Lucas 20

Da' laso'víỹaxac so' Jesús

(Mateo 21.23-27; Marcos 11.27-33)

1'Uo so' nolo' joca'li so' Jesús huétaaue jeso' tamnaxaqui let'ádaic di' Jerusalén da' ỹapaxaguéetac so' siỹaxadipi da' ỹ'axátetac da' nec'alaxa. Qana'chi nivídeuo jeso'me lasoxola'pi so' netaxaỹáxanaxanecpi da' qodetaxaỹapégue' ñi' Dios qataxa so' dapaxaguenataxanapeec na' naqátaxacpi qataxa so' nasoxonecpi. 2Qana'chi qoỹinatétaco' jeso'me, qoỹinaaco':

—Ỹa qo'mi 'au'aqtaxanema, ¿jái'chogamaxa 'auachiỹoxot'ague ga' 'an'aqtaguec da' tadeno' 'aué'et dójo'? ¿Jái'chogamaxa 'am ỹanem jedójo' 'adamaxasóxonaxac?

3Qana'chi so' Jesús 'enaaco':

—Jaỹim nataq'en 'uo da' ỹinataxanaxac da' 'ami sena't. Jaỹim 'au'aqtaxañiim qomle. 4¿Jái'chogamaxa qoỹamaxalégue so' Juan da' dachiláxanataxan? ¿Ñi' Dios séetapega, 'uootaxa ga' 'chi siỹaxaua?

5Qana'chi jeso' siỹaxadipi mai'chi necotátapega't, 'enaaco':

—¿Jái'chogamaxa senqáta? Da' senaqpéga da' na'chiñi ñi' Dios da' ỹamaxalégue, di'ỹoqóta qomle da' 'eet'oi: “¿Tá'nooqo'chi da' sa 'au'amaqchíñii?” 6Qataxa da' 'uootaxa senqaac da' 'chi siỹaxaua ga' ỹamaxalégue, ỹima na' siỹaxadipi di'ỹoqóta qomle da' qo'mi ỹasaxaque na' qa' da' qo'mi ỹalaa't, qá'a ỹátaqta 'eesa qa'en so' Juan jeso'me l'aqtáxanaxanec ñi' Dios.

7Qana'chi jeso'me net'alpi 'enaaco' da' sa ỹaỹáten jái'chogamaxa ỹamaxalégue so' Juan da' dachiláxanataxan. 8Qana'chi so' Jesús 'enaaco':

—Jaỹim nataq'en senaac neegue't sa saỹáten ga'me jaỹim ỹamaxalégue da' sé'et dójo'.

Da' n'aqtaguec so' 'onataxanaxaicpi 'me 'itaxalóxoicpi

(Mateo 21.33-44; Marcos 12.1-11)

9Joca'li ỹim, qana'chi d'aqtaxanem so' siỹaxadipi, qana'chi ỹa'uo da' daloqtenaxana, 'enaaco':

—'Uo so' siỹaxaua ỹa'uo so' lanaxanqa' da' ỹaañi jan' uva. Joca'li ỹim, qana'chi ỹipataxaguet so' l'onataxanaxanecpi. Ỹim, qana'chi taỹa ga' 'aléua laqáỹa, qana'chi huo'oi naua' 'uóidi da' huet'ague. 10Joca'li ỹivíta so' lalóqo' da' qonaqat jan' jala, qana'chi namaq so' lamaxasec da' ỹiỹaxanot so'me 'onataxanaxaicpi da' qaidi qoỹicolaxatée'ga jaga'me talégue so'me. Qaláxasa jeso'me 'onataxanaxaicpi ỹi'uaxáatac so' namaxasec. Ỹim, qana'chi qoỹ'iỹílaxachichiỹi. 11Qana'chi jeso'me nadípa ỹitaxa namaq so' lamaxasec laqáỹa. Qaláxasa na'chi 'ená'am qoỹisouéetac qataxa qoỹi'uaxáatac jeso'me, qataxa qaỹa 'te ga' qoỹanem. 12Jeso'me nadípa qataxa v'iỹílaxalégue da' namaq so' lamaxasec laqáỹa, qaláxasa so'me 'onataxanaxaicpi nataq'en ỹi'quemaqtet so'me qataxa ỹ'odéegue.

