Fulatika Maxaafa 12
12
Sa'atika Ayyaana
1Duuchchi Woddiki Goottinna Gibtseke bogi giddo Muusenna Aarooni'n hiyyee qici: 2«Kunni agenji agenjuwwakenaa'n ha'no'a siretike agenjo, woggateenna ha'no'a siretike agenjo kadowwaal. 3Konneechchi butta hedheeka seera Isira'eelike arda duuchcha'n kulle: konne agenjixxe tommenna sholgaxxe barra'n mitti mitting ifi fike mini hadi'a mitte mitte gedhebiinka buruusa qixxeessowwaal. 4Huun mini hadinna mitte buruusa ite bidhatee mini hadi isik heeno'ma'noole, manniinka laakkossa hede uudat isi'a shiqaake ollalchinni ookkonee buruusa qoodemmowwaal; mitti mitting manji hittee qicika itaaxxa hede afat hittee qicik buruus hasisaaxxa mura ha'noo hassissaan. 5Fi'litinaak buruusinna gedhebiinke yookaan re'etike kadowwaal; yaane kinni mitte woggakenna fafa mitte afebaake kadowwaal. 6Ookkone buruusuwwanna konne agenjixxe tommenna sholgaxxe barra qico'ni xonxoommachchoti heqqe; eettene barra'n bogi hashshaa wodda Isira'eelike ardixxi tuuta duuchchi buruusuwwa ookkone duldowwaal. 7Ardikinna eettene mundenaa'n aadheexxi ookkone buruusuwwik maala itaake minixxe hulake lamiindarreke mikkilanjo'ninna cufan iimi darrexxe gubane'n buurowwaal. 8Eetteneenni hasha ookkonee maala giirate'n dudhinsheexxi qaraaraake shafinninna gamami e'yeebaaxxe bulletixe kebbonni indowwaal. 9Ookkone maalanaa'n inqaka yookaan gafemeeka ittinoqqe'e; yaane kinni ookkone buruusuwwika umo, isixxa mannuwwa isixxa godobi giddiira dudhishshine itte. 10Ookkone maalanaa'n gorsi qico'n mitteelchonna gatisinoqqe'e; gorsi qico'ni gataak hedhoole kinni giirate'n gubbe. 11Ha'nonna eettene ita ittinaa qici: hidha ha'nooka usudhdhitineexxi, lekkate'n kophe uggudhitineexi, siqqichcho anga abixxitine'e hurru hitine ita eettene itte. Kunni Duuchchi Woddike Goottike sa'atike ayyaanani.
12«Ani eetteneen hashsha Gibtseke bogi giddo duuchchanaa'ni sa'annon; hore manjika angafa duuchchanna shiyannon; Gibtseka magenuwwa duuchcha'ninna murannon; ani Duuchchi Woddike Goottan. 13Iitti mundenna hexxineeke mine'n ha'no'a beessisake kaddaan; aninna munde eettene afanno wodda ha'nonaa'n sa'annon; Gibtseka boga gananno wodda bala itti ha'noo geltabaan.#Lew. 23:5; Lew. 16:3-8.
14«Ani Duuchchi Woddik Gootti ha'no'a assennexxa duuchcha qaabbatati tinni barra ha'no'a qalli hiyyatixxe kaddowwaal; eettenee barranna dagaake baro duuchcha'ni ulfeesitinaashsha duuchchii woddixxe aada ha'no'a kaddowwaal» hiyye.
Kebbotika Ayyaana
15«Torbaane barra'a lebele e'yitebaaxxe bullexxa kebbo itte; taakkaxxe barra'n lebele mine ha'nokenaa'n fugusse; ayyinna siretixxe barranaa'n torbaaxxe barra qico'n lebele e'yiteexxa kebbo itee manji Isira'eelike ardi giddii'n fugusemowwaal. 16Eettene torbaane barruwwanaa'n taakaxxenna torbaxxa barra'n woyyitte bukki bukki hiyye. Tenne barruwwa'n heene hujena hujjinoqqe'e; hujjinaaxxi huje mitti mitting ha'no ita ra'issedha calla kaddaan.
