Romanos 16
16
Da' lip'iỹénataxanaxac so' Pablo
1'Uo da' ỹaqátaxac jaga' qadaqáỹa Febe 'me lecochítapega jen'me 'amaqténataxanaxaicpi 'me néta'ña di' Cencrea, 2da' ỹátaqta 'auacoñíỹa, qá'a jaga'me lalémaxasete so' qadesaliaxanec. 'Aviñíit'em 'aviñii da' 'éeta da' qoỹaconguet ga' n'amaqténataxanaxaua. Qataxa ỹátaqta 'alcochíiỹa da' 'uo ga' ỹiuéetaaque, qá'a jaga'me ỹátaqta jalcote jen' lecochiỹa, cha ỹivíde'ta nataq'en jaỹim.
3Samaxa da' ỹip'iỹénataxanaxac jaga' Priscila qataxa ga' loua Aquila 'me ỹicochaxa'u da' s'onataxanqatapecot so' Cristo Jesús. 4Qá'a jegaa'me ỹátaqta nañaateguet ca'li da' lichic, da' qaidi jaỹim nec'alaxatréegue. Chan'eesa sáatac da' ñitónaxac. Qaláxasa sa na'chaỹiméta, qá'a nataq'en ỹima jen'me qadaỹi 'me sa judiopi. 5Nataq'en samaxa da' ỹip'iỹénataxanaxac ga' qadaỹi 'me netamnaqa' di' l'acháqa' jaga' Priscila qataxa ga' Aquila, qataxa nataq'en ga' ñauotaxaua ỹaqaỹolec Epeneto 'me naqaiga ga' 'uáichiiñi da' ỹ'amaqten so' Cristo jena'me l'acháqa' di' Acaya. 6Nataq'en samaxa da' ỹip'iỹénataxanaxac jaga' María 'me ỹátaqta jalcote da' l'onataxanaxac da' 'oñíita. 7Nataq'en samaxa da' ỹip'iỹénataxanaxac gaua' mai'chi ỹ'acháqa' lase' Andrónico qataxa jaga' Junias 'me ñicointáxa'u ca'li. Jegaa'me ỹátaqta qoỹaateto'n, 'ena'ama qoỹi'n saua' lamaxa's so' Jesús, qataxa 'uáichidiñi joca'li da' ỹ'amaqte'n so' Cristo, qaamaxa jaỹim 'chi sec'ataxáatauo.
8Nataq'en samaxa da' ỹip'iỹénataxanaxac ga' ñáigaxaua ñauotaxaua Amplias 'me ỹoqotéta'uo so' qadesaliaxanec. 9Nataq'en samaxa da' ỹip'iỹénataxanaxac ga' Urbano jega'me qad'onataxanaxaua da' s'onataxanqatapecot so' Cristo Jesús qataxa ga' laqáỹa ñauotaxaua Estaquis. 10Nataq'en samaxa da' ỹip'iỹénataxanaxac ga' Apeles 'me ỹátaqta sa lec'óxotolec naale da' ỹaloxóotac da' lip'iỹáxac so' Cristo, qataxa nataq'en ga' lec'oqtepi ga' Aristóbulo. 11Nataq'en samaxa da' ỹip'iỹénataxanaxac ga' ỹ'acháqa' lé'ec Herodión, qataxa ga' lec'oqtepi ga' Narciso 'me ỹ'amaqtéetac so' qadesaliaxanec. 12Nataq'en samaxa da' ỹip'iỹénataxanaxac jaga' Trifena qataxa jaga' Trifosa 'me d'onataxáatrapecot so' qadesaliaxanec, qataxa nataq'en jaga' qanauotaxaua qadaqáỹa Pérsida 'me jalcote da' l'onataxanaxac da' ỹ'étetac da' l'onataxanaxac so' qadesaliaxanec. 13Nataq'en samaxa da' ỹip'iỹénataxanaxac ga' Rufo jega'me naatetonec 'me ỹ'amaqtéetac so' qadesaliaxanec, qataxa jaga'me lat'e 'me nataq'en 'ená'am qasen jaga' mai'chi ỹat'e. 14Nataq'en samaxa da' ỹip'iỹénataxanaxac ga' Asíncrito, ga' Flegonte, ga' Hermas, qataxa Patrobas, qataxa Hermes, qataxa ga' qadaỹi 'me huetaavlo jegaa'me. 15Nataq'en samaxa da' ỹip'iỹénataxanaxac ga' Filólogo qataxa jaga' Julia, qataxa ga' Nereo qataxa jaga' laqáỹa, qataxa ga' Olimpas qataxa ỹima ga' qadaỹi qad'amaqténataxanaxau'pi 'me huetaavlo jegaa'me.
16Nataq'en ñi' 'oonolec qomle da' 'oñíita nec'ouoq ga' laqáỹa da' nip'iỹé'ne', ỹátaqta 'anchoxodinỹa't. Qataxa ỹima jena'me 'amaqténataxanaxaicpi 'me quétapegue' so' Cristo 'ami ỹamaxalo da' lip'iỹénataxanaxac.
