Lucas 22
22
Sétaaque da' qoỹaconé'uo so' Jesús
(Mateo 26.1-5, 14-16; Marcos 14.1-2, 10-11; Juan 11.45-53)
1Qaláqa'chi ma'le nadíiteuo jeso'me lalóxoqui da' qoỹalic jana' pan 'me sa qoỹa'uo ga' lale'gue 'me ỹaseedáxachiỹi jeso'me huétooue da' qoueenata so' nolo' joca'li qodíc'ai so' Egipto. 2Qana'chi so' lasoxola' so' netaxaỹáxanaxanecpi da' qodetaxaỹapégue' ñi' Dios qataxa jeso'me dapaxaguenataxanapeec na' naqátaxacpi, jeso'me nimitétaaque ga' ỹachiỹoxotaỹi da' ỹaqanatet da' ỹalaat so' Jesús, qaláxasa jeso'me nasoxola'pi ỹátaqta d'oiỹa so' siỹaxadipi.
3Qana'chi so' paiỹac Satanás ỹinoxonóoue so' Judas, da' lenaxat laqáỹa Iscariote. Jeso'me na'chiso so' 'oonolec saua' doce lamaxa's so' Jesús. 4Qana'chi jeso'me ỹic'áte'uo da' detaxaỹapégue' so' lasoxola'pi na' netaxaỹáxanaxanecpi, qana'chi d'aqtaxanem jeso'me da' 'éet'ec qa'en da' lasoxoc da' ỹaneuó'o jeso'me so' Jesús. 5Qana'chi jeso'me nasoxola'pi ỹátaqta 'uo da' netóot'ec. Huá'a, qana'chi qoỹaloxónapega da' qoỹiseeten. 6Qana'chi so' Judas ỹ'at, qana'chi nimitáaque ga' lasoxoc da' ỹaneuo so' Jesús da' ỹivíta da' ỹisamaq.
Da' liqui'ỹáxac so' qadesaliaxanec
(Mateo 26.17-29; Marcos 14.12-25; Juan 13.21-30; 1 Corintios 11.23-26)
7Joca'li ma'le ỹivíta so' nolo' 'me huétooue da' qoỹalic jan' pan 'me sa qoỹa'uo jen'me ỹaseedáxachiỹi. Jeso'me nolo' nalaataxaqui na' n'aanaxate lec'óxot 'me qoỹalic, da' qaidi qoueenata so' nolo' joca'li qodíc'ai di' Egipto. 8Qana'chi so' Jesús ỹamaq so' Pedro qataxa so' Juan, qana'chi 'enapegalo, 'enaaco':
—'Oquíỹi qomle, 'auqátaxañiỹa't ga' qonoq qomle qoueenata so' nolo' 'me qodíc'ai di' Egipto.
9Qana'chi jesaa'me denataxa'n, 'enapega't:
—¿Jái'chogamaxa hua'ague ga' sétaaque sacháq'ague jega'me da' saqataxanqa't?
10Qana'chi so' Jesús 'enaaco':
—'Ami qomle 'aunoxoñiiuó'o di' noic, qana'chi 'anachiñiỹa'aguet qomle ga' siỹaxaua ỹachítac jaga' náco'na 'aléua. Qana'chiga qomle 'oquiỹiỹi, 'chi 'avídiaxachiỹa'uo ga' n'acháqa' 'me tauó'o. 11Qana'chi 'oñíỹapega qomle jega'me l'acháqa' ga' 'emec, 'oñiit'oi: “Jiñi'me paxaguenataxanaxaic 'enaac: ¿Jái'chi ga'me hua'ague ga'me 'emec 'me niqui'ỹáxaqui, da' qaidi siqui'ỹá'ai na' ỹapaxaguenatacpi da' salíinaq ga' nalic 'me náỹi da' qoueenata joca'li qodíc'ai di' Egipto?” 12Qana'chi 'ami ỹaloxonalo qomle di' niqui'ỹáqa' ỹátaqta let'ádaic 'me p'ásee'mec na' lóvi' ñi' 'emec, sóxote qoỹaqátaxata't. Huá'ña, qana'chi 'auqátaxañiita't qomle jega'me qonoq.
