Romanos 5
5
Ma'le qo'mi ỹiỹamaxade'n ñi' Dios
1Sóxote qo'mi ỹiỹamaxade'n ñi'me Dios ỹasouaxat da' qadip'iỹáxac. Chan'eesa naỹi ñiỹamaxadénaqte' jiñi'me, qana'chi dójo' chiỹoqóchiỹi so' qadesaliaxanec Jesucristo. 2Qá'a so'me chiỹoqóchiỹi da' tadeeto' qo'mi senoxonaxauó'o dójo' lichoxodénataxanaxac ñi'me Dios, qana'chi dójo' chiỹoqóchiỹi da' qadip'iỹáxac. Chan'eesa dójo' nichoxodenataxanaxac ỹátaqta ñ'añaxataxac, qataxa qo'mi madet'apolqa, qá'a 'uo da' qanaquitaxac da' ñiuánaqa'uo da' li'ỹoxodic ñi'me Dios. 3Qaláxasa sa na'chidáta dójo'. Nataq'en qo'mi máchidiñi ỹasouaxat da' qane'queténaxac. Qá'a qo'mi saỹátenaq dójo' 'queténaxac da' ỹí'et da' qanapogáxadenaxac, 4qana'chi dójo' pogáxadenaxac ỹí'et da' qo'mi qoỹiỹamaxadéete'. Qana'chi da' qo'mi qoỹiỹamaxadéete', qana'chi 'uo nataq'en da' qanaquitaxac. 5Qana'chi dójo' qanaquitaxac ỹí'et da' sa ñ'alóxonaqtac. Qá'a da' lesóxodic ñi'me Dios sóxote da' qoỹicodí'ñiita naua' qadiquidiaqtel, chiỹoqóchiỹi qa'en so' Espíritu Santo 'me ma'le qo'mi ỹanema.
6Qá'a joca'li souqátaaue da' qaỹa ga' qad'añaxac da' mai'chi ñic'alaxataxala't, qana'chi so' Cristo ỹileualégue jen' sa nó'inpi joca'li ỹivíta so' lalóqo' qa'en ñi'me Dios. 7Ỹátaqta 'eesa da' qaỹa ga' siỹaxaua da' 'uootaxa ỹañoxot da' nañaalégue da' ỹileualégue ga' 'ená'am laqáỹa, temaqaidi da' 'uootaxa ỹipaquichiilo naua' naqátaxaco. Qaláxasa sa ỹiuénaaque da' 'uootaxa 'uo ga' ỹañoxot da' nañaalégue da' ỹileualégue ga' laqáỹa 'me ỹátaqta sóxodaic. 8Qaláxasa da' ỹátaqta ỹichoxot da' ñi' Dios qo'mi ỹauoteque 'eet'oi: So' Cristo qo'mi ỹileualóo'te qa'en, temaqaidi da' qo'mi maliaxa souqátaaue da' qadoiquiaxac. 9Qana'chi naỹi da' ma'le qo'mi ỹiỹamaxade'n ñi'me Dios da' sachíỹoxosoqchiỹi da' leleuaxa so' Cristo, qana'chi lamá'asa da' 'eesa da' qo'mi nec'alaxatréegue jeso'me jega'me ne'uaxánaguec jen' siỹaxadipi 'me naỹa'quéna. 10Qá'a ñi'me Dios da' ỹachiỹoxotaỹi da' leleuaxa so' lec'óxot da' qo'mi ỹiỹamaxade'n joca'li maliaxa souqátaaue da' ñip'aguénaqtapegue' jiñi'me, qana'chi lamá'asa da' 'eesa da' qo'mi nec'alaxatréegue jeso'me, qá'a nec'alétaiỹi qataxa ỹasouaxat da' sóxote ỹim da' ñiỹamaxadénaqa'te' ñi'me Dios. 11Qataxa sa na'chidáta dójo'. Qá'a nataq'en qo'mi ñitónaqtapeec ñi' Dios, qana'chi dójo' qantónaxac chiỹaqaỹi so' qadesaliaxanec Jesucristo. Qá'a jeso'me chiỹaqaỹi da' tadeeto' ñiỹamaxadénaqa'te' ñi'me Dios.