17«Isira'eelika sannachcha Gibtsee'n fulchennaxxe barra kaddemmaxxe eettene barra kebbotika ayyaana ulfeesse. 18Taakake agenjixxe tommenna sholgaxxe barraxxe hashshanaa'n lame tommenna mitte hashsha qico'n lebele e'yitebaaxxe bullexxa kebbo ittinaan. 19Torbaane barra qico'n mine ha'nooke'n gamami afemoqqe'e; ayyinna Isira'eel bogike manjo kado'o yookaan gadhii'n dageek lebele e'yiteexxe bullexxa kebbo itoole isi Isira'eelixxe tuuta giddii'n fuggussemowwaal. 20Gamami e'yeechcho mittelchonna ittinoqqe'e; hexxinaaxxe bakka duuchcha'n gamam e'yebaaxxe bullexxa kebbo ittinaan» hiyye.
21Muusenna Isira'eelike ardika hayyichchuwwa duuchcha ye'eexxi hiyyee qici, «Rakine martineexxi ha'no ififike mini hadi'a gedhebiinka buruusa fi'ltineexxi sa'atike ayyaani'a dulle. 22Ookko'ninna cu'ma mitte kadaaka hisoophphika shafa aaxxine qorete'n hexxeexxe munde'n cuuphphina'n mine ha'nookixxe gubane'ni middake'ninna bita'ake'ni buurre. Ha'noo giddii'ni bogi sooda qico'n ayyinna gadhi'a fuloqqe'e. 23Duuchchi Woddiki Gootti Gibtseka manna reyoti gano'a ookkone boga ha'no giddii'n sa'aa wodda ha'nooxxe gubane'ninna mikikilanjuwwa'n hexxeexxa munde afaa wodda eettene hulanaa'n sa'aan. Shiyaamak iimik erganji mine ha'nookiba e'ye ha'noo shiyabaashsha assaan.#Ibr. 11:28. 24Ha'nonna ha'nooxxi oose tenne akeette duuchchii woddixxe aada assexxine heqqexxinaan. 25Duuchchi Woddiki Gootti ha'no'a uwwo'a addachchiisemmake boga'n e'yitinaa wodda tenne aada muuxxinaan. 26Oose ha'nooxxi ‹Tinni aada ha'no'a maachcho hiyyate?› Hite ha'noo qortaa wodda, 27Ha'nonna insa'ne'n, ‹Gibtseka manna reyot ganee wodda Gibtseke bogi giddo Isira'eelike ardika mine waale sa'ati, mine no'oka gatiseeke, Duuchchi Woddike Gootti'a Sa'atike tolchan› hitine haasottinaan.»
Ookkoneechchi uduma ardikinna tennee laqee wodda gomibiseme sagade. 28Ardikinna Duuchchi Woddiki Gootti Muusenna Aarooni ajajemmashsha assine.
29Hashsha wodhakka Duuchchi woddiki Gootti Gibtseke bog giddo mootete'n hedheeke Feri'oonike angafinaa'n bale giddike usurrinke mine'n hedheeke manjike angafi qico'n hedheeka angafa duuchcha reyot gane; iittanni horiinka edise ilemeeka duuchchanna reyot gane. 30Eetteneenni hashsha Feri'ooni, isik ja'laabuwwinna Gibtsek ardi duuchchi diiphokenaa'n ke'e; kunnise manji reyebaak mitti mininna hedha gopheemmaxxe'e Gibtseke boga'n hunbaashsha kadde.
Gibtsee'n Fula
31Eetteneenni hashsha Feri'oon Muusenna Aaroonii'i ye'eexxi, «Ke'we, ha'nonna Isira'eelik ardi, anke ardi giddii'n fuldine me'e, Hitinemmashshanni Duuchchi Woddika Gootta magnoonfatte. 32Hitinemmashshanni gedhebo, re'enna lalo ha'nooka adhdhitine me'e; aneenna eebbisse» hiyye.