13Qana'chi jesaa'me jéque', qana'chi ỹipaquíchiỹi da' nateeda'aguet ỹima jen'me 'enapéga so' Jesús. Huá'a, qana'chi ỹaqátaxatra't so' nalic.
14Qana'chi joca'li ỹivíta so' lalóqo' da' niqui'ỹáxac, qana'chi so' Jesús qataxa jesaa'me lamaxa's, qana'chi ñíiñi dasoỹalégue so' niqui'ỹáxala'. 15Qana'chi so' Jesús 'enaaco':
—¡Jaỹim ỹátaqta 'uo da' ỹidiáxa da' 'ami ñiuánaxa'u jen'me nalic, ỹatemaliaxa sona'li seleu! 16Qá'a jaỹim senaac naỹi sa 'te qomle da' ỹitaxa s'iỹílaxalégue da' salic jénjo' nalic, cha ỹivíde'ta ga' nolo' qomle ỹivíta ga' lalóqo' da' ỹilo'ogue da' ỹimata'a'téna ñi' Dios. Huá'ña, qana'chi ỹátaqta nalot'a't na' nalic.
17Qana'chi ỹacona jaso'me ỹómaxaqui. Ỹim, qana'chi ỹanot da' netónaxac ñi' Dios. Qana'chi joca'li ỹim, qana'chi 'enaac:
—'Auacoñiiỹet jánjo' ỹómaxaqui, qana'chi ñi' 'oonolec da' 'oñíita ỹanem ga' laqáỹa. 18Qá'a jaỹim senaac naỹi da' sa 'te da' ỹitaxa s'iỹílaxalégue da' ñiỹómỹi jen'me uva lí'i, cha ỹivíde'ta qomle da' ỹivíta ga' lalóqo' da' ỹilo'ogue da' ỹimata'a'téna ñi' Dios.
19Joca'li ỹim, qana'chi ỹacona jaso' pan, qana'chi ỹanot da' netónaxac ñi' Dios. Ỹim, qana'chi ỹicolaxachiỹi, qana'chi ỹanoovlo jesaa'me, qana'chi 'enaaco':
—Jánjo' pan na'chána da' ỹó'oquiaxac 'me qoỹaneguet da' nalaataguec, ỹasouaxat da' 'oñíita. 'Av'íchii qomle jeda'me, tetoqo' sa 'te da' jaỹim 'apeteláqaiỹet.
20Qana'chi ỹipagaqteet'egue jaso' ỹómaxaqui joca'li ma'le ỹim da' niqui'ỹáxac, qana'chi 'enaaco':
—Jánjo' ỹómaxaqui na'chána da' dálaxaic ỹamaxataxac 'me ỹátaqta sa nedámchiiñi qa'en naua' ỹitauo' 'me qoỹicodédeegue da' 'ami qolcochaxanaxanque.
21Qaláxasa naỹi jiñi'me jaỹim ỹaneuo qomle, jiñi'me nataq'en ñis'ónaqat'ai', dasotalégue jen'me qadiqui'ỹáxala'. 22Qaláxasa jen'me siỹaxaua lec'óxot maliaxa quetalégue jeda'me ladíquiaxac 'me sóxote qoỹidétañi, qaláxasa ¡choxodaicolec qasen jiñi'me siỹaxaua 'me sétaaque ỹaneuo jen'me!
23Huá'ña, qana'chi mai'chi nenatétapega't jesaa'me da' jái'chogamaxa ỹaneuo jeso'me Jesús.
