Gálatas 1
1
So' Pablo ỹidénaqtena jaso' lidíise so' 'amaqténataxanaxaicpi 'me Galacia lé'ec
1Jaỹim Pablo, jaỹim lamaxasec so' Jesucristo. Sa 'te jaỹim lamaxasec ga' 'chi siỹaxaua qataxa da' jaỹim ỹidéuo, na'chisóta so' Jesucristo qataxa ñi'me let'a Dios 'me nec'alaxadiséguem ca'li qoỹalaat. 2Jaỹim qataxa ỹima jen'me qadaỹi 'me jaỹim huet'asop 'ami samaxasaxalo jan' qadidíise, 'ami 'amaqténataxanaxaicpi 'me 'ad'acháqadii na' Galacia. 3Sétaaque da' 'auacoñiiỹet da' n'ágaxanataxanaxac qataxa da' n'emáxac 'me chiỹoqo'ot ñi' qadet'a Dios qataxa so' qadesaliaxanec Jesucristo, 4'me nañaneguet joca'li da' nalaataguec, ỹasouaxat naua' qadoico, qaidi qo'mi nec'alaxatree'guesopa jen'me sa ỹiỹamaxañi 'me huetalégue jen' 'aléua. Ỹipaquíchiỹi da' mai'chi 'éetapeec ñi' qadet'a Dios. 5Chan'eesa ¡na'chiñi da' ni'ỹoxodenatac qomle ñi' Dios! Já'a, na'chi naq'áita dójo'.
Qaỹa 'te n'aqtac laqáỹa da' nec'alaxaqui
6Jaỹim ỹátaqta jalcote da' ỹ'aalaxac da' 'oñíita, da' ỹátaqta pasá'a da' 'oquí'ỹai ñi'me Dios, 'me chiỹoqóchiỹi qa'en da' qo'mi ỹichoxode'n so' Cristo ca'li ñi'me 'ami ỹiỹáxanalo. Ỹátaqta s'aalát'ec da' 'oquiiỹi da' ỹaqá'a n'aqtaxanaxac 'me qoỹíitapega nec'alaxaqui. 7Sa 'eesa taa'le 'uo ga' laqáỹa n'aqtaxanaxac 'me nec'alaxaqui. Qaláxasa 'uo jen'me sa 'ami ỹalémaxa't, qataxa sétaaque da' ỹiléemaxat da' n'aqtaxanaxac 'me nec'alaxaqui 'me chiỹoqo'ot so' Cristo. 8Qaláxasa qomle 'uo ga' qoỹ'axatema 'ami ga' n'aqtac laqáỹa 'me qoỹíitapega nec'alaxaqui, qana'chi qomle sa 'te nateneguet da' sóxote 'ami s'axátaqtapeema, qana'chi ga' siỹaxaua qoỹa'uo qomle ga' ne'uaxánaguec let'ádaic chiỹoqo'ot ñi'me Dios, temaqaidi da' 'uootaxa jaỹim, 'uootaxa piỹem lé'ec Dios lamaxasec. 9Da'me sóxote da' senaac ca'li, qaláxasa ỹitaxa da' s'iỹílaxalégue da' senaac: Qomle 'uo ga' ỹ'axat ga' n'aqtaxanaxac laqáỹa 'me qoỹíitapega nec'alaxaqui, qana'chi 'uootaxa sa nateneguet da' sóxote da' 'auacoñiiỹet, qana'chi ga'me qoỹa'uo qomle ga' ne'uaxánaguec let'ádaic chiỹoqo'ot ñi'me Dios.
10Da'me senaac dójo', qana'chi ¿qo'li sétaaque 'chi jaỹim ỹiỹamaxaden na' siỹaxadipi, 'uootaxa ñi'me Dios? 'uootaxa ¿'chi sétaaque da' qaỹa 'te 'uo qasen na' siỹaxadipi? 'Axai', qá'a qomle 'chi sétaaque jaỹim ỹiỹamaxaden na' siỹaxadipi, qana'chi sa 'te jaỹim lamaxasec so' Cristo.
