Fulatika Maxaafa 3
3
Muusexxa Ye'ensha
1Muusenna ifika ballo Midiyaamika qeesichcho Yetorika gedhebonna re'e allala'emman; horekanna qiilla gammoojjeke qarqara'n iyyedageexxi Mageniinxe kooba hiyyemak Siina'a dage. 2Ookkonna Duuchchi Woddike Goottik iimik erganji qosorro giddo giiratike bubenixxe oddonaa'ni Muuse'ni leelle. Muusenna qosorrote'n giira ha'yiteexxe kaddoolenna midde gubate'emmabaaxxa afe. 3Muusenna, «Mareennexxi giira bubbaa'na'a qosorro mayee gubatta'nebaaxxa konnee mambe'a uudo!» Hiyye.#Erga. Huj. 7:30-34.
4Duuchchi Woddiki Goottinna Muuse tenne yaane uudo'a mareexxa uudeexxi qosorroti giddii'n Magen, «Muuse! Muuse!» Hiyye ye'e.
Muusenna «Hee kunna'a kaban hedhenen» hiyye.
5Magenikinna «Kabaa shiqqoxxe; uurritteettexxi bakka woyyittete kaddemmaxxe'e kophe atixxa fulchedhi» hiyye. 6Higgen, «Ani anna atike Abirihaamike, Yisaaqikenna Ya'iqoobike Magenon» hiyye. Ookkone wodda Muuse Mageno uushsho sodaatemmaxxee alba buqedhe.
7Duuchchi Woddik Goottinna, «Gibtse hedheeke anke ardixxa rakko uude'ennen; insa'nee hujisa'neeke mannixxe buutonni oo'na'neexxa oodhishsha laqeennen; abara insa'neekanna ege'neenneni. 8Insa'neenna Gibtsike mannixxe anganaa'n wodonnaanna ookkone malebiinkenna adotike ba'lakenna shamoke Kenaanitotike, Hiititotike, Amooritotike, Feeriizitotike, Hiwaatichchikenna Iyyaabusotike bogibaa insa'ne iyyedagonnaa dirreennen. 9Ta'a, Isira'eelike ardixxi oodhishsha anbaa gelte'een; Gibtseki manninna insa'nee miica'neeka miiccama uudeennen. 10Tennexxe'e amo, arda anka Gibtske boganaa'n fulchitotta'a ate'e Feri'ooniba'a ergaannen» hiyye. 11Muusenna Mageno, «Feri'ooniba marennexxi Isira'eelika arda Gibtsee'n fulchannok ani ayyete?» hiyye.
12Mageninna hiisseexi «Ani atinni welti hedhannon; atee ergeenk ante kadenexxa kulaak beessisi: arda Gibtsee'n fulchitatto wodda tenne kooba'ni ha'no Mageno magenooffatinaan» hiyye.#Fula. 6:2-3.
13Muusenna Mageno, «Isira'eelike ardiba marennexxi, ‹Ha'nooke annuwiki Mageni ha'noobaa anee erge'en› hiyye'na'a, insa'nenna ‹Summi isik ayyete?› Hine anee qorroole, insa'ne'n maa hiyyanno?» Hiyye.
14Mageninna Muuse'e, «Ani ‹Hedhennekenna hedhannoken› tennexxe Isira'eelike arda'ni, ‹Hedheekinna hedha'neki› ane'e erge'een hite insa'ne'ni kuli» hiyye.#Yoh. 8:58; Ibr. 13:8; Wal. 1:4, 8. 15Mageninna Muuse'e hiyyee qici: «Isira'eelike arda'n ‹Anuwwa ha'noke Abirihaamik, Yisaaqikinna Ya'iqoobik Duuchchi Woddik Gootti, Mageni anee ha'noobaa ergeen;› Kunni duuchchi woddike anke summan; ila ila'n qaabbatemannok konne summinniten» hiyye.
16«Martettexxi Isira'eelike ardika akeekisanjuwwa bukki assite'e insa'ne'ni hitatto qici, ‹Duuchhci Woddik Gootti Abirihaamik, Yisaaqikinna Ya'iqoobik Mageni ane'ni leelleexxi anee'e: ani ha'noobaa dirrennexxi Gibtsek manni ha'no'ni geessiseeka miiccama uudeennen. 17Gibtsexxe rakkonaa'n ha'noo fulchennexxi malebinna ado burqita'neeke Kenaanitotike, Hiititotike, Amooritotike, Feeriizitotike, Hiitawaachchinkenna Iyyaabusitotike boga'n ha'noo iyyedagannon› hiyyennen.
18«Isira'eelike ardiki akeekisanjuwwi ati hitattoxxa laqaan; ookkoneechchi uduma atinna isira'eeliki akeekisanjuwwi Gibtseke moyanjuwiba martineexxi iso'n, ‹Ibiritotik Magen no'o'n leellee'een; tennexxe'e qiilla gammoojje giddo sase barraka ora me'inennexxi Duuchchi Woddika Gootta no'oke Mageni'a tolcha tolchinonna'a no'aa eettii uwwi› hitine kulle. 19Yaane kinni Gibtsek moyanji jabaxxe hirrenni kaddoole malee'e me'itino'a eetii ha'no'a uwwabaaxxa ege'neennen. 20Tennexxe ani hirre anxa dirriirsennexxi Gibtseka arda ganannoka maso manbe'uwwa ookko insa'nexxe oddo'n assannon; ookkoneechchi uduma me'itino'a ha'no wocci assaan.
21«Kunni ardi Gibtseke ardi edo elle alfaashsha assa'ennaxxe fuldinaa wodda duwwixxe anganni fuldinabaan.#Fula. 12:35-36. 22Mitte mittendi Ibiritotixxi melaalle ifi fke olla'a'ni hexxeexxe Gibtsexxe melaalleka worqetikanna birretike sibljika seesuwwa uutaashsha laqexxowwaal; konneechcho duuchcha adhitineexxi ha'nooxxe labbaxxenna meyyaxxe oose'n oddeessitinaan; konne qicinni Gibtseke mannixxa karra gudhdhitinaan» hiyye.
Currently Selected:
Fulatika Maxaafa 3: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
