Colosenses 4
4
1'Ami nadi'ppi, ỹátaqta 'av'íchii qomle ga' ỹiỹamqáchiiñi, qataxa ỹátaqta 'aupagaqchiñíichiỹi da' neseeténaguec ga' 'adamaxasíqui. 'Ami 'aueenachíiỹa da' nataq'en 'uo ñi' 'adadípai 'me net'ague da' piỹem.
2'Ami ỹátaqta 'oquiit'ot qomle da' 'antamnaxaquii. 'Anlóiteegue, qataxa 'auañíit'am da' 'antónaxaquii ñi' Dios. 3Qataxa nataq'en qo'mi 'antamñiitalóo'te qomle, qaidi ñi' qadasoxola' Dios qo'mi ỹanema ga' qadadíquiaxac da' s'axátaxaỹi da' n'aqtac qataxa da'me sa 'te qoỹaỹáten joca'li n'aqtaguec so' Cristo, qá'a na'chida da' 'uo da' jaỹim qoỹicoñideta't. 4Chan'eesa jaỹim 'antamñiitalégue qomle, qaidi ỹátaqta sen di'ỹoq da' s'axáteegue ga' lasoxoc da'me n'aqtac, qá'a naqaida da'me ỹ'onataxanaxac.
5Qataxa ỹátaqta 'anaỹáchiñiitela't da' 'auasoiỹa'aguet jen'me maliaxa sa d'amaqténataxan. Ỹátaqta 'apitaqchiñiỹa'pe naua' 'ónaxaiqa noloqo'te, da' 'uo ga' 'adedáqadii. 6Qataxa naua' 'adtaxaỹaxacódii' sa 'te 'aviñiimga qomle qataxa ỹátaqta madet'eeta. Ñi' 'oonolec da' dosápegue' ga' laqáỹa, ỹaỹáten da' ỹiỹamaxachíchiiñi ga' lasoxoc.
Da' p'áteegue nip'iỹénataxanaxac
7Ñi'me qanauotaxaua qadaqáỹa Tíquico 'me ỹátaqta qadepé'et qataxa qad'onataxanaxaua da' s'onataxanqot so' qadesaliaxanec, jiñi'me 'ami ỹ'axatema qomle ga' 'adipí'iquii da'me séeta. 8Chan'eesa 'ami samaxalo ñi'me, da' qaidi 'ami ỹ'axatema da' senqáta, qataxa qaidi 'ami ỹ'añaqte't. 9Ñi'me náictapegue' qomle ñi' Onésimo ñi'me qanauotaxaua qadaqáỹa qataxa qadepé'et. Ñi'me mai'chi 'adí'iqui ca'li. Ñaa'me 'ami ỹ'axatema qomle ỹima jen'me huét'a jénjo' souqát'a.
10Ñi'me Aristarco 'me ñicoñitáxaua, ñi'me 'ami ỹamaxalo da' lip'iỹénataxanaxac, qataxa ñi'me Marcos 'me lanóqolec laqáỹa ga' Bernabé. 'Ami sóxote da' 'auaỹáchiñii da' ỹaqátaxac da' saqátetapeelégue ñi'me. Qana'chi da' ỹivíta da' 'ami ỹic'atalo, qaláxasa ỹátaqta 'auloiỹet. 11Nataq'en 'ami ỹamaxalo da' lip'iỹénataxanaxac ñi' Jesús, 'me lenaxat laqáỹa Justo. Jen'me d'amaqténataxanpi judío lé'ecpi, na'chináate' naa'me da' jaỹim lecochítrapega s'axátaqtac da' ỹima ỹilo'ogue ỹimata'a'téna ñi' Dios qataxa da' jaỹim ỹ'añaqtétrac. 12Nataq'en 'ami ỹamaxalo da' lip'iỹénataxanaxac ñi' Epafras. Ñi'me nataq'en lamaxasec so' Jesucristo, qataxa mai'chi 'adí'iqui ca'li. Ñi'me na'chi 'eeta't naale da' 'ami netameetalóo'te, da' qaidi qaỹa 'te 'uo da' 'adeenataxaquii, qataxa da' qaidi ỹátaqta 'anañañiỹot da' 'av'íchii' naua' 'enapegalo ñi' Dios. 13Qá'a jaỹim ỹátaqta sauáachiỹi ñi' Epafras ỹátaqta jalcote da' loouoxo, ỹasouaxat da' 'oñíita, nataq'en jen'me néta'ña di' noic Laodicea qataxa di' Hierápolis. 14Qataxa ñi'me qanauotaxaua Lucas 'me nata' ló'o nataq'en 'ami ỹamaxalo da' lip'iỹénataxanaxac, qataxa ñi' Demas.
15Qataxa 'auañiima qomle da' ỹip'iỹénataxanaxac ga' qadaỹipi 'me l'acháqa' di' Laodicea. Qataxa 'auañiima nataq'en da' ỹip'iỹénataxanaxac jaga' Ninfas qataxa na' 'amaqténataxanaxaicpi 'me lemáqa' di' l'acháqa'. 16Qomle 'aumachii da' 'autaxaỹaxañii jan' ỹidíise, qana'chi 'auamaqáiỹa qomle na' 'amaqténataxanaxaicpi 'me l'acháqa' di' Laodicea, da' qaidi nataq'en ỹitaxaỹaxan. Qataxa nataq'en 'autaxaỹaxañii qomle jaga' ỹidíise 'me chiỹaqá'a di'me. 17Nataq'en 'au'aqtaxañiim qomle ga' Arquipo, 'oñíỹaac: “Ỹátaqta 'aupaqueteloo'to' qomle naua' 'ad'onataxanaxaco 'me 'am ỹanema so' qadesaliaxanec, da' qaidi 'au'onataxanot.”
18Jaỹim Pablo mai'chi semaac da' sidíñi da' ỹip'iỹénataxanaxac da' 'ami samaxalo. 'Aueenachíit'a qomle da' jaỹim qoỹicoñideta't. Ñi' Dios 'ami ỹanema qomle ga' liỹálaqtaxanaxac. Já'a, na'chi naq'áita dójo'.
Currently Selected:
Colosenses 4: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.