Efesios 2
2
Qadec'alỹi da' lesóxodic ñi' Dios
1Ñi' Dios 'ami ỹanema da' 'adec'alaxauai so' Cristo ca'li 'ami maliaxa 'ovíitaaue da' sega'me 'adeleuaxaquii, ỹasouaxat jen'me sa nó'inpi qataxa jen'me 'adesamaxataxaquii 2'me 'ovíitaaue, qataxa ỹasouaxat da' 'oquíitapegue' da' lasoxoc jen'me ỹ'étetac jen' janoic 'me huetalégue jen' 'aléua, qataxa 'av'íchiitac jen' 'enapéga jeso'me paiỹac qadó'o, 'me ỹ'añaqtetétac jen'me sa ỹoqo'cha ñi' Dios. 3Nataq'en ỹima da' senqáta na'chi senqá'am jen'me jesaa'me 'uáudeegue 'uóidi, da' qolqátapegue' jen'me mai'chi senqátapeecpi, qataxa s'étaqtac da' mai'chi loqopi'chi da' qadapáchiỹaxac qataxa jen'me mai'chi qadeenataxacpi. Chan'eesa ỹátaqta taỹá'a da' qo'mi huetalóo'te da' qaỹa 'te ga' 'ená'am lichic lalemataic ñi'me Dios, na'chi senqá'am ỹima jen'me siỹaxadipi laỹi.
4Qaláxasa ñi' Dios ỹátaqta let'ádaic da' lichoxodénataxanaxac da' ỹátaqta qo'mi ỹauoteque, 5qana'chi qo'mi ỹanema da' qadec'alaxaua so' Cristo, temaqaidi da'me maliaxa souqátaaue joca'li da' sega'me qo'mi napa'li ỹasouaxat jen' qadoicpi. Chan'eesa chiỹoqóchiỹi da' mai'chi l'ágaxanataxanaxac ñi' Dios da'me 'uo da' 'ami nec'alaxatréegue. 6Ñi' Dios nataq'en qo'mi nec'alaxachidíseguem, nataq'en so' Cristo Jesús, joca'li n'iỹílaxaseguem chiỹaqánỹi jaso' napa'lai't. Ỹim, qana'chi qo'mi nes'onaxana'ña'salo jeso'me da' piỹem. 7Ỹí'et dójo' jiñi'me, qá'a sétaaque da' ỹaloxon da' 'éeta da' let'ádaic loqopi'chi da' senqáta qataxa da' lauo'chi 'me ỹachiỹoxotaỹi so' Cristo Jesús jegaa'me maliaxa naidáuo noloqo'te. 8Qá'a naqaida da' loqopi'chi ñi' Dios 'me 'uo da' 'ami nec'alaxatréegue, qá'a 'uo da' 'adip'iỹáxaquii jiñi'me. Qaa'le da'me sa 'ami chiỹaqaavlo, qá'a da'me mai'chi l'ágaxanataxanaxat ñi'me Dios. 9Jeda'me sa 'te chiỹoxotaỹi ga' ỹiỹamqáchiiñi 'me ỹí'et ga'me siỹaxaua, qaidi qaỹa 'te ni'ỹoxodínỹi. 10Qá'a ñi' Dios qo'mi l'onataqa, qataxa qo'mi nañaxatoto qa'e'n so' Cristo Jesús, qá'a sétaaque da' s'étaq ga' ỹiỹamqáchiiñi. Jeda'me jalchi'eno' da' huaqátetañi da' sétaaque qadadíquiaxac.
