Efesios 5
5
Da' 'éeta da' lasoxoc jen'me lec'óqo'tepi ñi' Dios
1Qá'a 'ami lauotaqa'te lec'óqo'te ñi' Dios, chan'eesa ỹátaqta 'aupaquiỹápegue' qomle da' 'oñí'ỹam ñi'me. 2Qataxa ỹátaqta 'ami sóxodaiqa, qaidi 'oñíit'em so' Cristo da' ỹátaqta qo'mi noqopitalo, qataxa qo'mi nemeelóo'te, 'ená'am ga' n'aanaxate lec'óxot da' qoỹalaat, qataxa qoỹic'oi da' qoỹanot ñi' Dios. Qaa'le da' laitáỹaxac ỹátaqta ỹiỹamaxaden ñi'me.
3Qá'a 'ami lalémaxase'te ñi' Dios, chan'eesa n'óota qomle sa 'ami chimaqpegoovlo da' 'uo ga' nequeséeguetaxa qataxa ỹima jen'me desepaxanaqtaxanpi, 'uootaxa da' ỹipitá'a ga' ỹaqá'a. 4Qataxa 'ená'te qomle da' 'anasaqáidapeegue naua' n'aqtaqa 'me ỹauáaque ga' nepecóxo, 'uootaxa ga'me ỹa'uo da' nasáxanaxac, 'uootaxa ga'me qaỹa 'te ga' náaue. Qá'a jen'me sa 'ami taiỹita. Jaldato' da' 'ami 'auañíitapecot da' 'antónaxaquii ñi' Dios. 5Qá'a 'ami sóxote 'auaỹáchiñii da' sa ỹaqanatet da' ỹinoxoneuó'o ga' l'onataxanaxac so' Cristo qataxa ñi' Dios 'me ỹilo'ogue ỹimata'a'téna ga' siỹaxaua 'me nichíuatetapegue' jaga' sa loua, 'uootaxa ga' ỹ'étetac ga'me desepaxanaqtaxan, 'uootaxa ỹipitá'a ga' sa loxot ('me 'ená'am da' qonetameetapecot ga' 'chi nadénaqtac). 6Qataxa 'ená'te 'ami noqovíñii's qomle da' 'uo ga' 'ami ỹidolóo'te naua' lapaxaguenataxanaxaco 'me chiỹoxo's. Qá'a naa'me sa ỹiỹamadídiñi, naqainaua naua' ỹ'e't qomle da'me qaỹa 'te 'ená'am lichic da' laqalhuaxa ñi' Dios, da' ỹa'uo da' ne'uaxánaguec jen'me sa ỹoqochapiỹe't. 7Chan'eesa 'ená'te da' 'aualiquíitapeeguet qomle jen' quétapegue' dójo'.
8Qá'a 'ami ca'li 'ovíitaaue na' sega'me n'álaxa, qaláxasa naỹi da' 'ami 'auqochíita'uo so' qadesaliaxanec, qana'chi 'ovíitaaue da' ỹ'oqóchiiñi. Chan'eesa 'ami 'auadénaxachiichiỹi qomle ga' siỹaxaua 'me huétaaue na' ỹ'oqóchiiñi. 9Qá'a jen' ỹ'oqóchiiñi naqaida da' chiỹoqóchiỹi da' nauo'chi, qataxa da' 'eesa nasoxoc, qataxa da'me n'óiỹaxac 'me chimaqáchiiñi. 10Qataxa 'apaquiỹápegue' qomle da' 'auaỹáchiñii ga' lasoxoc ga' ỹiỹamaxaden ñi' qadesaliaxanec. 11Qataxa 'ená'te 'anaỹii'ỹa qomle jen'me qaỹa 'te ga' náaue lasoxocpi 'me ỹ'étetac jen'me huétaaue na' n'álaxa. Jaldáta da' 'aviñii di'ỹoq ga' ladic, da' qaidi qoỹaỹáten. 12Qá'a ỹátaqta ỹí'et da' nepecóxo da' 'uootaxa 'chi qoỹ'axat jen' sa di'ỹoq 'me ỹ'étetac jen'me. 13Qaláxasa da' 'uootaxa ỹima jen'me sa nó'inpi lasoxocpi ỹ'oqotelégue qa'en jen'me ỹ'oqóchiiñi, huá'a, qana'chi ỹima ỹátaqta di'ỹoqóta, qá'a jen'me ỹ'oqóchiiñi 'me ỹima ỹichoxot. 14Chan'eesa da'me n'aqtac 'eet'oi:
'Adatom, ỹa 'anlóiỹi, 'am 'ochaxaic;
'oñíseguem, 'auachíỹaqaaue na'me napa'lpi,
qana'chi so' Cristo 'am ỹicoỹadelégue.
