Fulatika Maxaafa 2
2
Muusexxa Ilensha
1Eettene yanna Leewwixxe gosake miniki mitti manji me'eexxi mitte Leewwixxe gosaxxa manjichcho aadhe. 2Isenna sila'witeexxi labbaka belto ilde; annotinna danchate kaddeexxa affeexxi sase agenjo iso'o shoxxe.#Erga. Huj. 7:20; Ibr. 11:23. 3Yaane kinni ookkone agenji iimi darre anno sho'a dande'a gopheemmaxxee qoocetixxa qirco aaxxeexxi ise'ni faarakanna renje buurte; ookkoneechchi uduma anno giddo uggite eettene qirco'n Abbaayike galaani qarqara qooce giddo uggite. 4Annotixxi dayyonna annote'ni maachchi kadaaxxa uudatee bayyatte uurrite heqqita'nemman.
5Eettene yanna'n Feri'oonixxi belto biso anshexxo'a aade galaana marte; ise'a ergatendammaxxi melaalle galaani qarqara marenda'nemman. Isenna qoocce giddo hexxeexxa qirco affeexxi erganjo ifixxa mitte ergite iyyedagisse. 6Isenna qirco bandaa wodda labbaxxi anno giddo hexxee'naa affe; annotinna ooxxaammaxxee yaaddeexxi, «Kunni Ibiritottixxe annoolenaa'n mitteken» hite.
7Ookkone wodda annotixxi dayyo Feri'oonixxa belto «Tenne anno unuunsita'n ati'a nossitaaxxa Ibiritottixxe melaallenaa'n mare ye'oo?» Hite qorte.
8Feri'oonixxi beltonna «Eetti, marte ye'i» hite hissite haasotte; beltichchotinna marteexxi eettene annoxxa ama yexxe. 9Feri'oonixxi beltonna manjichcho, «Tennee anno aaxxe unuussita'n ani'a nossi, ati'a hira uwwannon» hite; tennexxe'e manjichcho anno aaxxeexxi nossite. 10Beltichchi nophphee wodda isenna Feri'oonike beltoba isoo iyyedagge; isinna ise'a beltoke kade; «Wodi giddii'n fulchenneke hita'n suumma isika Muuse#2:10 Muuse hiyya Ibrititotike laagadinni fulchate hiyyaten.» hite fulchite.#Erga. Huj. 7:21.
Muuse Miidiyaamike Bogiba Baaje
11Muuse nophpheexxi mitte barra ifik manni hedheeba mare; ookkonna insa'ne ha'urto huje hunjaashsha assemee'naa afe; Muusenna mitte ifika Ibiritotika manjo mitti Gibtsek manji ganaa'na afe.#Ibr. 11:24. 12Muusenna erqe kayya uude ayyinna hedhebaaxxa uudeechchi uduma Gibtsichcho shiyeexxi maanchi giddo sho'e. 13Langa baro maraa wodda lami Ibiritotik manni welt lolemaa'naa afe; balleesanjokanna, «Ibirichcho atika manjo gandaatelch mayeete?» Hiyye. 14Manjichchikinna «Atee no'o'n galchallokenna hayyichchake kaddattoshsha baallonseeki ayyete? Yookaan ookkonee Gibtsichcho shiltettashsha aneenna shiltotta'a hassa'eteta?» Hiyye. Muusenna yo'oshsha sodaateexxi, «Adana assennexxi yaane ege'nedeen!» Hiyye hede.#Erga. Huj. 7:23-28. 15Feri'ooninna tennee yaane laqee wodda Muusee shiyo'a ke'e.#Erga. Huj. 7:29; Ibr. 11:27.
Muuse kinni Feri'oonixxa baajjo Midiyaamike boga'n me'exxi mitte wodiinxe bale bira ofo'le. 16Midiyaamike bogik qeesichchi torbaane dubarra afeemman; insa'nenna wodinxe baleba dangeexxi ifike annika gedhebo wode'e ha'wisatee gongake'n wonshine. 17Allalsanotinna daggeexxi ookkonee dubarra shortee wodda, Muuse mareexxi insa'nee gargaare; gedhebo insa'neekeenna wode'e ha'wise. 18Dubarinna ifike anna Raagu'eeliba'a illee iima higee wodda, isinna insa'ne'e, «Telcho hitta hirbake'n daggine?» Hiyye qore.
19Insa'nenna iso'ni «Mitti Gibtsichchi no'oo allalisanotenaa'n wodeen; matanga wode'e ikkileexxi gedhebo no'oka no'a ha'wise» hine. 20Annikinna ifika dubarra, «Isi haba hedhe? Mayee iso'o waaldine daggine? Ita ito'a ye'we» Hiyye.
21Muusenna insa'nenni hedha eeyye; Ragu'eelinna belto ifixxa Sipoora'a iso'ni heerunsiise. 22Sipaaranna labba belto ilde; Muusenna «Alagiinke boga'ni hedheneni» hiyya'ni beltiinka summa Gershoom#2:22: Gersaam: Kunni summi Ibrititotike laagadinni «Wele bogi manjo» hiyyatishsha fakkaataan hiyye fulche.
23Heddo wogga uduma Gibtski moyanji reye; Isira'eeliki manninna garbummatenaa'n kexxeexxinni oodhe; garbummatenaa'n gatatee'e oo'neexxi oodhishsha Magenibaa gelte. 24Magenikinna insa'neexxa aadino laqe; Abirihaami'a, Yisaaqi'anna Ya'iqoobi'a aagemmaxxa kako hede.#Dada. 15:13-14. 25Mageninna Isira'eelika arda uude; insa'ne'aanna hede.
Currently Selected:
Fulatika Maxaafa 2: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
