Mateo 16
16
So' fariseopi qataxa so' saduceopi ỹiỹáxataaque da' qoỹí'et ga' n'anec 'me sa qoỹauanápiỹi
(Marcos 8.11-13; Lucas 12.54-56)
1So' fariseopi qataxa so' saduceopi ỹic'áta so' Jesús da' sétaaque da' ỹa'uo ga' ỹachiỹoxotaỹi ga' lasouaxaset jeso'me. Qana'chi qoỹiỹaxanot jeso'me, da' qaidi ỹí'et ga' n'anec 'me sa qoỹauanápiỹi da' ỹachiỹoxot'ot na' piỹem. 2Qaláxasa jeso'me 'enapego':
—'Ami da' ỹivíta di' jávit, qaa'le 'oñíitojo': “Ỹátaqta 'ónaxaic ga' nolo' qomle ỹ'oxoñi, qá'a ỹátaqta 'edíỹi na' jávit.” 3Qana'chi da' maliaxa néte'ta, qaa'le 'oñíitojo': “Di'ỹoqóta da' sa nó'in jen' nolo', qá'a ỹátaqta 'edíỹi na' c'atena liiséguem qataxa n'áltapiỹi.” ¡'Ami 'me 'aviñíitapega da' 'ami lec'óqo'te ñi' Dios! Ỹátaqta 'auaỹáchiñii da' 'au'axáchii da' lasoxoc na' piỹem. Qalqaiga 'ami sa 'auaỹáchiñii da' 'au'axáchii jega'me naỹilo naua' l'anaqa'te naua' souqataavlo noloqo'te. 4Jénjo' siỹaxadipi 'itaxalóxoicpi qataxa ỹiguem ñi' Dios, jen'me naỹi ỹiỹáxataaque da' qoỹí'et ga' n'anec 'me sa qoỹauanápiỹi. Qaláxasa sa qoỹanem, qá'a na'chisóta jeso'me n'anec 'me huáaue joca'lio' so' Jonás 'me qoỹan.
Ỹim, qana'chi jec so' Jesús, cá'ai jeso'me siỹaxadipi.
Jeso' ỹaseedíỹi 'en jan' pan 'me huétaaue so' fariseopi
(Marcos 8.14-21)
5Saua' lapaxaguenataqa so' Jesús joca'li p'aideta so' lasego jaso' peróna, qana'chi jesaa'me petelaxateguet joca'li da' ỹáchi' jaga' neseete' pan. 6Qana'chi so' Jesús 'enapegalo' jesaa'me, 'enaaco':
—Ma'chaxa qomle, 'avichiỹa'aguet jana' ỹaseedíỹi 'en jan' pan 'me huétaaue na' fariseopi qataxa na' saduceopi.
7Qana'chi saua' lapaxaguenataqa hueenatet'ape joca'li, 'enapega'to' da' leenataxa'j:
—Séetapega ỹasouaxat da' qo'mi sa ñachóxosoq jaga' pan.
8Qana'chi so' Jesús joca'li mai'chi ỹaỹáten da' leenataxa'j jesaa'me, qana'chi 'enapegalo', 'enaaco':
—¿Tá'nooqo'chi 'oñíitapega da' qaga jaga' 'adi'ỹáquii pan? ¡'Ami ỹátaqta cat'oñooc da' 'adip'iỹáxaquii! 9¿Maliaxa séetapega da' qaỹa ga' 'auaỹáchiñiỹaac, qataxa sa taỹapiilo naua' 'adai'lídii' saua' cincole paa'ñi 'me sanóoue ca'li so' cinco mil siỹaxadipi, qataxa ga' jái'te laỹóqte' joca'li saua' saqachiilo nachóxonaxaqui' so' n'iỹóxot? 10Qataxa ¿séetapega da' sa 'antovíñiit'aque saua' sietole paa'ñi 'me sanóoue joca'li so' cuatro mil siỹaxadipi, qataxa ga' jái'te laỹóqte' joca'li saua' saqachiilo nachóxonaxaqui' so' n'iỹóxot? 11Di'ỹoqóta da' séetapega sa 'auaỹáchiñiiỹet da' jaỹim sa na'chaga jaga' ỹ'oqóchiỹi pan, ca'li ỹímta seetapegalo 'ami da' ma'chaxa qomle da' 'avichiỹa'aguet jen' ỹaseedíỹi qa'en jan' pan 'me huétaaue na' fariseopi qataxa na' saduceopi.
12Huá'a, qana'chi jesaa'me ỹaỹáte'n so' Jesús da' sa 'éetapega da' qoỹivitá'a jen' ỹ'oqóchiỹi ỹaseedíỹi 'en jan' pan, na'chidáta da' qoỹivita'alo naua' lapaxaguenataxanaxaco na' fariseopi qataxa na' saduceopi.
So' Pedro ỹ'axat so' Jesús da' na'chiso so'me net'a 'me nec'alaxaqui
(Marcos 8.27-30; Lucas 9.18-21)
13So' Jesús joca'li ỹivíta di' 'aléua Cesarea 'me ỹilotalégue so' Filipo, qana'chi ỹinatet'ape saua' lapaxaguenataqa, 'enaaco':
—Jen' siỹaxadipi naỹi ¿jái'chogamaxa 'éetapega na' siỹaxaua lec'óxot?
