Lucas 11

So' Jesús dapaxaguenataxanec da' tamnaxac

(Mateo 6.9-15; 7.7-11)

1'Uo so' nolo' so' Jesús huét'a so' 'aléua netaméetac. Joca'li ỹimat da' netamnaxac, qana'chi 'uo so' lapaxaguenatac 'enapéga, 'enaaco':

—'Am qadesaliaxanec, qo'mi 'auapaxaguenque qomle da' qantamnaxac, 'ená'am da' 'éeta so' Juan joca'li ỹapaxaguen so' lapaxaguenatacpi.

2Qaama'le so' Jesús 'enaaco':

—Da' ỹivíta da' 'antamiñii, qana'chi 'oñíitojo':

'Am qadet'a 'me 'onet'ague na' piỹem,

ỹima qoỹi'ỹoxoden da' 'adenaxat.

Ỹa 'anamaxaño' qomle da' 'ad'onataxanaxac,

tetoqo' ỹí'et ga' qonétapeec ỹima jen'me huetalégue jen' 'aléua, 'ená'am na'me huetalégue na' piỹem.

3Ỹa qo'mi 'auanema ga'me seuénaqtaaque qonoq ỹiméda na' noloqo'te.

4Qataxa 'auapalaxa't naa'me qadoico, qá'a qo'mi nataq'en sapalaxataq ỹima jen'me qo'mi qoỹ'eteque 'me sa nó'in.

Qataxa 'ena't qomle da' qo'mi 'auaseneeta ga' qanapiinaguec,

na'chidáta da' qo'mi 'antelaqtena'agueta ga' sa nó'in.

5So' Jesús nataq'en 'enaaco':

—Saloqtenaxanaxa da' 'uootaxa 'uo ga' 'oonolec da' 'oñíita 'uo ga' nauotaxaua. Qana'chi sóxote pí'ỹaq lauel, qana'chi ỹic'áta, qana'chi 'enapego': “'Am ỹaqáỹa, 'aua'uo qomle ga' ñaat nalic. 6Qá'a 'uo ñi' ñauotaxaua nivída'uo di' ỹ'acháqa' chiỹaqáiỹi, qá'a qaỹa ga' janoq da' sanem ñi'me.” 7Saloqtenaxanaxa jega'me p'áuo da' ỹ'at, 'éetojo': “Sa jaỹim 'aucouógaxan. Péga, ñi' ñasom napadéetaỹi, qataxa naua' ỹalaqa souetañiilo. Qana'chi sa soñíseguem da' 'uo ga' 'am sanem.” 8Qana'chi 'ami senapegalo da' ỹañoxot da' ñíseguem jeso'me da' ỹan jeso'me qoỹiỹáxanaaque. Qaláxasa da'me sa 'te da' náỹi ỹasouaxat da' huotaxaua, qá'a jeso'me sétaaque da' qaidi sa quéta da' qoỹicouógaxaatac, qana'chi ỹanéegue ỹima so'me qoỹiỹáxataaque. 9Qana'chi 'ami senapegalo naỹi: 'Aviỹáxañii, qaidi jiñi'me Dios 'ami ỹanema ga'me 'aviỹáxañiitaaque; 'auemítaxañii, tetoqo' 'auañíiỹa ga'me 'anmichíitaaque 'autóuoqoita'uo ga' som, qaidi 'ami qoỹ'ouáteeta. 10Qá'a ga'me diỹáxan, qaa'le ỹaconguet ga'me dasélaxaataaque. Qataxa ga'me dimitaxan, qaa'le ỹauana ga'me nimitáaque. Qataxa ga'me ỹitóuoqtapee'uo jega' som, qaláxasa qoỹ'ouateguet.

11Qaláxasa ¿séetapega ỹisetoodamaxa 'uo ga' 'oonolec da' 'ami 'me 'ami net'al da' ỹañoxot da' ỹanem ga' lec'óxot ga' qa' da' 'uootaxa ỹiỹáxanaaque jaga' pan? ¿'Uootaxa ỹanem ga' nanaic da' ỹiỹáxanaaque ga' níỹaq? 12¿'Uootaxa ga' lec'óxot da' ỹiỹáxanaaque ga' 'olégaxa lec'oue', qana'chi ỹanem ga' noxopic? ¡'Ai'! Sa naq'áita. 13'Ami matemané'e 'ami qalhuaxaiqa, qaláxasa 'auaỹáchiñii da' 'auañimii ga' 'ónaxaic ga' 'ac'óxochi, ¿hua'ago' da' sa naq'áita ñi'me 'adet'ai 'me net'ot na' piỹem da' ỹanem so' Espíritu Santo ga'me ỹiỹaxanot jiñi'me?

