2 Corintios 6
6
1Qá'a qo'mi lecochaxa'u ñi'me Dios da'me l'onataxanaxac, chan'eesa 'ami ñachoxodénaqtapegoovlo da' 'ená'te qomle da' ỹisamaxáỹi da' 'ami ỹichoxode'n ñi'me Dios. 2Qá'a naua' l'aqtaqa ñi'me 'me nedétrañi 'enapega't:
So' nolo' 'me ỹichoxodénataxanaxaqui, qana'chi 'am semachíỹa;
qataxa so' nolo' 'me huáaue da' sec'alaqtaxan, qana'chi 'am ñoq'oỹá'ac ỹicochiỹa.
Na'chína naỹi na' nolo' 'me niỹálaqtaxanaxaqui; qataxa na'chína na' nolo' 'me nec'alaqtaxanaxaqui.
3Qaỹa 'te ga'me 'uootaxa taa'le ñauánaqtapeeguet, da' qaidi sa 'te da' sa ỹiỹamaxañi ga'me qoỹasaxalégue da' qad'onataxanaxac. 4Na'chidáta da' sétaaque da' ỹima na' s'etaqpi na'chi di'ỹoxoma qa'e'n da' qo'mi lelatáqa ñi'me Dios, qá'a ỹasouaxat da' ỹátaqta 'uo da' ñiuénaxagueta ỹima naua' qane'queténaxacpi, da' qadovic qataxa jen'me qanloiquiaxanataguecpi. 5Qá'a qo'mi qoỹi'uaxáat'ape, qo'mi qoỹicoñi't, qo'mi qoỹicouaxat'ape, qataxa let'ádaic da' qad'onataxanaxac, sa s'ochaxaỹi di' pí'ỹaq, qataxa qadoqouat. 6Nataq'en di'ỹoxoma qa'e'n da' qo'mi lelatáqa ñi'me Dios da' 'ónaxaic qadasoxoc, qataxa da' qadaatetonaxanaxac 'me 'eesa, qataxa da' qanpogoxóinaxac, qataxa da' qadauochidíỹaxac, qataxa na'chi 'eeta't da' qo'mi huet'aita so' Espíritu Santo, qataxa da' 'eesa qadoqopi'chidíỹaxac, 7qataxa da'me qad'aqtaxanaxac 'me 'eesa, qataxa da' lañoqtaxanaxac ñi'me Dios 'me qo'mi huet'aita. Qataxa s'euóxonaxa da' n'euóxonaxat chaalataxac 'me huosóta, da' ỹivíta da' qo'mi qoỹicouaxa'n, 'uootaxa da' 'uo ga' ñicotaxá'ỹi'. 8Qataxa 'uo di' nolo' na'chi qo'mi qoỹi'ỹoxoden'ape, qataxa da' qo'mi sa 'te qoỹodiáquen'ape. Qataxa 'uo da' n'óosa da' qan'aqtaguec, qataxa 'uo da' sa nó'in. Qataxa 'uo da' qo'mi qovínaxanaxaiqa qoỹi'n, hua'idi ỹitaxa qoỹíitapega qo'mi 'eesoda. 9Qataxa hua'idi ỹitaxa qoỹinapéga sa 'te qo'mi qoỹaateto'n, qataxa 'uo da' qoỹinapéga da' qo'mi naatetonaqa. Qataxa 'uo da' qo'mi qoỹachitalóo'te da' qadeleuaxa, qaláxasa maliaxa ñic'alqátaiỹi. 'Uo da' qo'mi qoỹi'uaxáat'ape, qaláxasa sa 'te qo'mi qoỹalaa't. 10Temaqaidi da' saquicoqóta, qaláxasa na'chi 'eeta't da' qo'mi madet'ape. Qataxa temaqaidi da' qo'mi choxodáchi, qaláxasa jalcote na' sesaliaqtetaq. Temaqaidi da' qaỹa 'te ga' sauanáxa, qaláxasa qaỹa 'te ga'me qadovic.
11'Ami qadaqáỹa' 'me 'ad'acháqadii na' Corinto, qo'mi ỹátaqta qaỹa 'te ga' ñip'itáxanaqtaaque da' 'ami setaxasóxovlo, ỹátaqta huosóchiỹi jañi' qadiquidiaqte, qaỹa 'te ga' 'chi soxotaqátapiiñi. 12Qataxa sa 'te 'uo ga' 'oonolec da' 'chi soxotaqátapii'nsop gamachaqaiga da' 'oñíita, mai'chi 'ami 'me huo'oi naua' qo'mi 'auoxochíitapii'nsopa. 13Naỹi 'ami ñachoxodénoovlo, sená'am ga' net'a da' nachoxodénoovlo gaua' lec'óqo'te, da' ỹátaqta 'au'ouáchichiilo qomle naua' 'adiquidiaqtéldii', 'oñíit'em jaỹim da' qaỹa 'te ga' ñip'itáxaataaque da' 'ami sosoovlo.
Qo'mi senqá'am ga' l'emec ñi' Dios
14'Ená'te da' 'auaqaiỹet qomle ga' siỹaxaua 'me sa d'amaqténataxan. Qá'a da' naq'áita da'me, qana'chi 'ená'am ga' qoỹiuaxaỹaxana't 'me sa 'te natena't. Qá'a ¿qo'li taiỹet da' huaxaiỹet da' chaalataxac huosóta da' chaalataxac 'me sa nó'in? 'uootaxa ¿qo'li huaqát'ai na' ỹ'oqóchiiñi na' n'álaxa? 15Qataxa so' Cristo ¿qo'li neuotée'te' so' qadó'o paiỹac Satanás? qataxa ga' tamnaxaic ¿qo'li 'ená'am ga' sa tamnaxaic? 16Qataxa ga' 'emec 'me tamnaxaqui ¿qo'li qoỹanáaue ga' 'chi nadénaqtac niquí'i? Qá'a 'ami 'me 'ami l'emáqa ñi'me Dios 'me sa leuaxaic, qá'a ñi'me 'enaac:
Sonétaaue qataxa sequétaaue qomle jen'me siỹaxadipi;
jaỹim 'me naqaỹim let'a netamnaxala',
qana'chi jen'me mai'chi ỹalaqapi.
17Chan'eesa nataq'en ñi' qadesaliaxanec 'enaac:
'Oquí'ỹai qomle na' sa d'amaqténataxan, qataxa 'auỹochíit'a;
qataxa 'ená'te 'aupochíiỹi qomle ga' desepaxanaqtaxan,
qaidi 'ami saconeeta,
18qataxa qaidi na'chaỹim 'me jaỹim 'adet'ai.
Qana'chi 'ami ỹalaqapi qataxa ỹalepi, naqaida 'me 'enaac ñi'me qadesaliaxanec 'me p'asáiỹi.
Currently Selected:
2 Corintios 6: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.