Qonec'onaxanapíỹi da' jái'chogamaxa ỹátaqta ỹ'oxodaq
24Huá'a, qana'chi nec'onaxaatapega't saua' Jesús lapaxaguenataqa da' jái'chogamaxa ỹátaqta ỹágueegue da' ỹ'oxodaq qoỹin. 25Qaláxasa so' Jesús 'enaaco':
—Jen'me net'alpi 'me ỹilot'ague jen' ỹodapecachi siỹaxadipi, jen'me ỹátaqta 'uo da' 'enec da' damaxasóxonaac, qataxa jen'me nasoxola'pi 'me ỹilot'ague jen' siỹaxadipi da' qodetaxaỹá'a, qaláxasa qoỹinapéga da' 'ónaxaic siỹaxadipi. 26'Ami, qaa'le sa 'chi 'oñíit'ec dójo'. Qá'a ga' 'oonolec da' 'oñíita da' ỹ'oxodaq, qaláxasa jega'me sega'me maliaxa nesoqolec; qataxa jega'me damaxasóxonaac, qaa'le 'ená'am qomle ga' 'chi namaxasec. 27Qá'a ¿jái'chogamaxa ỹátaqta ỹ'oxodaq, séetapega jega'me ñíchiiñi da' dasotalégue jega'me niqui'ỹáxala' da' de'quétac, 'uootaxa jega'me 'chi namaxasec? ¿Séetapega sa ỹiseto' jodamaxa na'chiso jeso'me dasotalégue so' niqui'ỹáxala' jeso'me ỹátaqta ỹ'oxodaq? Já'a. Jaỹim, qaa'le 'ami souetaavlo, sená'am jega'me 'chi namaxasec.
28'Ami 'me na'chi 'eeta't da' jaỹim 'anáiquiitapegue', qataxa 'an'quichíñiitapiỹi ỹima jen'me ñi'queténaxacpi. 29Chan'eesa 'ami sanema qomle ga' 'ad'onataxanaxaqui da' 'auloỹiỹi ỹima jen' 'aléua, 'ená'am da' 'éeta ñi' ỹit'a da' jaỹim ỹanem da' ỹ'onataxanaxac, 30qaidi 'ami ñiuánaxa'u, qataxa 'ami ñiỹómaxa'u jega'me ỹiqui'ỹáxala' qomle ma'le souétaaue ga' ỹ'onataxanaxac, qataxa nataq'en 'oñíỹanỹi jaga'me s'ónaxaquipi 'me ỹ'oxodaq, qaidi 'anmichii jen'me lec'oqtepi jeso'me doce lec'oqtepi so' Israel.
So' Jesús ỹ'axát'a da' noqolguétaxac so' Pedro
(Mateo 26.31-35; Marcos 14.27-31; Juan 13.36-38)
31Nataq'en 'enaaco' so' qadesaliaxanec:
—'Am Simón, ỹa 'aulá'a so' paiỹac Satanás sóxote 'ami ỹiỹáxatapee'ualo da' sega'me 'ami nichiỹoxodíñi, 'ená'am qa'en da' qonchiỹoxoñi ga' trigo. 32Qaláxasa 'am ñitameetapeelégue, qaidi sa 'te da' qaỹa da' 'adip'iỹáxac. Qana'chi 'am qomle ỹivíta da' jaỹim 'an'iỹilqot, qana'chi 'alcochiỹa qomle na' 'adaỹi da' qaidi na'chi 'eeta't 'uo da' lip'iỹáxac.
33Qana'chi so' Simón 'enaaco':
—'Am ỹisaliaxanec, jaỹim qaỹa 'te sega da' 'am sequétaa'ue jaga' cointáxanaxaqui, cha ỹivíde'ta da' 'am seléeta'ñi'.
34Qaláxasa so' Jesús 'enapego' jeso'me, 'enaaco':
—Pedro, naỹi 'am senapéga da' qomle ỹamtaa'le da' noỹin ga' 'olégaxa, qana'chi ma'le tres qomle da' 'av'iỹílaxalégue da' 'anqolguet da' 'auéetapega jaỹim sa 'auaateton.
Nadíit'a so' lalóqo' da' ne'queténaxac so' Jesús
35Qana'chi so' Jesús 'enaaco':
—Jeso'me nolo' ca'li 'ami sama' da' sa 'te da' 'uo ga' 'adachoxónaxaqui qataxa jaga' lai't jaga' 'anaicauai qataxa gaua' 'adapela'chídii', ¿séetapega 'uo joca'li ga' 'avíñiitaaque?