14Qana'chi jesaa'me 'enapega'to':
—'Uo jen' 'éetapega da' na'chi'am Juan 'me chiláxanataxanaxaic, qataxa 'uo na' 'am 'éetapega Elías, qataxa 'uo na' 'am 'éetapega Jeremías, 'uootaxa ga' laqáỹa l'aqtáxanaxanec ñi' Dios jeso'me huá'au.
15Qana'chi so' Jesús 'enaaco':
—Qataxa 'ami, ¿jái'chogamaxa 'aviñíitapega jaỹim?
16Qana'chi so' Simón Pedro 'enaaco':
—Na'chi'am ga' qoỹ'axátet'aguet net'a nec'alaxaqui 'me 'am lec'óxot ñi' Dios 'me sa ỹileu.
17Qana'chi so' Jesús 'enapego':
—'Am Simón 'me 'am lec'óxot so' Jonás, ỹátaqta let'ádaic qomle da' 'adamaic, qá'a sa 'chi siỹaxaua ga' 'am ỹaỹátenaxanaxanec dójo', na'chiñíta ñi' ỹit'a 'me net'ague da' piỹem. 18Jaỹim 'am senapéga 'am Pedro 'me 'am qa', qana'chi jénjo' qa' jaỹim s'oxotelégue qomle jega' ñitamnaxaqui. Ỹivíd'a qomle da' l'añaxac da' neleuaxa ỹátaqta sa ỹaqanatet da' noláxachiñi jega'me. 19Jaỹim qomle 'am sanem jaga' som ló'o da' l'onataxanaxac ñi' Dios 'me net'ague da' piỹem. Qana'chi ga' 'am 'auaséet'em jen' 'aléua, jega'me nataq'en qoỹaséet'em di' piỹem. Qataxa ga' 'am sa 'auasenem jen' 'aléua, jega'me nataq'en sa qoỹasenem di' piỹem.
20Qana'chi so' Jesús huaqátetapegalo saua' lapaxaguenataqa da' qaidi qaỹa ga' d'aqtaxaatem jesaa'me da' jeso'me na'chiso so' qoỹ'axátet'aguet net'a 'me nec'alaxaqui.
So' Jesús ỹ'axátet'a da' nalaataguec
(Marcos 8.31—9.1; Lucas 9.22-27)
21Huá'a, qana'chi so' Jesús ỹátaqta d'aqtaxanema saua' lapaxaguenataqa, 'enaaco':
—Jaỹim saiỹi da' Jerusalén. Huá'ña qomle di'me, qana'chi jen'me nasoxonecpi qataxa lasoxola'pi na' letaxaỹáxanaxanecpi jen' siỹaxadipi da' qodetaxaỹapégue' ñi' Dios, qataxa jen'me dapaxaguenataxáatapeec na' laqátaxacpi so' Moisés, jen'me ỹátaqta jalcote 'en qomle da' ñi'queténaxac, qataxa jaỹim qoỹalaat. Qaláxasa qomle ma'le ỹinoxodéegue gaua' tres noloqo'te, qana'chi ñic'aliséguem.
22Qana'chi so' Pedro ỹiỹotái'ỹa so' Jesús, qana'chi ỹátaqta 'enapéga jeso'me, 'enaaco':
—¡'Am ỹisaliaxanec, jiñi'me Dios ỹátaqta 'am netelaqtena'aguet qomle dójo', da' qaidi qaỹa ga' 'ouápiỹi!
23Qaláxasa so' Jesús ñ'ímaxañi, qana'chi 'enapéga so' Pedro 'eet'oi:
—¡'Am ỹó'o paiỹac Satanás, jaỹim 'ocá'ai! Na'chi'am ỹátaqta jaỹim sa 'aualémaxat. 'Am sa 'auená'am da' leenataxac ñi'me Dios, na'chínata jen' 'chi siỹaxadipi 'me 'auená'am.
24Qana'chi so' Jesús 'enapegalo saua' lapaxaguenataqa, 'enaaco':
—Da' 'uo ga' sétaaque jaỹim 'equegue, n'óota da' ỹiguem ỹima na' mai'chi leenataxacpi, ỹim, qana'chi jaỹim 'equegue, temaqaidi da' daqat da' l'óiỹaxac. 25Qá'a ga' sétaaque da' mai'chi nec'alaxatéegue da' l'óiỹaxac, qana'chi jega'me daqat. Qaláxasa jega'me sega'me ỹaqataqtet da' l'óiỹaxac ỹasouaxat jaỹim, naqaiga ga' qonec'alaxatéegue. 26Qá'a ¿jái'chogamaxa ỹachiỹoxotaỹi ga' siỹaxaua da' 'uootaxa ỹimatet'a't ỹima jen'me huetalégue jen' 'aléua, qana'chi da' l'óiỹaxac daqat? 'uootaxa ¿jái'chogamaxa ga' neuodéna da' n'iỹílaxatela't da' l'óiỹaxac? 27Qá'a jénjo' siỹaxaua lec'óxot qomle n'iỹílaq, qana'chi naquétaaue da' li'ỹoxodic ñi' let'a qataxa jen' lamaxasec piỹem lé'ecpi. Huá'a, qana'chi ỹiseeten ñi' 'oonolec jega'me l'onataxanaxac. 28Qana'chi ỹátaqta 'eesa dójo' 'ami senapegalo da' 'uo naỹi na' huétauo da' sa 'te ỹileu qomle maliaxa da' ỹic'aten jen' siỹaxaua lec'óxot qomle ma'le n'iỹílaq da' naquétaaue da' l'onataxanaxac da' net'a.
Currently Selected:
Mateo 16: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
