Mateo 9

So' Jesús nataden so' sa d'añiiỹi

(Marcos 2.1-12; Lucas 5.17-26)

1Qana'chi so' Jesús ỹitaxa huenóchiinỹi jaso' licota da' pai'ta di' lasego jaso' peróna da' n'iỹílaxa'ta so' mai'chi lalémaxaset noic. 2Huá'a jidi'me joca'lio' qondó'uo so' siỹaxaua 'me sa d'añiiỹi, qoỹachitalégue so' letala'. Qana'chi so' Jesús joca'li ỹilá'a da' lip'iỹáxa'j jesaa'me, qana'chi 'enapego' jeso'me ỹilhuaac, 'enaaco':

—Ỹátaqta 'an'añaxat qomle, 'am ỹalecolec. Na' 'adoicpi ma'le ỹima qoỹapalaxat.

3'Uo jeso'me huétauo so' dapaxaguenataxáatapeec na' laqátaxacpi so' Moisés da' hueenatétac, 'enaaco': “Da'me dójo' siỹaxaua naua' l'aqtaqa nep'agué'ne' ñi' qan'étoqo't.” 4Qana'chi so' Jesús joca'li ỹilá'uo da' leenataxac jeso'me paxaguenataxanaxaicpi, qana'chi 'enapego', 'enaaco':

—¿Tóoqo'chi da' ỹátaqta sa n'oi'n naua' 'adeenataxacódii'? 5Qá'a ¿jái'chogamaxa ỹátaqta sa qalaq da' qoỹinaac? ¿Séetapega da' qoỹiit'oi: “Na' 'adoicpi ma'le qoỹapalaxat,” 'uootaxa da' qoỹiit'oi: “'Oñíseguem, ỹim, qana'chi 'aueuoỹapiỹe't?” 6Qaláxasa na'chi 'ená'am na' siỹaxaua lec'óxot 'ami naloxonalo da' ỹátaqta 'uo da' 'enec da' ỹañoxot da' ỹapalaxat na' nasouaxasetpi jen' 'aléua.

Ỹim, qana'chi 'enapéga so' sa d'añiiỹi, 'enaaco':

—'Oñíseguem qomle, 'aunana't na' 'adetala'. Ỹim, qana'chi 'auc'áta ga' 'ad'acháqa'.

7Qana'chi jeso' sa d'añiiỹi ñíseguem, qana'chi ỹic'áta so' l'acháqa'. 8Qana'chi na' siỹaxadipi joca'li ỹauáachiỹi dójo', qana'chi ỹátaqta 'uo da' loqolánaxa. Qana'chi ỹi'ỹoxodéetac ñi' Dios, ỹasouaxat da' jiñi'me ỹanem dójo' n'añaxac na' siỹaxadipi.

So' Jesús ỹiỹáxana so' Mateo

(Marcos 2.13-17; Lucas 5.27-32)

9So' Jesús joca'lio' cá'ai jidi'me, qana'chi ỹila'o' so' siỹaxaua lenaxat Mateo. Jeso'me ñíchiiñi, nétaaue so' l'onataxanaxaqui da' ỹaconapeeguet jan' neseeténaqte ga' net'a Roma lé'ec. Qana'chi 'enapego', 'eet'oi:

—Jaỹim 'oquegue qomle.

Qana'chi so' Mateo ñíseguem, qana'chi 'equegue jeso'me.

10Qana'chi so' Jesús joca'li ma'le huét'a ga' n'acháqa' da' de'quétac, qana'chi ỹátaqta jalcote na' huétauo jen'me ỹaconapeeguet jan' neseeténaqte ga' net'a Roma lé'ec qataxa na' laỹi 'itaxalóxoicpi 'me janac da' liqui'ỹáxaua jeso'me qataxa saua' lapaxaguenataqa. 11Qaláxasa so' fariseopi joca'li ỹauáachiỹi dójo', qana'chi ỹinatet'ape saua' lapaxaguenataqa jeso'me, 'enaaco':

—¿Tá'nooqo'chi jiñi'me 'ami ỹapaxagueet'ape da' 'chi ỹisedeso' da' neuán'ai jen'me ỹacootapeeguet jan'me neseeténaqte ga' net'a qataxa jen'me 'itaxalóxoicpi?

12Qana'chi so' Jesús joca'li demachíỹa dójo', qana'chi 'enaaco':

—Sa 'te da' ỹiuen ga' tadénataxanaxaic ga' qaỹa 'te 'uo qataxa ga' ỹiméegue, na'chínata jen'me ỹilhuaacpi. 13'Aucolóliita qomle, qana'chi 'anapaxaguiñíỹa ga' náỹi naua' nidii's l'aqtaqa ñi' Dios 'me 'eet'oi: “Jaỹim sétaaque da' 'ami 'avichoxodénataxañii. Sa 'te da' na'chida da' 'auañiiuo da' qoỹigóoue ga' síiỹac da' 'adasaqásiqui.” Qá'a jaỹim sa 'te da' ñanac da' siỹáxataaque ga' 'ónaxaic da' lasoxoc, na'chínata jen'me 'itaxalóxoicpi, da' qaidi ỹaxadíñi naua' loico.

