Hechos 16
16
So' Timoteo náicapee'to so' Pablo qataxa so' Silas
1So' Pablo qataxa so' Silas ỹivíded'a di' noic lenaxat Derbe qataxa di' Listra. Huá'a di'me, qana'chi ỹilodalégue so' 'amaqténataxanaxaic lenaxat Timoteo. Jeso'me lec'óxot jaso' judío lase 'amaqténataxanaxai, qaláxasa so' let'a 'me griego lé'ec. 2So' 'amaqténataxanaxaicpi 'me néta'ña di' Listra qataxa di' Iconio ỹátaqta 'ónaxaic qa'en da' lasoxoc so'me. 3Qana'chi so' Pablo sétaaque da' náictapegue' so' Timoteo. Qana'chi ỹ'áta da' qoỹa'uo jeso' n'anaxaset na' ló'oc, qá'a sétaaque da' na' judiopi 'me néta'ñalo saa'me 'ale'u ỹiỹamaxadéeta so'me, qá'a ỹima qoỹaỹáten da' griego lé'ec so' let'a. 4Qana'chi ỹima jen'me noicpi 'me tadelégue, ỹ'axátetrapeguem da'me laqátaxa'j saua' Jesús lamaxa's qataxa saua' nasoxola'te laqáỹa' 'me nétra'ña di' Jerusalén. 5Huá'a, qana'chi na' 'amaqténataxanaxaicpi ỹátaqta 'uo da' l'añaxac da' lip'iỹáxac, qana'chi saua' noloqo'tédi ỹátaqta nichíctaiỹi di' liiñi na' d'amaqtenataxan.
Da' lauanáxanaxac so' Pablo ca'li ỹilá'a so' siỹaxaua na'ata di' Macedonia
6So' Espíritu Santo sa ỹasenema saa'me da' ỹ'axátrem da' n'aqtac di' 'aléua lenaxat Asia. Chan'eesa saa'me napacdalégue di' 'aléua Frigia qataxa di' Galacia, 7cha ỹivíd'a ga' loiquiaqa' di' 'aléua lenaxat Misia. Huá'a, qana'chi sétaaque da' tadé'uo di' 'aléua lenaxat Bitinia, qaláxasa so' lepaqal so' Jesús sa ỹaseedé'uo saa'me da' ỹic'átre'uo. 8Chan'eesa saa'me napacdalégue di' 'aléua Misia, qana'chi nenóchidi'ña di' nadíỹaxasom lenaxat Troas. 9Huá'a di'me, qana'chi so' Pablo 'uo so' leuoqtaxanaxac jeso'me pí'ỹaq: ỹilo'oto' so' siỹaxaua 'me na'ata di' Macedonia. So'me nichaatétañi, qana'chi nachoxodéetapecot so'me, 'enaaco': “Ỹa 'auanait'a qomle na' Macedonia, qo'mi 'alcochiỹalo.” 10Ca'li 'uo da' leuoqtaxanaxac so' Pablo, qana'chi qo'mi ñiỹamaxataq da' saxa'ta di' Macedonia. Qá'a ỹátaqta 'eesa da' na'chiñi ñi' Dios ñi' qo'mi niỹáxatapee'talo, da' qaidi s'axátaxam ga'me siỹaxadipi da'me 'ónaxaic qadipí'ic.
So' Pablo qataxa so' Silas huétr'a di' Filipos
11Qana'chi sapágaxa'ta, sachíỹoxosoqchii'ña di' Troas, seloqot'eta di' 'aleuolec lenaxat da' Samotracia. So' nolo' laqáỹa, qana'chi sivítaxa di' nadíỹaxasom Neápolis. 12Huá'a di'me, qana'chi qótaxa di' Filipos, 'me ỹátaqta nedóchiiñi na' chiỹaqa'ague da' Roma na' netalégue na' ỹilótapegue' di'me, qataxa na'chidi di'me noic let'ádaic 'me ỹátaqta ỹ'oxodaq di'me 'aléua Macedonia. Huá'a di'me, qana'chi huo'oi saua' noloqo'te da' souqát'a. 13'Uo so'me nolo' 'me mataxaqui, qana'chi saxái'ỹa da' lai di' noic let'ádaic, sec'átaqaasó'ma so' loxogue so' ñáchi di'me huápega da' qoỹí'et da' tamnaxac. Huá'a, qana'chi sonqáchiiñi, qana'chi s'axátaqtapeguem da' n'aqtac na' ỹauodipi 'me dasot'a't. 14Qaa'le 'uo jaso' 'oonole ỹauo, lenaxat Lidia, chiỹaqa'ague da' noic Tiatira. Jaso'me ỹiméetac jen' ỹátaqta nó'in huoxóidit ỹimalqalégue na' letóomaxa. Jaso'me ỹauo na'chi 'eeta't da' quétapegue' ñi' Dios. Jaso'me naquiáxatac, qana'chi so' qadasoxola' ỹ'ouáchiỹi jaso' liquidiaqte, da' qaidi ỹaconeguet da'me ỹ'axátetac so' Pablo. 15Ỹim, qana'chi qonachiláxan, nataq'en ỹima so' lec'oqtepi. Ca'li ỹim, qana'chi jaso'me qo'mi nachoxodenoto, 'enaac:
—Qomle 'eesa 'ami da' 'auaatetoñii da' ỹ'amaqténataxanaxac so' qadasoxola', qana'chi n'óota qomle da' 'auc'áchiỹa di' ỹ'acháqa' da' 'ad'ochaqádii.
