Dadatika Maxaafa 39
39
Yooseefiinna Phiixifaaraxxa Are
1Eettenne Yanna Yooseefi Gibtse'a adhdhemeemman; Feri'oonike ja'laabuwwinaa'n heqqanjuwwiink ajajalli Gibtse bogik manji Pheexxifaara ookko isoo iyyemarte'emmaxxee Isima'elitotenaa'n Yooseefi'i hidhdhe. 2Duuchchi Woddik Gootti Yooseefinni hedhemman; yaane duuchchinna isi'a qajeelde; isinna iso'o galchaamake Gibtseke manjike mine'n hedha'nemman.#Erga. Huj. 7:9. 3Duuchchi Woddik Gootti isinni hedheexxannaa asseexxi duuchchanna isi'a qajeldeexxa uude wodda, 4Yooseefinna iso'ni elle alfe; isike shiqike erganjonna kade; Phiixifaaranna mine ifike'ni isoo baallonse; karra duuchchanna anga isixxe'ni waale. 5Isi Yooseefii ifike mine'n baalonseexxe yannanaa'n Duuchchi Woddik Gootti Yooseefixxe hiyyeexxi okko Gibtsichchiinka mine eebbise; Duuchchi Woddike Goottixxi eebba mene gadho, Phiixifaara afeechcho duuchcha'n kadde. 6Tennexxee Phiixifaara afeechcho duuchcha'n Yooseefii baalonse; itaaxxe yaane gadhi darre duuchchinxa yaane Yooseefixxe anga'n waaleemman.
Yooseefinna dhagga danchummandinni biifa'nemmakemman. 7Ookkoneechchi uduma Yooseefike goottixxi are Yooseefi'ni ille uggiteexxi isoo, «Amo aninni diiphi» hite. 8Isi kinni gibeexxi gootta ifikixxe are'n hiyyee qici, «Ank gootti mine ifike'n hedheechcho kunni konnechcho hiyye mittelcho ege'nebaan; afeechcho duuchchanna anxe anga'n uwwe'een. 9Mine konne'n anenaa'n sa'aak ayyinna hedheba'an; isi ane'n uwwebaachchi ate'e mitte callan, tinninna isixxe are kaddettexxeeten; tenne fuggoxxa yaane assiyyoti hitta Magen edo cubbo hujanno?» Hiyye. 10Isenna tenne yaane barra barra'ninni Yooseefi'n haasota'nemman; Yooseefi kinni isenni diiphaaxxa waalni ise bira hedha eeyyebaani.
11Barratixxa barra Yooseefi hujetee mini'a e'ye; mini giddo ergatammake erganjuwwinaa'ninna ayyinna mine hedhemmabaa. 12Isenna seemma isixxa abideexxi, «Aninni diiphi» hite; isi kinni seemma ifixxa anga isixxe'n wocci asseexxi minii'n baaje fule. 13Isenna seemma ifixxa anga isexxe'n wocci assee baaje fuleexxa uuddeexxinna, 14ise'a ergatammaka erganjuwwa mini'a yexxeexxi insa'ne'n hitee qici, «Uuddineen adana kunni Ibirichchi dage'echchi no'oo gacifato'ate; isinna aninni diipho'a kaba'i qico'n dage; yaane kinni ani raare xinisiisenne. 15Ani raare xinisiisennexxa laqexxinna seemma ifixxa ani bira hune baaje minii'n fule» hite.
16Yooseefik gootti mini'a dagaa qico'ni seemma isixxa ifi biranni uggite. 17Isinna dagaa wodda kaddeemmaxxa yaane iso'n hite kuldee qici, «Ati iyyedaggettak Ibirichchi garbichchi ane'n gacifato'a hedhennebaa dage. 18Aninna manni dhaqqabaashsha raare xinnisiisannale seemma ifixxa ane'ni hune baaje gadhi'a fule» hite.
19Yooseefik goottinna are ifixxi tenne isik garbichchi isee asseexxa yaane iso'n haasottee'naa laqee wodda yo'oshsha aare, 20Yooseefik goottinna Yooseefii aadheexxi moyanji manna usuramake mine'ni iyyemare usure.
Yaane kinni Yooseefi okko usurrii mine'n hedhemma wodda, 21Duuchchi Woddik Gootti isinni welti hedhemman; ba'lunte ifixxanna isi'a birasisse; usuriinke minike ajajallo'ninna elle alfaashsha asse.#Erga. Huj. 7:9. 22Tennexxee usurriinke minik ajajalli Yooseefi'i usurememmake manni duuchchike ajajallo asse; usuriinke mini giddo hujendaaxxe huje duuchchanna isoo uudaake kade. 23Duuchchi Woddik Gootti Yooseefinni hedheemmaxxee'e asseexxa duuchcha isi'a qajeelcha'nemmaxxee usurriinke minik ajajalli Yooseefii uudda'nemmaxxe yaane duuchchixxe mitte yaadonna afe'emmabaan.
Currently Selected:
Dadatika Maxaafa 39: gdo
Highlight
Share
Compare
Copy
Want to have your highlights saved across all your devices? Sign up or sign in
The Word for the World International, The Word for the World Ethiopia
