Fulatika Maxaafa 5
5
Buttiniinxe Qabada'a Hicaciinxe Uwwenshaxxa gophema
1Ookkoneechchi uduma Muusenna Aarooni Gibtse marreexxi Feri'ooni'n, «Duuchchi Woddiki Gooti Isira'eeliki Magen hiyya'nee qici, ‹Qiilla gammoojje'n ayyaana ani'a ulfeeso'a arda anka wocci assi› hiyya'neen» hine.
2Feri'ooninna, «Isi'a ajajemona'a Isira'eelika ardanna wocci assonna'a Duuchchi Woddik Gootti isi ayyete? Ani Duuchchii woddika Gootta ege'nebe'non, Isira'eelika ardanna me'o'a wocci assaabe'non» hiyye.
3Insa'nenna, «Ibiritotike Duuchchi woddik Gootti no'o'n futti hiyye'een; isi no'oo dhukkubik yookaan bagedik birabaashsha qiilla gammoojje giddo sase barraka ora me'inennexxi no'oke Duuchchi woddike Gootta Mageni'a tolcha tolchino» hine.
4Gibtseke Moyanji kinni, «Koo Muuse, koo Aarooni mayee ha'no konne arda huje belo hedhaashsha assitina? Amme ha'nonna ha'nooxxe huje'n illee iima higge» hiyye. 5Feri'ooninna «Kunnise konne bogike mannik laakkossi lumoo qico bira sa'eeken; ha'no kinni ardi huje hujabaashsha assitina'neen» hiyye.
6Eettenen barra Feri'oon huje hujisiisammakeranna ardake umoke kade'maka manna hiyye ajajee qici: 7«Buttiniinxe qabada'a hasisaaka hicacce edishsha Isira'eelike ardi'a shiqishinoqqe'e; insa'ne ifi'anni marreexxi hicacce bukki asse'nowwaal. 8Yaane kinni edi wodda buttina qabande shiqinshaammake qicika laakkossa shiqinshaashsha assine; mittetinna xe'itoqqe'e; ‹Hujete'n goonfemmaxxeeten Mageno no'okee marre tolcha tolchino› hina'n cancina'neek. 9Insa'ne dhariinxa odo laqa waalle'e hujete'ni siinaashsha huje insa'ne'ni ha'urse.»
10Ookkoneechchi uduma arda hujisammakinna soorsuwwi dageexxi ardakee «Feri'ooni hiyya'nee qici: ‹Telchinn elqi'a ha'no'aa hicacce uwwabe'non. 11Ha'no umo ha'noongeninni martine habaa'ninna kaddoole hicacce halsitinee shiqilshe; yaane kinni edo hujinammaxxi huje hara xe'itoqqe'e› » hine. 12Tennexxe'e ardi hicacciinxa bado huuba bukki asso'a Gibtseke bogi giddo duuchcha'n xeereme. 13Hujisammakiri, «Edo hicacce ha'no'a uunamma wodda hujinammashsha barra barratixxa huje barra barra'ninni hujje» hina'n arda muddansina'eman. 14Ardake'e umoke kade'emmak Isire'eel manni, «Edo hujinamma qicika qabademeeka buttina berqenna telcho maa wonsha gophphine?» Hina'n Isira'eelika arda hujisammaka manna jadhafa'emman.
15Isira'eelike ardi'a umoke kadeemmak manninna Feri'oonibaa mareexxi, «No'o'o atike erganjuwwa'n tenne assitettechchi mayeete? Tinninna: 16Hicacce no'o'a uunebaang, buttina qabademeeka giisse! Hina'n no'oo ajanje'een; no'oo atika erganjuwwanna jadhanfe'neen» dedhi kinni atike ardiken hina'n iso'n ku'line.
17Feri'ooninna hiyyee qici, «Ha'no huje eetina'nebaake goofa mannan; tennexxeeten ‹Marrennexxi Duuchchi Woddike Gootti'a tolcha tolchino› hitina'neek. 18Ta'a ha'nooxxe hujebaa higge; hicacce haranga ha'no'a uwwemabaan; yaane kinni edo qabaddine giisitinammake laakkossixxe qixxeka giissiyyo hassissaan» hiyye. 19Isira'eelike ardi'a umoke kadeemmak manninna «Barra barra'n buttina qabaddine giissitinammake laakkossinaa'n haranga xe'yishshinoqqe'e» hine insa'ne kulee wodda rakko lumoxxi giddo he'neexxa egenne.
20Feri'oonibaa'n fullee woddanna insa'nee heqqa'neemmake Muusenninna Aarooninni afemmeexxi, 21«Duuchchi Woddik Gootti ha'noo uudo'o, ha'no'ni muro'o! Ha'noo Feri'oon edonna isike ja'laabuwwi edo bonbannoshsha assitinee'en; no'oo shinno'a wolaantichcha anga insa'nexxe'n uutine'een» hine.
Muuse Mageniinba Raare
22Muusenna Duuchchi Woddike Goottiba'a illeema higeexxi, «Ee, Duuchchi Woddike Gootta! Konne arda'n rakko iyyedaggettechchi mayeete? Tennexxeetee anee ergitettechchi? 23Atike summinni haaso'onnaa Feri'ooni edo marennexxe yannaanni kayyi'a isi konne arda'n abara iyyedage'een; atinna arda atika hara woddebexxon» hiyye.
Currently Selected:
Fulatika Maxaafa 5: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