Qana'chi jaso'me ỹátaqta 'enapegalo qo'mi da' sonqáta'ña so' l'acháqa'.
16Cana'le ỹitaxa qótaxa'ỹa so'me tamnaqa', qana'chi sauadaq'aguet jaso' q'añole nelata 'me 'uo so' lé'ec nataqtáqaic 'me ỹilápegooue 'en ga' laqáỹa. Jaso'me ỹátaqta dauégaxatapiỹi jaso'me so'me ladípa, da' ỹilóoue ga'me laqáỹa. 17Jaso'me q'añole qana'chi quétapegue' so' Pablo, qataxa qo'mi. Qana'chi ỹ'alqata't, 'enaac:
—Nauójo' siỹaxa'u, naa'me d'onataxáatrapecot ñi'me Dios 'me p'asáiỹi, naa'me 'ami ỹ'axátetapeema da' ladic da' nec'alaxa.
18Ỹátaqta huo'oi saua' noloqo'te da' na'chi 'eeta't dójo'. Cha ỹivíd'a da' ỹátaqta sa ỹiỹamaxaden so' Pablo. Qana'chi so'me v'iỹílaxaguet jaso'me, qana'chi 'enapego' so'me né'ec 'me nétaaue jaso'me, 'enaaco':
—'Am sedolégue da' lenaxat so' Jesucristo da' 'ocá'ai jana'me q'añole.
Qana'chi so'me né'ec cá'ai jaso'me.
19Qaláxasa so' ladípa jaso' q'añole ca'li ỹilá'a da' ma'le qaỹa so'me dauégaxatapiỹi 'me n'onataguec jaso'me, qana'chi qoỹaconé'uo so' Pablo qataxa so' Silas, qana'chi qoỹauéguee'ga ga' letaxaỹaqa' so' net'alpi 'me huá'a laiñi so' noic. 20Qana'chi qoỹaueegueta saua' net'al 'me nimitraac na' nasouaxasetpi, qana'chi qoỹinaaco':
—Nauójo' siỹaxa'u, naa'me judío lase'. Naa'me ỹátaqta sa ỹalémaxa't na' siỹaxadipi jen' qad'acháqa', 21qataxa dapaxaguenataxatec na' n'onataguec 'me sa siỹamaxadénaq da' saconaxaguet da' s'étaq, qá'a qo'mi romano lase'.
22Chan'eesa so' siỹaxadipi ỹátaqta nep'aguee'to saa'me, qana'chi saua' net'al damaxasoxolóo'te da' qonaqa't naua' leuo saa'me, qana'chi qoỹalaqai'n, qoỹido'oque na' ne'uáanaxanaxat 'me 'epaq. 23Joca'li sóxote jalcote da' qoỹi'uaxáat'ape, qana'chi qoỹanédaaue jaga' necointáxanaxaqui. Qana'chi qoỹinapéga jeso'me ỹilótapegue' jaso' necointáxanaxaqui da' ỹátaqta netela'lo. 24Qana'chi ca'li 'uo da' n'aqtaguec jeso' ỹilótapegue' jaso' necointáxanaxaqui, qana'chi qoỹaadá'uo ga' ỹátaqta p'ásauo jaso' necointáxanaxaqui saa'me, qana'chi qoỹanaỹilo naua' lapia'te naua' necointáxanaxaqui' 'epa.
