Hechos 11
11
So' Pedro d'aqtaxanem so' 'amaqténataxanaxaicpi di' Jerusalén
1Saua' Jesús lamaxa's qataxa so' 'amaqténataxanaxaicpi 'me néta'ña di' Judea, so'me joca'li p'iquilégue da' nataq'en ỹaconeguet da' l'aqtac ñi' Dios na' sa judiopi. 2Joca'li v'iỹílaxague da' Jerusalén so' Pedro, qana'chi quetapeelégue so'me jen'me judiopi 'me quétapegue' da' napaxaguenataxanaxac da' qoỹa'uo ga' n'anaxat na' ló'oc ga'me sa judío lé'ec. 3Qana'chi qoỹinatétaco' so'me, qoỹinaaco':
—¿Tá'nooqo'chi 'ausapchiỹa na'me sa judío lé'ecpi qataxa 'adiqui'ỹáxau'pi?
4Chan'eesa so' Pedro ỹachiỹoxochíchii'ña da' ỹ'axat da'me chiỹoqóchii'ña ỹima da' huápiỹi, 'enaac:
5—Jaỹim souét'a ca'li di' noic Jope. Qana'chi cana'le ñitaméetac, qana'chi 'uo so' ỹauanáxanaxac: jaỹim selá'a so' 'ená'am na' huáloq let'ádaic chiỹoqo'ot di' piỹem, qoỹaxada'salo naua' cuatro leséenaqa. Qana'chi nivída'ña di' souét'a. 6Ca'li ỹátaqta sec'aten, qana'chi selá'a na' síiỹacpi 'me cuatro naua' lapia'te, 'uo na' nelopi qataxa na' huosáñi, qataxa na' naqalec, qataxa na' máỹo'. 7Qana'chi semachíỹa so' n'aqtac jaỹim 'enapéga, 'enaac: “'Am Pedro, 'oñíseguem, 'aua'uo qomle ga' 'aualaat jen'me síiỹacpi, qana'chi 'aualic.” 8Qaláxasa jaỹim senaac: “'Ena't, 'am ỹasoxola', qá'a jaỹim sa sauana taa'le da' salic ga'me qoỹinapéga da' paanaxadaic, 'uootaxa ga'me sa qoỹisiquiaxaná'a da' qoỹalic.” 9Chan'eesa so'me n'aqtac 'me chimaqpecot di' piỹem ỹitaxa v'iỹílaxalégue da' jaỹim 'enapéga, 'enaac: “Ga'me sóxote liỹóisec ñi' Dios 'ená'te da' 'auenapéga da' paanaxadaic.” 10Jeso'me n'aqtac tres da' v'iỹílaxalégue da' jaỹim 'enapéga. Huá'a, qana'chi ỹima v'iỹilqot di' piỹem. 11Huá'a, qana'chi nivídeda'uo ñi' 'emec 'me souét'a saua' tres siỹaxa'u. Saa'me namaxa's, chiỹoqoda'ague di' Cesarea da' jaỹim n'iidá'a. 12Qana'chi so' Espíritu Santo jaỹim ỹamaxaguelo saa'me da' sequeelo, qaỹa 'te ga' sega. Nataq'en huo'oi naa'me ñáictapee'to seis qadaqáỹa'. Qana'chi qadema da' sep'áxauo ñi' l'emec so' siỹaxaua. 13Qana'chi so'me qo'mi ỹ'axatema da' 'éeta ca'li huá'a so' l'acháqa' da' nauá'ne' so' namaxasec piỹem lé'ec, nichaatétañi, qana'chi 'enaaco': “'Auauo'oi qomle gaua' 'auamaxategue di' noic Jope, da' qaidi ỹ'iidá'a ñi' lenaxat Simón, da' lenaxat laqáỹa Pedro. 14Ñi'me qomle 'am ỹ'axátem da' 'éeta, da' qaidi 'am 'anec'aléegue qataxa ỹima na'me 'ac'óqo'tepi.” 15Ca'li jaỹim s'aqtaxáatac, qana'chi janac so' Espíritu Santo da' ta'nỹet ỹima so' siỹaxadipi, 'ená'am da' 'éeta qo'mi ca'li so' ỹímta qota'ñiita. 16Huá'a, qana'chi jaỹim seenata ca'li da' l'aqtac so' qadasoxola' 'me 'enaac: “'Eesása so' Juan da' dachiláxanataxana na' noxop, qaláxasa da' 'oñíita qomle 'ami qonachiláxanỹilo ga' Espíritu Santo.” 17Ñi'me Dios da' nataq'en ỹanem jen'me siỹaxadipi da' 'ena'ama qa'e'n qo'mi 'me s'amaqténaq so' qadasoxola' Jesucristo, chan'eesa ¿jái'chi jaỹim da' ñauaneguet jiñi'me?