Qoỹinat so' Jesús ga' lasoxoc da' noqouaqtela't ga' siỹaxaua

(Marcos 2.18-22; Lucas 5.33-39)

14Qana'chi so' quétapegue'pi so' Juan 'me chiláxanataxanaxaic nauó'o so' Jesús. Qana'chi ỹinatétac, 'eet'oi:

—¿Tóoqo'chi da' qo'mi qataxa na' fariseopi da' ỹátaqta jalcote naale da' ñoqouaqtaxala't, qaláxasa naua' 'adapaxaguenataqa sa ỹ'e't?

15Qana'chi so' Jesús 'enaaco':

—¿Séetapega ỹáataño' ga' lasouaxaqui jega'me qoỹip'iỹéna da' ỹaleeuó'o ga' n'onáxac da' 'uootaxa maliaxa net'aguet ga' nauonaxaua? Qaláxasa 'uo qomle ga' nolo' da' ỹivíta da' qodeuódaxanec ga' nauonaxaua, huá'a, qana'chi ỹañoxot da' noqouaqtela't jega'me.

16Qaỹa ga' n'et ga' noxot tóxoic da' 'uootaxa dauláxana ga' dálaxaicolec 'uáloq lai. Qá'a jega'me dálaxaicolec nauláxanaxat, da' 'uootaxa ỹ'iỹena't, qana'chi ỹañoxot da' ỹicolaxata'ague ga' tóxoic, qana'chi nichíỹiiỹi ga' lecolaxa. 17Qataxa sa 'te da' qoỹacháỹi ga' dálaxaic latáxa jaga' síiỹac ló'oc tóxoi. Qá'a da' na'chi qoỹíit'ec dójo' da' qoỹacháỹi, qana'chi ỹañoxot da' ỹicolaxata'ague jaga' síiỹac ló'oc. Qana'chi jega'me latáxa qataxa jaga'me síiỹac ló'oc ne'ueela't. Chan'eesa ga' dálaxaicolec latáxa, jega'me qoỹacháỹi jaga' síiỹac ló'oc dálaxai, qaidi jegaa'me na'chi 'eeta'salo da' sa ne'ueela'salo.

Jaso' lec'oqte so' Jairo qataxa jaso' ỹauo 'me ỹipoteuó'o so' lai so' lapoto so' Jesús

(Marcos 5.21-43; Lucas 8.40-56)

18So' Jesús joca'li maliaxa ỹ'axátetac dójo', qana'chi janac so' lasoxola' so' judiopi, qana'chi ỹisocoto naua' liliictel jeso'me, 'enapego':

—Jadi' ỹale ỹímta ỹileu. Qaláxasa 'am da' 'auc'áta da' 'auaselelégue, qana'chi ỹitaxa nec'aléegue.

19Qana'chi so' Jesús ñíseguem da' 'equegue jeso'me, qataxa náicapee'to saua' lapaxaguenataqa. 20Qana'chi 'uo jaso' ỹauo ỹilhuaac. Jaso'me sóxote ỹivi't saua' doce 'uóidi da' ne'queténaxac da' naquétac jan' letauo'. Qana'chi ỹic'áte'uo so' Jesús, queto'uet na' lóvi'. Qana'chi ỹipoteuó'o so' lapoto lai, 21qá'a jaso'me 'enaaco' da' leenataxac joca'li, 'eet'oi: “Qomle 'chi sepoteuó'o ga' lapoto lai, qana'chi jaỹim seméegue qomle.” 22Qaláxasa so' Jesús neselcac, qana'chi ỹilá'a jaso'me ỹauo. Qana'chi 'enapego', 'enaaco':

—'Am ỹaqaỹole, 'an'añaxat qomle. Naỹi ma'le 'am 'ademéegue, qá'a 'uo da' 'ad'amaqténataxanaxac.

Huá'a, qana'chi jaso'me ỹiméegue.

23Qana'chi so' Jesús joca'li ỹivíde'uo so' l'acháqa' so' nasoxola', qana'chi ỹilá'a jeso'me niviqui ló'opi da' niỹamaxateta't da' sétaaque da' qoỹisiiñi jaso' 'añole, qataxa so' siỹaxadipi ỹátaqta n'alqátapiiseguem da' noỹíitac. 24Qana'chi so' Jesús 'enapego' jeso'me siỹaxadipi, 'enaaco':

—'Ap'áiỹiiỹi qomle, qá'a jadi'me 'añole sa 'te da' ỹileu. Jadi'me 'chi d'ochítac.

