Fulatika Maxaafa 23
23
Dhugaatixxanna Toggitte Murte
1«Dharitte odo ba'lissoxxe'e; dharik dhugaa kulat fuggo assaakenni mittoondoxxe.#Fula. 20:16; Lew. 19:11-12; Lan. 5:20. 2Fuggoxxa assatee heddo manna hordoffoxxe; seer edonna dhuga kuldatto wodda heddo manninni mitttoomati dhugaa dassitoxxe. 3Hayyummati wodda hiyyeessake gamisoxxe.#Lew. 19:15.
4«Atik naaphik saayyi yookaan harichcho baxxe'naa'a affottole isibaa illee iima hiissi. 5Atee gibaake manjichchik harrichchi ba'oti ibe'naa affottole, iso'o gargaarte ke'iss malee waaldoxxe.#Lew. 22:1-4.
6«Murtetiba gamissettexxi hiyyeesinka seera dassitoxxe; 7Ani cubbichcha xixichchokenaa'n gadho gatisa gophaannaxxee ayyeenna dharik ku'litoxxe'e; balleessa afebaaka yookaan qullichcha manjo'ninna reyo uggitoxxe'e. 8Matti ca'a asse uudammaka manna ille affebaashsha assammaxxenna qullichchiinka arrabonna dassammaxxee matta adhdhitoxxe.#Lew. 19:15; Lew. 16:19; 23:9; Fula. 22:21; Lew. 19:33-34; Lew. 24:17-18; 27:19.
9«Ha'no Gibtseke boga'n hedhati keessummummatixxa hedho egendinemmaxxe'e keessumma miiccinoqqe'e» hiyye.
Edike Sanbatika Seeruwwa
10«Jaane wogga fichcha atika hucci midhatanna aassedhi, 11Torbaxxe wogga'n kinni iikki bogi hafuura adhdho'a iso'o la'ooffatanna hucca waal; ookkonechchi uduma atike bogi giddo hexxeexxi hiyyeeyyee isinaa'n ita alfinaan; biiniichikinna insa'ne'na'n gateeka itaan; atike woyinetike booncho'ninna atike ejersinke haqichcho'n tenneenni assi.#Lew. 25:1-7.
12«Jaane barra huje ifixxa hucci; atik saayyi atixxi harre hafuura adhdhitaashsha, mine ilemek atik garbichchinna atik keesuntichchi hafuura adhdhinaashsha torbaxxa barra'n heene hujenna hujjoxxe'e.#Fula. 20:9-11; 31:15; 34:21; 35:2; Lew. 23:3; Lew. 5:13-14.
13«Tennee ha'no'n kulennexxa duuchcha xexxe'achchoti asse; wele magenuwwanna magenoonfatinoqqe'e; summa insa'nekanna gandinoqqe'e.
Sase Woggatika Ayyaannuwwa
(Fula. 34:18-26; Lew. 16:1-17)
14«Woggate'n sase ayyaaninni ani'a ulfeesse.
15«Gamamibeloxxe kebboka ayyaana ulfeess; atee ajajenneshshanni torbaane barra'a gamami e'yebaaxxe bullexxa kebbo iti; Gibtseke boganaa'n fuldinemmake agenjo kademmaxxe'e, tennee Abiibike agenji giddo murendeexxe barra'n assi.
«Ayyinna ani edo duwwixxe anganni dagoqqe'e.#Fula. 12:14-20; Lew. 23:6-8; Lak. 28:17-25.
16«Atike fichcha'n wiissettexxe midhaka tommitte umiinxa midha bukki asseccatika ayyaana ulfeess.
«Woggatike muuxama'n fichchakenaa'n midha bukki assitatto wodda aasseccatika ayyaana ulfess.#Lew. 23:15-21, 39-43; Lak. 28:26-31.
17«Woggate'n sasele atik labbak manji duuchchi Duuchchi Woddike Gootta Magen edo leellowwaal.