15Chan'eesa ỹátaqta 'auloit'egue qomle da' 'adasoxoquii. 'Ená'te 'auadénaxachii ga' qaỹa 'te ỹaỹátenaac, jaldáta da' 'auadénaxachii ga' ỹátenaxanaxaic. 16Qataxa ỹátaqta 'aupitaxañiỹa'pe naua' noloqo'te da' 'av'íchii ga' ỹiỹamqáchiiñi, qá'a náajo' noloqo'te ỹátaqta sa nó'in na' siỹaxadipi. 17'Ená'te 'ami chiỹoxo's. Jaldáta da' 'aupaquiỹápegue' da' 'auaỹáchiñii ga'me 'éetapeec so' qadesaliaxanec. 18Qataxa 'ená'te da' 'ami taxáiqa, qá'a jeda'me ỹaueeguet da' sa naỹamaxa ga' siỹaxaua. Jaldato' da' ỹátaqta 'ami saqachiilo so' Espíritu Santo. 19Qataxa ñi' 'oonolec da' dosápegue' ga' laqáỹa, qaláxasa 'en jen' ỹodapecachi nalacpi 'me chiỹoqo'ot so' Espíritu Santo. Qataxa ỹátaqta ỹima jan' 'adiquidiaqchii da' 'au'onaxañiitac qataxa da' 'avi'ỹoxodíñiitac so' qadesaliaxanec. 20Qataxa na'chi 'eeta't qomle da' 'auañíitapecot da' 'antónaxaquii ñi' qadet'a Dios ỹasouaxat ỹima na' nasoxocpi, qá'a 'ami 'auqochíita'uo so' qadesaliaxanec Jesucristo.
Da' lasoxoc gaua' nóua' qataxa da' lec'óxo'j
21Ñi' 'oonolec da' 'oñíita ỹátaqta ỹipacapégue' qomle ga' liquiáxaua ỹasouaxat da' ỹátaqta 'uo da' 'enec qa'en ñi'me Dios.
22Jaga' ỹauo 'me sóxote huó'on, ỹátaqta ỹoqo'cha ga' loua, ỹadénaxachichiỹi qa'en da' ỹalaxaguet so' qadesaliaxanec Jesús. 23Qá'a ga' loua naqaiga ga' laqaic jaga'me, na'chi 'ená'am so' Cristo. So'me naqaiso so' laqaic na' 'amaqténataxanaxaicpi, qataxa naqaiso so'me qadec'alaxaqui. Jen'me naqáina na' sega'me ló'oquiaxac jeso'me. 24Chan'eesa jaga' ỹauo ỹátaqta ỹoqo'cha ga' loua, 'ená'am jen' 'amaqténataxanaxaicpi da' ỹátaqta ỹalaxaguet so' Cristo.
25Qataxa ga' lé'em da' sóxote huó'on ỹátaqta ỹichoxoden jaga' loua, 'ená'am qa'en so' Cristo da' ỹátaqta ỹichoxoden na' 'amaqténataxanaxaicpi, qataxa nemeelégue jen'me. 26Naqaida 'me 'éet'ec so'me, qá'a sétaaque da' ỹoqovíchiỹi qa'en jen' 'amaqténataxanaxaicpi, 'en na' noxop da' ỹiỹo qataxa da' l'aqtac. 27Qaidi qomle ỹivíta da' naueela't so'me na' 'amaqténataxanaxaicpi, qaláxasa ỹátaqta 'uo da' lodiáquiaxac, qataxa qaỹa 'te ga' lesepaxanaxa, 'uootaxa ga' sega'me li'ỹáxanatac, 'uootaxa ga' laqáỹa 'me 'ená'am da'me. Jaldáta da' ỹátaqta huesóta qataxa nalóchiiñi. 28Ga'me lé'em da' sóxote huó'on, ỹátaqta ỹichoxoden jaga' loua, 'ená'am qa'en da' mai'chi ló'oquiaxac. Ga' ỹichoxoden jaga' loua, jega'me mai'chi nichoxodeela't. 29Qá'a qaỹa 'te ga' mai'chi necosemela't. Jaldáta da' ỹiqui'ỹáxan qataxa nichoxodeela't. Naqaida 'me 'éet'ec so' Cristo jen'me 'amaqténataxanaxaicpi, 30qá'a mai'chi lalémaxaset ló'oquiaxac. Na'chiqo'mi 'me loxosetpi da' ló'oquiaxac, 'ená'am da' qo'mi lapa'chi qataxa lip'ináqa. 31“Chan'eesa ga' siỹaxaua cá'ai ga' let'a qataxa jaga' lat'e da' huó'on, qana'chi l'acháqadiaxaua jaga' loua. Ỹim, qana'chi jegaa'me dos 'ená'am da' 'oonolec.” 32Chan'eesa dójo' n'aqtac ỹátaqta let'ádaic da' náaue 'me sa di'ỹoq. Qataxa jeda'me ỹ'axat qasen da' 'éeta so' Cristo qataxa jen' 'amaqténataxanaxaicpi. 33Qaláxasa da'me nataq'en ỹ'axat da' ñi' 'oonolec da' 'oñíita ỹátaqta ỹichoxoden jaga' loua, 'ená'am da' mai'chi nichoxodeela't. Qataxa da' jaga' ỹauo ỹalaxaguet ga' loua.
Currently Selected:
Efesios 5: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.