Qana'chi jeso'me siỹaxadipi ỹátaqta lasáxanaỹi da' ỹi'uéetac jeso'me. 25Qaláxasa so' Jesús ỹip'áxaneegue ỹima so' siỹaxadipi. Ỹim, qana'chi ỹinoxoneuó'o jaso'me, qana'chi ỹacona na' louaq, qana'chi jaso' 'añole ñíseguem. 26Qana'chi so' qouét'a 'aléua ỹivídapi'nỹi da' qoỹaỹáten dójo' qoỹí'et.

So' Jesús natade'n saua' dos qana'mi

27Joca'li cá'ai jidi'me so' Jesús, qana'chi jana'j saua' dos qana'mi. Qana'chi quetegue jeso'me, ỹátaqta ỹ'alqát'a'salo, 'enapega'to':

—¡'Am lec'óxot so' net'a David, qo'mi 'auchoxode'n qomle!

28Qana'chi so' Jesús joca'li ma'le ỹivíde'uo ga' n'acháqa', qana'chi jesaa'me qana'mi ỹic'átre'uo jeso'me. Qana'chi so' Jesús ỹina't jesaa'me, 'enaaco':

—¿'Ami 'au'amaqchíñii séetapega da' sañoxot da' sé'et dójo'?

Qana'chi jesaa'me 'enapega'to':

—Já'a, s'amaqténaq, 'am qadesaliaxanec.

29Qana'chi so' Jesús ỹipoteua'alo naua' l'ai'te jesaa'me. Qana'chi 'enaaco':

—Ỹátaqta ỹipaquíchiỹi qomle da' 'éeta da'me 'adip'iỹáxaquii.

30Qana'chi naua' l'ai'te jesaa'me nauáachidiñi. Qana'chi so' Jesús huaqátetapegalo jesaa'me, 'enaaco':

—Ỹátaqta sa 'te qomle da' 'uo ga' 'au'axáchiim dójo'.

31Qaláxasa joca'li 'chi ỹinoxodéegue, qana'chi ỹ'axátrem ỹima jen'me huét'a ga' 'aléua da' ỹ'eteque so' Jesús jesaa'me.

So' Jesús nataden so' qaỹaua 'te l'aqtaqa

32Joca'li 'chi jéque' jesaa'me, qana'chi huo'oi saua' siỹaxa'u nauéede'uo so' Jesús so' qaỹaua naua' l'aqtaqa 'me 'uo so' lé'ec nataqtáqaic. 33Joca'li ỹ'odáiỹi jeso' né'ec so' Jesús, qana'chi so' qaỹaua 'te l'aqtaqa ỹañoxot da' detaqa. Qana'chi so' siỹaxadipi ỹátaqta ỹ'aalátapeec. Qana'chi 'enaaco':

—Ỹátaqta sa ỹauanapeco' da' 'uo ga' qoỹauáachiỹi da' huáaue na' lec'oqtepi so' Israel da' 'uootaxa 'ená'am dójo'.

34Qaláxasa so' fariseopi 'enaaco':

—Dójo' siỹaxaua d'otáxatapega da' l'añaxac jeso'me qadó'o lasoxola' jen' paiỹagodipi nataqtáqaicpi da' ỹ'odáiỹi jen'me né'ecpi.

So' Jesús ỹátaqta 'uo da' lichoxodénataxanaxac so' siỹaxadipi

35So' Jesús coleetapeelégue ỹima so' noicpi qataxa jen' noicpiolec da' dapaxaguenataxáatapegooue so' lemáxaqui na' judiopi, ỹ'axátetac jeda'me 'ónaxaic qadipí'ic 'me náỹi da' ỹilo'ogue ỹima ñi' Dios, qataxa natadéetac ỹima jen' ỹodapecachi leleuaxa qataxa da' laỹaliaxa na' siỹaxadipi. 36Joca'li ỹiláaue so' siỹaxadipi, qana'chi ỹátaqta 'uo da' lichoxodénataxanaxac. Qá'a na' siỹaxadipi ỹátaqta daquico qataxa qaỹa ga' l'añaxac, 'ená'am jana' n'aanaxate 'me qaỹa ga' nouatoqo't. 37Qana'chi 'enapegalo saua' lapaxaguenataqa, 'enaaco':

—'Eesa da' ỹátaqta jalcote jan' jala na' nañiisec da' qaidi qonaqat, qaláxasa jen'me 'onataxanaxaicpi 'me sa léca. 38Chan'eesa 'ami 'aviỹáxañiỹot qomle jiñi'me lalémaxaset jen' nañiisec, qaidi jiñi'me namaq jega'me 'onataxanaxaicpi da' naqat jan' jala jen' nañiisec.

Currently Selected:

Mateo 9: PLGNT93

Highlight

Copy