Fulatika Maxaafa 21
21
1Isira'eelike ardi'a uutattok seeruwwi konneechchinni butti'a hedheeken.
Ibirichcho Garbichcho
(Lew. 15:12-18)
2«Ibirichcho garba hidhdhitottole jaane wogga ati'a ergatemowwaal. Yaane kinni torbaxxe wogga'n mittelchonna uwwebaang tola fulowwaal. 3Qofinni dage'exxe kaddoole qofinni me'owwaal; yaane kinni dage'emma wodda are afoole isenna isinn welt me'ituun. 4Gootti isik iso'o aadhise'na'a manjichcho isi'a labbaka yookaan meyaxxa oose ildo'oole, isenna isexxi oose ookkone goottixxe kadduun; isinni calla fulowwaal.
5«Yaane kinni iikki garbichchi, ‹Ani gootta anka anxa arenna anxa oose eeyyannen; qullo fule me'abe'no› hiyyoole, 6isiki goottinna iso'o magenoonfachchotixxe bakka'n iyyemareexxi mansha isixxa mutik urowwaal; isinna isi'a duuchchi woddi'a garbake kadaan.#Lew. 25:39-46.
7«Mitti manji belto ifixxa garbummatee gurgudhdhoole, labbaki garbichchi qullo fulammashsha ise fuldoqqe. 8Ifixxe kaddo'a fileeka gootta ifika gammachchiisa gophoole isi ise'e wodoqqe'e; ise'a afemmaxxa addatensha xe'yisheemmaxxee'e isee alagake'n gurguratixxa deette afebaan. 9Iseenna belto ifikee fi'le'oole ifixxe meyyaxxe oose'a assendaaxxa ise'a assowwaal. 10Isi langasse aadhoole eettene edixxenaa'n ita, oddoononna ma'natika seera xe'ishoqqe'e. 11Tenne sase yaanuwwa ise'a assa gophoole mitte maallaqixxe uwwa belo fulde me'itowwaal.»
Manjoke'n Geltaaxxa Miidhensha
12«Manjo gane shiyaak shiyemowwaal.#Lew. 24:17. 13Yaane kinni gaadiyyotite kaddebaang, Magen anga isixxe'n sa'isse uwwee'naa danot shiyoole ani murannoke boonchibaan baajowwaal.#Lak. 35:10-34; Lew. 19:1-13; Iya. 20:1-9. 14Yaane kinni mitti manji xaqarot ege'na'inni mitte manjo shiyoole, shiyemashsha isoo anke tolchimalchonaa'n aadhi.
15«Anna yookaan ama ganaak shiyema hasissaan.
16«Manji mitti wele manjo abide gurguraak yookaan angate'n manji abidemaak isi shiyemuun.#Lew. 24:7.
17«Anna ifika yookaan ama ifixxa yowwaaka shinnowwaal.#Lew. 20:9; Mat. 15:4; Mar. 7:10.
18«Manji welt lolemoole, mittikinna mitte kinjik yookaan tuntumot gane'naa'a, ganemeek reyebaang ma'na diiphoole, 19ke'eexxi siqqo siqqedha'n gadhi'a fula'noole, iikki iso'o ganemak manji balleessa afebaan, kaddo malee miidhememmake ookkone manji'a, diiphe sa'issemmaxxe yanna'a maallaqa uwwowwaal; fayye ca'a hiyya qico'ni iso'o dhibensiissowwaal.
20«Manji mitti ifika labbaka garba yookaan ifixxa meyyaxxa garbitte siqqoti ganoole; tennenaa'ninna kexxeexxinni reyoole isi mura woxa hasiissaan. 21Yaane kinni ganememmak garbichchi mitte yookaan lame barra turoole iikki garbichchi karra isixxe kaddeemmaxxe'e garbichchiink gootti xixemabaan.
22«Lami manji lolemaa'naa siila'witeexxa manjichcho ganee'na'a gufattoole, yane kinni miidhema isexxi jabaxxe kada gophphoole, iikki ise miidhendaashsha assemmak manjichchi, eettene manjichchok aro'i laqeechchonna hayyoole murteechcho duuchcha uwwowwaal. 23Yaane kinni miidhensha isexxi jabaxxe kaddoole hedhotee hedho 24Ille illetee, isso issotee anga angateenna lekka lekkatee#Lew. 24:19-20; Lew. 19:21; Mat. 5:38. 25gubematee'e gubemaa, madoossatee madoossa, jadhafatee jadhafa.
26«Manji mitti ifika labbake garbichchixxa ille yookaan ifixxa meyyaxa garbitte ille gane balleessoole, eettene illetixxe bado'a iso'o garbummatenaa'n qullo fulchowwaal. 27Ifike labbake garbichchixxa yookaan ifixxe meyyaxxe garibittexxa isso enqoole eettene issoxxe bado'a ookkone garbichcho garbummatenaa'n qullo fulchowwaal.
28«Saayyi mitti labbaka manjichcho yookaan meyyaxxa manjichcho tume shiyoole iikki saayyichchi kinjik cancaqemeexxi shiyemowwaal; ookkone saayyichchiki maal itemoqqe; yaane kinni ookkone saayyichchik anni balleessate laqemabaan. 29Yaane kinni iikki saayyichchi tumatika adaba edo afeexxa annake'e xexe'achchiisa uwwende hexxee'nann ookkone sayyichcho moona giddo gatisa gopheena'a mitte labbaka yookaan meyyaxxa manjo shiyyoole iikk sayyichchi kinjik cancaqemowwaal; saayyichchi anninna iittann cancaqeme shiyemowwaal. 30Kaddoollenna isi mura woxxendo'a laqemoole uwwo'a laqemeechcho uwwiyyoti hedho ifixxa wodowwaal. 31Mitti saayyi labbaka yookaan meyyaxxa belto tumoole kuninni seeri hujete'n hosowwaal. 32Mitti saayyi labbaka yookaan meyyaxxa garbitte tumoole ookkone saayyik anni garbichchiinke anni'a sase tomme birretika sibiljo uwwowwaal; iikki saayyichinna kinjik cancaqemowwaal.
33«Manji mitti bale haannasse waaloole yookaan bale qoteexxi tuphebaak waalee'naa saayyi yookaan harre giddo iboole, 34eettene balek anni ookkene horika hira ookkone horke anni'a uwwowwaal; reyemmaka horenna ifi'a gatilsowwaal.
35«Mitte manjichchik saayyi mittinka saayya tume shiyoole, lamingi manni lubbo gatemmaka saayyichcho gurgudhdhineexxi ookkone maallaqanna reyemmaka saayyichcho weli qixxe qoodemowwaal. 36Yaane kinni iikki saayyi tumatika adaba afe'exxa ege'nenda'nanni anni iski isoo moona giddo heqqa gophoole, ookkone saayyink anni saayya saayyinxa bado uwwowwaal; reyemmaka kinni ifi'a gatilsowwaal.
Currently Selected:
Fulatika Maxaafa 21: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
