Mathew 1

Llinach Iesu Grist

1Llyfr cenhedliad Iesu Grist, fab Dafydd, fab Abraham:

2Abraham a genhedlodd Isaac,

ac Isaac a genhedlodd Jacob,

a Jacob a genhedlodd Jwda a’i frodyr.

3A Jwda a genhedlodd Phares a Sara o Thamar,

a Phares a genhedlodd Esrom,

ac Esrom a genhedlodd Aram.

4Ac Aram a genhedlodd Aminadab,

ac Aminadab a genhedlodd Naason,

a Naason a genhedlodd Salmon.

5A Salmon a genhedlodd Boas o Rahab,

a Boas a genhedlodd Obed o Ruth,

ac Obed a genhedlodd Jesse.

6A Jesse a genhedlodd Dafydd frenin.

A Dafydd frenin a genhedlodd Solomon o’r hon a fuasai wraig Ureias.

7A Solomon a genhedlodd Rehoboam,

a Rehoboam a genhedlodd Abeia,

ac Abeia a genhedlodd Asa.

8Ac Asa a genhedlodd Jehosaffat,

a Jehosaffat a genhedlodd Joram,

a Joram a genhedlodd Usseia.

9Ac Usseia a genhedlodd Jotham,

a Jotham a genhedlodd Ahas,

ac Ahas a genhedlodd Heseceia.

10A Heseceia a genhedlodd Manasse,

a Manasse a genhedlodd Amon,

ac Amon a genhedlodd Joseia.

11A Joseia a genhedlodd Jechoneia a’i frodyr, ynghylch amser y symudiad i Fabilon.

12Ac wedi’r symudiad i Fabilon:

Jechoneia a genhedlodd Salathiel,

a Salathiel a genhedlodd Sorobabel.

13A Sorobabel a genhedlodd Abiwd,

ac Abiwd a genhedlodd Eliacim,

ac Eliacim a genhedlodd Asor.

14Ac Asor a genhedlodd Sadoc,

a Sadoc a genhedlodd Achim,

ac Achim a genhedlodd Eliwd.

15Ac Eliwd a genhedlodd Eleasar,

ac Eleasar a genhedlodd Mathan,

a Mathan a genhedlodd Jacob.

16A Jacob a genhedlodd Joseff, gŵr Mair, o’r hon y ganed Iesu, yr hwn a elwir Crist.

17Felly yr holl genedlaethau o Abraham hyd Dafydd sydd bedair cenhedlaeth ar ddeg, ac o Dafydd hyd y symudiad i Fabilon, pedair cenhedlaeth ar ddeg, ac o’r symudiad i Fabilon hyd Grist, pedair cenhedlaeth ar ddeg.

Geni’r Iesu

18A genedigaeth Iesu Grist oedd fel hyn. Wedi dyweddïo Mair ei fam ef â Joseff, cyn eu dyfod hwy ynghyd, hi a gafwyd yn feichiog o’r Ysbryd Glân. 19A Joseff ei gŵr hi, gan ei fod yn gyfiawn, a heb chwennych ei gwneuthur hi yn destun cywilydd, a ewyllysiodd ei rhoi hi ymaith yn ddirgel.

20Ac efe yn meddwl y pethau hyn, wele, angel yr Arglwydd a ymddangosodd iddo mewn breuddwyd, gan ddywedyd, ‘Joseff mab Dafydd, nac ofna gymryd Mair dy wraig, oblegid yr hyn a genhedlwyd ynddi sydd o’r Ysbryd Glân. 21A hi a esgor ar fab, a thi a elwi ei enw ef Iesu, oblegid efe a wared ei bobl oddi wrth eu pechodau.’ 22(A hyn oll a wnaethpwyd fel y cyflawnid yr hyn a ddywedwyd gan yr Arglwydd trwy’r proffwyd, gan ddywedyd: 23‘Wele, y forwyn a fydd feichiog, ac a esgor ar fab, a hwy a alwant ei enw ef Emmanuel’, yr hyn o’i gyfieithu yw, ‘Duw gyda ni’.)#Eseia 7:14

24A Joseff, pan ddeffroes o gwsg, a wnaeth megis y gorchmynasai angel yr Arglwydd iddo, ac a gymerodd ei wraig. 25Ond nid adnabu efe hi hyd onid esgorodd hi ar ei mab cyntaf‐anedig. A galwodd ei enw ef Iesu.

Currently Selected:

Mathew 1: BWMTND

Highlight

Copy