Qana'chi jesaa'me 'enapega'to':
—'Ai', qaỹa ga' seuénaqtaaque.
36Qana'chi 'enaaco':
—Naỹi, qaa'le ga' 'uo ga' lachoxónaxaqui, qana'chi 'ónaxaic da' ỹáchi, nataq'en jaga'me naicaua lai't. Qataxa ga'me qaỹa ga' legaxanaxat, qana'chi 'ónaxaic da' ỹimen ga' lapoto, qaidi neuodénaaque ga'me legaxanaxat. 37Qá'a jaỹim senaac da' ỹátaqta ỹipaquíchiỹi qomle da' ñ'aqtaguec 'me ỹ'axa't naua' nidii's l'aqtaqa ñi' Dios, 'me 'eet'oi: “Na'chi qoỹaptenóoue na'me loicoló'olpi jega'me.” Qá'a ỹima jen'me ñ'aqtaguec 'me qoỹidétañi, jen'me ỹátaqta ỹipaquíchiỹi.
38Qana'chi so' lamaxa'spi 'enaaco':
—'Am qadesaliaxanec, jenauójo' huo'oi naua' dos qadelegaxanaqa'te.
Qana'chi jeso'me 'enaaco':
—Ja'ñi, na'chi táchi'ndi.
So' Jesús netaméetac, huét'a di' Getsemaní
(Mateo 26.36-46; Marcos 14.32-42)
39Ỹim, qana'chi so' Jesús ỹinoxonéegue, taỹa ga'me na'chi 'eeta't naale nemataqa' 'me comadelégue 'aléua 'me nanaqa' jan' 'epaq 'olívos. Qataxa so' lapaxaguenatacpi náictapegue'. 40Joca'li qoỹivídee'ga jidi'me, qana'chi so' Jesús 'enapego', 'enaaco':
—'Antamiñii qomle, qaidi sa 'te da' 'ami ỹinoxonoovlo ga' sa nó'in 'adeenataxaquii.
41Qana'chi so' Jesús cá'ai jesaa'me, taỹa ga' qaỹát'a. Ỹim, qana'chi ỹisóidiñi naua' liliictel da' netamen. 42Qana'chi 'enaaco':
—'Am ỹit'a, da' 'aviỹamaxaden, qana'chi n'óota da' sa 'te da' jaỹim 'aupagaqtena'aguet dójo' 'queténaxac 'me 'ená'am da' qonỹómỹi ga' ỹátaqta chim. Qaláxasa sa 'te qomle da' 'aué'et ga' mai'chi séetapeec, na'chigáta ga'me 'onétapeec.
43Qana'chi janac jeso'me namaxasec piỹem lé'ec da' ỹanem da' l'añaxac jeso'me. 44Joca'li ma'le ỹágueegue da' ne'queténaxac, qana'chi ỹitaxa nichíỹaxateegue da' n'añaxataxac da' netamen, qana'chi jen' nasóxoỹaxa 'me naquétac, 'ená'am jan' netauo', ỹátaqta ñitelégue jen' 'aléua.
45Joca'li ỹimat da' netamnaxac, qana'chi ñíseguem da' ỹic'áta so' lapaxaguenatacpi. Qana'chi joca'li ỹivíta, qana'chi ỹilalégue da' d'ochítac jeso'me, ỹasouaxat da' sa nalo'oguet da' laquicoxo. 46Qana'chi 'enapego' jeso'me lasoxoñiisecpi, 'enaaco':
—¿Tóoqo'chi 'au'ochíitac? Ỹa 'oñíiseguem qomle, 'antamiñii, qaidi sa 'te da' 'ami taavlo ga' sa nó'in 'adeenataxaquii.
