ yi kə́ gɛ̀ lɔŋ fɛ, təmə bɔŋ kʉʉ yi kə́ kɔ́ vâa lɔŋ fɛ. 36Təmə bɔŋ bieleʼ nə kwú fɛ, bʉʼka mbɔ bɔ̂ŋ nɔ bɛ ndyʉndyʉ ghɔŋbə bʉəntəŋNyii, kə́ leʼ bɛ vâa-Nyii, kə́ bɛ vâa ndə bɔ̂ŋ bʉ̀nə kóʼ. 37Buŋ ndə nukə ndə Mushi kə nyɔ̀ʼ te vaa-yuu ndə i kə kyʉ́ʉ, ɔ nɔ kə dʉ̀ʼ mbɔ w̃o nɔ kwú bʉ̀nə kóʼ, nɔ kə bɛ yɔŋ ndə Mushi kə tíi Tiekətʉ nə ‘Nyii-Ablahaŋ, Nyii-Aisi leʼnə Nyii-Jakɔ.’ 38Nduɔ, ɔ kaa Nyii-bəŋkwusê fɛ, ɔ nɔ bɛ Nyii-bʉə ndə bɔ̂ŋ bíe ŋɛnə. Bʉʼka bʉə bənchəŋ nɔ tʉʼ chí mbi ndə Nyii kínə.”

39Bʉəbɛʼbə ndə bɔ̂ŋ kə́ dàhə nuʼ-Mushi bə̀ŋhə mbɔ, “Chicha, a nɔ kɛŋ gìe jyujyu.” 40Maa-yɔ̄ŋ kʉ̂ʉ tíŋ təmə bɔ̂ŋ leʼ mùutə bíʼtə nukə tʉ ɔŋ fɛ.

Wo ndə Nyii Kùŋ Tə́ŋ bɛ vaa nda?

(Matia 22:41-46; Mak 12:35-37)

41Jiso bíʼtə tʉ mbʉ bʉə mbɔ, “Chìi ka bɔ̂ŋ ghɔ̀ŋ mbɔ, Wo ndə Nyii Kùŋ Tə́ŋ bɛ vaa-Dɛbi? 42Dɛbi nə mbəŋ-ɛŋ nɔ nə nyɔ̀ʼ mu Ŋwɔʼnə-təLyuu mbɔ,

‘Mbʉ Tiekətʉ nɔ nə ghɔ̀ŋ tʉ Tiekətʉ-ɔ mbɔ,

“Dùʼ kwiiləŋ-mɔ,

43 tə mɔ yi mɔ̀ʼ bʉə-bàa-ba sê bəshʉ a.” ’

44 Nduɔ ndə Dɛbi tíi ɔ nə Tiekətʉ nɔ, bəkɔ ɔ bʉ̀nə bɛ vaa-ɛ təka?”

Jiso shyùu tyunə-bʉə-bə te bʉə dàhə nuʼ-Mushi

(Matia 23:1-36; Mak 12:38-40)

45Ɔ kíahə gìe tʉ vâafɔʼɔ-bi ghɔŋbə bʉə bənchəŋ ndə bɔ̂ŋ bɛ chɔ kə́ yʉ́, 46mbɔ, “B̈ii láa bʉə dàhə nuʼ-Mushi, bɔ̂ŋ nɔ kʉ̀ʉ məmɔ̀ʼ bəgaŋ kyʉə mbʉə-bɔŋ kə́ tòʼ ghʉ́ʉ nə yɔŋ, kʉ̀ʉ mbɔ b̈ə kə́ bʉ́ʉnə tʉ bɔŋ ndəŋ yəŋ-vyii-bə, kʉ̀ʉ ndə mədùʼ ndəŋ fɔŋkwɛʼtəŋbə mu njaagháaNyii ghɔŋbə yəŋkwɛʼtəŋbə ndəŋ yəŋ-nchəŋtə-bə. 47Bɔ̂ŋ nɔ tʉʼ kwò fɔ-bəkwuʼ-bəke-bə. Bɔ̂ŋ nɔ tʉʼ gháaNyii duhəduhə kə́ làhə shʉ mbɔ bɔ̂ŋ bɛ ndyʉndyʉ. Bʉʼka yɔ̄ŋ-yə, fɛʼɛ-yʉə bu yi shʉ́ə daa.”

Currently Selected:

Luk 20: bvm

Highlight

Copy