Dadatika Maxaafa 41
41
Feri'oonixxa Oojjo
1Lame wogga uduma Feri'ooni oojjo oojjote: oojjoti isi Abbaayike galaan qarqara uurreemman. 2Dhagga ela'neek fuddalammi torbaani lali wodi'i giddii'n fuleexxi wodi'in qarqara hexxeexa anso dheda'nemman. 3Higgeenna weli dhagga eeyyisa'nebaak huqqate miqe calli gatte'eek torbaani lali wodi'i giddii'n fuleexxi edise fulemmake lali bira wodi'in qarqara uurre. 4Kunni dhagga eeyyisaabak huqqate miqe calli gatteemmak lali okkone dhagga ela'neeka furdallamma lalo liqiinse. Ookkoneechchi uduma Fari'oon diiphokenaa'n dammaqe. 5Fari'ooninna higgeen diipheexxi wele oojjo oojjote: oojjoti mitti midhatik agadi ela'neeka unkuruure'eka torbaane deeggichcho ibisaa'naa afe. 6Ookkoneechchi uduma sibirooteexxanna borotixxi diidallo gande'naa shewwewwiteexxa wele torbaane deeggichcho ibise. 7Iikki Sibiro'eek torbaani deeggichchi elaammakannaa bokkeeka ookkonee torbaane deeggichcho liqiinse; Feri'ooninna diiphokenaa'n dammaqeen, adana oojjotemman. 8Feri'ooninna bogi soodaa wodda yaadik raanke; Tennexxee Gibtseke bogi giddo oojjo tikaakeerannaa beekkole duuchcha ye'iseexxi oojjotemmaxxa oojjo insa'ne'n kule; kaddo malee eettene oojjo isi'a dande'eexxi tikeek hedhebaan.#Dan. 2:2.
9Ookkone wodda ha'wa shiqishammake mannik ajajalli Feri'ooni'i hiyyee qici, «Moyanjoo! Edo hujennexxa balleessa ta'a kassi hiyyenneni. 10Tinninna, ati mitte yanna ane'ninna atike itatike mannike ajajallo'n mufattettexxi usuremeeka manna heqqammaka mannika ajajallike mine'n no'o usursiisseettan. 11No'o lamiingi mitte hashsha'n ifi fixxa oojjo oojjontenne; no'o lamiingixxi oojjo ifi ifinxe tika afeemmaxxen. 12Ookkone wodda usurriinke minike heqqanjuwwike ajajallik erganji mitti Ibirichchi dargaggeessi no'onni welt usuremeemman; no'o ifi ifi'a oojjontennexxa oojjo iso'n kullenne wodda isinna no'oxxe oojjuwwaxxa tika no'o'ni kule; no'o lamiingixxe oojjo oojjoshshanni tika no'o'a uwwe. 13Yaane duuchcha isi no'o'a oojjo tikemmashshanni kadde; anee edixxe anxe hujebaa higenne; ita shiqishammake mannik ajajalinna fanniseme» hiyye.
14Tennexxe Feri'ooni'a Yooseefii usurriinke minenaa'n dagaashsha ajaje; hirba ookkone'ni Yooseefii usurri minenaa'n aa'ne dange; umo ifikanna haaxxeexxi seemma jijjiidhdheechchi uduma Feri'oon edo dage. 15Feri'ooninna Yooseefi'n, «Ani oojjo oojjotennen; isee ani'a tika dande'aaka mitte manjonna gophenne; ati kinni oojjo ate'n kulendoole ise tika dandeettattoxxa laqeennen» hiyye.
16«Yooseefinna Feri'ooni'n ani oojjo tikatixxa ege'na afebo'non; yaane kinni Mageni Feri'ooni hasaaxxa tika uwwaan» hiyye.