Qoỹaconé'uo so' Jesús da' qoỹicoñi'
(Mateo 26.47-56; Marcos 14.43-50; Juan 18.2-11)
47Maliaxa detaqátac so' Jesús joca'li nóvi' so' ỹátaqta jalcote siỹaxadipi. Qodasotai'ỹi so' lenaxat Judas, jeso'me 'oonolec so' doce lapaxaguenatacpi. Qana'chi jeso'me nichíi'uo so' Jesús da' nec'ouoq. 48Qana'chi so' Jesús 'enaaco':
—'Am Judas, ¿'am 'anec'ouoq jen' siỹaxaua lec'óxot da' sétaaque da' 'auaneuo?
49Qana'chi jeso'me náictapegue' so' Jesús, joca'li ỹauáachiỹi dójo' qodíuapiỹi, qana'chi qoỹinatétaco' jeso'me, qoỹiit'oi:
—'Am qadesaliaxanec, ¿séetapega seloiquiaxai' jen'me siỹaxadipi?
50Qana'chi so' 'oonolec jesaa'me ỹiquesoxóiỹi jaso' lequetéla 'me p'aiỹi na' loic jeso'me lamaxasec so' lasoxola' jen'me netaxaỹáxanaxanecpi da' qodetaxaỹapégue' ñi' Dios. 51Qaláxasa so' Jesús 'enaaco':
—'Amachíi'ỹa, ja'ñi, na'chi táchi'ndi.
Qana'chi so' Jesús ỹipoteuó'o jaso' lequetéla so' namaxasec, qana'chi nataden. 52Ỹim, qana'chi 'enapéga so'me lasoxola'pi jen'me netaxaỹáxanaxanecpi qataxa so'me ỹilot'ague jeso' tamnaxaqui let'ádaic, qataxa jeso'me nasoxonecpi 'me janac da' n'iiná'uo jeso'me da' ỹauec, 'enaac:
—¿'Ami 'auanaquíỹi, 'anachiit'ape naua' 'adelegaxanaqchídii' qataxa naua' 'anpo'ñídii', 'ena'amo' da' 'uootaxa jaỹim cacháxaic? 53'Ami souetaavlo naale saua' noloqo'te jiñi' tamnaxaqui let'ádaic, qalqaiga ¿tá'nooqo'chi da' sa jaỹim 'auacoñíi'uo? Qaláxasa ma'le ỹivíta di' lalóqo' da' 'au'onataxañii qataxa da' d'onataxan da' l'añaxac jen'me n'álaxa.
Jeso' Pedro noqolguétetac da' 'éetapega sa ỹaateton so' Jesús
(Mateo 26.57-58, 69-75; Marcos 14.53-54, 66-72; Juan 18.12-18, 25-27)
54Qana'chi qoỹaconé'uo so' Jesús da' qoỹicoñi', qana'chi qoỹauée'uo ga' l'acháqa' jeso'me lasoxola' na' netaxaỹáxanaxanecpi da' qodetaxaỹapégue' ñi' Dios. Qana'chi so' Pedro ỹic'átetaa'ue jeso'me siỹaxadipi. 55Joca'li ỹivídeuo jeso'me, qana'chi qoỹalon jeso' dóle', qoỹachánỹi na' laiñi so' nasoxoc. Nataq'en so' Pedro ñíiñi, nétanỹi so' siỹaxadipi. 56Qana'chi jaso' namaxase joca'li ỹilá'a jeso'me da' dasótanỹi so' dóle', qana'chi ỹilot'ot, qana'chi 'enaaco':
—Nataq'en séetapega jiñíjo' siỹaxaua náictapegue' jeda'me.
57Qaláxasa so' Pedro noqolguet, qana'chi 'enaaco':
—Neegue't, jaỹim sa saateton jeda'me siỹaxaua.
58Joca'li copát'a dójo', qataxa jec so' laqáỹa da' ỹilá'a jeso'me, qana'chi 'enapéga, 'eet'oi:
—'Am séetapega nataq'en 'aquiáxau'pi jen'me.
Qana'chi so' Pedro 'enaaco':
—Neegue't, sa 'te da' na'chaỹim.