So' Jesús qoỹíitapega 'uo ga' lé'ec nataqtáqaic

(Mateo 12.11-30; Marcos 3.19-27)

14Jeso'me Jesús ỹ'odétapegueegue jeso'me né'ec nataqtáqaic 'me qaỹaua qa'e'n naua' l'aqtaqa 'e'n so' siỹaxaua, qaláxasa joca'li ma'le ỹinoxonéegue jeso'me né'ec, qana'chi ỹañoxot da' detaqa so' qaỹaua naua' l'aqtaqa. Qana'chi na' siỹaxadipi ỹátaqta ỹ'aalátapeec dójo'. 15Qaláxasa 'uo na' 'enaac so' siỹaxadipi:

—Jeda'me siỹaxaua 'me ỹ'odétapeegue na' né'ecpi nataqtáqaicpi, jeda'me d'otáxatapega da' l'añaxac jeso'me Beelzebú 'me mai'chi lasoxola' jen'me né'ecpi paiỹagodipi.

16Qataxa 'uo na' 'chi sétaaque da' ỹ'iỹen, qana'chi ỹiỹáxatapecot da' ỹí'et ga'me n'anec 'me sa qoỹauanápiỹi da' chiỹoqo'ot qa'en na' piỹem. 17Qaláxasa jeso'me Jesús sóxote ỹaỹáteetac da' leenataxac so' siỹaxadipi, qana'chi 'enapéga, 'enaaco':

—Gamachaqaiga na' nasoxola'pi da' niỹotapecachi qataxa deloỹiỹa't, qana'chi ga'me taỹá'a da' noláiñi; qataxa gaua' net'al da' niỹotapecachi, qana'chi ga' lec'oqtepi noláiñi. 18Qana'chi 'éeta nataq'en so' paiỹac Satanás da' mai'chi niỹotapecachi jen'me quétapegue', qaa'le ¿hua'ago' da' ỹañoxot da' jec da'me l'añaxac? Jaỹim dójo' senaac, qá'a 'ami 'oñíitapega da' jaỹim s'odétapegueegue na' né'ecpi paiỹagodipi da' s'otáxatapega da' l'añaxac so' paiỹac Beelzebú. 19Qaláxasa da' na'chi 'éeta dójo', qana'chi ¿jái'cho' ga' ỹanem jen'me 'ami quetapee'to ga' n'añaxac, qaidi ỹ'odáiỹi na' né'ecpi? Tadeeto' jen'me 'ami quetapee'to, na'china na' di'ỹoq qa'en da' 'ami 'ausómiỹaac. 20Qaláxasa na'chida da' l'añaxac ñi' Dios da' s'otáxatapega da' s'odáiỹi na' né'ecpi, qaláxasa na'chida da' náỹi da' ma'le 'ami nivitalo da' l'onataxanaxac ñi' Dios da' ỹilo'ogue da' ỹimata'a'téna.

21Ga' siỹaxaua 'uañaxaic da' 'uootaxa ỹátaqta nepataỹi ga' l'euóxonaxat qataxa ỹilo'ogue ga' l'acháqaỹaxac, qana'chi ỹima na' ỹiỹamaxatétac qaỹa ga' ỹ'iỹiita'uo. 22Qaláxasa da' janac ga' siỹaxaua laqáỹa napacalégue da' l'añaxac jeso'me, qana'chi loxonec. Ỹim, qana'chi deuootáxanec ỹima na' l'euóxonaxatpi 'me tanaxáatapega, qana'chi mai'chi ỹoiquíitac na'me loxotáxanaxatpi.

23Qá'a ga' jaỹim ỹiỹotét'a, qana'chiga ga' jaỹim nep'aguéetapega; qataxa jega'me sa ỹapónaxanaxaua, qana'chiga ga' delagaqtaxan.

