Romanos 7
7
Qodaloqtenaxana da' n'onáxac
1'Ami ỹaqáỹa', 'ami 'me 'auaatetoñii jen' naqátaxacpi, qataxa 'auaỹáchiñii jen'me naqátaxacpi da' necoindet'aguet ga' siỹaxaua da' 'uootaxa maliaxa nec'alétaiỹi. 2Saloqtenaxana jaga' ỹauo 'me ma'le huó'on, jaga'me jen' naqátaxacpi maliaxa necoindet'aguet qa'en ga' loua qomle 'uootaxa jega'me maliaxa nec'alétaiỹi. Qaláxasa jega'me loua qomle 'uootaxa ỹileu, qana'chi jaga'me huesotee'guesop jen' naqátaxacpi 'me necoindet'aguet qa'en jega'me. 3Chan'eesa jaga'me da' 'uootaxa 'uoneguet ga' siỹaxaua laqáỹa, da' 'uootaxa maliaxa nec'alétaiỹi ga' loua, qana'chi jaga'me qoỹimatá'ac da' chíuaxai. Qaláxasa jega'me loua da' 'uootaxa ma'le ỹileu, qana'chi jaga'me huesotee'guesop jen'me naqátaxacpi. Qana'chi jaga'me ỹañoxot da' 'uoneguet ga' siỹaxaua laqáỹa. Qaa'le sa qoỹimatá'ac da' chíuaxai.
4Qana'chi 'éeta nataq'en 'ami ỹaqai'ỹolqa 'me 'oviit'aguet da' ló'oquiaxac so' Cristo, 'ená'am da' sóxote 'adelivii, da' qaidi 'oquí'ỹai jen' naqátaxacpi, da' qaidi sega'me ỹitaxa 'au'óñii. Qana'chi naỹi 'ami lalémaxase'te so' Cristo 'me nec'alaxadiséguem ñi'me Dios, da' qaidi s'onataxanqot ñi' Dios da' s'étaq ga' 'ónaxaic. 5Qá'a joca'li qo'mi maliaxa qolqátapegue' da' qadapáchiỹaxac, qana'chi jénjo' naqátaxacpi ỹadíit'a jen'me sa nó'in 'éetapeecpi jeda'me qadó'oquiaxac. Qana'chi da' qo'mi ỹauect'alo da' qadeleuaxa. 6Qaláxasa naỹi sóxote qadeleu, da' qaidi qolqá'ai jen' naqátaxacpi 'me qo'mi ỹicoindeta'salo. Huá'a, qana'chi ỹátaqta qo'mi huesóchidiñi, da' qaidi s'onataxanqot ñi' Dios jeda'me dálaxaic qad'óiỹaxac 'me chiỹoqo'ot so' Espíritu Santo. Qana'chi sa souqat'oto naua' naqátaxaco 'me nidii's.
Jen' ỹodapecachi sa nó'inpi da' séetapeec
7Qana'chi ¿jái'chogamaxa hua'ague ga' 'éeta ga' qad'aqtac? ¿Séetapega sa nó'in jen' naqátaxacpi? ¡'Ai', sa naq'áita! Qá'a jaỹim joca'li sa saỹáten jái'chogamaxa n'etaxalóxoc, da' 'uootaxa sa jaỹim d'aqtaxanem jen'me naqátaxacpi. 'Chi saloqtenaxana da' jaỹim sa saỹáten ga' lasoxoc da' 'uootaxa qoỹipitá'a ga' ỹaqá'a, da' 'uootaxa sa jaỹim d'aqtaxanem jen' naqátaxacpi da' 'eet'oi: “'Ena't qomle da' 'apitá'a ga' ỹaqá'a.” 8Qaláxasa dójo' n'etaxalóxoc joca'li ỹauana da' 'éeta, qana'chi d'onataxana dójo' namaxasóxonaxac, qaidi qoỹadí'na ỹima na' ỹodapecachi sa nó'inpi da' séetapeecpi. Qá'a jénjo' naqátaxacpi da' 'uootaxa qaỹa, qana'chi dójo' n'etaxalóxoc qaỹa taa'le ga' l'añaxac. 9Qá'a 'uo joca'li so' nolo' da' jaỹim 'chi ñic'alétaiỹi, qataxa sa saateton jen' naqátaxacpi. Qaláxasa joca'li saateton dójo' namaxasóxonaxac, qana'chi dójo' n'etaxalóxoc nec'aléegue, qana'chi jaỹim, qaa'le sega'me seleu. 10Huá'a, qana'chi dójo' namaxasóxonaxac 'me ỹañoxot táxa da' jaỹim nec'alaxatéegue, ma'te sega'me jaỹim ỹauéga da' ỹileuaxa. 11Qá'a dójo' n'etaxalóxoc joca'li ỹauana da' 'éeta, qana'chi d'onataxana dójo' namaxasóxonaxac, qana'chi jaỹim ỹoqovin, qataxa chiỹoqóchiỹi qa'en dójo' namaxasóxonaxac da' jaỹim ỹalaat.