13Qana'chi so' lalémaxaset so' 'aléua 'enaaco': “Naỹi ¿jái'chogamaxa séet'ec? Naỹi jaỹim samaq ñi'me ỹauotaxat ỹalec, qaidi qomle qoỹilá'a, da' di'ỹoqóta qomle da' qoỹilo'oguet.” 14Qaláxasa jeso'me 'onataxanaxaicpi joca'li qoỹila'aguet jeso'me, qana'chi 'enapega'to': “Naqáina qomle na' talégue qoỹin dójo' nesaliaxa. Salaataq naỹi jen'me, tetoqo' qadalémaxaset qomle jeda'me.” 15Qana'chi qonaqatéegue so'me qoỹin cá'ai jeso'me nanaxanqa'. Ỹim, qana'chi qoỹalaat.

Qana'chi so' Jesús denataxan, 'enaaco':

—Qana'chi ¿hua'ague ga' 'éet'ec jeso' lalémaxaset so' 'aléua? 16Jeso'me janac, qana'chi ỹalaat jeso'me 'onataxanaxaicpi. Ỹim, qana'chi ỹanem so' laỹi 'onataxanaxaicpi so'me n'aléua.

Joca'li qodemachíchiỹi dójo', qana'chi qoỹinaaco':

—¡Qo'li ỹañoxoto' da' 'éet'ec dójo' ñi' Dios!

17Qaláxasa so' Jesús ỹilóoue so' siỹaxadipi, qana'chi 'enaaco':

—¿Hua'ago' ga' 'éete' naua' nidii's l'aqtaqa ñi' Dios? 'Enapega't:

Ga' qa' 'me ỹ'otan josii'chi jen'me 'emeeló'opi,

na'chiga naỹi ga' sa nedámchiiñi qa'en ga' 'emec.

18Qaláxasa da' 'uo gamachaqaiga talégue jeso' qa', qana'chi jega'me doláỹi; qataxa so' qa' da' 'uo ga' talégue, qana'chi jega'me ỹátaqta doláchiỹi qa'en.

Qodenataxáatapeec da' neseeténataguec ga' net'a da' qoỹiseeten

(Mateo 21.45-46; 22.15-22; Marcos 12.12-17)

19Qana'chi so' lasoxola'pi jeso'me netaxaỹáxanaxanecpi da' qodetaxaỹapégue' ñi' Dios qataxa so' dapaxaguenataxanapeec na' naqátaxacpi, jeso'me nasoxola'pi sétaaque da' na'chiso so' nolo' da' ỹaconé'uo so' Jesús, qá'a ỹaỹáten da' na'chiso so' nasoxola'pi ỹalémaqchiỹi dójo' qodaloqtenaxáatapega. Qaláxasa qod'óitapega jeso'me siỹaxadipi. 20Qana'chi ỹa'uo so' lamaxa'spi 'chi n'ónaxatela't da' 'enapeela't 'ónaxaic siỹaxadipi, da' qaidi ỹisómaxan'ape naua' l'aqtaqa jeso' Jesús, qana'chi qoỹañoxot da' 'uo ga' qoỹachiỹoxotaỹi ga' lasouaxaset, qana'chi qoỹaneuó'o so' net'a. 21Chan'eesa so' namaxa'spi ỹa'uo da' lenataxanaxac, 'enaaco':

—'Am 'me 'am paxaguenataxanaxaic, qo'mi saỹátenaq da' ga' qonaac qataxa jen' 'adapaxaguenataxanaxacpi ỹátaqta ỹiỹamqáchiiñi, qataxa sa 'te da' 'chi 'aulótaỹi ga' siỹaxaua da' 'anmit da' 'aua'uo ga' lasouaxaset. Na'chidáta da' 'am 'auapaxaguenataxáatapeec da' ỹátaqta 'eesa naq'aic ñi' Dios. 22Qana'chi qo'mi 'au'aqtaxanema qomle: ¿séetapega ỹiỹamqáchiiñi da' qoỹiseeten ñi'me net'a Roma lé'ec 'me ỹilo'ogue jen'me net'alpi, 'uootaxa sa qoỹiseeten?