So' né'ec nataqtáqaic 'me n'iỹílaxa so' l'emec

(Mateo 12.43-45)

24Ga' né'ec nataqtáqaic da' ỹivíta da' cá'ai ga' siỹaxaua, qana'chi jec, huetalégue ga' totelégue 'aléua, nimitétaaque ga' nemataqa'. Qaláxasa da' 'uootaxa sa ỹauana, qana'chi 'éeta da' leenataxac, 'enaac: “Jaỹim 'ónaxaic da' s'iỹílaxa ñi' ỹ'imec 'me sachiỹoqtooue ca'li.” 25Qaláxasa da' ỹivíta da' n'iỹílaxa, qana'chi ỹilalégue jeso'me siỹaxaua da' 'ená'am ga' 'emec ỹátaqta qoỹipolquíchiỹi qataxa qoỹiỹamaxatéta. 26Ỹim, qana'chi v'iỹílaqteegue, qana'chi ỹ'iina'alo saua' liquiáxa'u siete 'me p'asodáiỹi jeso'me, qana'chi 'ena'uaque jesaa'me tadóoue jeso'me siỹaxaua. Huá'a, qana'chi jeso'me siỹaxaua ỹapáisaiỹi da' jaloic, sa 'ená'am so' 'uáichiiñi.

Da' ỹátaqta 'eesa n'emáxadic

27Joca'li maliaxa ỹ'axátetac dójo' so' Jesús, qana'chi 'uo jaso' ỹauo 'me huétaaue jeso'me siỹaxadipi. Jaso'me n'alaxaséguem, 'enaaco':

—¡Ỹátaqta máchiiñi qa'en jaga'me ỹauo 'me 'am dec'oic qataxa 'am ỹaqtet joca'li!

28Qaláxasa jeso'me Jesús 'enaaco':

—¡'Ai', ỹátaqta ỹágueegue da' máchiiñi ga' naquiáxana da'me l'aqtac ñi' Dios qataxa ỹalaxaguet!

So' chiỹoxo'spi siỹaxadipi ỹiỹáxataaque da' qoỹí'et ga' n'anec 'me sa qoỹauanápiỹi

(Mateo 12.38-42; Marcos 8.12)

29Joca'li ỹátaqta nichíctaiỹi na' siỹaxadipi 'me dasouó'o so' Jesús. Qana'chi jeso'me detaqa, 'enaaco':

—Jénjo' siỹaxadipi naỹi ỹátaqta chiỹoxo'spi, qataxa ỹiỹáxataaque da' qoỹí'et ga'me n'anec 'me sa qoỹauanápiỹi, qaláxasa sa ỹitaxa qoỹan ga'me, na'chisóta jeso'me n'anec 'me qoỹ'étec jocalia'cho' so' l'aqtáxanaxanec ñi' Dios, lenaxat Jonás. 30Qá'a da'me 'éeta so' Jonás joca'li ỹí'et da' l'aalaxac so'me siỹaxadipi 'me l'acháqa' di' Nínive, qana'chida qomle nataq'en da' 'éeta jen'me siỹaxaua lec'óxot qomle ỹí'et da' l'aalaxac na' siỹaxadipi 'me huétaaue naỹi. 31Qaláxasa jega'me p'áteegue nolo' qomle qonimit na' siỹaxadipi 'me huétaaue naỹi, qana'chi jaso'me nat'e 'me na'ague da' taỹíñi, jaso'me nichaachiñi qomle da' ỹichoxot da' 'uo da' lasouaxac jen'me siỹaxadipi. Qá'a jaso'me chiỹaqá'a joca'li di'me ỹátaqta soqoỹoqót'a 'aléua da' naquiáxana da' laỹátenaxanaxac so' Salomón, qaláxasa naỹi 'uo jeda'me 'me napacalégue da' l'añaxac so' Salomón. 32Qataxa so'me néta'ña di' noic Nínive nataq'en nichaachiñi jega'me p'áteegue nolo' qomle ỹivíta da' qonimit na' siỹaxadipi 'me huétaaue naỹi, qana'chi ỹichoxot da' 'uo da' lasouaxac. Qá'a so'me l'acháqa' di' Nínive ca'ai naa'me loico joca'li so' Jonás ỹ'axátem da'me l'aqtac ñi' Dios, qaláxasa naỹi qaa'le 'uo jeda'me 'me napacalégue da' l'añaxac so' Jonás.