17Feri'ooninna «Oojjot ani Abbaayike galaani qarqara uurreennan; 18Dhagga ela'neekinna furdallammi torbaani lali wodi'i giddii'n fuleexxi anso dheedaa'naa afenne. 19Ookkonneer uduma huqqatee miqe ce'e hite gattaa qico'ni haphphateek weli torbaani lali wodi'i giddii'ni fule; konne lalishsha hedheeka elobaak lalo Gibtseke boga duuchcha'n haranga uude ege'nebe'non. 20Kunni dhagga ela'nebaaki huqqate miqe calli gatte'ek lali edise fulemmaka torbaane furdallamma lalo liqiinse. 21Iikki lali okkone lalo liqinseechchi udumanna dhagga edi woddishshanni eeyyisa'nemmabaake, liqinse'exxanna ege'nisha'nemmabaan; ookkoneechchi uduma aninna diiphokenaa'n dammaqenne. 22Iittanni oojjoti mitti midhatik agadi torbaane ela'neekannaa sibeeka deeggichcho ibisee'naa afenne. 23Ookkoneechchi uduma borotixxi diidallo gande'naa sibiro'eexxi shewwewwe'eka wele torbaane deeggichcho ibise. 24Torbaani shewwewweemak deeggichchuwwi torbbaane ela'nemmaka deeggichchuwwa liqiinse; tennee oojjo tikammake manna'n kulenne, yaane kinni mittikinna isee ani'a dande'e tikeek hedhebaan.»
25Yooseefinna Feri'ooni'i hiyyee qici, «Lamiinxi atixxi oojjo weli labbaxxennaa mitteten. Mageni edi'a asso'a hedheexxa yaane ediseenni ate'n kule'en. 26Torbaani elollammi lali, torbaane woggan; torbaan elollammi deeggichchuwwinna torbaane woggan; lamiinxi oojjo weli labbaxxenna mitteten. 27Konneer uduma fuleek huqqate miqe calla gatte'emakiirinna eeyyisa'nemmabaak torbaani lali torbaane woggan; iitanni borotixxi diidallo ganda'nemmakinna shewweweemmak torbaani deeggichchuwwinna torbaane woggan: tinni torbaane solo'iinxe woggan. 28Edisennexxi ate'ni kulenneshshanni Mageni edi'a asso'a hedheexxa yaane edisen ate'n leellishe'een. 29Gibtseke boga'n hara bira sa'eek goddi kadaaxxi torbaane wogga daggaan. 30Ookkoneechchi uduma kinni torbaane solo'iinxi wogga daggaan; Gibtseke boga'n hedhemmak goddinna dedhemaan; solo'ikinna boga miidhaan. 31Eettenne goddiinxe wogguwwa uduma dagaak solo'i hara ha'ureeke kaddeemmaxxee'e okkone boga'n kadeemmak goddi qaabbatemmabaan. 32Oojjo lamele oojjota atixxi, tenne yaane Mageni mureexxe kaddeemmaxxee Mageni shiqoxxe yanna'n ise'e muuxaan.
33«Tennexxe yoona qalbeefachchonna beekkuma afeeka manjo hassettexxi konne Gibtseke boga'n isoo baalonsi. 34Iittanni eettene torbaane goddiinxe wogga'n aaggaaxxi midha, ondixxenaa'n mitte anga bukki assaaka manna baalonsi. 35Insa'nenna dagga'neexxe goddiinxe woggaxxa midha duuchchinaa'n bukki assinnowwaal dinnetanna Feri'oonixxe alcha hundanna aasinowwaal; itate kaddaashshanna qachcha qachcha'ni heqqinowwaal. 36Tinni bukki assenda'neexxi midha Gibtseke boga'ni edi'a daggaaxxe torbaane solo'iinxe wogga'a ukatake kaddaan; konne qicininna bogi solo'ik ba'abaan.»
37Kunni herregi Feri'ooninna isik ja'laabuwwa'n eloke labe leelle. 38Feri'ooninna «Mageniink Hafuur iso'ni galeeka Yoosefi caalaaka manjo hara alfinabo'non» Hiyye. 39Feri'ooninna Yooseefii'i hiyyee qici, «Tinni duuchcha ate'ni ifiseek Magenoken; atishsha hedheek beekinna qalbeefachcho afeeki manji hedhebaan. 40Ati anke mootomatike mine'ni umoke kaddatton; anki ardi duuchchinna ati hitattoxxe'n galaan; ani atenaa'n sa'annok anxe moote callinniten.»#Erga. Huj. 7:10.
