Fulatika Maxaafa 22
22
Karra Heqqatika Seera
1«Manji mitti saayya yookaan gedhechcho moore duloole yookaan gurguroole, mitte saayyixxa bado onde saayya, mitte gedhechchixxa bado shoole gedhebo uwwowwaal.
2«Mitti moodhalchi mine enqa'n'a afemoole, reyaa qico'ninna ganemoole, iikki faachcheffatteek mundokee'e laqemabaan. 3Yaane kinni tinni kaddeek arishsho fuldeechchi udumate kaddoole isi duneexxe munde'a laqemaan.
«Iikki moodhalchi mooreechcho hiissa hasissaan; mittelchonna afa gophoole kinni modhalchumma isixxee'e gurguremowwaal.
4«Mooreek hore saayya yookaan, harre, yookaan gedhechcho lubondinni anga isixxe'n afemoole, lame anga asse hiissowwaal.
5«Manji mitti hore ifika fichchake'n yookaan woyineti booncho'n bobbaase'na'a wele manjike fichcha itoole ifike fichchinaa'n yookaan ifike woyinetike boonchinaa'n filemeechcho isi'a uwwowwaal.
6«Mitti manjichchi fichchi giddo giira qassiisoolenna giira waaccote'ni saxxe wele manjixxe midha'ni guuldeexxi nophphichchoke'ni hexxeexxa haamende tuulndeexxa midha ittoole, giira ha'isheemmaki manjichchi midha eettene'e hissowwaal.
7«Manji mitti birretika sibiljo yookaan miya mitte manjo'n massedhee'na'a mooremoole, moodhalchikinna abidemoole lame anga hiissowwaal. 8Moodhalchi afema gophoole kinni miniik anni ookkone mooremeke miya'n isi hedheexxanna hedhebaaxxa gargar hiissatee hayyoolti edo shiqowwaal. 9Manni saayyake, harrichchoke, gedheboke, seemmatee yookaan hoone wele ba'eeke miyixxe weli ku'linee'naa mitti, ‹Kunnichchi anichchon› hiyyoole lamiing mannixxi yaane hayyoolete'n shiqinshowwaal; hayyoolletinna balleessanjoken hitaak manji holqone'a lame anga hiissowwaal.
10«Manji mitti ifika harrichcho, lalo, gedhechcho yookaan hooneenna hore manjinba alallo'a uggudhdhe'naa hori iikki reyoole, enqemoole yookaan afeeng hedhebaang adhdhemoole, 11iikki weli manjinna ookkone hore adhdhebaaxxa lamiing manni Duuchchi Woddike Gootti edo kakatowwaal; ookkone horik anninna kako tennee adhdhowwaal; isinna ookkone horixxa badonna adhdhoqqe. 12Hore ikki mooremeek isinbaa'nite kaddoole kinni annake hiissowwaal; 13Hore okkone biniinchi iteexxe kaddo'ole, manjichchi biniinchi itee'na'a gatteexxa hafe dhugaate shiqishowwaal; isinna itemeeke horixxa bado uwwo'a laqemaba'a.
14«Mitti manji wele manjika hore ergilsoole, hori ikiinna anni bira hedhebaaxxe yanna'n enqemoole yookaan reyoole ookkone horixxa bakka hiissowwaal. 15Yaane kinni horiink anni bira hedhee'nate kaddoole iikki ergilsemmak hiissoqqe'e; barratika hiri'a adhdhoole, iikki barratike hirik maallaqi ookkone horixxe hiissa kade'een.
Arda Uudaka Seera
16«Manji mitti uwwendebaaxxa dubarrichcho sossobeexxi welt diiphoole, araariinka maallaqa uwweexxi isee aadhowwaal. 17Isek ann ise'e iso'n heerunsisa haranga giboole, mitte dubarrichoke araari'a uwwemamma qicik biretik siblji ise'a uwwemowwaal.#Lew. 22:28-29.
18«Gojaallette manjo hedhot hexxo'a waaldoxxe'e.#Lew. 18:10-11.
19«Horik yabaabulaak shiyyemowwaal.#Lew. 20:15-16; Lew. 27:21. 20«Duuchchi Woddike Gootti'ate malee wele magenuwwa tolchaak shiyemowwaal.
21«Ha'nonna Gibtseke boga'n keessummumma hexxinemmaxxee keessuntichcho miiccinoqqe'e.#Fula. 23:9; Lew. 19:33-34; Lew. 24:17-18; 27:19. 22Aro'i reyyeexxa yookaan anna ama affebaaxxa hunshi assitinoqqe'e. 23Insa'ne hunshi asitinee'naa aniba raarroole ani raare insa'nexxa laqanoxxi kokaken. 24Mufe anxinna ha'no'n kexxaan; wolaantichchikinna ha'noo shiyannon; aruwwa ha'noxxi aro'o affebaaxxe, oose ha'noxxinna anna affebaaxxe kaddaan.
25«Anke ardi giddo rakkichchake kadeeke'e maallaqa liqeessitinoole dhalik liqeessammake manjishsha kaddinoqqe'e; dhalakanna uwwo'a laqinoqqe'e.#Lew. 25:35-38; Lew. 15:7-11; 23:19-20. 26Maallaqa liqeessitettek manjinaa'n anga abixxatee seemma adhdhitoottole arishsho aaggebaangi seemma eettene isi'a hiissi. 27Tinni isi biso ifike'n tee'laaxxi isenni calla kaddemmaxxeeten; buyyedhe galaaxxanna wele afebaa'a; ani mararannoke Mageno kadennaxee'e aniba raaroole ani laqannon.#Lew. 24:10-13.
28«Magenoke'n#22:28: Mageno: Yookaan «Hayyoolete'n» hiyyatenna kaddaan fuggo afo'o fulchexxoxxe; atike ardika akeekisanjuwwanna yowwitoxxe'e.#Erga. Huj. 23:5.
29«Atixxe midhaka yookaan woyine atixxika bulbulo ani'a uwwatee hekki hitoxxe; atixxe oosenaa'ninna angafeeka labbaka ani'a uwwi. 30Iitanni atike lalikanna atike gedhebika angafa ani'a uwwi; tinninna edise ilemeek labbak duuchchi amati welti torbaane barra turowwaal; saddeetixxa barra kinni ani'a uwwi.
31«Ha'no ani'a woyyichcha arda kaddinaan; tennexxe biniinchi shiyeeka ittinoqqe'e; worshake uwwe.#Lew. 17:15.
Currently Selected:
Fulatika Maxaafa 22: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