Da' qad'emáxac 'me chiỹoqo'ot so' Cristo
11Chan'eesa 'ami 'aueenachíit'a da' 'éeta da' 'adasoxoquii joca'li, da' sa 'te 'adaỹii jen' judiopi. Chan'eesa jen'me judiopi 'me ỹa'uo na' n'anaxaset na' ló'oc na' lec'óqo'tepi, qana'chi ỹanec da' 'eet'oi: n'añiisec. Qaláxasa jen'me 'ami ỹimata'aque qaỹa 'te n'anaxaset. 12So'me ca'li maliaxa sa 'te 'auaatetoñii so' Cristo, qataxa sa 'anhuoquiiỹet jen' lec'oqtepi so' Israel, qataxa sa 'auaỹáchiñii jen'me ỹamaxataxacpi qataxa da'me ỹaloxóotac ñi' Dios josii'chi da' ỹanem jen' lec'oqtepi so' Israel. 'Chi 'oviitalégue jen' 'aléua, qaỹa ga'me táxa 'anaquitaxaquii qataxa sa 'auaatetoñii ñi'me Dios. 13Qaláxasa naỹi da' 'auqochiiuó'o so' Cristo Jesús, qana'chi 'ami 'me ỹátaqta soqoỹoqot'alo joca'li, qana'chi naỹi ỹátaqta 'ami sa qaỹadapiỹi, ỹasouaxat da' leleuaxa so' Cristo. 14So' Cristo naqaiso so' ỹa'uo da' qad'emáxac. Qá'a jeso'me ỹ'étec na' judiopi qataxa jen'me sa 'te judiopi da' 'oonolec da' ỹima mai'chi naỹi, qá'a sóxote ma'le ỹim da' noláxachiñi jeso'me nequepaqtaxanaxat 'me 'en nautena't na' siỹaxadipi. 15Qá'a so' Cristo naqaida da' mai'chi ló'oquiaxac 'en ỹinoxonéegue ỹima da' lapaxaguenataxanaxac na' naqátaxacpi na' judiopi. Huá'a, qana'chi ỹapotena't na' judiopi qataxa na' sa judiopi, qana'chi ỹaueeguet da' dálaxaic da' mai'chi naỹi. Qataxa da' ỹoqoteuó'o qa'en jeso'me. Naqaida 'me ỹí'et da' qo'mi ỹanema da' qad'emáxac. 16Naqaida 'me 'éeta so' Cristo ca'li qoỹip'enaỹi jaso' sodooso. Huá'a, qana'chi qaỹa qa'en da' nauteet'a't na' siỹaxadipi 'me colaxaỹi. Qataxa namá'ne' qa'en ñi'me Dios, qana'chi jen'me 'ená'am ga' 'oonolec nó'oquiaxac.
17So' Cristo janac, ỹ'axátem ỹima na' siỹaxadipi da' 'ónaxaic qadipí'ic 'me ỹí'et da' n'emáxac, cha ỹivid'alo da' 'oñíita 'me ỹátaqta soqoỹoqot'alo joca'li qataxa jen'me judío lé'ecpi 'me sa qaỹáaque. 18Qana'chi chiỹoqóchiỹi so' Cristo da' ỹima da' senqáta, temaqaidi da' judío lé'ec 'uootaxa sa 'te judío lé'ec, da' qo'mi ỹaueegueta ñi' qadet'a Dios da' sachiỹoxotaqaỹi so' Espíritu Santo. 19Chan'eesa 'ami 'me sa 'te judío lé'ecpi, sa 'te 'ami naỹi ỹaqá'a lase' da' 'oñiitalégue ga' 'aléua 'me sa 'te 'adalémaxasichii. Qá'a ỹátaqta naỹi 'ami mai'chi 'adaỹii ỹima na' lalémaxasetpi ñi' Dios, qataxa ỹátaqta 'ami l'acháqa' lase' jen'me lalémaxaset lec'óqo'tepi ñi'me. 20Qataxa 'ami 'oñí'ỹam ga' 'emec 'me qon'oxótapiiseguem, ỹ'oxolégue qoỹin so'me d'añapeeguet so' 'emec 'me lapaxañi josii'chi na' lamaxa'spi so' Jesús qataxa na' letaxaỹáxanaxanecpi ñi' Dios. Naqaiso so' Jesucristo so'me sega'me qa' 'me d'añapeeguet ga' 'emec. 21Jeso'me naqaiso so'me n'oxonaxala' ga'me 'emec 'me qoneuaxaỹaxátapiiseguem. Ga'me ỹátaqta nalóchiiñi qoỹin, cha ỹivíd'a da' 'ená'am ga' 'emec 'me ỹoqovíchiỹi qataxa ỹoqota'aguet so' qadesaliaxanec Jesús. 22Qana'chi naq'áita naỹi da' 'oñíita qataxa ỹima na' 'amaqténataxanaxaicpi laỹi ỹima 'auqochíita'uo so' Cristo, 'oñí'ỹam ga' 'emec 'me l'emec qa'en ñi' Dios so' lepaqal.
Currently Selected:
Efesios 2: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.