23Qaláxasa so' Jesús ỹaatetoot'eguet da' sa nó'in leenataxac so' lamaxa'spi so' nasoxola'pi, qana'chi 'enaaco':

—¿Tóoqo'chi da' 'chi jaỹim 'anapogóxochiitac? 24Jaago', ỹa jaỹim 'aualoxóñiỹa jaga'me laicaua lai. ¿Jái'chogamaxa latáxasoxoc di'me huetalégue? qataxa ¿jái'chogamaxa lenaxat di'me nedetalégue?

Qana'chi jeso'me denataxáatacpi 'enaaco':

—Na'chiñi jiñi'me ỹilot'ague na' net'alpi.

25Qana'chi so' Jesús 'enaaco':

—'Auañimii ñi'me net'a Roma lé'ec 'me ỹilot'ague na' net'alpi jega'me mai'chi lalémaxaset, nataq'en 'auañimii ñi'me Dios ga' mai'chi lalémaxaset.

26Qana'chi sa 'te da' 'uo ga' qoỹachiỹoxotaỹi qoỹin lasouaxaset da'me 'enaac joca'li dasótaaue so' siỹaxadipi. Na'chidáta da' ỹátaqta 'uo da' l'aalaxac so' lamaxa'spi so' nasoxola'pi jeda'me 'enaac so' Jesús. Huá'a, qana'chi ỹ'imaqtam.

Qodenataxáatapeec ga' 'éeta da' ỹitaxa nec'aléegue ga' siỹaxaua

(Mateo 22.23-33; Marcos 12.18-27)

27Joca'li ỹim, qana'chi ỹitaxa janac jeso' ỹalcapíỹi na'me saduceopi da' qoỹic'áte'uo so' Jesús. Jen'me saduceopi 'enaac naale sa 'te da' ỹitaxa nec'aléegue na' napa'lpi. Qana'chi qoỹiitapego' so' Jesús qoỹiit'oi:

28—'Am 'me 'am paxaguenataxanaxaic, so' Moisés qo'mi ỹipotáneeta naua' laqátaxaco, 'enaac: Ga' siỹaxaua da' 'uootaxa ỹileu, qana'chi n'ónañi jaga' loua da' 'uootaxa qaỹa ga' lec'óxot, qana'chi jega'me lanoqolec ỹiuen da' ỹitaxa 'uoneguet jaso'me la'ỹoxoua, qaidi 'uo ga' lec'óxot qa'en so'me lachoq'olec 'me ỹileu. 29Jeso'me huo'oi saua' siete nanogaxa'u. Jeso'me ỹ'axaic nepíloxot da' huó'on, qaláxasa jeso'me ỹileu, qaỹa ga' lec'óxot. 30Qana'chi jeso'me lanoqolec 'uoneguet jaso'me la'ỹoxoua, qaláxasa jeso'me nataq'en ỹileu, taqadíta sa 'te da' 'uo ga' lec'óxot. 31Qataxa jec so' laqáỹa ỹitaxa 'uoneguet jaso'me la'ỹoxoua, qana'chi 'ena'uaque jesaa'me nanogaxa'u. Qana'chi ỹiméda jesaa'me siete nanogaxa'u ỹile'u, qaỹa ga' ỹañoxot da' 'uo ga' lec'óxot. 32Qana'chi nataq'en p'áteegue jaso' ỹauo ỹileu. 33Qana'chi da' ỹitaxa ỹivíta da' qonec'alaxadiséguem na' napa'lpi, ¿jái'chogamaxa ỹátaqta 'eesa da' loua jaso'me?, qá'a 'ena'uaque jesaa'me siete nanogaxa'u 'uooteguet jaso'me.