25Qaláxasa so' pí'ỹaq laiñi, qana'chi so' Pablo qataxa so' Silas, saa'me netameet'ape qataxa d'onaxaat'ape, ỹi'ỹoxodéetrac ñi' Dios. Qana'chi so'me laỹi necointáxau'pi naquiáxatapegalo saa'me. 26Qana'chi nepeláxateta da' 'uo so' nedáxa, qana'chi ỹátaqta ỹachólaxan jaso' necointáxanaxaqui, ỹátaqta ỹivídañi. Huá'a, qana'chi mai'chi n'ouátreegue naua' so'mi, qataxa mai'chi huosoỹilo naua' leque'te so' necointáisecpi. 27Qana'chi datom so'me ỹilótapegue' jaso' necointáxanaxaqui. Qana'chi ca'li ỹilá'a da' ỹima n'ouátetaiỹi na' sompi jaso' necointáxanaxaqui, qana'chi so'me nauégueegue so' legaxanaxat da' sétaaque da' mai'chi nalaatela't, qá'a nip'itáxatapega da' n'otáiỹi so' necointáisecpi. 28Qaláxasa so' Pablo ỹ'alaxalégue so'me, 'enaac:
—'Ená'te da' 'analaatela't, qá'a qo'mi ỹima da' qadalot'a't.
29Chan'eesa so' ỹilótapegue' jaso' necointáxanaxaqui ỹiỹáxanaaque jaso' coỹadáxanaqte, qana'chi ỹátaqta naqalégaqa'uo so' p'áuo, ỹátaqta divíloxolem da' loqolánaxa. Qana'chi so'me ỹisocoto naua' liliictel so' Pablo qataxa so' Silas. 30Ỹim, qana'chi ỹinoxodaqtréegue saa'me, qana'chi ỹinatet'ape, 'enaac:
—'Ami ỹaqáỹa', ¿jái'chogamaxa 'éeta ga' séeta, da' qaidi jaỹim qonec'alaxatéegue?
31Qana'chi saa'me 'eedaaco':
—'Au'amaqten so' qadasoxola' Jesucristo, qaidi 'am 'anec'aléegue, qataxa ỹima ga' 'ac'oqtepi.
32Qana'chi qoỹ'axátetapeguem so'me da' l'aqtac ñi' Dios qataxa ỹima so'me néta'ña so' l'acháqa'. 33Qaa'le na'chiso' so' pí'ỹaq so' ỹilótapegue' jaso' necointáxanaxaqui ỹiỹot'ape saua' liidíñi saua' ne'uaxánaqa saa'me. Ỹim, qana'chi so'me qataxa ỹima so' lec'oqtepi qonachiláxan. 34Joca'li ỹim, qana'chi ỹauéede'uo saa'me ga' l'acháqa', qana'chi ỹiqui'ỹáxat'ape. So'me qataxa so' lec'óqo'tepi ỹátaqta madet'ape, qá'a da' ỹ'amaqte'n ñi' Dios.
35So' nolo' laqáỹa, qana'chi saua' net'al ỹamaxata so' huataxanaq so'me ỹilótapegue' jaso' necointáxanaxaqui, da' qaidi 'enapéga da' ỹisodéegue saa'me. 36Chan'eesa so' necointáxanaxaqui ló'o 'enapego' so' Pablo, 'enaac:
—'Uo da' l'aqtac jen'me net'alpi, da' sétaaque da' jaỹim 'ami sesodéegue. Chan'eesa naỹi 'ami maale 'aunoxoñíiỹi, qaỹa 'te 'ami nauáneeta.
37Qaláxasa so' Pablo 'enapego' so' huataxanaq, 'enaac:
—Qo'mi 'me qo'mi romano lase'. Qo'mi 'aualaqáiñiit'ape, ỹima da' qo'mi qoỹic'atéet'ape, qamaale maliaxa da' sa qoỹaỹáten ga' sasouaxalégue. Qataxa qo'mi qoỹanédaaue jañi' necointáxanaxaqui, qana'chi ¿naỹi sétaacogamaxa da' 'chi qo'mi 'auoxochíitrapiiñi da' qo'mi 'ausoidéegue? ¡'Axai'! N'óota da' nepaca't ga'me, da' qaidi qo'mi ỹisodéegue.
38Qana'chi saua' huataxanaxalase' ỹ'axatema so' net'alpi da' l'aqta'j saa'me. Qana'chi jeso'me net'alpi ca'li ỹaỹáten dójo', qana'chi ỹátaqta dó'i, qá'a ỹaỹáten da' romano lase' saa'me. 39Qana'chi so'me net'alpi janac da' nemáatapecot so' Pablo qataxa so' Silas. Ỹim, qana'chi ỹisodéegue saa'me, qana'chi nachoxodéetapecoto, da' qaidi saa'me quéd'ai di' noic. 40Qana'chi saa'me ca'li quéd'ai jaso' necointáxanaxaqui, qana'chi ỹic'ádeta ga' l'acháqa' jaso' Lidia. Joca'li ỹima't da' nauáa'te' na' l'amaqténataxanaxau'pi qataxa da' ỹ'añaqtétrac, qana'chi saa'me jéque'.
Currently Selected:
Hechos 16: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