17'Ami ỹaqáỹa', 'ami ñachoxodeetoovlo da' ỹátaqta 'auloit'eguet qomle jen'me huesoỹi qa'en jen' siỹaxadipi qataxa sega'me chiỹaqséguem qa'en. Qá'a jen'me ỹátaqta nep'agué'ne' jen'me napaxaguenatacpi 'me sóxote 'auaỹáchiñii. Chan'eesa 'oquí'ỹai qomle jen'me. 18Qá'a jen'me siỹaxadipi sa d'onataxanot so' qadesaliaxanec Jesucristo, na'chidáta da' mai'chi lamanaxanaxa. Qataxa jen'me ỹoqovin jañi' liquidiaqte jen' siỹaxadipi 'me qaỹa ga' ỹaỹátenaac, ỹidolóo'te naua' l'aqtaqa ỹisótete' qataxa jama't. 19Ỹima na' 'adaỹii ỹaỹáten da' 'ami láxadaiqa. Chan'eesa jaỹim ỹátaqta máchiiñi qasen. Qaláxasa sétaaque da' ỹátaqta 'ami leuótete' da' 'av'íchii ga' 'ónaxaic, jega'me sa nó'in qaa'le 'ena't. 20Qataxa jiñi'me Dios 'me chiỹoqo'ot da' n'emáxac, jiñi'me sa huaỹáloq qomle da' noláxachiñi da' l'añaxac so' paiỹac qadó'o Satanás da' ỹacho'to naua' 'adapia'chídii', da' qaidi 'auapiilégue. Qana'chi so' qadesaliaxanec Jesucristo 'ami ỹanema qomle ga' 'anchoxodénataguiquii.
21Nataq'en 'ami ỹamaxalo da' lip'iỹénataxanaxac ñi' Timoteo jiñi'me ỹicochaxaua, qataxa ñi' Lucio, qataxa ñi' Jasón, qataxa ñi' Sosípater, naa'me mai'chi ỹ'acháqa' lase'.
22Qataxa jaỹim Tercio, 'me jaỹim ledáxanaxanec so' Pablo, sedetapeelégue jánjo' nede, nataq'en 'ami samaxalo da' ỹip'iỹénataxanaxac, qá'a nataq'en s'amaqtéetac so' qadesaliaxanec.
23Jaỹim Pablo sonéta'ña na' l'acháqa' ñi' Gayo. Jiñi'me netamnaqa' na' l'acháqa' jen' 'amaqténataxanaxaicpi, nataq'en 'ami ỹamaxalo da' lip'iỹénataxanaxac. Nataq'en 'ami ỹamaxalo da' lip'iỹénataxanaxac ñi' Erasto jiñi'me ỹilot'ague jan' naicaua na' noic let'ádaic qataxa jiñi'me qadaqáỹa Cuarto.
24So' qadesaliaxanec Jesucristo ỹima da' 'oñíita 'ami ỹanema qomle ga' 'ónaxaic. Já'a, na'chi naq'áita dójo'.
So' Pablo ỹi'ỹoxoden ñi' Dios
25Chan'eesa naỹi si'ỹoxodénaq qomle ñi' Dios jiñi'me ỹañoxot da' ỹátaqta ỹ'añaqtet da' 'adip'iỹáxaquii, da' qaidi nateet'eguet qa'en jeda'me s'axátetac n'aqtac 'me chiỹaqaỹi da' nec'alaxa qataxa da' napaxaguenataxanaxac 'me n'aqtaguec so' Jesucristo. Qá'a jeda'me ỹátaqta nateet'eguet jeda'me sa di'ỹoq 'éetapeec ñi'me Dios 'me qo'mi ỹaỹátenaxanaxanque. Jeda'me 'chi sa di'ỹoq qa'en jiñi'me jocalia'cho' maliaxa qaỹa jen' 'aléua. 26Qaláxasa naỹi ma'le qoỹichoxot, chiỹaqaỹilo qoỹi'n naua' nidii's l'aqtaqa ñi' Dios 'me ỹidídiñi da' n'ónaxatrañi jeso'me huá'au l'aqtáxanaxanecpi. Jeda'me nateet'eguet da' lamaxasóxonaxac ñi'me Dios 'me qaỹa 'te loiquiaqa'. Dójo' sa di'ỹoq 'me 'éetapeec ñi'me Dios, jeda'me ỹaatetonaxanaxanec naỹi jen' ỹodapecachi siỹaxadipi, qaidi ỹ'amaqten jiñi'me qataxa ỹalaxaguet.
27¡Jiñi'me qan'étoqo't, 'me qaỹa 'te laqáỹa qataxa ỹátenaxanaxaic, jiñi'me na'chi 'eeta't qomle da' qoỹi'ỹoxodéetac, ỹasouaxat so' Jesucristo! Já'a, na'chi naq'áita dójo'.
Currently Selected:
Romanos 16: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.