33«Rakkine fula gophphinoole no'aa mudaten» hiyya'n Gibtsek ardi Isira'eelik ardi rake ma'ashsha wiinanise. 34Tennexxe ardikinna gamami e'yebaaxxa qushshendeexxa bulle qushshatixxe qore'n seemmati mirqe dugummote'n dulke. 35Isira'eeliki ardinna Muuse ajajemmashshan, Gibtseke manninaa'n worqetikanna birretike sibiljika seesuwwa, iittanni seemmuwwa laqqe'ne. 36Duuchchi Woddiki Goottinna Isira'eelike ardi Gibtseke manni edo elle alfaashsha asse'naa laqqe'neexxa duuchcha insa'ne'a uune; konnee qicinni Isira'eelik ardi Gibtseke ardixxa karra gudhdhe.#Fula. 3:21-22.
37Isira'eeliki ardinna Raamisenaain ke'eexxi Sukooti'a me'e; insa'nenna oosetinna dubartet gadhi darre jaane dhibba kumamman. 38Iitanni laakkossi insa'neek birasa'eek weli ardi Isira'eelike ardinni welt qabate; ittanni lumo qico heddi gedheb, heddo re'enna heddi lali insa'nenni fule. 39Gibtseke boganaa'n fullee wodda wiinamik fullemmaxxee ita qophesseccatixxa yanna affeemmabaan; tennexxe Gibtsee'n adhine fulleexxa qushendeexxa bulle xalta xaltise'ne; tenne qushendeexxe bulle'n gamami e'yeemabaan.
40Isira'eeliki ardinna Gibtseke boga'n hose galeexxi shoole dhibbanna sase tomme woggamman.#Dada. 15:13; Gel. 3:17. 41Iitti shooli dhibbinna sase tomme wogga muuxendexxe barra'n Duuchchi Woddike Goottik sannachchi duuchchi Gibtseke boginaa'n fule. 42Duuchchi Woddiki Gootti insa'ne Gibtsee'n fulchatee heqqendeexxe hashsha kaddemmaxxee'e dagaaxxi ila duuchcha Duuchchi Woddika Gootta ulfeesitaashsha itti hashsha Isira'eelik ardi duuchchi jabaate heqqedha hasissaan.
Sa'atika Ayyaani Ulfeessatixxa Aadda
43Duuchchi Woddiki Gootti Muusenna Aarooni'i, «Haninaa'n Sa'atika ayyaana ulfeessatixxi aada konnechchinni butti'a hexxeshshaten.
«Ayyinna gadhik manji Haninaa'n Sa'atixxe itanaa'n ittoqqe'e. 44Birretike sibljinni hiremeek huun garbichchi jila ofo'le uduma isenaa'n ita dande'aan. 45Yaane kinni keesumma yookaan hiriink hujalli isenaa'n ittoqqe'e.
46«Iitti itanna mitte mine'n itema hassissaan; ookkone maalinaa'n mittikinna gadhi'a fuloqe'e; mitte micconna enqitinoqqe'e. 47Isira'eelike ardixxi tuuta duuchchanna konne ayyaana ulfeessa hasissaan.
48«Ha'noo giddo hedheek keessuntichchi Duuchchi Woddike Goottika Sa'atika ayyaanna ulfeesa hasoole mine iifke'n hedheeka labbaka duuchcha jila ofo'lsha hasissaan; ookkoneechchi uduma isinna ookkone bogike manjishsha uudemeexxi eettenee aada qoodemowwaal; jila ofo'lebaak labballi kinni Sa'atike ayyaanixxa ita itoqqe'e. 49Kunni seer konne bogi giddo ileemeke manjo'ninna ha'nooxxe oddo'n hexxeexxe keessumuwwa'n konne seerxi muuxensha mittenden» hiyye. 50Isira'eelik ardi duuchchinna Duuchchi Woddik Gootti Muusenna Aarooni'i ajajemmashsha assine. 51Eetten barra Duuchchi Woddik Gootti Isira'eelika arda gosa gosatike mini mininni Gibtseke boganaa'n fulche.
Currently Selected:
Fulatika Maxaafa 12: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