Jaga' coỹadáxanaqte 'me ỹicoỹadetalégue ga' siỹaxaua

(Mateo 5.15; 6.22-23)

33Qaỹa 'te ga' ỹitétooue jaga'me lecoỹadáxanaqte, ỹim, qana'chi ỹaná'ña ga' napóchiiñi, 'uootaxa da' ỹano'ot ga' p'áñi jaga' cason. Na'chidáta da' ỹanaséguem jaga'me, qaidi da' 'uo ga' p'áuo, qana'chi ỹ'oqotelégue. 34Naua' qad'ai'te na'chinaua naa'me 'ena'ama jaga'me coỹadáxanaqte 'me ỹicoỹadetalégue ga' siỹaxaua. Qana'chi naua' 'ad'ai'te da' 'uootaxa sa n'oi'n, qana'chi ỹima da' 'ad'óiỹaxac huétaaue da' n'álaxa. 35Qaláxasa ma'choqo' qomle jana' 'adcoỹadáxanaqte, péga qomle sega'me 'ouétaaue ga' n'álaxa. 36Qá'a da' ỹima da' 'ad'óiỹaxac ỹ'oqotelégue, qana'chi qaỹa ga' n'altalégue, nedot'a't da' ỹima ỹ'oqotelégue, 'ená'am da' 'uootaxa ỹicoỹadetalégue jaga' coỹadáxanaqte.

So' Jesús nelaxa so' fariseopi qataxa so'me dapaxaguenataxanapeec na' naqátaxacpi

(Mateo 23.1-36; Marcos 12.38-40; Lucas 20.45-47)

37Joca'li ma'le ỹimat da' letaxaỹaxac so' Jesús, qana'chi 'uo so' 'oonolec 'me huétaaue na' fariseopi ỹadí'na jeso'me da' liqui'ỹáxaua ga' l'acháqa'. Qana'chi so' Jesús p'áuo, qana'chi ñíiñi, dasoỹalégue jeso' niqui'ỹáxala'. 38Qana'chi so' fariseo ỹátaqta ỹoqo'chim ỹasouaxat da' ỹauáachiỹi so' Jesús da' sa ỹipaguelégue da' n'onataguec da' ỹiỹoi' naua' loua' da' ỹamtaa'le dequé'e. 39Qaláxasa so' qadesaliaxanec 'enaaco':

—'Ami 'me 'ami fariseopi, 'ami 'au'áuaxadiñiiñi da' 'aviỹóỹi' na' p'ádeegue naua' 'anỹómaxaquidii' qataxa na' 'adiqui'ỹáxaqui', qaláxasa jenaa'me p'ádeuo naua' 'adiquidiaqtéldii' ỹátaqta d'aichiilo jen'me 'chi 'auachiỹoxochiỹaiỹi da' 'adcacháxaqui qataxa jen'me sa nó'inpi. 40¡Ỹátaqta qaỹa ga' 'auaỹáchiñiỹaac! ¿'Ami sa 'auaỹáchiñiỹo' séetapega da' jiñi'me ỹí'et na' p'áiỹi, qaláxasa nataq'en na' p'áuo ỹí'et? 41Qana'chi 'ami da' 'auachítaqtaxañi, qaláxasa 'auañimii ga'me huétanỹi ga' 'adiqui'ỹáxaquii, qaidi tetoqo' ỹima da' ỹoqovíta ga'me.

42¡Ỹátaqta 'ami choxodaiqolqa, 'ami 'me 'ami fariseopi! 'Ami 'auañiiỹot naale ñi' Dios jan' 'oonole laỹoqte jan' diez jan'me nalectenaxanaqte 'me ỹa'uo na' laita qataxa da' lamaic ga' nóosec qataxa ỹima jan' laỹi laỹoqte 'me nalectenaxanaqte. Qaláxasa sa 'av'íchii ga' nó'in 'adadíquiaxaquii, qataxa sa 'adoqopichíỹa ñi' Dios. Qana'chi naqaida toqo' da' 'av'íchii, qaláxasa sa 'an'ónaxachiỹañi nataq'en na' laỹi.

43¡Ỹátaqta 'ami choxodaiqolqa, 'ami 'me 'ami fariseo lé'ecpi! Qá'a 'ami 'adoqopitaxáchii da' 'ans'óñiinỹi jan' nes'ónaxaqui jen'me ỹátaqta ỹ'oxodaq jiñi' lemáxaqui na' judiopi, qataxa da' 'ami qoỹi'ỹoxode'n da' 'ami qoỹip'iỹe'n da' 'ovíita'nỹi na' naq'aic.