Qodaloqtenaxana so' Adán qataxa so' Cristo
12Chiỹoqóchiỹi so' 'oonolec siỹaxaua da' tadeeto' 'uo da' nasouaxac jen' 'aléua qataxa da' neleuaxa. Huá'a, qana'chi da' neleuaxa táaue ỹima jen' siỹaxadipi, qá'a 'ená'uac jen'me 'uo da' jaloic. 13Joca'li maliaxa qaỹa na' naqátaxacpi, qana'chi chi'ena da' 'uo jen' janoicpi jen' 'aléua, temaqaidi da' 'uootaxa sa qoỹoqo'cha jen' janoicpi da' 'uootaxa qaỹa jen' naqátaxacpi. 14Qana'chi chiỹoqóchii'ña so' Adán, cha ỹivíde'ta so' Moisés da' dójo' neleuaxa ỹátaqta 'uo da' l'añaxac da' ỹañoxot da' ỹileu qa'en jen'me 'uo da' huasoilégue, temaqaidi da' 'uootaxa dójo' lasouaxaset, sa chiỹoxotaỹi da' ỹasouaxat da' sa ỹalaxaguet ga' namaxasóxonaxac, 'ená'am da' 'éeta so' Adán. So' Adán, jeso'me sega'me liquí'i jeso'me naỹa'quéna.
15Qaláxasa dójo' lesamaxataxac so' Adán, jeda'me sa qoỹañoxot da' qonaloqtenaxanguet jeda'me lachítaqtaxanaxat ñi'me Dios 'me qo'mi ỹanema. Qá'a dójo' lesamaxataxac so' 'oonolec siỹaxaua ỹasouaxat da' jalcote jen' ỹileu. Qaláxasa dójo' nec'alaxa, jeda'me ỹátaqta ỹágueegue da' let'ádaic, qaidi jalcote na' ỹañoxot da' n'óota. Jeda'me 'chi qo'mi ỹaat'ema ñi'me Dios, chiỹoqóchiỹi qa'en so' 'oonolec siỹaxaua, lenaxat Jesucristo. 16Dójo' lasouaxac so' 'oonolec siỹaxaua sa qoỹañoxot da' qonaloqtenaxanguet jeda'me nec'alaxa 'me qo'mi ỹanema ñi'me Dios. Qá'a da' 'éeta dójo' 'oonolec nasouaxac, jeda'me chiỹoqóchiỹi da' qoỹa'uo ga' ne'uaxánaguec jen' siỹaxadipi. Jeda'me 'éeta da' nec'alaxa, qaláxasa jiñi'me Dios 'chi ỹáat'em jen' siỹaxadipi da' ỹiỹamaxaden, temaqaidi da' 'uootaxa jen'me siỹaxadipi sa lec'óxotolec jocalia'cho' da' lesamaxataxac. 17Qá'a dójo' neleuaxa da' 'uootaxa chiỹaqaỹi da' lesamaxataxac jeso'me 'oonolec siỹaxaua da' ỹátaqta 'uo da' l'añaxac jocalia'cho', qana'chi ¿taalia'chi toqo' da' sa naq'áit'ec jen'me siỹaxadipi 'me 'chi ỹáat'em ñi'me Dios da' ỹiỹamaxaden? Jen'me siỹaxadipi ỹañoxot da' 'uo da' l'añaxac jeda'me dálaxaic n'óiỹaxac 'me chiỹaqaỹi jeso'me 'oonolec siỹaxaua Jesucristo.
18Dójo' naq'áita jeda'me lesamaxataxac jeso'me Adán da' ỹasouaxateguet ỹima jen' siỹaxadipi da' qoỹa'uo ga' ne'uaxánaguec, qana'chi naq'áita nataq'en jeda'me 'ónaxaic lasoxoc so' Jesucristo nedá'a ỹima jen' siỹaxadipi jega'me n'óiỹaxac 'me ỹátaqta huesóta. Qaỹa 'te ga' ne'uaxánaguec qoỹin. 19Qá'a dójo' naq'áita joca'li sa ỹalaq so' 'oonolec siỹaxaua, qana'chi ỹasouaxat da' sa lec'óxotolec na' 'itaxalóxoicpi, qana'chi naq'áita nataq'en jeda'me laláxadic so' 'oonolec siỹaxaua 'me ỹí'et da' sa lec'óxotolec qa'en jen' ỹiỹamaxaden ñi'me Dios.
20Qá'a jen'me naqátaxacpi janac, da' qaidi nichícteegue da' di'ỹoq qa'en jen' nesamaxataxacpi. Qaláxasa joca'li nichícteegue jen' nesamaxataxacpi, qana'chi da' lichoxodénataxanaxac ñi'me Dios nataq'en ỹátaqta nichíisaseguem. 21Qá'a jeda'me naq'áita da' nesamaxataxac joca'li ỹátaqta 'uo da' l'añaxac da' dalaataxan, qana'chi naq'áita nataq'en da' qo'mi ỹiỹamaxadéete' ñi'me Dios, qana'chi dójo' lichoxodénataxanaxac jiñi'me ỹátaqta 'uo da' l'añaxac da' qo'mi ỹanema da' n'óiỹaxac 'me qaỹa 'te loiquiaqa', chiỹoqóchiỹi qa'en so' qadesaliaxanec Jesucristo.
Currently Selected:
Romanos 5: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
