2 Corintios 4
4
1Chan'eesa qo'mi 'ena't qomle da' ñiláuaqañi, qá'a ñi'me Dios da'me lichoxodénataxanaxac qo'mi ỹipataxalóo'te da'me n'onataxanaxac. 2Qataxa sóxote sa saconaxaguet ỹima na' 'chi ñoxótaxaicpi 'me qoỹí'et, qataxa jen'me ỹa'uo da' n'alóxo. Qataxa sa 'te da' 'chi soqovínaxanaqtac, qataxa sa seléemaxata' naua' l'aqtaqa ñi'me Dios. Jaldáta da' 'eesoda naua' s'axáta', ỹima na' siỹaxadipi ỹaỹáten da' qo'mi 'eesoda, da'me ỹaỹáteeta ñi'me Dios. 3Chan'eesa da' 'uootaxa sa di'ỹoxoỹi da'me s'axátaqtac n'aqtaxanaxac 'me nec'alaxaqui, 'uootaxa jalénata na' siỹaxadipi 'me taỹá'a da' laqataxac. 4Qá'a jen'me sa 'te da' d'amaqténataxan, chan'eesa so'me qadó'o paiỹac 'me quétapegue' jen'me siỹaxadipi, jeso'me ỹaqanamaqtet jen'me da' laatetonaxanaxac, da' qaidi sa ỹilá'a na' lauaq da'me 'ónaxaic qadipí'ic 'me ỹ'axat da' ladíquiaxac so' Cristo 'me ỹ'oxodaic, so'me naqaiso so' liquí'i ñi'me Dios. 5Da' s'aqtaxanqátac, qana'chi sa 'te taa'le mai'chi ñ'axátaqtapeela't. Jalsóta so' Cristo 'me qo'mi s'axátaqtac da' naqaiso 'me qadesaliaxanec. Qataxa ñichoxotqátapeela't da' 'chi qo'mi 'adelatáqadii', ỹasouaxat da' lesóxodic so' Jesús. 6Qá'a ñi'me Dios 'me mai'chi namaq da' ỹicoỹadóoue, da' qaidi ỹ'oqótooue na' n'álaxa, naqaiñi 'me ỹicoỹadoovlo naua' qadiquidiaqtel, chiỹaqaỹi qa'en jeso'me l'edáxa, da' qaidi ma'le saatetonaq da' li'ỹoxodic ñi'me 'me 'edóoue qa'en da' latáxasoxoc so' Jesucristo.
Da' qodiiỹi da' nip'iỹáxac
7Qaláxasa da'me 'uo laso'víỹaxac, da'me sacháqtaỹi da' qadó'oc 'me 'ená'am jaga' taxaqui 'aléua, da' qaidi qoỹilá'a da'me p'asáiỹi lañoqtaxanaxac 'me chiỹoqo'ot ñi'me Dios, qana'chi sa 'te da' qo'mi chiỹaqaỹilo. 8Qana'chi temaqaidi da' huo'oi naua' hua'alo naua' ỹ'e't da' qadaqalaic, qaláxasa na'chi 'eeta't da' lasoxoc da' qoỹiỹamaxachiñi. Qataxa temaqaidi da' 'uo ga' qo'mi ỹachítataxa'n, qaláxasa sa 'te qaỹa ga'me qadasoxónataxanaxac. 9Qataxa temaqaidi da' qo'mi qonqalgaxat'ape, qaláxasa sa 'te qo'mi niimaqa. Temaqaidi da' qo'mi qoỹamaxadíñi, qaláxasa sa 'te qadeleu. 10Ga'me saxague, qana'chi huetalégue da' qadó'oquiaxac da'me leleuaxa so' Jesús, qaidi 'eesa di'ỹoxoma da'me qo'mi nichaatétaỹilo jeso'me Jesús. 11Qá'a naỹi da' qo'mi maliaxa ñic'alqátaiỹi, qana'chi sachóxosoqtac da' lichic da' qanalaataguec ỹiméda naua' noloqo'te ỹasouaxat so' Jesús, qaidi da' nichaalataxac so'me di'ỹoq da' nichaatétaỹi da' qadó'oquiaxac 'me sa jaloc. 12Chan'eesa da' d'onataxanỹi da' neleuaxa da' qadó'oquiaxac, qaláxasa da' chaalataxac 'ami d'onataxañiilo.
13Naua' nidii's n'aqtaqa 'enapega't: “S'amaqténataxan, chan'eesa sose.” Qana'chi 'éeta da' senqáta da' qadip'iỹáxac da' s'amaqténataxanaq, chan'eesa sosáqtac. 14Qá'a saỹátenaqta ñi'me Dios 'me ỹitaxa nec'alaxadiséguem joca'li qoỹalaat so' qadesaliaxanec Jesús, ñi'me nataq'en qo'mi nec'alaxatréegue qomle, 'ená'am da' nec'alaqtaguec so' Jesús. Ỹim, qana'chi qo'mi qataxa 'ami ỹauee'ualo ga'me huét'a ñi'me. 15Ỹima di'ỹoq dójo', da' qaidi 'adiỹamaqáiñi, qaidi da' jalcote na' ỹaconeguet da' l'ágaxanataxanaxat ñi' Dios, nataq'en jalcote na' ỹaatapecot da' netónaxac, da'me náaue da' li'ỹoxodic ñi' Dios.
16Chan'eesa sa 'te da' ñalásaxanaqta't qomle. Temaqaidi da' sega'me nacaquétañi da' qadó'oquiaxac, qaláxasa jeda'me sa di'ỹoq 'me qanchaalataxac noloqo'te da' naqaloxodétaseguem. 17Qá'a naa'me qane'queténaxaco naỹi da'me qanchaalataxac, naa'me qaỹa 'te laliide'j qataxa sa 'te loidéegue, naqainaua naua' qo'mi ỹ'éteeta ga'me ỹátaqta let'ádaic ni'ỹoxodic 'me qaỹa 'te loiquiaqa', sa 'ená'am na' qane'queténaxacpi. 18Chan'eesa sa 'te seloqótaỹi qomle ga'me ỹ'oqóchiỹi. Jalgáta ga' sa di'ỹoq. Qá'a ga'me ỹ'oqóchiỹi, sa 'te loguéegue, qaláxasa ga'me sa di'ỹoq, na'chiga 'me qaỹa 'te loiquiaqa'.
Currently Selected:
2 Corintios 4: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.