44¡Ỹátaqta 'ami choxodaiqolqa, 'ami 'me 'auapaxaguenataxañíitapeec na' naqátaxacpi qataxa jen'me fariseopi 'me 'oñíỹapeela't da' 'ami 'eesoda! Qá'a 'ami 'oñí'ỹam jaga'me napa'lai't 'me sa qoỹilá'a, qana'chi na' siỹaxadipi 'chi petapeelégue da' sa qonóm'a.

45Qana'chi ỹ'at jeso'me 'oonolec na' dapaxaguenataxáatapeec na' naqátaxacpi, 'eet'oi:

—'Am 'me paxaguenataxanaxaic, jedójo' 'anasaxáiỹi nataq'en ỹivid'alo qo'mi da' qo'mi ỹ'aloqte't.

46Qaláxasa so' Jesús 'enaaco':

—¡Ỹátaqta 'ami choxodaiqolqa, 'ami 'me 'auapaxaguenataxañíitapeec na' naqátaxacpi! Qá'a 'ami ỹátaqta qaỹa ga' ỹañoxot da' ỹáchi ga' lí'ỹac 'me 'auachiỹalégue ga' siỹaxaua, qataxa 'ami qaga jaga' 'chi 'oonole jaga' néỹaxata jaga' 'chi ỹipoteuó'o 'aviñii da' 'alcochíiỹa.

47¡Ỹátaqta 'ami choxodaiqolqa! Qá'a 'ami mai'chi 'an'oxoñíitapiiseguem jan' napa'lai't, lai't jeso'me l'aqtáxanaxanecpi ñi' Dios 'me ỹalaat josii'cho' jeso'me huá'au 'adet'aipi. 48Qana'chi da' 'av'íchii dójo', naqaida da' di'ỹoq qa'en da' 'ami ỹátaqta 'aviỹamaxadíñii da'me ỹí'et jeso'me 'adet'aipi. Qá'a jeso'me 'adet'aipi ỹalaat so' Dios l'aqtáxanaxanecpi, qaláxasa naỹi 'ami 'an'oxoñiiséguem jan' napa'lai't.

49Chan'eesa jiñi'me Dios 'me ỹátenaxanaxaic josii'chi 'enaaco': “Samaxá'ña qomle na' siỹaxadipi ga' ỹ'aqtáxanaxanecpi qataxa ga' ỹamaxa'spi, qaláxasa jidi'me 'uo qomle ga' ỹalaat, qataxa ga' laỹi qaláxasa ỹicáatac.” 50Tetoqo' jen'me siỹaxadipi 'me huétaaue naỹi, ñi' Dios ỹachalégue ỹima jan' letauo' jeso'me l'aqtáxanaxanecpi 'me qoỹalaat, chiỹoqóchii'ña qa'en joca'li ỹímta da' qoỹí'et jen' 'aléua. 51Qana'chi chiỹoqóchii'ña 'en joca'li qoỹalaat so'me Abel, cha ỹivíde'ta da' nalaataguec so' Zacarías 'me qoỹalaat joca'lio' huánỹi so' lauel jeso' tamnaxaqui let'ádaic, jidi'me ná'ña jaso' nec'atoxonaxalate.

52¡Chan'eesa 'ami choxodaiqolqa, 'ami 'me 'auapaxaguenataxañíitapeec na' naqátaxacpi! Qá'a 'ami 'anmachiỹala't jaso'me ló'o ga' som 'me náỹi da' naatetonaxanaxac, qaláxasa 'ami sa 'aunoxoñiiuó'o, qana'chi 'ená'am sa 'auasiñim da' ỹinoxoneuo jen'me sétaaque da' p'áuo.

53Qana'chi joca'li ỹim dójo' nasaxáiỹi so' Jesús, qana'chi so'me dapaxaguenataxanapeec na' naqátaxacpi qataxa jeso'me ỹalcapíỹi na' fariseopi, ỹátaqta dalemataỹa jeso'me. Qana'chi qodictot da' sa qoỹalémaxat da' qoỹinatétac. Jalcote jen'me qoỹinatétapeecpi. 54'Chi qoỹoqovíitac jeso'me, da' 'uootaxa 'uo ga' nasaxáiỹi l'aqtac sa nó'in, qana'chiga chiỹoqóchiỹi qoỹin da' 'uo ga' qoỹasaxalégue lasouaxac qoỹin.

Currently Selected:

Lucas 11: PLGNT93

Highlight

Copy