18Qana'chi so'me 'amaqténataxanaxaicpi 'me néta'ña di' Jerusalén, ca'li naquiáxana dójo', qana'chi ỹaxañi da' losáxac, qana'chi ỹi'ỹoxodéetac ñi' Dios, 'enaac:
—¡Já'a, na'chi 'eeto' ñi' Dios da' nataq'en ỹanem na' sa judiopi, da' qaidi ỹigue'm naua' loico, qana'chi 'uo da' lec'alaxa 'me qaỹa 'te loiquiaqa'!
So' 'amaqténataxanaxaicpi 'me néta'ña di' Antioquía
19Joca'li sóxote qoỹalaat so' Esteban, qana'chi chiỹoqóchii'ña da' nataq'en qoỹilagaxatapíỹi so' l'amaqténataxanaxau'pi, qana'chi 'uo na' dasóiỹi. 'Uo na' taiỹi da' Fenicia, Chipre, qataxa da' Antioquía. Hua'alo naa'me 'ale'u, qana'chi qoỹ'axáteegue da' 'ónaxaic qadipí'ic, qaláxasa na'chínata na' judiopi, qana'chi na' siỹaxadipi laỹi sa qod'aqtaxanem. 20Qaláxasa 'uo na' 'amaqténataxanaxaicpi 'me chiỹaqa'ague da' Chipre qataxa da' Cirene 'me nivíta di' noic Antioquía. Qana'chi jen'me d'aqtaxanem nataq'en na'me sa judiopi, ỹ'axátem da'me 'ónaxaic qadipí'ic 'me n'aqtaguec so' Jesús 'me qadasoxola'. 21Qana'chi da'me lañoqtaxanaxac so' qadasoxola' ỹátaqta huet'aguet jeso'me, chan'eesa ỹátaqta jalcote na' ỹaxañi da' toisec l'amaqténataxanaxac, qana'chi ỹ'amaqten so' qadasoxola'.
22Qana'chi jen'me 'amaqténataxanaxaicpi 'me néta'ña di' Jerusalén, ca'li p'iquilégue dójo', qana'chi qoỹamaq so' Bernabé da' ỹividetelégue di' Antioquía. 23Joca'li ỹividi't so' Bernabé, qana'chi ỹilalégue da' loq'oỹaqtaxanaxac ñi' Dios. Qana'chi jeso'me ỹátaqta mátac. Huá'a, qana'chi ỹátaqta huaqáta ỹima so'me, da' qaidi sa ỹaqá'a ga' daseegue jan' liquidiaqte, na'chidáta da' ỹátaqta quelégue so' qadasoxola'. 24Qá'a so' Bernabé ỹátaqta 'ónaxaicaloic, qataxa so'me saqáchiỹi so' Espíritu Santo qataxa da' lip'iỹáxac. Chan'eesa ỹátaqta jalcote so' dálaxaic siỹaxadipi da' 'equegue so' qadasoxola'.
25Joca'li ỹim dójo', qana'chi so' Bernabé taiỹi da' Tarso da' ỹ'iiná'a so' Saulo. Ca'li nauá'ne' so'me, qana'chi ỹauéga di' Antioquía. 26Qana'chi neda'ndi, ỹaleedóoue na' 'amaqténataxanaxaicpi, ỹinoxóteegue so' 'oonolec huó'e. Qana'chi ỹátaqta jalcote na' siỹaxadipi 'me ỹapaxaguéetrac. Huá'a di' Antioquía, qana'chi ỹímta da' na' 'amaqténataxanaxaicpi qoỹatámatec da' quétapegue' so' Cristo.
27Jesaa'me noloqo'te huo'oi saua' Dios l'aqtáxanaxanqa chiỹoqodá'ña di' Jerusalén da' ỹic'ádeta di' Antioquía. 28'Uo so' 'oonolec saa'me, lenaxat Agabo. So'me nichaachiñi joca'li huétaaue so' 'amaqténataxanaxaicpi, qana'chi so' Espíritu Santo ỹosáxanaxanec so'me da' 'uo qomle ga' né'ep ỹima jen' 'aléua. Qana'chi da'me l'aqtaxanaxac ỹipaquíchiỹi, huétooue so' nolo' ca'li let'a na' net'alpi so' lenaxat Claudio. 29Chan'eesa na'me 'amaqténataxanaxaicpi 'me néta'ña di' Antioquía dosápiỹi da' ỹa'uo jaga' lecochaxanaqte da' ỹamaxa so' l'amaqténataxanaxau'pi 'me néta'ña di' Judea. Ga'me táchii'ña ga' ỹañoxot da' ỹan. 30Qana'chi naq'áita. Qana'chi qoỹamaxa jaso' n'ágaxanaqte so' nasoxola'pi 'me néta'ña di' Judea, qoỹachóxonaxanque so' Bernabé qataxa so' Saulo.
Currently Selected:
Hechos 11: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