59Joca'li ma'le copát'a dójo', qana'chi v'iỹílaxalégue da' denataxan so' laqáỹa, 'eet'oi:
—Ỹátaqta 'eesa jiñíjo' siỹaxaua mai'chi laqáỹa jeda'me siỹaxaua, qá'a jiñi'me nataq'en chiỹoxogue da' Galilea.
60Qana'chi so' Pedro 'enaaco':
—Neegue't, jaỹim sa saỹáten dójo' 'au'axátetac.
Qana'chi joca'li maliaxa detaqátac so' Pedro, qana'chi noỹin so' 'olégaxa. 61Huá'a, qana'chi so' qadesaliaxanec neselcapeeguet so' Pedro. Huá'a, qana'chi jeso'me táchiỹi lauel so' l'aqtac so' qadesaliaxanec joca'li 'eet'oi: “Qomle ỹamtaa'le noỹin ga' 'olégaxa, qaa'le sóxote tres qomle da' 'av'iỹílaxalégue da' 'anqolguet da' 'onapii'ỹa da' jaỹim sa 'auaateton.” 62Huá'a, qana'chi p'áiỹi so' Pedro, qana'chi ỹátaqta let'ádaic da' noinaxac.
Qoỹi'uéetac so' Jesús
(Mateo 26.67-68; Marcos 14.65)
63Qana'chi so' siỹaxadipi 'me nauaatalégue so' Jesús ỹátaqta ỹi'uena't jeso'me qataxa ỹi'uaxáatapecot. 64Qataxa qoỹapadíidiñi naua' l'ai'te jeso'me, qataxa qoỹi'uaxánooue so' latáxasoxoc, qana'chi qoỹinapego', qoỹiit'oi:
—¡Ỹa 'au'axat jái'chodamaxa 'am ỹi'uaxáatac!
65Qataxa jalcote na' n'aqtaguec jeso'me da' qoỹisouéetac.
So' Jesús qoỹasoxona'aguet so' net'alpi 'me ló'o na' nasoxocpi
(Mateo 26.59-66; Marcos 14.55-64; Juan 18.19-24)
66Joca'li ma'le ỹ'oxoñi, qana'chi ỹiỹaxa't so' nasoxonecpi na' judiopi qataxa so' lasoxola'pi na' netaxaỹáxanaxanecpi qataxa jen' dapaxaguenataxanapeec na' naqátaxacpi. Qana'chi qoỹauée'uo so' Jesús so' net'alpi 'me ló'o na' nasoxocpi. Qana'chi qoỹinatétaco', qoỹiit'oi:
67—Ỹa qo'mi 'au'aqtaxanema, ¿'am séetapega na'chi'am net'a nec'alaxaqui?
Qana'chi jeso'me Jesús 'enaaco':
—Da' senaac já'a, na'chaỹim, qana'chi di'ỹoqóta da' sa 'te da' jaỹim 'au'amaqchíñii. 68Da' 'uootaxa 'ami sena't, qaláxasa di'ỹoqóta da' sa 'te da' jaỹim 'au'aqtaxañiim qataxa sa 'te da' jaỹim 'ausoỹíiỹi. 69Qaláxasa naỹi jen' siỹaxaua lec'óxot sóxote da' nes'oot'ague da' loic ñi' Dios 'me qaỹa 'te ga' ỹaqalánaac.
70Ỹim, qana'chi ỹima qoỹimalégue da' qoỹinatétac, qoỹíitojo':
—¿Séetapega na'chi'am lec'óxot ñi' Dios?
Qana'chi so' Jesús 'enaaco':
—Já'a, na'chaỹim, qá'a na'chi 'oñíỹaac nataq'en 'ami.
71Qana'chi jeso'me net'alpi 'enaaco':
—¿Jái'chogamaxa laqáỹa ga' seuénaq da' detaxaỹáuo? Qá'a qo'mi 'chi semacháqchiỹi da' l'aqtac jeda'me 'me nasaxáiỹi.
Currently Selected:
Lucas 22: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