34Qana'chi so' Jesús 'enaaco':

—Jénjo' 'aléua 'me souqatalégue, na' siỹaxadipi qataxa jen'me ỹauodipi ne'uoola't. 35Qaláxasa ga'me táchiỹi qom'chi da' ỹinoxoneuó'o ga'me 'aléua laqáỹa qomle qonec'alaxadiséguem na' napa'lpi, jega'me 'aléua, huá'a, qana'chi qaỹa ga' huó'on, qataxa sa 'te da' 'uo ga' ỹ'onáxan jaga' lec'oqte. 36Qá'a huá'a, qana'chi qaỹa 'te ỹileu. Qá'a na' siỹaxadipi 'ená'am jen'me piỹem lé'ec lamaxa'spi ñi' Dios. Qá'a sóxote ỹitaxa qonec'alaxatéegue, qana'chi na' siỹaxadipi ỹátaqta lec'oqtepi ñi' Dios. 37So' Moisés nataq'en ỹ'axat da' ỹitaxa nec'aléegue na' napa'lpi da' n'aqtaguec jocalia'cho' dasot'ot jaso' 'epoqole 'me 'edétanỹi, qaláxasa sa 'te da' ỹátaqta ỹavic. Huá'a, qana'chi ñi' qadesaliaxanec 'enaaco': “Jaỹim 'me na'chaỹim netamnaxala' so' 'adapidii Abraham, Isaac qataxa so' Jacob.” 38Qaláxasa sa 'te da' netamnaxala' jiñi'me na' napa'lpi, na'chínata jen'me nec'alétaiỹipi, qá'a jiñi'me ỹima nec'alétaiỹi qa'en na' siỹaxadipi.

39Qana'chi 'uo jeso'me dapaxaguenataxanapeec na' naqátaxacpi 'enaaco':

—'Am 'me 'am paxaguenataxanaxaic, ỹátaqta 'ónaxaiqa naua' 'ad'aqtaqa.

40Huá'a, qana'chi sa qov'iỹílaxalégue da' ỹitaxa qoỹinat jeso'me.

¿Jái'chi ga'me lec'óxot ga'me net'a 'me nec'alaxaqui?

(Mateo 22.41-46; Marcos 12.35-37)

41Qana'chi so' Jesús 'enaaco':

—¿Tá'nooqo'chi da' qoỹíitapega naale da' lec'óxot so' qadet'a David jega'me qoỹ'axátet'aguet net'a 'me qadec'alaxaqui? 42Qá'a jeso'me David 'enaac da' l'aqtac 'me nedétañi jan'me lede 'me lenaxat Nalacpi, 'enaac:

Ñi' qadasoxola' Dios 'enapéga ñi' ỹasoxola', 'eet'oi:

“'Ona'ague qomle na' ỹoic,

43cha ỹivíde'ta qomle ma'le sacho'to naua' 'adapia'te jen'me 'anp'aguénoqo'tpi.”

44¿Hua'ago' ga' 'éeta so' David da' lec'óxot jega'me net'a 'me qadec'alaxaqui, qá'a jeso'me David ỹimatá'ac da' 'en lasoxola'?

So' Jesús detelaqtaxáatapega jen'me dapaxaguenataxanapeec na' naqátaxacpi

(Mateo 23.1-36; Marcos 12.38-40; Lucas 11.37-54)

45Qana'chi ỹima so' siỹaxadipi naquiáxatac joca'li 'enapéga so' lapaxaguenatacpi so' Jesús, 'enaaco':

46—Ma'choqo' qomle, 'avichiỹa'aguet jen'me dapaxaguenataxanapeec jen' naqátaxacpi. Qá'a jen'me noqopita da' ỹáatrañi naua' locaiqa nouo 'me ỹ'oxodáchi, qataxa noqopita da' qoỹodiáquen da' qoỹip'iỹen da' huá'ña ga' nemáqa', qataxa jen'me nimitá'ai jan'me s'ónaxaqui 'me ỹátaqta 'ónaxai jen'me nemáxaquipi qataxa jen'me nó'in niqui'ỹáqa'pi. 47Nataq'en jen'me ỹátaqta deuootáxaneque naua' hueta'ñalo naua' l'acháqa'te jen'me p'aipi, qana'chi jen'me 'chi ỹinoxótaaue da' jáloote qa'en da' netamnaxac. Ỹátaqta let'ádaic qomle da' ne'uaxánaguec jen'me.

Currently Selected:

Lucas 20: PLGNT93

Highlight

Copy