Fulatika Maxaafa 6
6
1Duuchchi Woddiki Goottinna Muuse'e, «Feri'ooni'n assannoxxa uuddinaan; anxe hunnaameette anganaa'n kexxeexxa me'itino'a ha'no wocci assaan» hiyye.
2Mageninna Muuse'e, «Ani Duuchchii woddike Goottan. 3Ani duuchchiinxa dande'anoke Mageno kade Abirihaami'a, Yissaaqi'a Ya'iqoobi'a leelleenneni. Yaane kinni Duuchchi Woddike Gootta hiyyemaake anke summinni insa'ne'ni ifi ifiseennabaan.#Dada. 17:1; 28:3; 35:11; Fula. 3:13-15. 4Keessummummatinna he'naammaka Kenaanika boga insa'ne'a uwwonna'a kako aageenne. 5Iittanni Gibtsek manni garbumma galchaa'naa Isira'eelike ardi aada'nemmaxxa aadino laqeennen; Aagennexxa kakonna hedenne. 6Tennexxe Isira'eelike arda'n hitatto qici, ‹Ani Duuchchi woddike Goottani. Ani Gibtsexxe garbummanaa'n ha'noo fulchannon; jabbaxxe hirrenninna jabake xixichchinni ha'noo wodannon. 7Ha'nonna arda anke assedhannon; aninna ha'nooke Mageno kadannon; Gibtsexxe garbummanaa'n ha'noo fulchenneke kadennexxa ani Duuchchi woddike Gootti hanooke Mageno kadennexxanna egendinaan; 8Abirihaami'a, Yisaaqi'anna Ya'iqoobi'a uwwonnaa kakatenneke boga'n ha'no'o idagannon; ha'noke qadaadanna kado'a ha'no'a uwwannon; ani Duuchchi Woddike Goottan› » 9Muusenna tenneenni Isira'eelike arda'n haaso'e; insa'ne yaadik ganematenaa'ninna a'urto hujenaa'n kexxeexxa Muuse hiyyeexxa lanqebaan.
10Ookkoneechchi uduma Duuchchi woddik Gootti Muuse'e, 11«Martettexxi Gibtsek moyanj Feri'ooni'n boga ifikenaa'n Isira'eelk ardi fulaashsha wocci asso'a kuli» hiyye.
12Yaane kinni Muuse Duuchchi Woddike Gootta'n «Isira'eeliki ardi ani hiyyaannexxa laqebaaka Feri'oonita hitta ani hiyyannoxxa laqaata? Ani ca'a asse haaso'abe'noke manjon» hiyye.
Muusenna Aaroonxe Ilenshaxxa Borreesema
13Duuchchi Woddik Gootti Muusenna Aarooni'i, «Isira'eelika arda Gibtseke boganaa'n fulchitino'a ha'noo ajajenneke kadennexxa Isira'eelike arda'ninna Gibtseka moyanjo feri'ooni'n kulle» hiyye ajaje.
Muusexxanna Aaroonixxa Sanne
14Insa'neeke hundaayyetike annuwwiki mini mini hadiki akeekisanjuwwi konneechchinn butti'a hedheekeran: Isira'eelika angafa belto Robeelixxi labbaxxi oose: Heenooki, Feluus, Hatsirooninna Kermi; kunnir Roobelike gosatike mineman. 15Simoonixxi labbaxxi oose: Yimu'eel, Yamiin, Oohaad, Yaakiin, Tsohaarinna Kenaannichcho ildeeke Sa'uulitemman. Insa'nenna Simoonike gosatike minike hundaayyetike annuwamman. 16Borreessememmaqicinni Leewwixxi labbaxxi oosek summuwwi: Gershoon, Qe'aatinna Meraariten. Leewwinna 137 wogga lubbo gale. 17Gershoonxi labbaxxi oose insa'neeke mini mini haddinn: Loobinna Seme'itemman. 18Qe'aatixxi labbaxxe ooseki summuwwinna: Imibbirem, Yisi'aar, Kebirooninna Uuzi'eelitemman; Qe'aati 133 wogga lubbo gale. 19Meraarixxi labbaxxe oosek summuwwi: Mohoolinna Muusitemman. Insa'ne borreessemmeemma qicinni Leewwik gosatike mininnitemman.#Lak. 3:17-20; 26:57-58; 1 Odo. 6:16-19.
20Imbreeminna ifixxa adaada Yokaabiidi'i aadhe; isenna Aarooninna Muuse isi'a ilde. Imbreem 137 wogga lubbo gale. 21Yisaarxi labbaxxi oose: Qore, Naafeeginna Zikiritemman. 22Uuzii'eelixxi labbaxxi oosenna Misa'eel, Elitsafaninna Siitiritemman.
23Aarooninna Ne'asoonxa dayyo Aminaadaabixxa belto Elishabaa'a aadhe; isenna Naadabinna, Abihu, Ali'aazaarinna Itamaarii'i isi'a ilde. 24Qorexxi labbaxxi oose: Asiiri, Eliqaananna Abiyaasaafitemman; kunnir Qoreke gosatike minemman. 25Aaroonik belt Ali'aazaar Puti'eelike dubarri giddii'n mitte aadhe; isenna Finihaasi isi'a ilde; kunniiri gosatike mini minishsha Leewwitotike mini hadduwwan.
26«Duuchchi Woddik Gootti Isira'eelika arda Gibtseke boginaa'n gosa gosake mini mininni fulche» hiyye ajajeemmak konne Muusenna konne Aaroonitemman. 27Isira'eelike manni Gibtsee'n fulatixxe Feri'oon Gibtseke moyanjo yaansisemmakinna konne Muusenna konnee Aaroonimman.
28Duuchchi Woddik Goottinna Gibtseke boga'n Muuse'n haaso'eemma wodda, 29«Ani Duuchchi woddike Goottan; ani ate'n kulaannexxa yaane duuchcha Gibtseke moyanjo Feri'ooni'ni kuli» hiyye.
30Yaane kinni Muuse Duuchchi Woddika Gootta, «Ani ca'a asse haaso'abe'noke manjon; hittata Feri'oon ani haaso'annoxxa laqa?» Hiyye.
Currently Selected:
Fulatika Maxaafa 6: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