18«Ani'a tolchemeeke tolchixxa munde gamami e'yeechchinni ani'a shiqishshoxxe.
«Anke ayyaanike tolchik ha'yi sooda qico'ni turoqqe'e.
19«Atik bogixxe gummaka umo#23:19 Atike bogixxe gumaka ummo hiyyaka hiyyichcho wele wele tika atike bogixxe filndeexxe gumaka umo hite'een; yaane kinni Ibritotixxi iitta hitaba'a. Duuchchi Woddike Gootta atike Magenik mi'nen iyyedagi.#34:26; Lew. 14:21; 26:2.
«Re'etike beltanjike maalla isixxe amaxxe addonni gaffoxxe'e.
Magenik Iimik Erganji Orake'n Edii'n Me'eexxa
20«Kunse, ora me'itatto wodda ate'e heqqaakanna ati'a qixxeessenneke booncho'n ate'e geessisaaka iimika erganjo ati edo ergannon. 21Isi edonna xexxe'ati; hiyyaaxxanna caqasi; iso'o qaraarfataashsha assitoxxe; Summi ank iso'n hedhemmaxxe'e atixxa cubbo gattowwaal hiyyabaan. 22Isi hiyyaaxxa dho'o hitee caqassetelna ani hiyyannoxxa duuchcha assitottole naapha atikee'e ani naaphake kadannon; atee gibaakanna gibannon. 23Ank iimik erganji ati edo me'eexxi Amooritotike, Hiititotike, Feeriizitotike, Kenaanitotike, Hiwaatotikenna Iyyaabustotike boga'n atee'e iyyedagaannon; aninna insa'nee balleessannon. 24Ati insa'neka magenuwwa sagaddoxxe'e; magenooffattoxxe'e; aada insa'nexxanna hordoffoxxe'e; magenuwwa insa'neka diigge balleessi; insa'nee magenooffantammaxxa soodduwwanna butuchchite biri; 25Duuchchi Woddika Gootta atika Mageno magenooffat; isinna midha wode'e atika eebbisan; dhukkubakanna atixxe oddonaa'n bayyisannon. 26Boga atike'n gufattaaxxi yookaan maseento hexxabaan; wogga atixxanna qeersanon.
27«Ate'e moromaake gosa gosake arda duuchcha'ni soda'a insa'ne'ni ibisannon; insa'ne dommi hinaashsha assannon; naaphi atik duuchchinna dudduro wirri hiyye'e baajaashsha assannon. 28Aninna edi'a me'itatto wodda Hiiwwaawwito, Kenaanitonna Hiitito ora atikenaa'n shorratee ati edo soonsa ergannon. 29Yaane kinni mitte wogga giddo isna'ne shorrabe'no; tinninna bogi urme'na'a biniinchi ha'no'n birasa'abaashshaten. 30Yaane kinni horte birasaxxe boga duuchcha abixxitatto qico'n, shiixxishe shiixxishe insa'ne'e ati edii'n shorrannon.
31«Gabala atixxa Eritiriinxe Abbaayyanaa'n#23:31 Ibrititotike laagadinni, Yaami Suufi Hinaani; tinninna Dengelixxxe abbaya Hiyyaten. Filisixeemixxe abbaayyaa qico,#23:31 Mediteraliyan eettene qiilla gammoojjenaa'n galaani qico'ni#23:31 Eefiraxisi assanon. Ookkone boga'ninna hedha'neka manna atixxe anga'ni sa'isse uwwannon; atinna insa'ne'e shorrite ati edii'ni fulchitatton. 32Insa'nenninna kadi insa'neke magenuwwinni welt kako aaggoxxe'e. 33Insa'eka magenuwwa magenooffachcho ati'a fonxoro kadda kokake kaddammaxxee'e, ane'ni cubbo hujabexxoshsha atike boga'n kunni ardi hedho'a waaldoxxe'e.»
Currently Selected:
Fulatika Maxaafa 23: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