Da' 'éeta so' Pablo da' Jesús lamaxasec
11Qaláxasa 'ami ỹaqáỹa', jaỹim sétaaque 'auaỹáchiñiit'eguet da'me n'aqtac 'me 'ami s'axátetapeema, jeda'me sa 'te leenataxac ga' 'chi siỹaxaua. 12Jeda'me sa 'te da' sachiỹoxoto'ot gamachaqaiga 'chi siỹaxaua. Qataxa sa 'te 'chi ñapaxaguenaguec, qá'a jalsóta so' Jesucristo 'me jaỹim ỹaỹátenaxanaxanec dójo'.
13Qataxa sóxote da' 'aumachiitapeelégue da' 'éeta ca'li da' ỹasoxoc so' maliaxa sequétaaue da'me lasoxoc da' l'amaqténataxanaxac na' judiopi. Qataxa sóxote da' 'auaỹáchiñii da' séet'ec da' ỹaqaleuaxa ca'li ñaqalegaxátac na'me Dios lalémaxasetpi da' sétaaque da' ñimachíchiiñi da' salaat. 14Da'me l'amaqténataxanaxac na' judiopi ca'li souétaaue, qana'chi jaỹim ỹátaqta jalcote na' mai'chi ỹ'acháqadiaxau'pi 'me ñaloxou'pi 'me ñapacalégue. Qá'a jaỹim ỹátaqta sequet'eelo da' ỹiỹamaqtaqa naua' napaxaguenaxaco so'me huá'au ỹit'alpi. 15Qaláxasa ñi'me Dios jaỹim ỹilotelégue joca'li maliaxa sa 'te ñiỹíñi, qá'a jalcote da' loqopi'chi, qana'chi jaỹim ỹiỹáxana joca'li. Chan'eesa ca'li 'éeta da'me jiñi'me, 16huá'a, qana'chi jaỹim ỹaatetonaxanaxaneguet so' lec'óxot, qaidi jaỹim s'axátem jen'me sa judiopi da' l'aqtac 'me nec'alaxaqui. Ca'li sóxote ỹim da'me, qana'chi jaỹim qaỹa 'te ga' ñinát'e'. 17Qataxa sa 'te saiỹi da' Jerusalén da' 'uootaxa sec'atalo saua' sóxote da' Jesús lamaxa's. Jaldáta da' jaỹim sa ñiỹáloxoden da' sec'áta di' 'aléua Arabia. Ca'li ỹim, qana'chi ñ'iỹílaxa di' noic Damasco.
18Ca'li ma'le ỹinoxodéegue saua' tres 'uóidi, qana'chi jaỹim saiỹi di' Jerusalén. Huá'a, qana'chi ñaatetó'ne' so' Pedro, qana'chi souet'asop so'me, ỹivi't saua' quince noloqo'te. 19Qaláxasa sa 'te taa'le sela'alo gaa'me Jesús lamaxa's laqáỹa', na'chisóta so' Jacobo so'me lanogaxaua so' qadesaliaxanec Jesús. 20Ñi' Dios ỹic'atéetac naỹi da'me sidíñi 'me 'ami samaxalo, da'me ỹataqtelégue 'eesa.
21Ca'li ỹim dójo', qana'chi sec'áta di'me 'aléua Siria qataxa di' Cilicia. 22Qaa'le jen'me qadaỹi 'me ỹ'amaqtéetac so' Cristo 'me néta'ña di' 'aléua Judea, sa 'te jaỹim ỹaateton ca'li jen'me. 23Jaldáta da' 'chi naquiáxatapeelégue da' n'aqtaxanaxac 'me 'enaac: “So'me siỹaxaua 'me qo'mi ỹicaat'ape ca'li, naỹi ma'le ỹ'axátetac da' nip'iỹáxac 'me sétaaque da' noláxachiñi josii'chi.” 24Qana'chi ỹi'ỹoxodéetac ñi'me Dios ỹasouaxat jaỹim.
Currently Selected:
Gálatas 1: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.