12Chan'eesa jénjo' naqátaxacpi, jen'me chiỹoqo'ot ñi' Dios. Qataxa ñi' 'oonolec jen'me namaxasóxonaxacpi 'me chiỹoqo'ot jiñi'me, ỹiỹamqáchiiñi jega'me 'enaac qataxa ỹí'et jega'me n'óota. 13Qana'chi ¿séetapega jénjo' 'ónaxaic naqátaxacpi na'chína na' jaỹim ỹauéga ga' ỹileuaxa? ¡'Ai', sa naq'áita! Qá'a naqaida da' n'etaxalóxoc da' jaỹim ỹasouaxateguet da' seleu. Huá'a, qana'chi jeda'me mai'chi ỹaloxon da' lasoxoc joca'li d'onataxana jeda'me 'ónaxaic. Qana'chi naqaida da' 'éeta da' namaxasóxonaxac da' ỹ'axáteegue da' ladíquiaxac da' n'etaxalóxoc da' ỹátaqta sa nó'in.
14Qá'a qo'mi saỹátenaq da' sa di'ỹoq jen' naqátaxacpi. Jaỹim, qaamaxa ỹ'oqóchiỹi da' 'chi jaỹim siỹaxaua, sená'am da' sega'me jaỹim qoỹimen da' qaidi jaỹim lelatac da' n'etaxalóxoc. 15Qá'a jaỹim sa saỹáten jega'me séeta, ỹasouaxat da' sa sañoxot da' sé'et ga'me ỹátaqta séetapeec. Nedot'a't da' ỹaqaigaxa, qana'chiga sé'et. 16Qaláxasa jega'me sa siỹamaxaden, da' 'uootaxa na'chiga sé'et, qana'chi jaỹim mai'chi saỹáten da' ỹátaqta 'ónaxaic jen'me naqátaxacpi. 17Qana'chi sa naqaỹim da' sé'et jega'me, qaláxasa naqaida da' n'etaxalóxoc 'me huétaaue jañi' ỹiquidiaqte. 18Qá'a jaỹim saỹáten da' qaỹa ga' ỹiỹamqáchiiñi ga' huétaaue da' ỹ'oqóchiỹi ỹapáchiỹaxac. Temaqaidi da' jaỹim 'uo da' ỹidiáxa da' sé'et ga' ỹiỹamqáchiiñi, qaláxasa sa sañoxot da' sé'et. 19Sa sé'et jega'me ỹiỹamqáchiiñi 'me seenatétapega, na'chidáta da' sequet'ot da' s'étetac jega'me sa seenatapéga. 20Chan'eesa da' 'uootaxa sé'et jega'me sa seenatapéga, qana'chi sa naqaỹim da' sé'et ga'me, qá'a na'chida da' n'etaxalóxoc 'me huétaaue jañi' ỹiquidiaqte.
21Naqaida naale da' 'éeta da' souápiỹi: Da' 'uootaxa sétaaque da' sé'et ga' 'ónaxaic, qaa'le nedot'a't da' sa nó'in 'me jaỹim huétaỹi da' sé'et. 22Qá'a jañi'me ỹiquidiaqte 'me jaỹim p'átaaue noqopita jen'me naqátaxacpi 'me chiỹoqo'ot ñi'me Dios. 23Qaláxasa 'uo da' laqáỹa selá'a da' huétaỹi jen' ỹó'oquiaxac, jeda'me deloiquitapegue' da'me ỹeenataxac. Jeda'me naqaida jeda'me lamaxasóxonaxac da' n'etaxalóxoc 'me huétaỹi da' ỹó'oquiaxac, qataxa jaỹim ỹicoindeta't.
24¡Ỹátaqta jaỹim choxodaicolec! ¿Jái'chogamaxa ỹañoxot da' jaỹim ỹisoi'isop qa'en dójo' ỹó'oquiaxac 'me jaỹim ỹauéquet'a da' ỹileuaxa? 25Na'chiñíta ñi'me Dios 'me ỹañoxot da' chiỹoqóchiỹi qa'en so' qadesaliaxanec Jesucristo. ¡Ñitóotapeec ñi' ỹit'a Dios! Chan'eesa jaỹim naỹi saỹáteeta da' ỹátaqta ñañanot da' sé'et jen' laqátaxacpi ñi'me Dios. Qaláxasa jeda'me ỹ'oqóchiỹi ỹapáchiỹaxac, jeda'me lamaxasec da' lamaxasóxonaxac da' n'etaxalóxoc.
Currently Selected:
Romanos 7: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
