Jenadik 1
1
Allah napèrhéj langid, bumi, ròb kenèmbek ilok rik mok
1Bil mulak eh tòp, Allah napèrhéj langid, bumi, ròb kenèmbek ilok rik mok. 2Gerèk doh lah nabelakuk:
Bil mulak nak, bumi tik ranghãy, tok mèk-mok ilok-ilok, had òng laud jèꞌrok rik kèskelus. Rengah kerèmlãm nasèrkub ma òng jèꞌrok nak. Dak Ruway Allah nahèng-héng èn balikh riyap òng nak. 3Dak Allah nachal, “Chelakh lah!” Dak chènlakh pon hòj mok. #2 Kor 4:6. 4Allah nanéh ma chènlakh nak méj. Dak Rik Nak napèrmòy chènlakh nak nòm rengah. 5Allah natèrjal chènlakh nak “Is,” dak rengah nak “Layèg.” Dak pas nak nabelayèg bok nayah, unak lah arik rik mulak.
6Dak Allah nachal wèl, “Et lah tèghog rayak untok nampèrmòy òng èn tèk nòm òng èn balikh.” 7Dak gerèk nak lah nabelakuk: Allah nateꞌèl tèghog nak bok napèrmòy òng èn tèk nòm òng èn balikh. #2 Ptr 3:5. 8Allah natèrjal tèghog nak “Langid.” Dak nabelayèg bok nayah wèl, unak lah arik rik kedua.
9Dak Allah nachal wèl, “Perak lah òng èn tèk langid nak namwid sewey èn néy tempad, supaye namꞌet tèk.” Dak gerèk nak lah nabelakuk. 10Allah natèrjal tèk karéh nak “Tèk,” dak òng rik sèywey naꞌtèk natèrjal kenëh um “Laud.” Dak Allah nanéh ma kenèmbek nak méj. 11Dak Allah nachal wèl, “Nòm tèk doh tèrhin lah mèn lènlut: kenèmbek rik bekèꞌbek menéh, bok kenèmbek jehuk rik bekèꞌbek. Dak tiyab lènlut nak akal mok menéh ròb kebek rik eh.”
Dak gerèk nak lah nabelakuk: 12tèk nak natèrhin ma kenèmbek lènlut nak, rik bekèꞌbek menéh bok jehuk rik bekèꞌbek, dak tiyab lènlut nak mok menéh ròb kebek rik eh. Dak Allah nanéh ma kenèmbek nak méj. 13Dak nabelayèg bok nayah wèl, unak lah arik tenigak.
14Dak Allah nachal wèl, “Et lah mèn chènlakh èn langid untok nampèrmòy is nòm layèg. Chènlakh nak lah tande rik perèhnéh arik, musim, ròb tawon. 15Dak perak lah mèn chènlakh èn langid nak muchelakh ma bumi.”
Dak gerèk nak lah nabelakuk: 16Allah napèrhéj nar chènlakh rik rayak geb: rik lebéh rayak nak untok namchelakh ma ès-is, bok rik ajok nak namchelakh ma layèg. Dak Allah napèrhéj keꞌjèk mèn pèrlòy. 17Dak Allah nadol kenèmbek chènlakh nak èn langid untok muchelakh ma bumi. 18Mèn chènlakh nak umchelakh ma is bok ma layèg, untok nampèrmòy chènlakh nòm rengah. Dak Allah nanéh ma kenèmbek nak méj. 19Dak nabelayèg bok nayah wèl, unak lah arik keꞌempad.
20Dak Allah nachal wèl, “Tèrbikh lah òng doh nòm kenèmbek mèn lawok rik gès-gos èn kelòj òng. Bok tèrbikh lah langid nòm kenèmbek chèp rik hèng-héng èn balikh.” 21Allah napèrhéj mèn lawok rèꞌyak èn òng laud, bok kenèmbek lawok gèhnih rik gès-gos bok rik umdèr-dor èn òng nak. Dak Allah napèrhéj keꞌjèk kenèmbek chèp. Allah nanéh ma kenèmbek nak méj. 22Allah nateꞌèl méj ma kenèmbek perènhéj Eh nak bok naꞌor, “Nyob lawok èn kelòj òng, yos lah kuwòt nyob bok chëy ibuk! Tèrbikh lah ma òng laud doh. Bok nyob chèp pon chëy lah ibuk èn bumi.” 23Dak nabelayèg bok nayah wèl, unak lah arik kelimak.
24Dak Allah nachal wèl, “Tèrꞌet lah èn bumi kenèmbek lawok rik umgèl-gel èn tèk: mèn chok bènleh ròb kenèmbek lawok kèjlaj, rik rèꞌyak bok rik èꞌjok.”
Dak gerèk nak lah nabelakuk: 25Allah pon napèrhéj kenèmbek lawok kèjlaj, rik rèꞌyak bok rik èꞌjok, ròb kenèmbek chok bènleh. Dak Allah nanéh ma kenèmbek nak méj.
26Dak Allah nachal wèl, “Jok lah Èk èmpèrhéj sènꞌòy gerèk rik ma rik Èk, bok umjadik gerèk Èk. Umnak akal umbekuwase ma kenèmbek lawok èn bumi: mèn kak èn òng, mèn chèp èn langid, mèn chok bènleh, ròb mèn lawok kèjlaj rik rèꞌyak bok rik èꞌjok.” #1 Kor 11:7. 27Jadik Allah pon napèrhéj sènꞌòy gerèk rik ma rik Eh, najadik ma sènꞌòy nak babeh ròb babok. #Jen 5:1,2.#Mat 19:4; Mrk 10:6. 28Allah nateꞌèl méj ma sènꞌòy nak bok naꞌor, “Kènwòt lah kuwòt kaꞌan bok tèrchëy lah ma kenèmbek bumi. Bekuwase lah ma kenèmbek bumi bok kenèmbek lawok: mèn kak èn òng, mèn chèp èn langid, ròb mèn lawok rik chèb-chib èn tèk.” 29Dak Allah nachal wèl, “Keyòkh lah! Yék iꞌog ma nyob kenèmbek lènlut rik méj untok nyomgéy, rik mok menéh bok rik bekèꞌbek. 30Dak Yék iꞌog kenèmbek lènlut rik belaꞌer untok nèygéy mèn lawok: mèn chèp èn langid ròb kenèmbek lawok rik chèb-chib èn tèk, rik rèꞌyak bok rik èꞌjok — kenèmbek rik umgès-gos èn bumi doh.”
Dak gerèk nak lah nabelakuk. 31Allah nanéh ma kenèmbek perènhéj Eh nak, dak nanéh kenèmbek nak méj geb. Dak nabelayèg bok nayah wèl, unak lah arik keꞌenam.
Currently Selected:
Jenadik 1: KKT
Highlight
Share
Copy
Want to have your highlights saved across all your devices? Sign up or sign in
© 2025 Wycliffe Bible Translators, Inc.