Yoosefi Gibtseke Boga'n Baallome
41Ookkoneechchi uduma Feri'ooni Yooseefii, «Gibtseka boga duuchcha'ni ate baallonsenne» hiyye. 42Feri'ooninna ifike baallomika beesisa affeexxa qube qubichcho ifikenaa'n fulcheexxi Yooseefike qubichcho'n ugge; iittanni layinotike shimalixxa seemmanna iso'n oddeesse; gooba isike'ninna worqetika haachchaba oddeesse.#Dan. 5:29. 43Ifixxe langaxxe fadhadiinxe gaare'ni ofo'lishe; mannikinna isi edo, «Kumbullisse» hiyya'n lallaba'nemman; konnee qicinni Gibtseke boga duuchcha'ni isoo baallonse. 44Feri'ooninna Yooseefi'i, «Ani Feri'ooniten, atike ajaji belo Gibtseke boga duuchcha'n ayyinna mittechcho assa dande'abaan» hiyye. 45Feri'ooni Yooseefii'i «Tsafinat Pa'inah»#41:45: Tsafinat Pe'inah: Gibtsike laagadinni Tsafinat Pa'inah hiyya magen haaso'ee'naa isi hedhaan hiyyaten. hiyye summa isi'a fulche. Iittanni Heliyootuke#41:45 laakkossa 50 giddo hedheeka mitteba abideexxi Holiyopoolii'i leellishaan. qachchike qeesichchixxa, Pheexxifaaraxxa belto Asinati hinaaxxa isi'a aadhise. Yooseefinna Gibtseke bogi giddo duuchcha mareme.
46Yooseefi Gibtseka moyanjo Feri'ooni'a ergatema safee wodda wogga isixxi sase tommemman; Yooseefinna Feri'oon edii'n fuleexxi Gibtseke bogi giddo duuchcha mareme 47Torbaaniinxe goddiinxe wogga'n buttin hara bira saxxeexxa midha uwwe. 48Yooseefi tenne torbaane goddiinxe wogga giddo Gibtseke boga'n afendeexxa midha bukki asseexxi qachcha qachcha'n tuule; mitte mittenge qachcha'n tuulendeemmaxxi midha okkone qachchike loola'n wiisendeexxemman. 49Yooseefinna abbaayatike maanchishsha hara bira saxxeexxa midha tuule; midha hara bira saxxeexxe kaddemmaxxee ise borreessa uurrisaa qico'ni ise mika dandeessisse'emmabaan.
50Torbaane solo'iinxi wogga daggeba edi darre Heliyootu hiyyemaake qachchike qeesichchixxi, Pheexxifaaraxxi belto Asinati'i Yooseefi'a lame labbaxxa oose ilde. 51Yooseefiinna, «Mageni rakko anxanna hado anka dedhannoshsha asseen» hiyya'n ifika angafa belto summaa Minaase#41:51: Minaase: Ibrititotike laagadinni Minaase hiyya dedhannoshsha asse'een hiyyaten hiyye fulche. 52Iittanni, «Rakkateennange boga'ni Mageni anee gummatike asse» hiyya'ni ifike langake beltika summa Efireemi#41:52: Eefireemi Hiyya Ibritotike laagadinni Caala gummatike Hitaaxxa tika afe'eeke hiyyichchinn welti fakkataake ye'injo afeedheen. hiyye.
53Gibtseke bogixxi torbaane goddiinxi wogga saxxeenaa, 54Yooseefi edi wodda haaso'emmashshanni torbaane woggaki solo'i safe. Weli duuchchiingi boguwwi solo'wee wodda Gibtseke boga duuchcha'n kinni midha hexxemman.#Erga. Huj. 7:11. 55Solo'ikinna Gibtseke boga'n ba'lata'n me'ee wodda ardi «Indannochcho no'o'a uwwi!» Hiyya'n Feri'ooni'n cance. Feri'ooninna Gibtseka arda duuchcha «Yooseefiba martineexxi isi hiyyaaxxa asse» hiyye.#Yoh. 2:5. 56Solo'i Gibtseke boga duuchcha'n geyeemmaxxenna jabaateemmaxxee'e Yooseefi gootaruwwa baneexxi midha Gibtseke manna'n gurgurendaashsha asse. 57Solo'i butta duuchcha'n jabaatemmaxxee'e bogi duuchchik manni Yooseefiinaa'n midha hidhdhatee Gibtse'a dage.
Currently Selected:
Dadatika Maxaafa 41: gdo
Highlight
Share
Compare
Copy
Want to have your highlights saved across all your devices? Sign up or sign in
The Word for the World International, The Word for the World Ethiopia
