2 Corintios 10
10
De'uoolégue da' 'enec so' Pablo 'me Jesús lamaxasec
1Jaỹim Pablo, 'ami ñachoxodenoto, ỹasouaxat da' lesoosóxonaxac so' Cristo qataxa da' lesóxodic. Jaỹim 'uo na' jaỹim 'enapéga da' 'ami souetaavlo, qana'chi sa 'te da' ñidáqa, qaláxasa naale da' jaỹim qaỹá'a jen' 'oñíita'ña, qana'chi 'uo da' ñiteeta't. 2Chan'eesa naỹi 'ami ñachoxodénoovlo da' qomle ỹivíta da' 'ami sec'atalo, qana'chi 'ená'te qomle da' jaỹim 'auladiilégue, da' qaidi sividaxat'ot ga' qo'mi ỹipoleelóo'te da' s'étaqtac jen'me loiquínataxanaxac na' 'chi siỹaxaua. Qá'a qaỹa 'te ga' jaỹim nauanguet da' ñicotá'ỹi' jen'me. 3Qá'a 'eesa da' 'chi qo'mi siỹaxa'u, qaláxasa sa 'te da' senqá'am na' siỹaxadipi 'me 'aléua lé'ec da' 'uootaxa necota. 4Qá'a da'me qad'euóxonaxat da' 'uootaxa ñicotaq, sa 'te naqáina jen'me l'euóxonaxat jen'me siỹaxadipi 'me 'aléua lé'ec. Qá'a da'me jaldáta 'me lañoqtaxanaxac ñi'me Dios, da' qaidi soláxataxaỹi jen'me n'iinaxaquipi. 5Da' qaidi ñoláxataxañi ỹima jen'me 'chi qoỹa'uo nesamaxataxacpi qataxa gamachaqaiga nep'aguénataxanaxac 'me ỹ'oxodénaxac da' sétaaque da' nauanguet da' qaidi sa qoỹaateton ñi'me Dios. Qataxa ỹima jen'me leenataxacpi na' siỹaxadipi ỹátaqta sanoqot so' Cristo, da' qaidi ỹalaxaguet so'me. 6Qataxa ỹátaqta qaỹa 'te ga' segaqátapega da' sauoqo ga' ne'uaxánaguec ỹima jen'me sa 'te ỹalaq, lamá'a qomle 'uootaxa ma'le nalóchiiñi da' 'aualáqai.
7'Ami 'chi 'aulóitaỹi ga' ỹ'oqóchiỹi siỹaxaua. Qomle 'uo ga' 'enapeela't da' huet'aguet so' Cristo, qana'chi jega'me n'óota da' ỹaỹáteeta da' nataq'en qo'mi qolqátapegue' so' Cristo. 8Qá'a temaqaidi da' 'uootaxa jaỹim sétaaque sega'me da' ñagaqtenaac da' 'uo ga' senec, qaláxasa sa 'te da' ñipecóqtac. Qá'a so' qadesaliaxanec 'me jaỹim ỹanem da'me 'uo da' senec, da' qaidi nichíiseguem qasen da'me sa di'ỹoq 'anchaalataxaquii. Qana'chi sa 'te da' sega'me 'ami ñoláxataxadiñi. 9Qataxa 'ená'te taa'le da' 'oñíitapega da' 'ami soqochoqte't da' 'ami sedénaqtenalo naua' ỹidíisel. 10'Uo quenáxa na' 'enapii'ỹa da' co'ỹachi naua' ỹidii's, qataxa vicháxagueta naua' senapegalo, qaláxasa da' ỹasoxoc da' 'ami souetaavlo, qana'chi qaỹa 'te ga'me ñitenaxac, qataxa naa'me ỹ'aqtaqa qoỹ'ota'n. 11Qaláxasa ga'me 'enaac da'me dójo', ga'me n'óota da' ỹaỹáteeta da' qo'mi sa na'chináate' naua' qadosáxaco da' qo'mi sedáqtrañi, qá'a na'chi ỹipaquíchiỹi da' qadosáxac da' 'uootaxa 'ami souqataavlo.
12Qo'mi sa 'te sétaaque da' sadénaxataq, 'uootaxa da' senqá'am da' nichaalataxac jen'me siỹaxadipi 'me mai'chi niỹamaxadéetapeela't. Jen'me 'uo da' nichiỹoxosóxoc, ỹasouaxat da' mai'chi naloqteetapeela't, qataxa ñi' 'oonolec mai'chi naloqteetapeeguet da' nichaalataxac ga' laqáỹa. 13Qá'a qo'mi sa 'te da' sagaqtenaqpégueegue ga'me qo'mi qoỹanema. Qá'a ñi'me Dios naqaiñi 'me ỹ'an ga' loiquiaqa' ga'me qad'onataxanqa', naqaiñi ñi'me qo'mi ỹanema da' 'uo da' qadivídaxac da' 'ami jen'me 'oñíita'ña Corinto. 14Chan'eesa sa 'te da' ñapagaqpeelégue da'me qo'mi qoỹanema qad'onataxanaxac, ga'me 'éeta toqoogamaxa lasoxoc taa'le sa 'te 'ami sevídaxauelo ca'li. Qá'a qo'mi 'me 'ami se'uáuaqtoovlo da' 'ami sedaxalo da' 'ami s'axátaxama da'me 'ónaxaic qadipí'ic 'me n'aqtaguec so' Cristo. 15Sa 'te da' ñip'áxanaqpeeguet ga' l'onataxanaxac ga' siỹaxaua laqáỹa, 'uootaxa da' sega'me mai'chi qadalémaxaset. Jaldáta da' qo'mi ñaquitaqát'a da' nichíiseguem da' 'adip'iỹáxaquii, qaidi qo'mi nichígueegue da' qad'onataxanaxac da' 'oñíita, qaláxasa na'chi 'eeta't sa 'te ñapagaqalégue di' loiquiaqa' da' qad'onataxanaxac. 16Qana'chi qomle ỹim, qana'chi ỹitaxa ñichíỹaxa ga' 'aléua laqáỹa 'me p'ásaiỹi da' 'ami, da' s'axátaq da' n'aqtac 'me nec'alaxaqui. Qaláxasa sa 'te da' ñip'áxanaxaguet ga' l'onataxanaxac ga' siỹaxaua laqáỹa.
17Qá'a naua' nidii's l'aqtaqa ñi' Dios 'eet'oi: “Da' 'uo ga' sétaaque ni'ỹoxodeela't, qana'chi ga'me n'óota da' ỹi'ỹoxoden so' qadesaliaxanec.” 18Qá'a ga' siỹaxaua 'me qoỹiỹamaxadéeta, sa naqaiga ga'me mai'chi ni'ỹoxodéetapeela't, na'chidáta da' ỹi'ỹoxodéetac ñi' qadesaliaxanec.
Currently Selected:
2 Corintios 10: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.